Qanoq ilillutit Biibilimik paasinnissinnaasutit

3. Allanut ikiortigit

Edward John Eyre narsaamanersuarmi Australiamiittumi Nullarbor Plainimi pisulluni angalagami Australiap inoqqaavinut tassani najugaqartunut ikiortippoq. Taakkua taanna ippinnit orpinnillu eukalyptusinit imermik qanoq pissarsisinnaaneranik ilinniartippaat. Taassuma sumiiffimmik tamatuminnga ilisimannilluartunut ikiortinnini inuuinnassutigaa.

OQALUTTUARINEQARTUMI tamatumani soorlu ersertoq, unamminiarnartumik suliaqassagaanni misilittagaqarnerusumit ikiorneqarneq iluaqutaasarpoq. Biibilimik atuarnialeraanni aamma taamaappoq.

Jiisusip ajoqersukkami Guutip oqaasianik allanneqarsimasumik allanit ikiorneqarnatik paasinninnissaat naatsorsuutiginngilaa. Ilaanni taakkua “siuneqassusiat ammarpaa Allakkat paasisinnaalersillugit”. (Lukasi 24:45) Nalunngilaa Biibilimi ajoqersuutigineqartunik paasinnissagaanni ikiorneqarnissaq pisariaqartoq.

Kikkut ikiortigissavavut?

Jiisusip ajoqersukkani taamatut ikiuinissamik suliassippai. Qilaliannginnermini ima peqqusivoq: “Taamaattumik aallaritsi inunnillu inuiannit tamaneersunik ajoqersuganngortitsigitsi . . . ajoqersorlugillu ilissinnut peqqussutikka tamaasa maleruaqqullugit.” (Matthæusi 28:19, 20, NV) Kristumiup suliassaasa pingaarnersaasa ilaat tassaavoq allanik ilinniartitsineq, tamatumunngalu ilaavoq najoqqutassiat Biibilimiittut ulluinnarni qanoq maleruarneqarsinnaanerannik nassuiaaneq. Kristumiut ilumoortut Biibilimik paasinnikkusuttunik allanik ikiuisarput.

Jiisusip ajoqersukkaminik taamatut peqqusinerata kingorna sivitsunngitsoq soqutiginartumik pisoqarpoq. Biibilimi oqaluttuarineqarpoq kunngip atorfilittaa Etiopiamiu Esajap siulittuutaanik atuartoq. Atuarnermini siulittuut paasiuminaatsitani atuarpaa. Oqaluttuarineqarnera naapertorlugu taassuma uku atuarpai: “Soorlu sava toqukkiartorneqartoq, soorlu savaaraq kissarneqartilluni nilliallanngitsoq, taamatut qarni ammanngilaa. Nikanarsagaanerani eqqartuunneqarnera piiagaavoq. Eqqarlii kia oqaluttuarisinnaavai? Inuunerami nunamit peersitaavoq.” — Apustilit Suliaat 8:32, 33; Esaja 53:7, 8.

Kunngip atorfilittaata Filipi, kristumiu inersimalluartoq Allakkanik Illernartunik ilisimasaqarluartoq, ima aperaa: “Qinnuigaakkit oqarfigeqqullunga kina pruffiitip tassani eqqartoraa. Imminut pinerpoq, allaluunniit pinerpaa?” (Apustilit Suliaat 8:34) Etiopiamiu eqqortuliorusuttoq taanna Jerusalemimiissimavoq Guutimik pallorfiginnikkiartorluni, Guutimullu siulersoqqulluni qinusimagunarpoq. Qularnanngitsumik ilinniarusussuseqarluni atuarsimavoq. Kunngilli atorfilittaata allassimasut suli paasisinnaanngilai. Taamaattumik maniguulluni Filipimut ikioqquvoq. Angutip taassuma Filipip nassuiaataa tusaramiuk ima nuannaartigilerpoq nammineq kristumiunngorusulerluni. — Apustilit Suliaat 8:35-39.

Jehovap Nalunaajaasuisa suliaq Filipip ukiunilu hundredelinni siullerni kristumiut allat ulapputigisaat ingerlateqqippaat. Nunani 235-nit amerlanerusuni namminneq kajumissutsiminnit allat Biibilimi sorpiaat ajoqersuutigineqarnerannik paasinninnissaannut ikiortarpaat sammisat ataasiakkaarlugit misissornerisigut. Taamatut siumukartumik Biibili pillugu kursusernermut ilaavoq sammisaq aalajangersimasoq pillugu Biibilimi qanoq allassimasoqarneranik misissueqqissaarneq.a — Takuuk ungalusaq “Biibili pillugu apeqqutinut akissutit naammaginartut”.

“Apeqqutikka tamaasa akissutissarsivakka”

Steven, Valvanera Jo-Annelu, allaaserisami siullermi issuarneqartut, Jehovap Nalunaajaasuinit Biibilimik atuaqqissaaqatigineqartalerput. Steven ima oqarpoq: “Najoqqutassianik oqaluttuanilluunniit Biibilimiittunik naleqqiussinerinnakkut apeqqummut akissutip suunerata amerlanertigut Biibilimerpiaq paasineqartarnera tupaallaatigaara. Biibilimik atuaqqissaartalinngikkallarama takutinneqarnikuunngilanga qanoq iliortoqartartoq. Oqiliallaatigeqaara paasillugu Biibili paasiumallugu oqallinnernut killeqanngitsunut peqataanissaq paasinnittaatsillu assigiinngilluinnartut isummerfiginissaat pisariaqanngitsoq.”

Valvanerap Steven isumaqatigaa. Ima oqarpoq: “Paasisakka tamarmik imminnut ataqatigiillutillu tunngaveqarluarput. Paasivara taakku ilumoortuusut ‘oqaluffimmi’ ajoqersuutigineqarnerat pissutigiinnarnagu, aammali suut tamarmik pissusissamisoortunik nassuiaatissaqarnerat pissutigalugu.” Jo-Anne ima oqaluttuarpoq: “Apeqqutikka tamarmik Biibili tunngavigalugu akineqarput, tamannalu mianerinnilissutigaara — atuakkiortuanik ataqqinningaalissutigaara — taassuma siumut sillimareerluni apeqqutigineqartunut sunulluunniit akissutit naammaginartut allanneqarnissaat isumagisimammagu.”

Jehovap Nalunaajaasuisa ilaannik ilisarisimasaqarpit? Soormi taanna aperigukku qanoq ililluni taamatut Biibilimik kursusertoqartarnersoq? Jehovap Nalunaajaasuisa ilaannik ilisarisimasaqanngikkuit, taava adressit atuagassiami matumani qupperneq 2-mi allassimasut ilaannut allagit. Guutip anersaavanit ikiorneqaraanni, isummakkut ammagaanni Biibililu pillugu ilinniartitsillaqqissumik ilinniartitsisoqaraanni Guutip oqaasia ilinnut paasiuminaattariaqanngilaq. Biibili paasisinnaavat. (wp09 07/01-E)

[Quppernerup ataani ilanngussaq]

[Qupp. 8-mi ungalusaq/​assiliartaq]]

Biibili pillugu apeqqutinut akissutit naammaginartut

Sammisat Biibilimik kursusernermi Jehovap Nalunaajaasuisa neqeroorutigisartagaanni nassuiarneqartartut ilaat ukuupput:

• Guutip nunarsuaq sumik siunertaqarfigaa?

• Toqungasut sumiippat?

• “Ullussani kingullerni” inuuvugut?

• Sooq Guutip naalliunnartoqarnera akueraa?

• Qanoq ililluni ilaqutariittut pilluartoqarsinnaava?

[Qupp. 7-mi assiliartat]

Biibilimik paasinnigit . . . Guutip anersaavanik qinnutiginninnikkut, isummereernak atuarnikkut, allanut ikiortinnikkut