Pissuserineqartussat ajoqersuganngortitsinissamut iluaqutigisinnaasatit ineriartortikkit
„Aallaritsi inunnillu inuiannit tamaneersunik ajoqersuganngortitsigitsi.“ — MATTHÆUSI 28:19, NV.
1. Piginnaasat suut isiginnittaaserlu suna itsaq Guutip kiffaasa ilaasa ineriartortittariaqarsimavaat?
JEHOVAMUT kiffaasut taassuma piumasaatut iliorsinnaajumallutik ilaannikkut piginnaasanik aalajangersimasunik isiginnittaatsimillu aalajangersimasumik ineriartortitsisariaqartarput. Assersuutigalugu Aaperaap Sarallu Guutip peqqusineratigut illoqarfik pigissaarfiusoq Ur qimappaat, piffissallu ingerlanerani pissuserineqartussat piginnaasallu tuperni nomadetut najugaqarnissamut pisariaqartitatik ineriartortittariaqarpaat. (Hebræerit 11:8, 9, 15) Josva nunamut neriorsuutigisamut Israelikkunnik siulersuisinnaajumalluni sapiitsuusariaqarlunilu Jehovamik tatiginnittariaqarlunilu taassuma inatsisaanik ilisimasaqartariaqarpoq. (Josva 1:7-9) Aamma Besal’elip Oholiabillu sunilluunniit piginnaaneqarsimagaluarunik qularnanngilaq Guutip anersaava iluaqutigisimassagaat iluatsilluartumik tupermik naapeqatigiittarfiliornissaminnut, sanaartornermik nakkutilliinissaminnut assingusunillu suliaqarnissaminnut. — 2 Mosesi 31:1-11.
2. Ajoqersuganngortitsiortornermut tunngatillugu apeqqutit suut sammissavavut?
2 Ukiut hundredet arlallit tamatuma kingorna Jiisusi Kristusip ajoqersukkani matuminnga suliassippai: „Aallaritsi inunnillu inuiannit tamaneersunik ajoqersuganngortitsigitsi . . . ajoqersorlugillu ilissinnut peqqussutikka tamaasa maleruaqqullugit.“ (Matthæusi 28:19, 20, NV) Immikkut pisinnaatitaaffimmik tamatumunnga assingusumik siornatigut tunniussisoqarsimanngisaannarpoq. Ajoqersuganngortitsissagaanni pissuserineqartariaqartut suuppat? Qanoq ililluta ineriartortissinnaavavut?
Ersersiguk Guutimik asanningaarlutit
3. Ajoqersuganngortitsinissamik peqqussut pissutigalugu sunik periarfissaqalerpugut?
3 Inuit saaffigisinnaassagutsigit Guutimillu ilumoortumik pallorfiginninnissaannut ikiorsinnaassagutsigit Jehovamik asanningaarnissarput pisariaqarpoq. Israelikkut Guutimik asanninnertik ersersissinnaavaat taassuma peqqussutaanut uummatikkut iluunngarlutik naalannermikkut, taassuma akuerisinnaasaanik pilliuteqarnermikkut aamma taassuminnga unnersiutiginnillutik erinarsornermikkut. (5 Mosesi 10:12, 13; 30:19, 20; Tussiaat 21:14; 96:1, 2; 138:5) Kristumiuugatta taamatuttaaq Guutip inatsisai maleruartarpavut, Jehovamulli asanninnerput aamma ersertarpoq allat taanna taassumalu siunertai pillugit oqaluttuukkaangatsigit. Qularnata oqaluttariaqarpugut Guutillu uagutsinnut neriuutissiissutaanik qujamasuutiginninnerput ilumoorluta ersersissinnaajumallugu oqaatsinik eqqortunik toqqaasariaqarluta. — 1 Thessalonikamiut 1:5; 1 Petrusi 3:15.
4. Sooq Jiisusip Jehova pillugu ilinniartitsinini nuannaarutigaa?
4 Jiisusip Jehovamik iluunngarluni asannikkami Guutip siunertaa, Guutip naalagaaffia pallorfiginninnerlu ilumoortoq oqaluuseralugit nuannaringaartarpaa. (Lukasi 8:1; Johannesi 4:23, 24, 31) Allaat ima oqarpoq: „Uanga nerisassara tassaavoq aallartitsisima piumasaa malillugu iliornissaq suliassarititaatalu naammassinissaa.“ (Johannesi 4:34) Tussiaasiortup oqaasii ukua Jiisusimut tulluupput: „Guuti, piumasat malillugu iliornissaq tassa kajungerisara; inatsisitit uanga ilunni ipput. Katersorsimasorpassuarni tusarliukkumavara suna iluartuusoq, qarlukka matusimanngilakka, tamanna nalunngilat, [Jehova].“ — Tussiaat 40:9, 10; Hebræerit 10:7-10.
5, 6. Ajoqersuganngortitsiortorsinnaajumalluni pissuseq suna pingaaruteqarnerpaava?
5 Sallusuissummik Biibilimeersumik paasinneqqammersut Guutimik asanninneq kajumississutigalugu Jehova taassumalu naalagaaffia ima qularunnaarnartigisumik oqaluuserisarpaat allat Biibilimik misissuerusulersillugit. (Johannesi 1:41) Ajoqersuganngortitsiortornermi kajumississutaanerpaasoq tassaavoq Guutimik asanninneq. Taamaattumik asanninneq taanna uummaarissuutittuartariaqarparput Guutip oqaasia aalajangersimasumik atuartarlugu tassanilu allassimasut eqqarsaatigeqqissaartarlugit. — 1 Timotheusi 4:6, 15; Saqqummersitat 2:4.
6 Qularutissaanngilaq Jiisusip Jehovamik asanninneq aallussilluarluni allanik ilinniartitsinissaminut iluaqutigisimassagaa. Guutilli naalagaaffianik sunniuteqarluartumik oqaluussissutiginnittarneranut tamannaannaq pissutaanngilaq. Pissuseq alla suna ajoqersuganngortitsinermut taama pikkoritsigineranut pissutaava?
Inunnik asannittumik isumassuigit
7, 8. Jiisusip inuit qanoq isigai?
7 Jiisusip inuit isumassorlugillu ilumoorluni soqutigai. Guutip ’suliortuatut’ inuttut inunngunngikkallaramili inuit nuannarai. (Ussatit 8:30, 31, 1900/1961) Aamma Jiisusi inuttut nunarsuarmiitilluni misiginneqatiginningaartarpoq, imminullu orniguttut nukissaqalersittarpai. (Matthæusi 11:28-30) Jiisusip Jehovap asanninnera misiginneqataaneralu ersersippai, tamannalu pissutigalugu inuit Guuti ilumoortutuaq kajungerfigaat. Inuit tamalaat Jiisusi tusarnaartarpaat taassuma asannilluni isumassormatik pissutsillu atukkatik soqutigimmagit. — Lukasi 7:36-50; 18:15-17; 19:1-10.
8 Angutip aperimmani inuuneq naassaanngitsoq kingornussariumallugu qanoq iliussanerluni, ’Jiisusip taanna isigaa asalerlugulu’. (Markusi 10:17-21) Aamma Jiisusip Betaniami ilinniartissimasai pillugit ima allassimasoqarpoq: „Jiisusip Martha qatanngutaalu arnaq Lazarusilu asavai.“ (Johannesi 11:1, 5) Jiisusi inunnik ima isumassuitigaaq ilaannikkut pisariaqartikkaluarlugu qasuersaanngiinnartarluni taakkua ilinniartissinnaajumallugit. (Markusi 6:30-34) Jiisusi inoqatiminik asannilluinnarluni taama isumassuitigigami inunnit allanit sunniuteqarluarnerusumik pallorfiginninnermut ilumoortumut kajungilersitsisinnaaneruvoq.
9. Paulusip ajoqersuganngortitsiortorneq qanoq isumaqarfigaa?
9 Aamma apustilip Paulusip oqaluussiffigisani soqutigilluinnarpai. Assersuutigalugu Thessalonikami kristumiunngorsimasut ima allaffigai: „Taamatut asallusi kissaatigisimavarput Guutip iivangkiiliuanik tuniinnarasi aammattaaq inuunerput tunniutissallugu, nuannarisarilersimagassimi.“ Paulusip asannilluni isumassuinera pissutigalugu Thessalonikamiittut ilaat ’guutipiluit tunullugit Guutimut saapput, Guuti uumasoq kiffartorfigilerumallugu’. (1 Thessalonikamiut 1:9; 2:8) Jiisusitut Paulusitullu inuit ilumoorluta isumassorutsigit, nutaarsiassap nuannersup „inuunermik naassaanngitsumik eqqortumik isumaqarfiginnittut“ uummataannut anngunneranik takunninnerup nuannersua immaqa aamma uagut misigissavarput. — Apustilit Suliaat 13:48, NV.
Imminut pilliutigeriaannaagit
10, 11. Ajoqersuganngortitsiortorniarnitsinni sooq imminut pilliutigeriaannaasariaqarpugut?
10 Ajoqersuganngortitsiornermut pikkorissut imminut pilliutigeriaannaasarput. Pisuussutinik katersuineq inuunermi pingaaruteqarnerpaatut isiginngilluinnarpaat. Jiisusip ajoqersukkani ima oqarfigai: „Guutip naalagaaffianut isernissap pisuunut ila ajornassusia!“ Ajoqersukkat tamanna tusaramikku tupaallapput, Jiisusili ima nangippoq: „Qitornakka, Guutip naalagaaffianut isernissap ila ajornassusia! Qatigattuumut meqqutip isaatigut putoqqunnissaq pisuup Guutip naalagaaffianut isernissaanit ajornannginneruvoq.“ (Markusi 10:23-25) Jiisusip ajoqersukkani siunnersorpai pilimanianngitsumik inooriaaseqaqqullugit ajoqersuganngortitsiortorneq pingaarnerpaatinniassammassuk. (Matthæusi 6:22-24, 33) Sooq imminut pilliutigeriaannaaneq ajoqersuganngortitsiortornissamut iluaqutigissavarput?
11 Jiisusip peqqussutaanik tamanik inunnik ilinniartitsissagaanni iliuuseqangaatsiartariaqarpoq. Kristumiu ajoqersuganngortitserusuttoq amerlanertigut sapaatit-akunneri tamaasa soqutiginnittumik Biibilimik atuaqqissaaqateqarniarsarisarpoq. Oqaluussisartut ilaat ulloq naallugu suliffiminnit soraarlutik ullup ilaannaa sulilertarput inunnik eqqortuliorusuttunik nanisinissaminnut periarfissaqarnerulerumallutik. Tusindillit allamiut oqaasiinik ilinniarsimapput najugaqarfimminni naggueqatigiit aalajangersimasut oqaluussiffigisinnaajumallugit. Oqaluussisartut allat sumiiffimmut allamut nunamulluunniit allamut nuussimapput katersuinermi peqataanerujumallutik. (Matthæusi 9:37, 38) Tamakkuninnga tamanik iliuuseqassagaanni imminut pilliutigeriaannaasariaqarpoq. Sunniuteqarluartumilli ajoqersuganngortitsiortorsinnaajumalluni suli allat pisariaqarput.
Piffissaq asiutinnagu erinitsajuitsuugit
12, 13. Ajoqersuganngortitsiortornermi erinitsajuitsuunissaq sooq taama pingaaruteqartigaa?
12 Erinitsajuitsuuneq pissusiuvoq suli alla ajoqersuganngortitsiortornermut iluaqutigisarput. Kristumiutut tusarliussatsinnik ingerlatitseqqissagaanni iliuuseqapallannissaq pisariaqartarpoq, ajoqersuganngortitsiortornerli amerlanertigut piffissartornartarpoq, erinitsajuitsuusariaqartarpugullu. (1 Korinthimiut 7:29) Jiisusip affarmik qatanngutini Jaaku erinitsajuiffigiunnaanngilaa. Jaaku Jiisusip oqaluussinera pillugu ilisimasaqarluarunaraluarluni piffissap ilaani arlaannik pissuteqarluni ajoqersuganngornissaminut tunuarsimaarpoq. (Johannesi 7:5) Ukiumili 33-mi Kristusip toqunerata piinsillu ulluata akornanni Jaaku ajoqersuganngorsimannguatsiarpoq, Biibilimimi oqaatigimisaarneqarpoq anaanani, qatanngutini apustilillu qinoqatigiartorai. (Apustilit Suliaat 1:13, 14) Jaaku anersaakkut siumukarluarpoq kingusinnerusukkullu ilagiinni kristumiuni akisussaafferujussuaqalerluni. — Apustilit Suliaat 15:13; 1 Korinthimiut 15:7.
13 Naasorissaasut pisarnerattut oqaluussisartut kristumiut amerlanertigut kigaatsumik ineriartortartunik naatitsisarput — tassa Guutip oqaasianik paasinninnermik, Jehovamik asanninnermik Kristusillu anersaavanut assingusumik anersaaqarnermik ineriartortitsisarput. Matumani erinitsajuitsuunissaq pisariaqarpoq. Jaaku ima allappoq: „Qatanngutit, erinitsannaveersaarlusi Naalakkap tikiunnissaa utaqqisiuk. Eqqaamaniarsiuk naasorissaasup erinitsajuilluni nunap inerititassai pingaaqisut utaqqisariaqartarai ukiakkut upernaakkullu siallerfigineqareerserlugit. Aamma ilissi erinitsannaveersaassaasi uummatisilu nakuussuseqalersillugit, Naalakkap tikiunnissaa qanillimmat.“ (Jaaku 5:7, 8) Jaakup uppeqatini kajumissaarpai ’erinitsannaveersaarlutik Naalakkap tikiunnissaa utaqqeqqullugu’. Ajoqersukkat arlaannik paasinngisaqaraangata Jiisusip erinitsajuilluni nassuiaattarpai assersuutilluunniit atorlugit erseqqissaasarluni. (Matthæusi 13:10-23; Lukasi 19:11; 21:7; Apustilit Suliaat 1:6-8) Aamma maanna Naalakkap najuunnerani ajoqersuganngortitsiortorniarnitsinni erinitsajuitsuusariaqarpugut. Ullutsinni Jiisusimut ajoqersuganngortut erinitsajuilluta ilinniartitsinissarput pisariaqartippaat. — Johannesi 14:9.
14. Uagut oqaluussisartutut qanoq ililluta erinitsajuiitigaluta piffissaq isumatusaarluta atorsinnaavarput?
14 Erinitsajuikkaluartugut Biibilimik atuaqqissaaqatigilikkatta amerlanersaat inerititaqarneq ajorput. (Matthæusi 13:18-23) Taamaattumik taakkua ikiorniarlugit naleqquttumik iliuuseqareerutta, silatusaassaagut piffissarput taakkununnga atorunnaarutsigu inunnillu sallusuissummik Biibilimeersumik pingaartitsinerusunik ujarlerluta. (Oqaluussisartup oqaasii 3:1, 6) Soorunami sallusuissummik pingaartitsigaluartulluunniit isiginnittaatsiminnik, isummaminnik inuunerminnilu pingaartitaminnik allannguinissamut ikiorneqangaatsiarnissartik pisariaqartissinnaavaat. Taamaattumik erinitsajuippugut, soorluttaaq Jiisusip ajoqersukkani isiginnittaatsimik eqqortumik ineriartortitsinissaq sapernartikkaangassuk erinitsajuiffigisarai. — Markusi 9:33-37; 10:35-45.
Ilinniartitsillaqqissuuneq ilinniaruk
15, 16. Sooq paasiuminartuliorneq piareersarluarsimanerlu ajoqersuganngortitsiortornermi pingaaruteqarpat?
15 Ajoqersuganngortitsiortornermut pikkorissunngornissamut Guutimik asanninneq, allanik isumassuineq, imminut pilliutigeriaannaaneq erinitsajuinnerlu pingaaruteqartupilussuupput. Aammattaarli ilinniartitsillaqqissunngortariaqarpugut, tamannami paasiuminartumik sallusuissummik nassuiaasinnaalissutigissavarput. Ajoqersuisorsuup, Jiisusi Kristusip, oqaaserisaasa ilarpassui paasiuminaqigamik immikkut sunniuteqarluarput. Oqaasiisa ukua ilaat eqqaamajunnarsivatit: „Qilammi katersigitsi erlinnartuutinik.“ „Illernartoq qimminut tunniuteqinasiuk.“ „Ilisimassuseq eqqortuutitaavoq suliamigut.“ „Kaasari tunisiuk kaasarip piinik Guutilu Guutip piinik.“ (Matthæusi 6:20; 7:6; 11:19; 22:21) Soorunami Jiisusip oqaaserisartagai naatsukullaannaaneq ajorput. Paasiuminartumik ilinniartitsisarpoq naleqqukkaangallu nassuiaasarluni. Jiisusip ilinniartitseriaasia qanoq ilillutit ilaarsinnaaviuk?
16 Peqqissaarluni piareersarneq paasiuminartumik ilinniartitsisinnaanissamut pingaaruteqarluinnarpoq. Oqaluussisartoq piareersarsimanngitsoq oqaluppallaaqqajaasarpoq. Sammisami pingaarnersaasut oqaaserpassuarminit ipitittarpaalusooq sammisartillu pillugu ilisimasani tamaviisa oqaluttuarisarlugit. Oqaluussisartulli piareersarluarsimasup ilinniartitani eqqarsaatigisarpaa, sammisassartik eqqarsaatigeqqissaareersimasarpaa taavalu pisariaqartinneqartorpiaat paasiuminartumik nassuiartarlugit. (Ussatit 15:28; 1 Korinthimiut 2:1, 2) Ilinniartup qanoq ilisimasaqareertiginera aamma atuaqatigiinnerminni suut erseqqissarneqarnissaat pingaaruteqarnersut eqqarsaatigisarpaa. Oqaluussisartoq immaqa sammisartik pillugu annikitsualunnik soqutiginartunik ilisimasaqarpoq, ilinniartitsinerli paasiuminassappat paasissutissat pisariaqanngitsut tamarmik pinngitsoortariaqarput.
17. Qanoq ililluta Allakkat atorlugit inuit eqqarsalersinniarlugit oqaloqatigisinnaavavut?
17 Jiisusip aamma inuit paasissutissanik tunioraannarnagit eqqarsalersinniarlugit oqaloqatigisarpai. Assersuutigalugu ilaanni ima aperivoq: „Siimuut, qanoq isumaqarpit? Nunarsuarmi kunngit ilanngaatinik akileraarutinillu kikkunnit pisarpat? Innuttaminnit allamiunilluunniit?“ (Matthæusi 17:25) Immaqa sallusuissutinik Biibilimeersunik nassuiaanissaq ima nuannaritigaarput imminut noqittariaqarluta, ilinniartoq eqqarsaatiminik oqaatiginninnissaanut periarfissaqarniassammat imaluunnit Biibilimik atuaqqissaarnermi sammisavut qanoq paasisimanerlugit nassuiaaniassammat. Soorunami inuit apersorpallaassanngilavut. Periaaserillutali, assersuutit pitsaasut atorlugit eqqarsaatigilluakkanillu apeqquteqartarnitsigut tunngavilersuutinik Biibilimiittunik atuagaatitsinniittunik atuagassiaatitsinniittunillu paasinninnissaannut ikiorsinnaavavut.
18. Ilinniartitsillaqqissuuneq qanoq paasisariaqarpa?
18 Ilinniartitsinerup pingaaruteqassusia Biibilimi eqqartorneqartupilussuuvoq. (2 Timotheusi 4:2; Titusi 1:9) Ilinniartitsillaqqissuunerli tassaaginnanngilaq alanngaarinissamik ilinniartitsineq. Biibilimik atuaqqissaaqatigisartagarput ilumoortup ilumuunngitsullu, ajunngitsup ajortullu, silatusaarnerup sianiitsuliornerullu assigiinngissutaannik paasinninnissaanut ikiorniarsarissavarput. Taamaaliorutta Jehovamillu asanninneq taassuma uummataani sorlanitsinniarlugu ilungersorutta, sooq Jehovamut naalattariaqarneranik immaqa paasitissinnaassavarput.
Ajoqersuganngortitsiortornermi eqiasuitsuugit
19. Kristumiut tamarmik qanoq ilillutik ajoqersuganngortitsiortoqataappat?
19 Ilagiit kristumiut peqatigiissortaapput ajoqersuganngortitsiortornermik pingaartitsiffiungaartut. Ajoqersuganngortoqaraangat taassuminnga nanisisuinnaanngitsoq aamma Biibilimi ajoqersuutigineqartunik taassuminnga ilinniartitsisuinnaanngitsoq nuannaarnissaminut pissutissaqarpoq. Ujaasisoqatigiit meeqqamik tammarsimasumik ujaasiartortinneqaraangata, immaqa ataasiinnaap meeraq nanisarpaa. Meeqqalli angajoqqaani najuleqqikkaangagit soorunami ujaaseqataasut tamarmik nuannaartarput. (Lukasi 15:6, 7) Aamma ajoqersuganngortitsiortorneq suliaavoq ataatsimoorussaq. Kristumiut tamarmik Jiisusimut ajoqersuganngorsinnaasunik ujaaseqataasarput. Soqutiginnilerlaarlu naalagaaffilersaarfimmi ataatsimiinnernut najuuttaleraangat najuuttut tamarmik taassuma pallorfiginninnermik ilumoortumik pingaartitsineranik ineriartortitseqataasarput. (1 Korinthimiut 14:24, 25) Taamaattumik kristumiut tamarmik ukiut tamaasa hundrede-tusindinik ajoqersuganngortoqartarnera nuannaarutigisinnaavaat.
20. Sallusuissut Biibilimeersoq pillugu allanik ilinniartitserusukkuit suut iliuuserissavigit?
20 Kristumiorpassuit aalajaatsut Jehova pallorfiginninnerlu ilumoortoq pillugit ilinniartitsinissartik nuannaarutigissavaat. Sapinngisartilli tamaat iliuuseqaraluarlutik immaqa suli ilinniartitaqalinngillat. Pissutsit illit atukkatit taamaappata, taava Jehovamik asanninnerit nakussatsittuaruk, inunnik isumassuigit, imminut pilliutigeriaannaagit, erinitsajuigit, ilinniartitsillaqqinnerulerniarlutillu sapinngisannik iliuuseqarit. Pingaarnerpaamik Jehova qinnuigiuk sallusuissut pillugu ilinniartitsinissamik kissaateqarnerit pilluaqqoqqullugu. (Oqaluussisartup oqaasii 11:1) Jehovamut kiffartornermi iliuuserisavit tamarmik ajoqersuganngortitsiortornermik siuarsaanerat aamma ajoqersuganngortitsiortornerup Guutimik ataqqinartitsinera nuannarutigikkit.
Uku nassuiarsinnaavigit?
• Sooq ajoqersuganngortitsiortorneq Guutimik asanninnitsinnut misilinneqaataava?
• Ajoqersuganngortitsiortussagaanni suut pissuserineqartariaqarpat?
• Ilinniartitsillaqqissuuneq qanoq paasisariaqarpa?
[Qupp. 24-mi assiliartaq]
Sooq oqaluussisartut ajoqersuganngortitsiortorusuttut allanik soqutiginnittariaqarpat?
[Qupp. 25-mi assiliartaq]
Ajoqersuganngortitsiortorsinnaajumalluni ilaatigut suut pissuserineqartariaqarpat?
[Qupp. 26-mi assiliartaq]
Kristumiut tamarmik ajoqersuganngortitsiortornerup kinguneqarluarnera nuannaarutigaat