2 Guuti pillugu eqqorluartumik ilisimasaqalerit

“[Inuuneq] naassaanngitsoq tassaavoq ilinnik, ilumut kisimi Guutiusumik . . . ilisimanninneq.”— Johannesi 17:3.

SOOQ TAMANNA SAPERNARPA? Inuit ilaat oqartarput Guuteqanngitsoq. Allat isumaqarput Guuti pissaanerusoq kinaassuseqanngitsoq. Taassuminnga kinaassusiliviusorinnittut taassuma kinaanera qanorlu pissuseqarnera pillugu imminnut akerleriissunik ajoqersuuteqartarput.

QANOQ ILILLUTIT ILISIMASAQALERSINNAAVIT? Guutimik ilisarisimannilertoqarsinnaavoq ilaatigut taassuma pinngortitaanik qimerluuinikkut. Apustili Paulusi Guuti pillugu ima allappoq: “Takussaanngitsuunerami [Pissusii takussaanngitsut, NV], ittuinnartumik pissaanera Guutiussusialu, silarsuup pinngortitaaneraniilli takussaagaluarput suliaasigullu ilisimaneqarlutik.” (Romamiut 1:20) Pinngortitarsuup qimerlooqqissaarneratigut Pinngortitsisup ilisimassusia pissaaneralu pillugit paasisarpassuaqarsinnaavutit. — Tussiaat 104:24; Esaja 40:26.

Guutilli kinaassusivia pillugu ilisimasaqalerumalluni Biibili, Guutip oqaasia, quppertariaqarpoq, aamma nammineq misissortariaqarpoq. Eqqarsartaatsit ilatsiinnarlutit allanit sunnerteqinagu. Biibilimili siunnersuutigineqartoq una maliguk: “Silarsuarmut matumunnga naleqqussarniaqinasi, allanngoritsili isummassigut nutaanngortitaajuarlusi sianigileqqullusiuk sunaasoq Guutip piumasaa: ajunngitsoq, iluarinartoq, naammalluinnartoq.” (Romamiut 12:2) Assersuutigalugu Guuti pillugu paasissutissat Biibilimiittut tulliuttut eqqarsaatigisinnaavatit.

Guuti namminerisaminik ateqarpoq. Guutip aqqa Biibilimi allassimaqqaarfinni tusindileriarluni atorneqarpoq. Aamma nutsikkani arlalinni Tussiaat 83:19-imi atorneqarpoq, ima allassimagami: “Paasitserlugu illit kisivit — aqqit tassaasoq Jahve — Qutsinnerussaartuusutit nunarsuarmi tamarmi.” — Niels Wolfip 1824-mi Tussiaatit kalaallisuunngortikkamigit 83:19-imi ateq Jehova atorpaa.

Jehova Guuti misigissuseqarpoq inuit iliuusiinit sunniuteqarfigineqartartunik. Jehovap Israelikkunnik Egyptenimi inussiaataanermit aniguisitsinerata kingorna, taakkua taassuma siunnersuutai pitsaasut ilaannikkut sumiginnartarpaat. Jehovap taakkua pikitsitsinerat ‘aliasuutigaa’. — Tussiaat 78:40, 1990.

Jehovap tamatta immikkut isumassorpaatigut. Jiisusip ajoqersukkani ima oqarfigai: “Qupaloraarsuit marluk skillingimik akilersillugit tunineqartannginnerpat? Taakkua ilaat ataaserluunniit nunamut nakkarnavianngilaq Ataatarsi najortiginagu. Ilissimi nutsasiluunniit tamarmik kisissimapput. Taamaattumik erseqinasi, ilissi qupaloraarsuppassuarnit pingaarneruvusi.” — Matthæusi 10:29-31.

Jehova ammip qalipaataasa inuiaassutsilluunniit ilaannik pitsaanerutitsinngilaq. Paulusip grækererpaaluit Athenimiittut oqaluttuuppai taakku Guutip ‘inummit ataatsimit pinngortikkai inuiaat tamaasa nunarsuarmilu tamarmi najugassarsisillugit’. Aamma oqarpoq Guuti “ilatsinnit kimilluunniit ungasinngikkaluartoq”. (Apustilit Suliaat 17:26, 27) Apustili Petrusi ima oqarpoq: “Paasilerpara Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.” — Apustilit Suliaat 10:34, 35.

QANOQ ILUAQUTAASSAVA? Inuit ilaasa Guuti ilungersuutigaat “eqqorluartumilli ilisimasaqarnatik”. (Romamiut 10:2, NV) Guuti pillugu Biibilimi sorpiaat ajoqersuutigineqarnersut nalunngikkukku tammartitaanavianngilatit, taassumunngalu ‘qanillisinnaassaatit’. — Jaaku 4:8.

Paasisaqarnerorusukkuit takuuk kapitali 1, “Hvad er sandheden om Gud?”, atuakkami Hvad er det Bibelen virkelig lærer?-imia

[Quppernerup ataani ilanngussaq]

[Qupp. 6-mi assiliartaq]

Guutimik ilisarisimannilertoqarsinnaavoq ilaatigut pinngortitaanik qimerluuinikkut