„Eqqortumik isumaqarfiginnittut“ tusarliussaq ajunngitsumik periarfigisarpaat
„Inuunermik naassaanngitsumik eqqortumik isumaqarfiginnittut tamarmik uppertunngorput.“ — APUSTILIT SULIAAT 13:48, NV.
1, 2. Ukiuni hundredelinni siullerni kristumiut Jiisusip Guutip naalagaaffianik nutaarsiassap nuannersup silarsuarmi tamarmi oqaluussissutigineqarumaarneranik siulittuutaanut qanoq periarpat?
BIIBILIP atuagartaasa ilaat Apustilit Suliaat kristumiut siulliit Jiisusip Guutip naalagaaffianik nutaarsiassap nuannersup silarsuarmi tamarmi oqaluussissutigineqarumaarneranik siulittuutaanut qanoq periarsimanerannik oqaluttuanik pissanganartunik imaqarput. (Matthæusi 24:14) Oqaluussisartut aallussilluartut imminnik malinnittussanik aqqutissiuippullusooq. Jiisusip ajoqersugaasa aallussilluarlutik Jerusalemimi oqaluussinerata kingunerisaanik inuit tusindillit, ilaatigut „palasit amerlaqisut“, ukiuni hundredelinni siullerni ilagiinnut ilanngupput. — Apustilit Suliaat 2:41; 4:4; 6:7.
2 Ajoqersuiartortitat inuit suli amerlanerusut kristumiussutsimik ilassinninnissaannut ikiorpaat. Assersuutigalugu Filipi Samariamukarpoq, tassanilu inuppassuit taassuma oqaasii soqutigeqalugit malinnaaffigaat. (Apustilit Suliaat 8:5-8) Paulusi assigiinngitsunik angalaqateqarluni angalangaatsiarpoq kristumiullu tusarliussaat Cypernimi, Asiaaqqap ilaani, Makedoniami, Grækenlandimi Italiamilu oqaluussissutigalugu. Illoqarfinni oqaluussiffigisaani juuterpassuit grækererpassuillu uppertunngorput. (Apustilit Suliaat 14:1; 16:5; 17:4) Titusi Kretami kiffartorpoq. (Titusi 1:5) Petrusillu Babylonimi oqaluussineq ulapputigaa. Allakkani siulleq, ukiup 62-64-ip missaani, allammagu kristumiut sulinerat Pontusimi, Galatiami, Kappadokiami, Asiami Bityniamilu ilisimaneqarluarpoq. (1 Petrusi 1:1; 5:13) Taamanikkut pissanganarsimassaqaaq! Ukiuni hundredelinni siullerni kristumiut oqaluussinermi aallussilluangaarmata taakkununnga akeraasut taakku ’silarsuarmi tamarmi pikitsitsinerarpaat’. — Apustilit Suliaat 17:6; 28:22.
3. Ullumikkut Guutip naalagaaffianik oqaluussissutiginnittartut oqaluussinerminni sunik angusaqarpat, tamakkualu pillugit illit qanoq misigivit?
3 Aammattaaq nalitsinni ilagiit kristumiut maluginiarnartumik amerliartorneq pilluaqquneqaatigaat. Jehovap Nalunaajaasuisa ukiumut nalunaarusiaat atuaraangakku silarsuarlu tamakkerlugu angusarisimasaat takugaangakkit qiimmaallaatigisarpigit? Guutip naalagaaffianik oqaluussissutiginnittut ukiumi kiffartorfiusumi 2007-imi 6 millioninit amerlanerusunik Biibilimik atuaqqissaaqateqarsimanerat paasillugu nuannaajallapputit, ilaa? Aammattaaq siorna eqqaaniaalluni nalliuttorsiornermi najuuttut amerlassusianni erserpoq Jehovamut nalunaajaasuunngitsut 10 millionit missaanniittut nutaarsiassaq nuannersoq ima soqutigitigigaat ullormi eqqaaniaaffimmi pingaarutilimmi tamatumani najuullutik. Tamatumani paasinarpoq suli suliassaqaqisoq.
4. Kikkut Guutip naalagaaffia pillugu tusarliussaq ajunngitsumik periarfigisarpaat?
4 Soorlu ukiuni hundredelinni siullerni taamaassimasoq, ullumikkut „inuunermik naassaanngitsumik eqqortumik isumaqarfiginnittut tamarmik“ sallusuissut pillugu tusarliussaq ajunngitsumik periarfigisarpaat. (Apustilit Suliaat 13:48, NV) Jehovap inuit taamaattut peqatigiissortaminut kajungilersittarpai. (Atuaruk Haggaji 2:7). Katersuinermi tamatumani tamakkiisumik peqataajumalluta qanoq isiginnittaaseqartuartariaqarpugut?
Kinaassusersiornak oqaluussigit
5. Inuit qanoq ittut Jehovap iluarai?
5 Ukiuni hundredelinni siullerni kristumiut paasivaat „Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq“. (Apustilit Suliaat 10:34, 35) Inuup Jehovamut attaveqarluarneranut attaveqarluannginneranulluunniit aalajangiisuusoq tassaavoq taassuma Jiisusip utertitsissutitut pilliutaanik upperinninnera. (Johannesi 3:16, 36) Aamma Jehovap piumasaraa „inuit tamalaat annaanneqassasut sallusuissummillu eqqorluartumik ilisimasaqalissasut“. — 1 Timotheusi 2:3, 4, NV.
6. Guutip naalagaaffianik oqaluussissutiginnittut qanoq iliornaveersaartariaqarpat, aamma sooq?
6 Nutaarsiassamik nuannersumik oqaluussissutiginnittartut inuit naggueqatigiissusiat, innuttaaqatigiinni inissisimaffiat, isikkuat, upperisarsiornikkut tunuliaqutaat qallikkullu ittut allat tunngavigalugit eqqartuuttarpatigit tamanna kukkunerussaaq. Sallusuissut Biibilimeersoq pillugu ilinnut oqaluttuaqqaartup nakerisarsiunnginnera qujamasuutigaat, ilaa? Taava sooq illit ilinnut tusarnaarusuttut kikkulluunniit tusarliussamik taassuma inuuneranik annaassissutaasinnaasumik oqaluttuunnissaat tunuarsimaarfigissaviuk? — Atuaruk Matthæusi 7:12.
7. Sooq oqaluussiffigisatsinnik eqqartuussinaveersaartariaqarpugut?
7 Jehovap Jiisusi eqqartuussisunngortippaa, taamaammallu uagut kikkunnilluunniit eqqartuussisinnaatitaanngilagut. Tamanna naleqqulluarpoq, tassami uagut ’isitta isigisaat kisiisa najoqqutaralugit’ imaluunniit ’siutitta tusagaat kisiisa malillugit’ eqqartuussisinnaavugut, Jiisusilli uummatip eqqarsaatai pissutiginiagaalu ilorlerpaat nalunngilai. — Esaja 11:1-5; 2 Timotheusi 4:1.
8, 9. (a) Saulusi kristumiunngunnginnermini inuttut qanoq ittuua? (b) Apustilimik Paulusimik oqaluttuaq sumik ilinniarfigisinnaavarput?
8 Inuit assigiinngilluinnartunik tunuliaqutallit Jehovamut kiffanngorsimapput. Saulusi Tarsusimiu, kingusinnerusukkut Paulusitut ilisarisimaneqalersoq, tamatumunnga assersuutissaavoq maluginiarnartoq. Saulusi, farisiiariusoq, kristumiunik peqqarniitsumik akerlilersuisuuvoq. Taakkua tammarsimanerannik qularutiginninngilluinnarnini ilagiinnik kristumiunik malersuilissutigaa. (Galatiamiut 1:13) Inuit isiginnittaasiat naapertorlugu Saulusip qaqugumulluunniit kristumiunngornissaa ilimananngilluinnarpasippoq. Jiisusilli taassuma uummataani ajunngitsoqarnera takusinnaavaa suliassillugulu immikkut ittumik. Tamatuma kingunerisaanik Saulusi ukiuni hundredelinni siullerni ilagiinnut kristumiunut ilaasortaasut suliniuteqarnerpaat aallussilluarnerpaallu ilagilerpaat.
9 Apustilimik Paulusimik oqaluttuaq sumik ilinniarfigisinnaavarput? Immaqa angalaarfigisartakkatsinni inuppaaloqarpoq tusarliussatsinnut akeqqersimaarpasittunik. Taakkua ilaasa kristumiunngornissaat ilumoortut qularutigigaluarlutigu eqqarsalersinniarlugit oqaloqatigisarunnaanngisaannartariaqarpavut. Ilaannikkut ilimanannginnerpaat soqutiginnilertarput. Kikkunnut tamanut ’ajoqersuinitta ingerlatiinnarnissaa’, imaluunniit ’soraarnata’ (NV) oqaluussiuarnissarput, suliassaraarput. — Atuaruk Apustilit Suliaat 5:42.
’Soraarnani’ oqaluussineq pilluaqqussutissartaqarpoq
10. Sooq inuit qununarsinnaasut oqaluussiffiginissaat tunuarsimaarfigisariaqanngilarput? Najukkanneersunik misigisalikkersaarit.
10 Qallikkut ittut kukkusumik isummernermut pissutaasinnaapput. Ignacioa tamatumunnga assersuutissaalluarpoq. Nunami Amerikami Kujallermiittumi parnaarussivimmiitilluni Jehovap Nalunaajaasuinit Biibilimik atuaqqissaaqatigineqartalerpoq. Peqqarniitsumik pissuseqarnini pissutigalugu kikkunnit tamanit qunugineqarpoq. Taamaattumik parnaarussat parnaarussaqatiminnut nioqqutissiorlutillu nioqquteqartartut Ignacio akiliiniaasaartunut akiliisitsisartoraat. Ignacioli anersaakkut siumukariartortilluni ilikkakkanilu inuunermini maleruarnerujartortillugit peqqarniillunilu persuttaasarsimagaluarluni inussiarnersunngorpoq. Maanna akiliisitsisartutut atorneqarunnaarpoq. Ignaciop nammineq nalerisimaarutigeqaa sallusuissut Biibilimeersoq Guutillu anersaava iluaqutigalugit inuttut pissuserisaminik allannguisimanini. Aammattaaq oqaluussisartut imminik atuaqatiginninniarlutik ilungersortut nakerisarsiortuunnginnerat qujamasuutigaa.
11. Sooq pulaaqqiiuarpugut?
11 Inunnut nutaarsiassaq nuannersoq pillugu oqaloqatigeriikkatsinnut orniguteqqittuartarnitsinnut pissutaasut ilaat tassaavoq pissutsit taakkua atugaasa isumaasalu piffissap ingerlanerani allanngorsinnaanerat, amerlanertigullu taama pisoqartarpoq. Immaqa kingullermik pulaarnitta kingornagut pulaakkatta ilaat perulunnartumik nappaateqalersimavoq, suliffeerussimavoq imaluunniit ilaquttami ilaannik toqusoorsimavoq. (Atuaruk Oqaluussisartup oqaasii 9:11, 1990). Silarsuarmi pisartut pissutigalugit inuit siunissartik eqqarsaatigeqqissaalersinnaavaat. Silarsuarmi namminerlu inuunermi pisut pissutigalugit inuit siornatigut tusarliussamik soqutiginninngitsuusimasut — immaqaluunniit akerlilersuisuusimasut — ilaat ajunngitsumik periarsinnaapput. Taamaattumik periarfissat tamaasa atorlugit nutaarsiassaq nuannersoq pillugu oqaluussinissaq tunuarsimaarfigisariaqanngilarput.
12. Oqaluussiffigisavut qanoq isigisariaqarpavut, aamma sooq?
12 Inuit inunnik allanik eqqartuusseqajaasarlutillu immikkoortitereqqajaasarnerat nalinginnaagunarpoq. Jehovalli inuit tamaasa inuttut ataasiakkaatut isigisarpai. Inuit tamarmik immikkut sunik piginnaaneqarnerat maluginiartarpaa. (Atuaruk 1 Samueli 16:7). Uaguttaaq oqaluussigaangatta taamaaliorniartariaqarpugut. Inuppassuit misigisimasaannit erserpoq oqaluussiffigisanut tamanut isumalluarfiginninneq kinguneqarluartartoq.
13, 14. (a) Sooq pionerip arnaq angalaarnermini naapitani soqutigivallaanngilaa? (b) Tamanna sumik ilinniarfigisinnaavarput?
13 Qatanngut arnaq pioneriusoq Sandramik atilik qeqertami Caribiamiittumi oqaluussivoq. Angalaarnermini Ruth, karnevalernermik aallussisupilussuaq, naapippaa. Ruth marloriarluni nunamini karnevalertuni dronninginngortinneqarsimavoq. Taanna Sandrap imminut oqaluttuarisaanik ilumoorluni soqutiginnippoq, taamaattumillu Biibilimik atuaqqissaaqatigineqartalerpoq. Sandra ima oqaluttuarpoq: „Ruthip inaanut iserama takusara siulleq tassaavoq karnevalertutut atisaqarluni taassuma assinga angisooq, pinnattaavilu tamarmik taassuma sanianiipput. Kukkullunga eqqarsarpunga inuk taama nuannarisaatigisoq karnevalernermillu taama aallussitigisoq sallusuissummik soqutiginnissinnaanngitsoq. Taamaattumik pulaassaarpara.“
14 Tamatuma kingunerileraa Ruth naalagaaffilersaarfimmukarpoq, ataatsimiinnerlu naammat taassuma Sandra ima aperaa: „Sooq atuaqatigiartortarunnaarpinga?“ Sandra utoqqatserpoq, isumaqatigiippullu atuaqqissaaqatigiittaleqqinniarlutik. Ruth siumukapallappoq, karnevalernermi assini peerpai, ataatsimiinnernut tamanut najuuttalerluni oqaluusseqataasalerlunilu, Jehovamullu tunniulluinnarluni. Soorunami Sandrap nassuerutigaa kukkusumik isummersimalluni.
15, 16. (a) Oqaluussisartup ilaquttami ilaannut sallusuissut pillugu oqaluttuarnera qanoq kinguneqarpa? (b) Sooq ilaquttap tunuliaqutaa taassumunnga oqaluussinissamut tunuarsimaarutigisariaqanngilarput?
15 Inuppassuit aamma ilaquttaminnut uppinngitsunut, allaat uppertunngussasorinanngitsunut, oqaluussisarnerat kinguneqarluartarsimavoq. Qatanngutip arnap kristumiup USA-miittup Joycemik atillip tamanna misigisimavaa. Taassuma ningaava inuusuttuaraallunili parnaarussaasaqattaartarsimavoq. Joyce ima oqaluttuarpoq: „Inuit oqartarput taassuma inuunera sussaanngitsoq, ikiaroornartunimmi tuniniaasarpoq, tillinniartarluni ajortunillu allarpassuarnik iliuuseqartarluni. Taamaakkaluartorli — iluaqutaanissaa ilimaginanngikkaluartoq — ukiuni 37-ni sallusuissutit Biibilimeersut pillugit oqaluussiffigiuaannarpara.“ Ningaani ikiorniarlugu erinitsajuilluni ilungersornera pilluaqquneqangaarpoq taanna Jehovap Nalunaajaasuinik atuaqqissaaqateqartalermat inuunerminillu allannguerujussuarluni. Qanittukkut Joycep ningaava 50-inik ukioqarluni Californiami ataatsimeersuarnermi kuisippoq. Joyce ima oqarpoq: „Nuannaarnermik qiavunga. Nuannaarutigeqaara oqaluussiffigissaarsimannginnakku!“
16 Immaqa ilaquttavit ilaasa sallusuissutit Biibilimiittut pillugit oqaloqatiginissaannut nangaavutit nalunnginnakku upperisaminnik pingaartitsisupilussuusut. Joycelli tamakkua akornutiginagit ningaani oqaloqatigisarpaa. Aammami inuk alla qanoq uummammioqarnersoq qanoq ililluni ilisimaneqarsinnaagami? Immaqa inuk taanna ilumoorluni sallusuissummik paasinnikkusuppoq. Taamaattumik sallusuissummik paasinninnissaanut periarfissinnissaa nangaassutigeqinagu. — Atuaruk Ussatit 3:27.
Atuagaq atuaqqissaaqatigiissutissaq sunniuteqarluartoq
17, 18. (a) Nalunaarusiani silarsuarmit tamarmeersuni atuakkap Hvad er det Bibelen virkelig lærer?-ip pingaaruteqassusia pillugu suna erserpa? (b) Atuakkamut tamatumunnga tunngatillugu nuannersunik sunik misigisaqarsimavit?
17 Nalunaarusiani silarsuarmit tamarmeersuni erserpoq inuit eqqortuliorusuttorpassuit atuagaq atuaqqissaaqatigiissutissaq Hvad er det Bibelen virkelig lærer? ajunngitsumik periarfigisaraat. USA-mi qatanngut arnaq pionereq Pennimik atilik atuagaq taanna iluaqutigalugu arlalinnik Biibilimik atuaqqissaaqatigisartagaqalerpoq. Taakkua ilaat marluk utoqqaapput naalagiartartut upperisaminnik pingaartitsisut. Pennip pissangageqaa sallusuissutit Biibilimeersut atuakkami saqqummiunneqartut taakkua qanoq periarfigissaneraat. Imali allappoq: „Paasissutissat paasiuminartumik eqqoqqissaartumillu saqqummiunneqarnerat pissutigalugu ilikkakkamik sallusuissutaanerat akueriuminartippaat, aamma akerliliinatilluunniit tamakkua isumatsassutiginngilaat.“
18 Tuluit Nunaanni oqaluussisartup Patimik atillip arnaq nunamit Asiameersumit qimaasoq atuaqqissaaqatigisalerpaa. Arnaq taanna uimi ernermilu sakkutuunit pikitsitsisunit tigusaanerata kingorna qimaasariaqalersimavoq. Taakkua takoqqinngisaannarpai, toqutaanissaminillu sioorasaarneqarpoq, illua ikuallanneqarluni inunnillu arlalinnit pinngitsaalisaalluni arneriffigineqarluni. Tamakkua tamaasa pissutigalugit misigaaq inuunissaminut pissutissaqanngilluinnarluni, imminornissanilu arlaleriarluni eqqarsaatigisarsimavaa. Biibilimilli atuaqqissaarnini neriuuteqalissutigaa. Pat ima allappoq: „Nassuiaatit assersuusiallu paasiuminartut atuakkami Hvad er det Bibelen virkelig lærer?-miittut taassumunnga assorsuaq sunniuteqarput.“ Arnaq taanna siumukapallappoq, oqaluussisartunngorluni kuisimanngitsoq, tullianillu ataatsimeersuartoqalerpat kuisikkusunnerarluni. Inuit eqqortuliorusuttut Biibilimi neriorsuutigineqartunik paasinnillutillu qujamasuutiginninnissaannut ikiorlugit ila nuanningaarami!
„Ajunngitsuliorneq qatsuteqinatigu“
19. Sooq oqaluussineq taama nukinginnartigaa?
19 Oqaluussinermut ajoqersuganngortitsiortornermullu tunngatillugu suliassiissutigineqartoq ullut tamaasa nukinginnarneruleraluttuinnarpoq. Inuit eqqortumik isumaqarfiginnittut tusindillit ukiut tamaasa oqaluussinitsinnut ajunngitsumik periartarput. ’Jehovalli ullussarsua qanillivoq’, taamaattumillu anersaakkut taartumiiginnartut ’orloqqajaallutik toqutaaffissaminnut ingerlapput’. — Sefania 1:14; Ussatit 24:11.
20. Tamatta immikkut qanoq iliornissarput aalajangiusimasariaqarparput?
20 Inunnik taamaattunik suli ikiuisinnaavugut. Ikiorsinnaassagutsigilli ukiuni hundredelinni siullerni kristumiunik ’soraarnatik ajoqersuiuaannartunik Missiarsimillu, Jiisusimik, nutaarsiassamik nuannersumik oqaluussissutiginnittuaannartunik’ ilaarsinissarput pingaaruteqarpoq. (Apustilit Suliaat 5:42, NV) Taakkua maligassiaat maliguk artornartorsioraluarlutit akerlilersorneqaraluarlutillu pinertusaarnikkut, ilinniartitseriaatsivit eqqumaffigineratigut kinaassusersiornallu kikkunnut tamanut oqaluussinikkut! „Ajunngitsuliorneq qatsuteqinatigu,“ pinertusaaruttami Guutimit akuerisaassaagut pilluaqqussutinillu naammattorsuarnik katersilluta. — 2 Timotheusi 4:2; atuaruk Galatiamiut 6:9.
[Quppernerup ataani ilanngussaq]
a Atit ilaat allanngortitaapput.
Qanoq akissavit?
• Kikkut nutaarsiassamut nuannersumut ajunngitsumik periarpat?
• Sooq oqaluussiffigisavut eqqarsaatigalugit nakerisarsiornaveersaartariaqarpugut?
• Atuagaq Hvad er det Bibelen virkelig lærer? iluaqutigalugu suut anguneqarsimappat?
[Qupp. 17-mi assiliartat]
Eqqortuliorusuttut tusindillit oqaluussinermut ajunngitsumik periarput
[Qupp. 19-mi assiliartat]
Apustilip Paulusip inuunermini allannguinera sumik ilinniarfigisinnaavarput?
[Qupp. 20-mi assiliartaq]
Nutaarsiassamik nuannersumik oqaluussissutiginnittut inunnik eqqartuussereerneq ajorput