Jiisusip sumik ilinniartikkaatigut

Inuiaat siunissaat pillugu

Qilaliartoqassasoq Jiisusi neriorsuinikuua?

Aap, neriorsuinikuuvoq! Ataatami eqqaaneeqqulluni Jiisusi nammineq qilammi inuunermut makititaavoq. Toqunnginnermini makititaannginnerminilu ajoqersukkaminut aalajaatsunut aqqanilinnut ima oqarpoq: ‘Ataatama illuani inissat amerlaqaat. Inissassinnik piareersaakkiartorpassi.’ (Johannesi 14:2) Inuilli ikittuinnaat immikkut pisinnaatitaaffimmik tamatuminnga tunineqassapput. Jiisusip ajoqersukkaminut tamanna erseqqissarpaa ima oqarami: “Erseqinasi savarpannguususi ukorsii; Ataatarsimi aalajangiisimavoq Naalagaaffik ilissinnut tunniukkumallugu.” — Lukasi 12:32.

‘Savarpannguit’ qilammi sulerissagamik?

Ikittunnguit taakku Jiisusimik qilammi naalakkersueqateqarnissaat Ataatap kissaatigaa. Tamanna qanoq ililluta nalunngilarput? Jiisusip makititaanermi kingorna apustilimut Johannesimut paasinarsisippaa inuit aalajaatsut aalajangersimasunik amerlassusillit ‘nunarsuarmi [nunamut, 1936] kunngiussasut.’ (Saqqummersitat 1:1; 5:9, 10) Tamanna nutaarsiassaavoq nuannersoq. Inuiaat pisariaqartinnerpaasaasa ilagaat iluamik aqutsisunik naalakkersuisoqarnissaq. Naalakkersuisut taakku Jiisusimit aqunneqartut sunik naammassisaqarsinnaassappat? Jiisusi ima oqarpoq: “Ernioqqissitaaffimmia Inuup Ernera naalannassutsimi issiavissaarsuanut ingippat, taava ilississaaq uannik malinnittusi issiavissaarsuarni aqqaneq-marlunni issiajumaarpusi.” (Matthæusi 19:28) Naalakkersuisut tassaasut Jiisusi taassumalu ajoqersugai ‘nutaanngortitsissapput’, pissutsit naammalluinnartut inuit nunarsuarmi siulliit ajortuliunngikkallaramik nuannaarutigisimasaralui atuutilerseqqillugit.

Jiisusip inuiaat sinneri sumik neriuutissippai?

Jiisusi qilammi inuusussatut pinngortitaasoq, inuilli nunami inuusussatut pinngortitaapput. (Tussiaat 115:16) Jiisusi nammineq imatut oqarpoq: “Ilissi samannga pivusi, uangali pavannga pivunga.” (Johannesi 8:23) Jiisusip inuit nunarsuarmiittut siunissamik nuanningaartumik neriuutissippai. Assersuutigalugu ima oqarpoq: “Pilluarput qanilaartut, taakkuami nunarsuaq kingornutissavaat.” (Matthæusi 5:5) Tussiaat isumassarsiarititaasoq una pigunarpaa: “Qanilaartut nuna kingornutissavaat pilluangaarnertillu nuannaarutigissallugu. Iluartut nuna kingornutissavaat najugaqassallutillu tassani naassaanngitsumik.” — Tussiaat 37:11, 29.

Tassa inuuneq naassaanngitsoq ‘savarpannguit’ qilaliarnissamik neriuutillit kisimik neriuutiginngilaat. Jiisusip aamma eqqartorpaa silarsuup inuisa sinnerinut millionilinnut neriuutissaq ima oqarami: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” — Johannesi 3:16.

Inuit naalliuutaat Guutip qanoq piissavai?

Jiisusip eqqartorpaa inuit naqisimaneqarnernit assigiinngitsunit marlunnit aniguisitaajumaartut ima oqarami: “Maanna silarsuaq manna eqqartuunneqalerpoq, maanna silarsuup matuma naalagaanera ajattorneqassaaq.” (Johannesi 12:31) Siullermik, inuit guutiitsut naalliuutinut pisuusut eqqartuunneqartariaqarput peersitaallutillu. Aappassaanillu, Saatani ajattorneqassaaq inuiannik tammartitsisaarsillugu.

Oqaluttuarisaanerummi ingerlanerani inuusimasorpassuit, Guutip Kristusillu ilinniarnissaannut taakkununngalu uppilernissamut periarfissaqaratik toqusimasut, qanoq pissappat? Jiisusip pinerluttoq kikiattugaaqatini ima oqarfigaa: “Paratiisimeeqatigiumaarparma.” (Lukasi 23:43) Angut taanna, aamma toqusimasut allat millionillit, Jiisusimit nunarsuarmi paratiisiusumi inuunermut makitinneqaruni Guuti pillugu ilinniarnissaminut periarfissaqalissaaq. Qanilaartummi naapertuilluartullu nunarsuarmi inuunermik naassaanngitsumik tunineqarumaartut akornanniissinnaassaaq. — Apustilit Suliaat 24:15. (wp09 08/01-E)

Atuakkami Biibilimi sorpiaat ajoqersuutigineqarpat?b-imi kapitali 3-mi aamma 7-imi amerlanerusunik paasissutissaqarpoq

[Quppernerup ataani ilanngussaq]

[Qupp. 31-mi assiliartaq]

“Iluartut nuna kingornutissavaat najugaqassallutillu tassani naassaanngitsumik.” — Tussiaat 37:29