Pallorfiginneriaatsit tamaasa Guutip akuerai?
Inuppassuit qanoq oqartartut:
▪ “Upperisarsiornerit tamarmik Guutimut aqqutissiuipput.”
▪ “Qanoq upperisaqarneq soqutaanngilaq — tunniusimagaanni naammappoq.”
Jiisusi qanoq oqarpa?
▪ “Isaaffikkut nerukitsukkut iseritsi; nerutoqaarmi tammarfimmut isaaffik tassungalu aqqutaa sileqaluni; amerlaqaallu tassuuna isaasut. Nerukeqaarli inuussummut isaaffik tassungalu aqqutaa ameqaluni; ikittuinnaappullu taassuminnga nanisisut!” (Matthæusi 7:13, 14) Jiisusip upperinngilaa upperisarsiornerit tamarmik Guutimut aqqutissiuisuunerat.
▪ “Ullussami tassani amerlasuut uannut oqarumaarput: Naalagaq, Naalagaq! illit atikkut siulittuisarsimannginnerpugut, atikkullu anersaapilunnik anisitsisarsimannginnerpugut, atikkullu amerlaqisunik malunnangaartuliortarsimannginnerpugut? Taava isertuarnanga nalunaarfigiumaarpakka: Ilisarisimanngisaannarpassi. Nigorsinga, ilissi inatsisinik unioqqutitsisuususi!” (Matthæusi 7:22, 23) Jiisusip imminik malinninnerartut ilarpassui akuerinngilai.
UPPERISARSIORTORPASSUIT upperisartik ileqqutoqqatillu pingaartippaat. Taavami ilinniarsimasatik Guutip oqaasianut, Biibilimut, naapertuutinngippata? Jiisusip ersersippaa ileqqutoqqat inuit pilersitaasa qanoq navianartiginerat nalimini upperisarsiornikkut siuttunut ima oqarami: “Guutip oqaasii atorunnaarsippasi kingornussarsiasi pillugit.” Taava Guutip oqaasianik issuaalluni ima nangippoq: “Inuiaat ukua qarluinnarminnik ataqqivaannga, uummataalli uannit ungaseqaat asuliinnaq guutisiorfigaannga, inuimmi inassutiliaat ajoqersuutigisaramikkit.” — Matthæusi 15:1-9; Esaja 29:13.
Uppernerinnaanngitsoq aammali qanoq pissusilersorneq pingaaruteqarpoq. Guutimut kiffartornerartut ilaat pillugit Biibilimi ima allassimasoqarpoq: “Nassuerutigisarpaat Guuti ilisimallugu, uffali suliamikkut miserratigalugu.” (Titusi 1:16) Aamma inuit nalitsinni inuusut pillugit Biibilimi ima allassimasoqarpoq: ‘Inuulluarniutit Guutimit pingaarnerutippaat. Taakkua Guutimik mianerinninneq ileqqorisuusaaginnarpaat pissaanerali asiginnarlugu. Taamaattut nigorsimaniakkit!’ — 2 Timotheusi 3:4, 5.
Tunniusimaneq pisariaqarpoq — naammanngilarli. Sooq? Inuk tunniusimagaluarluni kukkusinnaammat. Taamaattumik pingaaruteqarluinnarpoq Guuti pillugu eqqorluartumik ilisimasaqarnissaq. (Romamiut 10:2, 3) Taanna pillugu ilisimasaqaleraanni Biibilimilu ajoqersuutigineqartut naapertorlugit iliuuseqaraanni Guutimit iluarisaasoqalersinnaavoq. (Matthæusi 7:21) Tassa upperisarsiornermut ilumoortumut ilaapput eqqortumik pissutiginiagaqarneq, ajoqersuutit eqqortut eqqortunillu iliuuseqarneq. Eqqortunillu iliuuseqarneq tassa ullut tamaasa Guutip piumasaatut iliorneq! — 1 Johannesi 2:17.
Biibilimi Guuti pillugu ilinniartitsissutigineqartut pillugit paasisaqarnerorusukkuit Jehovap Nalunaajaasui saaffigisinnaavatit akeqanngitsumik Biibilimik atuaqqissaaqatigineqarumallutit. (wp09 02/01-E)
[Qupp. 9-mi issuagaq]
Upperisarsiornermut ilumoortumut ilaapput eqqortumik pissutiginiagaqarneq, ajoqersuutit eqqortut eqqortunillu iliuuseqarneq