‘Guutip ajunngisaarneranut pisassarinngisaraluamut pilittaasutut’ kiffartorpit?
“Qatanngutigiittut asaqatigiillusi ungageqatigiigitsi [qamannga pisumik tunniusimaffigeqatigiigitsi, NV], ataqqeqatigiigitsilu immissinnut akimorniullusi.” — ROMAMIUT 12:10.
1. Guutip oqaasiani qanoq neriorsoqqissaarneqarpugut?
GUUTIP oqaasiani arlaleriarluta neriorsoqqissaarneqarpugut nikallorutta isumatsassimaleruttaluunniit Jehovap ikiorumaaraatigut. Assersuutigalugu oqaatsit qiimmaallannartut uku maluginiariakkit: “[Jehovap] najummisarpai orlulersut tamaasa, massitsittarlugillu taaqqungasut tamaasa.” “Katsorsarpai sequmissimasumik uummatillit, ikiilu mattuserlugit.” (Tussiaat 145:14; 147:3) Ataatarput qilammiusoq aamma nammineq ima oqarpoq: ‘Uanga tassaavunga Jehova Guutit talerpikkut tigussavakkit oqarfigalutillu: “Siooraqinak, ikiortigaarma.”’ — Esaja 41:13.
2. Jehovap kiffani qanoq annertoqqusersortarlugillu ikiortarpai?
2 Jehovalli, qilammi takussaanngitsumiittup, uagutsinnik ‘talerpitsigut tigusinera’ qanoq paasisariaqarpa? Aliasunnermik ‘taaqqungagaangatta’ qanoq ililluni ‘massitsittarpaatigut’? Assigiinngitsutigut taamatut ikiuisarlunilu annertoqqusersuisarpoq. Assersuutigalugu anersaani illernartoq iluaqutigalugu innuttani ‘pissaanermik pissusissamik akimuisumik’ tunivai. (2 Korinthimiut 4:7, NV; Johannesi 14:16, 17) Aammattaaq Guutip kiffaasa tusarliussaq Biibilimi isumassarsiarititaasumiittoq qiimmaallaatigalugulu nakussatsissutigisarpaat. (Hebræerit 4:12) Jehovap aamma allatigut nakussatsittarpaatigut? Tamanna Petrusip allagaani siullerni akissutissarsissavarput.
‘Guutip ajunngisaarnera pisassarinngisaraluaq assigiinngeqisunik ersiuteqartartoq’
3. (a) Apustili Petrusi misilinneqarnerit pillugit qanoq allappa? (b) Petrusip allakkami naggataatungaani suna eqqartorpaa?
3 Apustilip Petrusip kristumiut tanitat allaffigai nuannaarnissamut pissutissaqarluartut pilluaqqusaangaartussaagamik. Taava ima nangippoq: “Naak pisariaqassappat maanna sivikitsumik atugarliortassagaluarussi misiligaanertigut tamalaatigut.” (1 Petrusi 1:1-6) Maluginiariaruk oqaaseq “tamalaatigut”. Tamatumani erserpoq taakku assigiinngitsorpassuartigut misilinneqartarumaartut. Petrusilli allakkani tassunga naanngilai, naaginnarsimasuugunigimmi qatanngutit misilinneqarnernik assigiinngitsorpassuarnik naammagittarlutik atuisinnaanertik pillugu namminneq isumaliutiginnittussanngortissagaluarpai. Uparuarpaa kristumiut misilinneqarnernik suugaluartunilluunniit naammagittarlutik atuinissaminnut Jehovap ikiuiumaarnera qularutiginngilluinnarsinnaagaat. Petrusip allagaata naggataatungaani taamatut neriorsoqqissaarneqarpugut, tassani eqqartormagu ‘tamarmik naggatissaat qanillisoq’. — 1 Petrusi 4:7.
4. Sooq 1 Petrusi 4:10-mi allassimasut tuppallersaatigisinnaavavut?
4 Petrusi ima allappoq: “Guutip saammaanneranut [ajunngisaarneranut pisassarinngisaraluamut, NV] assigiinngeqisunik ersiuteqartartumut pilittaalluartutut kiffartuuteqatigiigitsi, tamassi immikkut saammaannermit tunissutisiarsi naapertorlugu.” (1 Petrusi 4:10) Matumani Petrusip oqaaseq “assigiinngeqisunik” — oqaatsimut “tamalaatigut”-mut assingusoq — atorpaa. Ima oqarporlusooq: ‘Assigiinngitsorpassuartigut misilinneqartarpugut, Guutilli aamma assigiinngitsorpassuartigut pisassarinngisaraluamik ajunngisaarfigisarpaatigut.’ Sooq tamanna tuppallersaatigisinnaavarput? Tamatumani ersersinneqarmat — qanorluunniit misilinneqaraluarutta — misilinneqarnermik tamatuminnga naammagittarluta atuinissamut uagutsinnut iluaqutaasinnaasumik Guutip ajunngisaarnerata pisassarinngisaraluap tamatigut ersersinneqartarumaarnera. Maluginiarpiulli Jehovap ajunngisaarnerata pisassarinngisaraluap Petrusip allagai naapertorlugit uagutsinnut qanoq ililluni ingerlateqqinneqartarnera? Tassa qatanngutivut kristumiut aqqutigalugit.
“Kiffartuuteqatigiigitsi”
5. (a) Kristumiut tamarmik immikkut susariaqarpat? (b) Apeqqutit suut akissutissarserusuppavut?
5 Ilagiinni kristumiuniittut tamaasa saaffigalugit Petrusi ima allappoq: “Tamanit annermik asaqatigiinnersi attattuinnarsiuk.” Taava ima nangippoq: “Kiffartuuteqatigiigitsi, tamassi immikkut saammaannermit tunissutisiarsi naapertorlugu.” (1 Petrusi 4:8, 10) Tassa qatanngutit ilagiinniittut tamarluinnarmik uppeqatiminnut ineriartuutaaqataasariaqarput. Jehovap pigisaanik pingaaruteqangaartunik ingerlatitseqqittussanngortinneqarpugut, allanullu ingerlateqqinnissaa akisussaaffigaarput. Sunaana uagutsinnut paareqquneqartoq? Petrusi allappoq ‘tunissutisiaasoq’. Tunissutisiaq taanna suua? Qanorlu ililluta ‘kiffartuuteqatigiinnitsinni’ atorsinnaavarput?
6. Kristumiunut tunniunneqartut ilaannik eqqaasaqarit.
6 Guutip oqaasiani ima allassimavoq: “Tunissutit ajunngitsut naammalluinnartuusullu tamarmik pavannga . . . pisarput.” (Jaaku 1:17) Aap, tunissutit Jehovap innuttaminut paareqqullugit tunniussai tamarmik taassuma ajunngisaarneranut pisassarinngisaraluamut ersiutaapput. Jehovap anersaamik illernartumik avitseqatigisarpaatigut, taannalu tunissutaavoq asseqanngilluinnartoq. Taanna pissutigalugu asanninnermik, ajunngissusermik saamanermillu — pissuserineqartussanik Guutip iluarisaanik — ineriartortitsinissamut periarfissaqalertarpugut. Pissuserineqartussallu taakku kajumilluta uppeqatitsinnik ikiuinissamut taakkununngalu qamannga pisumik tunniusimanissamut kajumississutigisarpavut. Tunissutit ajunngitsut anersaap illernartup ikiuineratigut pisartakkatta ilagaat ilisimassuseq piviusoq eqqortunillu ilisimasaqarneq. (1 Korinthimiut 2:10-16; Galatiamiut 5:22, 23) Aap, nukivut, piginnaanivut pikkorissuserpullu tunissutisiatut Ataatatta qilammiusup nersornaatissaanut ataqqinaatissaanullu atorneqartussatut isigineqarsinnaapput. Guutip pisinnaasatta tamaasa pissutsittalu atornissaannut akisussaaffilerpaatigut, taakku atorlugit Guutip ajunngisaarnera pisassarinngisaraluaq uppeqatitsinnut ersersissinnaaqqullugu.
“Kiffartuuteqatigiigitsi” — qanoq?
7. (a) Oqaaseq “naapertorlugu” matumani qanoq paasisariaqarpa? (b) Imminut qanoq aperisariaqarpugut, aamma sooq?
7 Tunissutisiatta ilaannut tunngatillugu Petrusi aamma ima allappoq: “Kiffartuuteqatigiigitsi, tamassi immikkut saammaannermit tunissutisiarsi naapertorlugu.” Oqaatsimi “naapertorlugu”-mi erserpoq pissuserineqartut pikkoriffigisallu inummiit inummut assigiinngissinnaanerat, aamma pissuserineqartussat qanoq pissuserineqartiginerat pikkoriffigisallu qanoq pikkoriffigineqartiginerat inummiit inummut assigiinngissinnaanerat. Tamattali immikkut kajumissaarneqarpugut ‘kiffartuuteqatigeeqqulluta tunissutisiarput [tassa tunissutisiavut suulluunniit] naapertorlugu’. Aammattaaq oqariartaaseq “pilittaalluartutut kiffartuuteqatigiigitsi” peqqussutaavoq. Taamaattumik imminut ima aperisariaqarpugut: ‘Tunissutisiakka uppeqatinnik nakussatsitsinissamut atortarpakka?’ (Naleqqiuguk 1 Timotheusi 5:9, 10). ‘Imaluunniit piginnaanikka Jehovameersut ingammik uanga nammineq iluaqutissannut atortarpakka — pisuussutinik katersuinikkut imaluunniit innuttaaqatigiinni qaffasissumik inissisimaffeqalerniarnikkut?’ (1 Korinthimiut 4:7) Tunissutisiavut ‘kiffartuuteqatigiinnermut’ atortarutsigit Jehovamit iluarisaassaagut. — Ussatit 19:17; atuaruk Hebræerit 13:16.
8, 9. (a) Silarsuaq tamakkerlugu kristumiut ilaatigut qanoq uppeqatiminnut iluaqutaasumik kiffartortarpat? (b) Ilagiinni illit ilaasortaaffigisanni qatanngutit qanoq ikioqatigiittarpat?
8 Guutip oqaasiani ukiuni hundredelinni siullerni kristumiut imminnut kiffartuuteqatigeeriaasii assigiinngitsut eqqartorneqarput. (Atuakkit Romamiut 15:25, 26; 2 Timotheusi 1:16-18). Ullumikkuttaaq tunissutisianik uppeqatit iluaqutissaanut atuisarnissamik peqqussut kristumiunit ilumoortunit uummatikkut iluunngarluni malinneqarpoq. Tamatuminnga malinneriaatsit ilaat misissoriartigit.
9 Qatanngutit anguterpassuit qaammatit tamaasa nalunaaquttap-akunneri arlallit ataatsimiinnerni saqqummiussinissamut piareersarnermut atortarpaat. Anersaakkut erlinnartuutit Biibilimik atuaqqissaarnerminni nassaarisimasamik ilaat ingerlateqqikkaangatigit, oqaasii isumaqarluartut ilagiinniittut tamarmik pinertusaarnissamut kajumississutigisarpaat. (1 Timotheusi 5:17) Qatanngutit angutit arnallu amerlasuut uppeqatiminnik isumassuingaarnertik misiginneqataasuunertillu ilisimaneqaatigaat. (Romamiut 12:15) Ilaat nikallungasunut pulaartarput taakkualu qinoqatigalugit. (1 Thessalonikamiut 5:14) Allat uppeqatitik misilinneqarnernik assigiinngitsunik akiugaqartut isumassorlugit qiimmaallannartunik allaffigisarpaat. Aamma allat timikkut pisinnaasamikkut killeqartunik asannittumik ikiuisarput, taakku ilagiit ataatsimiinnerinut najuussinnaaniassammata. Jehovap Nalunaajaasui tusindillit uppeqatimik illuinik ajunaarnersuarnit pinngortitamit pilersinneqartunit aserorneqarsimasunik sanaqqiinernut nammineq kajumissutsiminnit peqataasarput. Qatanngutit angutit arnallu isumassuingaartut taakku qamannga pisumik tunniusimapput atortussatigullu ikiuisarlutik, tamakkulu tamarmik Guutip ajunngisaarneranut pisassarinngisaraluamut ersiutaapput. — Atuaruk 1 Petrusi 4:11.
Suna pingaaruteqarnerpaava?
10. (a) Guutimut kiffartornermut attuumassuteqartut marluk suut Paulusip ulapputigai? (b) Paulusip maligassiaa ullumikkut qanoq ililluta malissinnaavarput?
10 Guutip kiffai taamaallaat uppeqatimik iluaqutissaannut atugassaminnik tunineqarnatik, aammali tusarliussamik inoqatiminnut ingerlateqqitassaminnik tunineqarput. Apustilip Paulusip Jehovamut kiffartornermut attuumassuteqartut taakku marluk eqqumaffigai. Taassuma ilagiit Efesosimiittut ‘Guutip ajunngisaarneranut pisassarinngisaraluamut pilittatut kiffartorneq’ taakkua iluaqutissaannut imminut kiffartuutigitinneqartoq pillugu allaffigai. (Efesosimiut 3:2, NV) Aammali ima allappoq: “Nalunaajaavugut Guutip iivangkiiliumik paarisaqarnissatsinnut naleqquttuutimmatigut.” (1 Thessalonikamiut 2:4) Nalunngilarput Paulusitut Guutip naalagaaffianik oqaluussissutiginnittussatut suliassinneqarsimalluta. Pileraluta oqaluusseqataasarnitsigut Paulusip iivangkiiliumik, imaluunniit nutaarsiassamik nuannersumik, oqaluussissutiginnittartutut qasusuitsutut maligassiaanik malinninniartarpugut. (Apustilit Suliaat 20:20, 21; 1 Korinthimiut 11:1) Nalunngilarput Guutip naalagaaffianik oqaluussissutiginninneq inuunermik annaassisinnaasoq. Tamannali ilutigalugu uppeqatitta ‘Anersaap tunissutaanik ilangiisinnissaannut’ periarfissanik eqqumaffiginninnitsigut Paulusi ilaarniartarparput. — Atuakkit Romamiut 1:11, 12; 10:13-15.
11. Oqaluussineq uppeqatitsinnullu ineriartuutaaneq qanoq isigisariaqarpavut?
11 Kristumiutut kiffartornermut attuumassuteqartut marluk taakku arlaat sorleq pingaaruteqarnerpaava? Taamatut aperinerup assigiinnarpaa timmiaq aperalugu suluisa marluk arlaat sorleq pingaaruteqarnerunersoq. Apeqqummut akissut erseqqippoq. Timmiaq timmisinnaajumalluni marlunnik suloqartariaqarpoq. Uagutsinnut piumasaqaataasunik tamanik malinnikkumalluta, Guutimut kiffartornermut tunngasut taakku marluk tamaasa peqataaffigisariaqarpavut. Oqaluussineq uppeqatitsinnullu ineriartuutaaneq suliassatut marluttut imminnut attuumassuteqanngitsutut isiginagit, apustilit Petrusip Paulusillu taakkuninnga isiginninnerattut isigaavut — akisussaaffittut imminnut tapertariittutut. Qanoq tapertariippat?
12. Qanoq ililluta Jehovamit atorneqarsinnaavugut?
12 Inoqatitsinnut iivangkiiliu oqaluussissutigigaangatsigu pikkorissuserput tamaat atortarparput Guutip naalagaaffia pillugu tusarliussamik qiimmaallannartumik taakkua uummataat anguniarniarlugit. Neriuutigaarput taamaalilluta taakku Kristusimut ajoqersuganngornissaannut ikiorsinnaallugit. Aammali piginnaasavut tunissutisiavullu allat tamaasa uppeqatitsinnik oqaatsitsigut iliuutsitsigullu qiimmassaanermut ikiuinermullu atortarpavut. Tamakkuttaaq Guutip ajunngisaarneranut pisassarinngisaraluamut ersiutaapput. (Ussatit 3:27; 12:25) Neriuutigaarput taamaalilluta taakku Kristusimut ajoqersugaajuarnissaannut ikiorsinnaallugit. Taakku marluk — tamanut oqaluussineq ‘kiffartuuteqatigiinnerlu’ — Jehovamit atorneqarnermi immikkut pisinnaatitaaffigilertarpavut. — Galatiamiut 6:10.
“Qamannga pisumik tunniusimaffigeqatigiigitsi”
13 ‘Kiffartuuteqatigiinnissamut’ tunuarsimaarutta qanoq pisoqarsinnaava?
13 Paulusip uppeqatini ima kajumissaarpai: “Qatanngutigiittut asaqatigiillusi ungageqatigiigitsi [qamannga pisumik tunniusimaffigeqatigiigitsi, NV], ataqqeqatigiigitsilu immissinnut akimorniullusi.” (Romamiut 12:10) Qatanngutitsinnik tunniusimaffiginninnerput Guutip ajunngisaarneranut pisassarinngisaraluamut pilittaasutut uummatikkut iluunngarluta kiffartornissamut kajumississutigisarparput. Nalunngilarput Saatanip, ‘kiffartuuteqatigiinnissamut’ tunngatillugu uagutsinnik tunuarsimaartitsiniaanermini iluatsissagaluaruni, ataasiussuseqarpiarunnaarsissinnaagaatigut. (Kolossemiut 3:14) Ataasiussuseqanngikkuttalu oqaluussinermi aallussilluarpiarunnaassaagut. Saatanip nalunngilluinnarpaa sulutta assersuutaasup illuinnaanik ajoqusiinermigut timmisinnaajunnaarseriaannaallutalusooq.
14. ‘Kiffartuuteqatigiinnerput’ kikkut iluaqutigisarpaat? Assersuuteqarit.
14 ‘Kiffartuuteqatigiinneq’ Guutip ajunngisaarneranik pisassarinngisaraluamik pisartunuinnaanngitsoq iluaqutaasarpoq. Aamma tamatuminnga ingerlatitseqqittartunut iluaqutaasarpoq. (Ussatit 11:25) Ryan Ronilu, aappariit USA-mi Illinoisimiittut, tamatumunnga assersuutaalluarput. Tusaramikku ulussaarsuaq Katrina Jehovap Nalunaajaasuisa hundredellit angerlarsimaffiinik aseruisimasoq qatanngutigiittut asaqatigiinneq kajumississutigalugu suliunnaarput, inissiaq najugartik qimallugu, kalittakkamik unnuiffiusinnaasumik atornikumik pisillutik taannalu iluarsaallugu, Louisianamullu 1400 kilometerisut ungasitsigisumiittumut aallarlutik. Tassani ukioq ataaseq sinnerlugu najugaqarput, piffissartik, nukitik pigisatillu qatanngutiminnik ikiuinermut atorlugit. Ryan, 29-nik ukiulik, ima oqarpoq: “Ikiuiniaqataanera Guutimut qaninnerulissutigaara. Takuara Jehovap innuttani qanoq isumassortarai.” Imalu nangippoq: “Qatanngutinik uannit angajulliusunik suleqateqarnera allanik qanoq isumassuisoqartarneranik ilinniarfigisupilussuuara. Aamma paasivara Jehovap peqatigiissortaani uagutsinnut inuusuttuusunut iliuuserisassarpassuaqartoq.” Roni, 25-nik ukioqartoq, ima oqarpoq: “Allanik ikiueqataagama qujamasuppunga. Maanna aatsaat taama nuannaartigaanga. Qularutiginngilara misigisaq nuannersoq tamanna ukiuni aggersuni iluaqutigiumaarlugu.”
15. Guutip ajunngisaarneranut pisassarinngisaraluamut pilittaasutut kiffartortuarnissamut sunik pissutissaqarluarpugut?
15 Aap, Guutip nutaarsiassamik nuannersumik oqaluussissutiginninnissamik uppeqatitsinnullu ineriartuutaanissamik peqqussutaa tamanut iluaqutaavoq. Uagutsinnit ikiorneqartut pinertusaarnissamut anersaakkut nakussatsinneqartarput, uagullu nammineq qamannga pisumik nuannaarneq taamaallaat tunisinikkut anguneqartartoq misigisarparput. (Apustilit Suliaat 20:35) Ilagiinniittut tamarmik asannittumik imminnut soqutigeqatigiimmata ilagiit ataatsimut isigalugit tunniusimanerujartortarlutillu isumassuinerujartortarput. Aammattaaq asaqatigiillutalu tunniusimaqatigiikkatta kristumiutut ilumoortuunerput erseqqippoq. Jiisusi ima oqarpoq: “Asaqatigiikkussi tamatumuuna tamarmik paasissavaat ajoqersugarigissi.” (Johannesi 13:35) Pingaarnerpaamik tamanna Ataatatsinnut isumassuingaartumut, Jehovamut, ataqqinaataassaaq, pisariaqartitsisut nakussatsinneqarnissaannik taassuma kissaataa kiffaasa nunamiusut pissusilersornerannit ersersinneqartarmat. Taamaattumik tunissutisiatta ‘Guutip ajunngisaarneranut pisassarinngisaraluamut pilittaalluartutut kiffartuuteqatigiinnissamut’ atornissaanut pissutissaqarluarpugut. Illit taamaaliortuassavit? — Atuaruk Hebræerit 6:10.
Eqqaamavigit?
• Suut aqqutigalugit Jehovap kiffani nakussatsittarpai?
• Sumik tunineqarpugut?
• Ilaatigut qanoq uppeqativut kiffartuussinnaavavut?
• Tunissutisiatta ‘kiffartuuteqatigiinnermut’ atortuarnissaanut suna kajumississutigisinnaavarput?
[Qupp. 17-mi assiliartat]
‘Tunissutisiat’ atortarpiuk allat iluaqutissaannut illilluunniit nammineq iluaqutissannut?
[Qupp. 19-mi assiliartat]
Nutaarsiassaq nuannersoq allanut oqaluussissutigisarparput uppeqativullu tapersersortarlugit
[Qupp. 20-mi assiliartaq]
Ikiuiniaqataasartut imminut pilliutigeriaannaanertik pillugu nersualaarneqartariaqarput