Assuarnaattuassavit?

“Toqussara tikillugu assuarnaattuassaanga!” — JOBI 27:5, NV.

1, 2. Sanaartornermut assersuunneqartoq suna uagut ulapputigaarput, apeqqutillu suut sammissavavut?

TAKORLOORIARUK illussamik titartakkat misissoritit. Qanoq aaqqissuulluagaatiginera alutorsaatigaat. Illit ilaquttavillu illumi tassani najugaqarnissarsi nuannerunartippat. Illuli sananngikkukku, iserterfiginngikkukku aserfallatsaalinngikkukkulu titartakkat taakkuninngalu eqqarsaatiginninnerit iluaqutaangaarnavianngilaq, ilaa?

² Taamatuttaaq assuarnaassuseq pissutsitut pingaarutilittut, uagutsinnut ilaquttatsinnullu iluaqutaasussatut, isigisinnaavarput. Taamatulli eqqarsarnerinnaq iluaqutigingaarnavianngilarput pissuseq taanna ineriartortinngikkutsigu pissuseriuarniarlugulu iliuuseqanngikkutta. Ullumikkut silarsuatsinni sanaartornernut aningaasartuuterpassuaqartarpoq. (Lukasi 14:28, 29) Taamatuttaaq assuarnaassutsimik ineriartortitsineq piffissartornarlunilu ilungersunartarpoq, imminulli akilersinnaavoq. Taamaattumik apeqqutit pingasut sammeriartigit: Qanoq ililluta assuarnaatsuusinnaavugut? Qanoq ililluta kristumiutut assuarnaattuarsinnaavugut? Piffissap ilaani assuarnaakkunnaaraanni qanoq iliortoqarsinnaava?

Qanoq ililluta assuarnaatsuusinnaavugut?

3, 4. (a) Jehovap assuarnaassutsitsinnik ineriartortitsinissamut qanoq ikiortarpaatigut? (b) Jiisusip maligassiaanik malinninnikkut qanoq ililluta assuarnaassutsitsinnik ineriartortitsisinnaavugut?

³ Allaaserisap matuma siuliani eqqaavarput assuarnaatsoorusunnerluta assuarnaatsoorusunnginnerlutaluunniit nammineq aalajangersinnaanermik Jehovap immikkut pisinnaatitaaffileraatigut. Qujanartumik qanoq iliornissatsinnik nammineq paasiniaasussanngortinngilaatigut. Ilinniartippaatigut pissuseq erlinnartoq taanna qanoq ililluta ineriartortissaneripput, ineriartortitsinissatsinnullu iluaqutissatsinnik anersaaminik illernartumik tukkorluni tunisarpaatigut. (Lukasi 11:13) Aammattaaq assuarnaatsumik inuuniarlutik ilungersortut anersaakkut sernissortarpai. — Ussatit 2:7.

⁴ Assuarnaattuarnissarput pillugu Jehovap qanoq ilinniartippaatigut? Pingaarnerpaamik ernini, Jiisusi Kristusi, nunarsuarmut aallartippaa. Jiisusi inuunini tamaat naalalluinnarpoq. ‘Naalappoq toqumut allaat’. (Filippimiut 2:8) Qanoq iliornermini tamani Ataatani qilammiusoq naalappaa, allaat pissutsini erloqinarnerpaani. Taassuma Jehova ima oqarfigaa: “Uanga piumasara pinnani illit piumasat pili.” (Lukasi 22:42) Pitsaassaaq tamatta immikkut imminut ima aperigutta: ‘Uanga tamatumunnga assingusumik naalattarpunga?’ Eqqortumik pissutiginiaqarluta naalalluta inuunitsigut assuarnaattuarsinnaavugut. Pingaartumik sunut tunngatillugu naalattuusariaqarnerluta sammeriartigu.

5, 6. (a) Inunnit allanit isigineqanngikkaluarluta assuarnaattuarnissap pingaaruteqassusia Daavip qanoq erseqqissarpaa? (b) Ullumikkut inuk kisimiitsilluni assuarnaassutsimigut qanoq misilinneqarsinnaava?

⁵ Aamma kisimiikkaluaraangattaluunniit Jehovamut naalattariaqarpugut. Tussiaasiortup Daavip aamma kisimiikkaluaraangami assuarnaatsuunissani qanoq pingaartitsigalugu eqqaavaa. (Atuaruk Tussiaat 101:2). Daavi kunngiugami inuppassuarnik ilaqarajuppoq. Qularnanngitsumik amerlasuutigut inunnik hundredelinnik, immaqa tusindilinnik, eqqaaniittoqartarpoq. (Naleqqiuguk Tussiaat 26:12). Pisuni taama ittuni assuarnaatsuunissani pingaartittarpaa, kunngiugamimi innuttaminut maligassaalluartariaqarpoq. (5 Mosesi 17:18, 19) Daavilli paasivaa — ‘illumini’ — kisimiikkaangami aamma assuarnaalluni inuusariaqarluni. Uagummi?

⁶ Tussiaat 101:3-mi Daavi ima oqarpoq: “Iluanngitsuliungaarnermik takusaqarumanngilanga.” Ullumikkut “iluanngitsuliungaarnermik” isiginnaarnissamut periarfissarpassuaqarpoq, ingammik kisimiikkaanni. Internetteriaannaaneq pissutigalugu taamatut pisoqarsinnaavoq. Assinik naleqqutinngitsunik, immaqa allaat pornomut tunngasunik, isiginnaarnissamut ussernartorsiortoqariaannaavoq. Tamannali Guutimut Daavimik oqaatsinik eqqaariikkatsinnik allannissamut isumassarsisitsisumut naalannerussava? Pornografii ajoqutaavoq, pilerissusipilunnimmi siuarsaasarpoq, nalunngeqatiginnissummik ajoqusiisarpoq, aappariinnernik ajorsiartortitsisarpoq tamatuminngalu sammisaqartunut tamanut nikanarsaataasarpoq. — Ussatit 4:23; 2 Korinthimiut 7:1; 1 Thessalonikamiut 4:3-5.

7. Najoqqutassiaq suna kisimiikkaangatta assuarnaattuarnissatsinnut iluaqutigisinnaavarput?

⁷ Soorunami Jehovamut kiffartortut kisimiivinngisaannarput. Ataatatta qilammiusup asannilluni pigaattarpaatigut. (Atuaruk Tussiaat 11:4). Jehova qanoq nuannaartigisassava takugaangamiuk ussernartumik akiuisugut! Taamaalioraangatta Jiisusip mianersoqqutigisaa Matthæusi 5:28-miittoq eqqumaffigisarparput. Assinik eqqunngitsumik iliornissamut ussernartorsiulissutigisinnaasannik isiginnaannginnissat aalajangiusimajuk. Pornografiimut tunngasunik isiginnaarnikkut atuarnikkulluunniit illit assuarnaakkunnaarniaqinak, assuarnaassutsimmi erlinnaqaaq!

8, 9. (a) Danieli ikinngutaalu pingasut sumik unamminiagaqarpat? (b) Ullumikkut kristumiut inuusuttut Jehovamut uppeqatiminullu qanoq nuannaarutaasarpat?

⁸ Aamma allamik upperisallit ilagitillugit Jehovamut naalannikkut assuarnaattuarsinnaavugut. Danieli taassumalu ikinngutai pingasut eqqarsaatigeriakkit. Taakku inuusuttuaraallutik Babylonimut aallarussaapput. Allamik upperisalinnit Jehova pillugu ilisimasaqalaaginnartunit ilisimasaqanngivissunilluunniit avatangerneqarlutik nerisassanik Guutip nereqqunngisaanik nerinissamut tatineqalerput. Hebræerit sisamat taakku nerisassanik taakkuninnga nerinissamut patsisissarsioriaannaagaluarput. Angajoqqaavisami juutillu utoqqaanertaasa palasillu sulerinerat takusinnaanngilaat. Kia taava ilisimasinnaagamiuk? Jehovap. Taamaattumik tatineqaraluarlutik aamma navianartorsioraluarlutik aalajangiusimannipput naalallutillu. — Danieli 1:3-9.

⁹ Ullumikkut silarsuarmi tamarmi Jehovap Nalunaajaasui inuusuttut tamatumunnga assingusumik aalajangiusimannittarput, Guutip kristumiunut najoqqutassiai aalajangiusimallugit ajortumillu tatineqarnermut nakkaannartaratik. Ilissi inuusuttut ikiaroornartutorumanngikkaangassi, nakuuserumanngikkaangassi, oqaasipilukkumanngikkaangassi, inuunerlukkumanngikkaangassi allamilluunniit eqqunngitsumik iliorumanngikkaangassi Jehova naalattarparsi. Taamaalillusi assuarnaattuassaasi, imminut iluaqutissillusi Jehovalu uppeqatisilu nuannaarutissillugit. — Tussiaat 110:3.

10. (a) Kinguaassiuutitigut inuunerlunnermut tunngatillugu paatsuuineq suna inuusuttut ilaasa assuarnaakkunnaassutigisimavaat? (b) Kinguaassiuutitigut inuunerlukkumanata assuarnaatsuunissamik piumasaqaat sunissamut kajumississutigissavarput?

¹⁰ Aamma angutaagutta arnamut arnaaguttalu angummut pissusilersorneq eqqarsaatigalugu naalattuusariaqarpugut. Nalunngilarput kinguaassiuutitigut inuunerlunneq Guutip oqaasiani inerteqqutigineqartoq. Naalakkunnaarlunili maleruutiinnalernissaq ajornanngitsuararsuuvoq. Assersuutigalugu inuusuttut ilaat qanikkut itikkullu atoqatigiittarsimapput pilerissutsikkullu imminnut naammassiteqatigiittarsimallutik, eqqarsarlutik tamakku ajorpallaanngitsut, ‘atoqatigiinneruinngimmata’. Puiorpaat — imaluunniit sumiginnarpaat — oqaatsip Biibilimi ‘kinguaassiuutitigut inuunerlunneq’-mik nutserneqartup iliuutsinut tamakkununnga tamanut, pissusilersornermut eqqunngitsumut ilagiinnut ilaajunnaarsitaanermik kinguneqarsinnaasumut, tunngassuteqarnera.a Sulili ajornerusoq manna iliuuseraat: Assuarnaannissamik piumasaqaat sumiginnarpaat. Assuarnaattuarnissarput ilungersuutigigatsigu eqqunngitsuliornissamut patsisissarsiorneq ajorpugut. Pillarneqaatiginngisatsinnik qanoq unioqqutitsitigisinnaanerluta misileraaneq ajorpugut. Iliuutsit tamakku ilagiinnut attaveqarnitsinnut qanoq kingunipiloqarsinnaanerat kisiat eqqarsaatigisanngilarput. Aammali Jehovamik aliasutsitsisinnaasumik iliuuseqarnaveersaarnitsigut taassumannga iluarisaanissarput eqqarsaatigisarparput. Qanoq unioqqutitsitigisinnaanitsinnik misileraanata sapinngisarput tamaat ajortuliornaveersaartarpugut ‘kinguaassiuutitigullu inuunerlunneq nigorsimaniarlugu [qimarratigalugu, 1936]’. (1 Korinthimiut 6:18) Taamaalilluta ersersittarparput ilumut assuarnaatsuulluta.

Qanoq ililluta assuarnaattuarsinnaavugut?

11. Sooq tamatigut naalannissaq pingaaruteqarpa, sumullu assersuunneqarsinnaava?

¹¹ Tassa naalattuunitsigut assuarnaassuserput ineriartortittarparput, naalattuarnitsigullu assuarnaattuarpugut. Ataasiaannarluni naalanneq soqutaanngippasissinnaavoq. Amerlasoorpassuariarlunili naalanneq piffissap ingerlanerani naalattuunermut takussutissanngortarpoq. Assersuuteqariarta. Qarmasissiaq ataaseq soqutaanngippasissinnaavoq, qarmasissialli qaleriaaqqissaarlugit sanileriiaaqqissaarlugillu inissitsiterutsigit naggataatigut illunngussaaq. Assuarnaassutsitsinnut tunngatillugu aamma taamaappoq — tamatigut naalattarnitsigut ineriartortittarparput. — Lukasi 16:10.

12. Daavi malersorneqaraluarluni naapertuilluanngitsumillu pineqaraluarluni qanoq ililluni assuarnaattuarpa?

¹² Assuarnaassuserput ingammik erseqqissisarpoq annikillioraluarluta, ajortumik pineqaraluarluta naapertuilluanngitsoqaraluartorlu pinertusaaraangatta. Daavi tamatumunnga tunngatillugu maligassaalluarpoq. Taanna inuusuttuulluni Saulimit, kunngitut Jehovap oqartussaaneranut sinniisuusussaagaluartumit, malersorneqarpoq. Sauli Jehovamit iluarisaajunnaarsimavoq Daavilu Guutimit akuerisaasoq sinngagersuataarlugu. Saulili suli oqartussaassuseqarallarpoq, Daavimillu malersuinermini Israelikkut sakkutuui atorpai. Jehovap ukiualunni Daavip taamatut naapertuilluanngitsumik pineqarallarnissaa akueraa. Tamanna pissutigalugu Daavip Guuti kamaappaa? Isummerpa pinertusaarnissamut pissutissaqanngitsoq? Naamerluinnaq. Daavi Saulip Guutip tanitaatut inissisimaffianik ataqqinningaartuarpoq ajortumillu piumanagu, naak tamatumunnga periarfissaqaraluarluni. — 1 Samueli 24:3-8.

13. Qamuuna annersinneqarsimallutaluunniit narrujuummisinneqarsimagutta qanoq ililluta assuarnaattuarsinnaavugut?

¹³ Daavi ullumikkut uagutsinnut maligassaalluaqaaq. Silarsuaq tamakkerlugu ilagiit inunnik naammalluinnanngitsunik, uagutsinnik naapertuilluanngitsumik pinnissinnaasunik imaluunniit allaat tunussisinnaasunik ilalinnik, ilaasortallit ilaaffigaavut. Qujanartumik piffissami Jehovap innuttaasa ataatsimut isigalugit ajortunngortinneqarsinnaanngiffianni inuuvugut. (Esaja 54:17) Pakatsisinneqaraluaruttali qamuunaluunniit annersinneqaraluarutta qanoq periassaagut? Tamanna pissutigalugu pakatsisimaarlutaluunniit narrutsassimaarniarutta Guutimut assuarnaakkunnaariaannaasinnaavugut. Allat pissusilersornerat Guutimik kamaassinissamut taassumunngaluunniit aalajaakkunnaarnissamut patsisigineqarsinnaanngilaq. (Tussiaat 119:165) Misilinneqarnerni pinertusaarneq assuarnaattuarnissamut iluaqutigissavarput.

14. Assuarnaatsuugutta peqatigiissortanut tunngatillugu allannguinerit Biibilimillu paasinninnitsinnik iluarsiinerit qanoq periarfigisassavavut?

¹⁴ Aamma assuarnaattuarsinnaavugut isornartorsiueqqajaasuunnginnitsigut kukkunersiuisannginnitsigullu. Tassa Jehovamut ilumoortuusariaqarpugut. Taanna innuttaminik maanna aatsaat taama pilluaqqusitigaaq. Pallorfiginninneq minguitsoq nunarsuarmut aatsaat taama siammarterneqartigaaq. (Esaja 2:2-4) Allassimaffinnut nassuiaatinik periaatsitsinnilluunniit assigiinngitsunik allannguisoqaraangat tamanna akuerisarparput. Anersaakkut qaamanerup suli qaammarissiartornera nuannaarutigaarput. (Ussatit 4:18) Allannguummik paasiuminaatsitaqarutta tamatuminnga paasinninnissamut ikioqqulluta Jehova qinnuigissavarput. Tamatuma paasinissaata tungaanut naalattuassaagut taamaalillutalu assuarnaattuarluta.

Assuarnaakkunnaartoqarpammi?

15. Ilinnik assuarnaakkunnaarsitsisinnaasutuaq kinaava?

¹⁵ Apeqqut tamanna pimoorussassaavoq, soorlumi allaaserisap matuma siuliani eqqaaneqartoq assuarnaattuarnissaq pingaaruteqarluinnarpoq. Assuarnaanngikkutta Jehovamut attaveqarnavianngilagut piviusumillu neriuuteqarnaviarnata. Manna eqqaamajuk: Qilammi nunarsuarmilu inuup ataasiinnaap assuarnaakkunnaarsissinnaavaatit. Illit nammineq! Jobip tamanna paasivaa. Ima oqarpoq: “Toqussara tikillugu assuarnaattuassaanga!” (Jobi 27:5, NV) Jobitut aalajangiusimannitsigiguit Jehovamullu qanittumik attaveqaruit, tamanna assuarnaattuarnissannut iluaqutigissavat. — Jaaku 4:8.

16, 17. (a) Ingasattumik ajortulioraanni suut iliuuserineqassanngillat? (b) Qanoq iliornissaq silatusaarnerpaassava?

¹⁶ Inoqarporli assuarnaattuanngitsunik. Apustilit nalaannisut ullumikkuttaaq inoqarpoq ingasattumik ajortuliortartunik. Illit ajortuliortalersimaguit, taava neriuutaaruppit? Taamaattariaqanngilaq. Qanoq iliorsinnaavit? Siullermik iliuuserisassarinngisatit sammeriartigit. Inuit eqqunngitsuliatik angajoqqaaminnut, uppeqatiminnut utoqqaanertanulluunniit isertoqqajaasarpaat. Biibilimili ima eqqaasinneqarpugut: “Unioqqutitsinerminik isertuisoq pilluaatissaqanngilaq; ajortuliaminilli anngiiaatiginnittoq soraarussisorlu nallittorneqartussaavoq.” (Ussatit 28:13) Ajortuliaminnik isertuiniarsarisut kukkulluinnartarput, Guutimummi isertuussisoqarsinnaanngilaq. (Atuaruk Hebræerit 4:13). Ilaat marloqiusamik inooriaaseqarniarsarisarput, ajortuliortaatigalutimmi Jehovamut kiffartortuusaarput. Tamanna assuarnaatsuunerunngilaq — assuarnaatsuunerup akerlerluinnaanik iliorneruvoq. Jehovap ajortuliaminnik ingasattumik isertuisut pallorfiginninnerat iluarinngilaa. Pallorfiginninnerat ilumoortuusaarneruvoq, tamannalu kamaatigisarpaa. — Ussatit 21:27; Esaja 1:11-16.

¹⁷ Kristumiu ingasattumik ajortuliorpat, qanoq iliortariaqarnera pillugu Biibilimi paasiuminartunik siunnersuuteqarpoq. Utoqqaanertanut kristumiunut ikiortissarsiornissamut piffissanngorsimassaaq. Jehovap aaqqissuussaasa ilaat aqqutigalugu anersaakkut perulunnartumik napparsimatilluni ikiorneqartoqarsinnaavoq. (Atuaruk Jaaku 5:14). Perorsaatissinneqarnissannik naqqinneqarnissannilluunniit annilaangaginninnerit pissutigalugu anersaakkut peqqissutsit paarilluanngitsoorniaqinagu. Toqussutaasinnaasumik nappaateqaraanni, kapitinnikkut imaluunniit allaat suliaritinnikkut anniarallarnissaq nappaatip iliuuseqarfiginissaanut akornutaatinneqassava? — Hebræerit 12:11.

18, 19. (a) Daavimik oqaluttuami qanoq ersersinneqarpa assuarnaaqqilertoqarsinnaasoq? (b) Illit suna aalajangiusimaniarpiuk?

¹⁸ Peqqissilluinnarnissamik neriuuteqarpa? Assuarnaakkunnaarsimasoq assuarnaaqqilersinnaava? Daavi eqqarsaatigeqqeriaruk. Taanna ingasattumik ajortuliorpoq. Angutip allap nulia pilerigalugu isigaa, allasiorpoq uiusorlu pisuussuteqanngitsoq toqutaatillugu. Tamatuma nalaani Daavip assuarnaatsuunerarnissaa takorlooruminaappoq, ilaa? Neriuutaarutivippali? Daavip sukannersumik perorsaatissinneqarnissani pisariaqartippaa, taamatullu pineqarpoq. Ilumoorlunili peqqissimimmat Jehovap nallittorpaa. Daavip perorsaatissinneqarnini ilinniutigaa Guutimullu naalannermigut assuarnaaqqilerluni, naalattuarporlu. Daavip inuunera uppernarsaataavoq Ussatit 24:16-imi allassimasut uku ilumoornerannut: “Iluartoq arfineq-marloriarluni orlusinnaasaraluarpoq nikueqqittarlunili.” Daavip ‘nikueqqittarnera’ qanoq kinguneqarpa? Maluginiaruk Daavip toqunerata kingorna taanna pillugu Jehovap Salomo qanoq oqarfigineraa. (Atuaruk 1 Kunngit 9:4, 1990). Guutip Daavi angutitut assuarnaatsutut eqqaamavaa. Tassa Jehovap ajortuliortoq peqqissimisoq minguiarsinnaavaa, ajortuliaa ingasakkaluarpalluunniit. — Esaja 1:18.

¹⁹ Aap, asannillutit Guutimut naalakkuit assuarnaatsuussaatit. Ilumoorfiginnillutit pinertusaarit, ingasattumillu ajortuliussagaluaruit ilumoorlutit peqqissiminerit ersersiguk. Assuarnaassuserput erlinnaqaaq! Qanortoq tamatta Daavitut ima aalajangerisa: “Uanga saqiuassaanga assuarnaallunga.” — Tussiaat 26:11, 1900.

[Quppernerup ataani ilanngussaq]

Qanoq akissavit?

• Qanoq ililluta assuarnaatsuusinnaavugut?

• Qanoq ilillutit assuarnaattuarsinnaavit?

• Qanoq ililluni assuarnaaqqilertoqarsinnaava?

[Qupp. 16-mi ungalusaq]

‘Ilumut Nersortariaqarpoq!’

Arnaq qaammatit tallimassaannik naartusoq arnap inuusuttup inussiarnisaarnera pillugu taama oqarpoq. Taanna nammineq sutorniartarfimmiissimavoq, akunnialuillu qaangiummata paasilerpaa aningaasivini taqqamunga puiorsimallugu. Aningaasivik 2000 dollarsinik, aningaasanik nassatarisartagaanit amerlanipilussuarnik, imaqarpoq. Arnaq taanna kingusinnerusukkut illoqarfimmi najukkamini aviisiliortumut ima oqarpoq: “Paatsiveerukkaluaqaanga.” Arnalli inuusuttup aningaasivik nassaaraa piginnittualu ujarniapallallugu. Ujaasinini aallaqqaammut iluatsinngimmat politeeqarfimmukarpoq, politiillu arnaq naartusoq nanivaat. Piginnittoq qujamasuttoq ima oqarpoq: “Ilumut ilumuik nersortariaqarpoq!” Arnaq inuusuttoq taanna aningaasivik utertitsinniarlugu sooq imminut taama pisarissersortigaa? Aviisimi oqaluttuarineqarpoq arnaq inuusuttoq Jehovamut nalunaajaasuugami “oqartoq unneqqarinnini upperisaminik pissuteqartoq”.

[Qupp. 17-mi assiliartaq]

Inuusuttut misilinneqarnerminni assuarnaattuarsinnaapput

[Qupp. 18-mi assiliartaq]

Daavi assuarnaakkunnaaraluarpoq, assuarnaaqqilerporli