Atuartartutta apeqqutaat
Jehovap Nalunaajaasui Guutimik pallorfiginninnerminni assilissanik sooq atuineq ajorpat?
Nunarsuaq tamakkerlugu ilagiit katuullit ortodoksillu ilaasortaasa, buddhasiortut, hindusiortullu Guutimik pallorfiginninnerminni pingaarutilinnut ilaatippaat assilissanik ikoninilluunniit atuineq. Afrikap ilaani inuit orpinnik imaluunniit ujaqqamik inuusaliat ataqqisarpaat isumaqarlutik guutip imaluunniit anersaap guutimit pisup ineqarfigilersimagai.
Jehovalli Nalunaajaasuisa guutipiluit qanorluunniit ittut assingi ikonilluunniit guutisiornerminni atorneq ajorpaat. Taakkua ataatsimiittarfiannukaruit, naalagaaffilersaarfittut ilisimaneqartuni, ikoninik iluartuutitalluunniit assinginik imaluunniit Jiisusimik Mariamilluunniit inuusalianik nassaassaqanngilaq.a Sooq taamaanngila? Tamanna Biibilimi akineqarpoq.
Guutip Israelikkut sumik piumaffigai?
Jehovap Guutip Israelikkut Egyptenimit aniguisereeramigit erseqqissumik ilitsersuuppai qanoq pallorfigineqarusunnerluni. Inatsisit qulit aappaat imaappoq: “Ilinnut guutilialiuutissanngilatit suulluunniit qilammi pavani nunamiluunniit maani imersuarmiluunniit nunap ataani ittut assinginik. Tamakku pallorfigissanngilatit guutisiorfiginagillu, uanga [Jehova] Guutit Guutiugama ilungersortoq [tunniusimalluinnarfigineqarnissaminik piumasarinnittoq, NV].” — 2 Mosesi 20:4, 5.
Guutip Mosesimut inatsisinik taakkunannga tunniussinerani Israelikkut kuultimik nersuteeraasaliorput qularnanngitsumik Egyptenimi nersutit pallorfigineqartartut assiganik. Nersuteeraasaliarli Egyptenimiut guutiisa ilaattut atserneqanngilaq, Jehovamilli pallorfiginninnermut tunngatinneqarpoq. (2 Mosesi 32:5, 6) Guutip tamanna qanoq isumaqarfigaa? Kuultimik nersuteeraasaliamik ataqqinnittut kamaatingaalerpai, Mosesillu taanna aserorterpaa. — 2 Mosesi 32:9, 10, 19, 20.
Kingusinnerusukkut Jehovap Guutip inatsisit aappaanut tunngasoq sukumiinerusumik nassuiarpaa. Mosesi aqqutigalugu Israelikkut eqqaasippai imminnut “qanoq ittumilluunniit timitaligaasumik [guutiliuutissanngitsut] angutit arnalluunniit assinginik, uumasut nunamiittut suusulluunniit imaluunniit sulullit suusulluunniit qilakkut timmisut assinginik, paarmortut suusulluunniit assinginik imaluunniit aalisakkat suusulluunniit nunap ataani immamiittut assinginik”. (5 Mosesi 4:15-18) Erseqqippoq Israelikkut Guutimik pallorfiginnikkaangamik guutipilunnik qanoq ittunilluunniit atuissanngitsut.
Taamaakkaluartoq kingusinnerusukkut Israelikkut guutipilussiulerput. Jehovap pruffiitini taakkununnga aallartippai naveeriartortillugit mianersoqqujartorlugillu guutipilussiornertik pillugu pillagaanissaannik. (Jeremia 19:3-5; Amosi 2:8) Israelikkut inuiattut Guutip mianersoqqussutai sumiginnarpaat. Taamaattumik 607-imi Kr.in.si. Jehovap Babylonimiut Jerusalemimik piuneerussinissaat inuiaqatigiinnillu tiguaanissaat akueraa. — 2 Nalunaarsuutit 36:20, 21; Jeremia 25:11, 12.
Ukiuni hundredelinni siullerni kristumiut suna upperaat?
Ukiuni hundredelinni siullerni juutiunngitsut kristumiunngoraangamik guutipiluit Guutimik pallorfiginninnerminni atorunnaartarpaat. Malugiuk apustilip Paulusip oqaluussinera pillugu Efesosimi sølvinik saffiuup guutipiluliortartup Demetriusip oqaasia: “Angutit! Nalunngilarsi pissarissaarnerput akissarsianik taakkuninnga pissuteqartoq. Maanna takuarsi tusaallugulu taassuma Paulusip Efesosimi piinnarnani nunalli immikkoortuani Asiami tamarluinnangajammi inuppassuit ilataariniarai tammartillugillu oqartarami assammik sanaajusut guutiunngitsut.”— Apustilit Suliaat 19:25, 26.
Paulusip Demetriusip unnerluussissutaa nammineq uppernarsarpaa. Paulusimmi grækerit Athenimi oqaluffigigamigit ima oqarpoq: “Isumaqassanngilagut guutiusup assigigaa inuit eqqumiitsuliorneratigut pikkorissusiatigullu kuultimik sølvimik ujaqqamilluunniit ilusilersugaq. Guutip ullut imminik ilisimanninngiffiusut ilaginnaaginnarfigisimagaluarpai, maannali inuit peqqusiffigai tamarmik sumiluunniit ittut allamik isumataassasut.” (Apustilit Suliaat 17:29, 30) Tamanna pillugu Paulusip Thessalonikamiut allaffigai nersualaarlugillu oqaatsinik ukunannga: “Guutipiluit tunullugit Guutimut [saappusi].” — 1 Thessalonikamiut 1:9.
Paulusip kisimi kristumiut pallorfiginninnerminni assilissanik atuinnginnissaannut mianersoqqunngilai; apustili Johannesi aamma taamaaliorpoq. Ukiut hundredellit siulliit naalerneranni Johannesip toqqaannartumik taakku ima allaffigai: “Guutipilunnut mianersoritsi!” — 1 Johannesi 5:21.
Jehovap Nalunaajaasuisa Guutip peqqussutaa erseqqissoq naalappaat Guutimik pallorfiginninnerminni assilissanik sunilluunniit atuinaveersaarlutik. Jehovap Guutip oqaasii uku pimooruppaat: “Uanga tassa [Jehova], tassa atera! Ataqqinassusera tunniutissanngilara kimulluunniit, nersorneqaatissaraluunniit guutilianut.” — Esaja 42:8. (wp09 02/01-E)
[Quppernerup ataani ilanngussaq]
a Naalagaaffilersaarfiit ilaanni Biibilimi inuttaasunik assiliaqarpoq. Assilissalli taakku taamaallaat pinnersaatitut atorneqarput ikonitut imaluunniit assilissatut illernartitatut ataqqiniarneqaratik. Jehovap Nalunaajaasuisa assilissat taakku qinnuiginagilluunniit pallorfigineq ajorpaat.
[Qupp. 10-mi issuagaq]
“Uanga tassa [Jehova], tassa atera! Ataqqinassusera tunniutissanngilara kimulluunniit, nersorneqaatissaraluunniit guutilianut.” — Esaja 42:8