Kristusip asanninnera asannittuliornissamut kajumississutigaarput

“[Jiisusip] pigisani silarsuarmiittut asajuarsimavai, naggatissamullu allaat asavai.” — JOHANNESI 13:1.

1, 2. (a) Jiisusip asanninnini maluginiarnartumik qanoq ersersippaa? (b) Pissutsini qanoq ittuni asannittuliornissaq sammineqassava?

JIISUSI asannittuliornermut tunngatillugu naammalluinnartumik maligassiuivoq. Taassumunnga tunngasut tamarmik — oqaloriaasia pissusialu, ilinniartitsissutigisai pilliutitullu toqunera — asanninneranik ersersitsipput. Nunarsuarmi inuunermi naanissaata tungaanut naapitaminut, ingammik ajoqersukkaminut, asannittuliortarpoq.

² Jiisusi tamatumunnga tunngatillugu nalissaqanngitsumik maligassiuivoq ajoqersukkami maligassaannik. Tamanna anersaakkut qatanngutitsinnut inunnullu allanut tamatumunnga assingusumik asannittuliortarnissamut kajumississutigaarput. Allaaserisami matumani ilagiinni utoqqaanertat ingasattumik ajortuliorsimasunut allaat asannittuliornermut tunngatillugu Jiisusi sumik ilinniarfigisinnaaneraat misissussavarput. Aammattaaq Kristusip asanninnera qatanngutinik aningaasatigut ajornartorsiortunik, ajunaarnersuarnit nalaanneqartunik perulunnartumilluunniit nappaateqartunik ikiuinissamut qanoq kajumississutigisarneripput misissussavarput.

3. Jiisusip Petrusi ingasattumik ajortulioraluartoq qanoq pivaa?

³ Jiisusip toqunissaanut aqaguttoq Petrusip Jiisusi pingasoriarluni miserratigaa. (Markusi 14:66-72) Petrusili peqqissiminiariartoq Jiisusip taanna isumakkeerfigaa, soorlu tamanna nammineq siulittuutigigaa. Jiisusillu Petrusi annertuunik akisussaaffilerpaa. (Lukasi 22:32; Apustilit Suliaat 2:14; 8:14-17; 10:44, 45) Jiisusip ingasattumik ajortuliorsimasunut isiginnittaasia sumik ilinniarfigaarput?

Ingasattumik ajortuliortoqarsimatillugu Kristusitut isiginnittaaseqarit

4. Ingammik qaqugukkut kristumiutut asanninnermik ersersitsinissaq pisariaqartarpa?

⁴ Ilaquttat ilagiinniittulluunniit ilaannik ingasattumik ajortuliortoqarsimatillugu Kristusitut isiginnittaaseqarnissaq imaannaannginnerpaasarpoq. Ajoraluartumik Saatanip silarsuaata ulluisa kingulliit naggatissaat qanilliartortillugu silarsuup anersaava ileqqorluttoq ingasatsikkaluttuinnarpoq. Silarsuarmi ilatsiinnarlunilu ileqqorlunneq inuusuttut utoqqaallu sunnertissutigisinnaavaat, aqqutikkut amitsukkut ingerlanissaminnik aalajangiusimannippiarunnaarlutik. Ukiuni hundredelinni siullerni ilagiinni kristumiuniittut ilaat ilaajunnaarsinneqartariaqarsimapput allallu naqqinneqartariaqarsimallutik. Ullumikkut aamma taamaattoqartarpoq. (1 Korinthimiut 5:11-13; 1 Timotheusi 5:20) Utoqqaanertalli tamakkuninnga suliaqartartut kristumiutut asanninnermik ersersitsippata, tamanna unioqqutitsisup killinneqaatigingaarsinnaavaa.

5. Kristusip ingasattumik ajortuliorsimasunut isiginnittaasia utoqqaanertat qanoq ilaartariaqarpaat?

⁵ Jiisusip pisimaneratut utoqqaanertat Jehovap najoqqutassiaanik naapertuilluartunik maleruaajuartariaqarput. Maleruaajuarunik Jehovap saamaneranik, inussiarnissusianik asanninneranillu ersersitsissapput. Unioqqutitsisoq ‘sequmissimasumik uummateqarpat’ ‘aserortersimasumillu anersaaqarpat’ utoqqaanertat taassuma ‘iluarsinissaanut ikiornissaa’ ‘qanilaarlutillu’ taamaaliornissartik ajornakusoortinnavianngilaat. (Tussiaat 34:19; Galatiamiut 6:1) Taavami naalasseriitsoqarpat peqqissimilaaginnartumik peqqissiminngilluinnartumilluunniit?

6. Utoqqaanertat unioqqutitsisunik oqaloqateqaraangamik sunaveersaartariaqarpat, aamma sooq?

⁶ Unioqqutitsisimasup Biibili tunngavigalugu siunnersorneqarnini akueriumanngippagu allaluunniit pisuutinniarsarippagu, tamanna utoqqaanertat allallu narrujuummissutigisinnaavaat. Unioqqutitsisup ajoqusiinera nalunngereeramikku unioqqutitsisup iliuusia isiginnittaasialu pillugit namminneq isummamik oqaatiginissaanut ussernartorsiorsinnaapput. Kamannerli narrujuumminerlu aserorsaataapput ‘Kristusillu isumaanik’ (1936), imaluunniit isiginnittaasianik, ersersitsinatik. (1 Korinthimiut 2:16; atuakkit Jaaku 1:19, 20). Jiisusip nalimini inuit oqaatsit toqqaannartut atorlugit mianersoqqusarpai, uumissuinngisaannarporli oqaatsitigullu annersitsinngisaannarluni. (1 Petrusi 2:23) Ajortuliortut peqqissiminissamut Jehovamullu uternissamut periarfissaqartittuaannarpai. Jiisusimmi nunarsuarmukarneranut pissutaasut pingaarnerpaat ilaat tassaavoq ‘ajortilinnik annaassinissaa’. — 1 Timotheusi 1:15.

7, 8. Ilagiinni eqqartuussisunik ataatsimiititaliaq iliuuseqartariaqaraangat utoqqaanertat suut najoqqutarisariaqarpaat?

⁷ Tamatumunnga tunngatillugu Jiisusip maligassiaa ilagiinnit perorsaatissinneqartunut isiginnittaatsitsinnut qanoq sunniuteqartariaqarpa? Eqqaamasariaqarparput ilagiinni eqqartuussisunik ataatsimiititaliaqarsinnaaneq pillugu Biibilimi ilitsersuussutigineqartoq savaatinut illersuutaasoq aamma unioqqutitsisup naqqinneqarsimasup peqqissiminissamut kajumississutigisinnaagaa. (2 Korinthimiut 2:6-8) Soorunami alianartarpoq peqqissimisimanngitsoqaraangat taamaattumillu taakku ilagiinnut ilaajunnaarsinneqartariaqaraangata, nuannertarporli takullugu taakkua ilarpassuisa Jehovamut ilagiivinullu kingusinnerusukkut utertarnerat. Utoqqaanertat Kristusitut isiginnittaaseqarnertik ersersikkaangamikku unioqqutitsisoq ileqquminik eqqarsaatiginninnissaanut kingusinnerusukkullu uternissaanut periarfissittarpaat. Immaqa ilaajunnaarsitaasimasut ilaasa utoqqaanertanit Biibili tunngavigalugu siunnersorneqarnertik annikitsualuttai ilanngullugit eqqaamanngilaat, qularnanngitsumilli eqqaamassavaat utoqqaanertat imminnik soqutiginnillutillu ataqqinnillutillu asannittumik pinninnerat.

⁸ Taamaattumik utoqqaanertat ‘anersaap inerititaanik’, ingammik kristumiutut asanninnermik, ersersitsiuartariaqarput, aamma unioqqutitsisoq siunnersorneqarnerminik akuerinninngikkaluarpat. (Galatiamiut 5:22, 23) Qatanngummik ilagiinnut ilaajunnaarsitsiniapallattussaanngillat. Ersersittariaqarpaat taassuma Jehovamut uternissaa kissaatigigitsik. Unioqqutitsisoq peqqissimillunilu uteruni ilarpassuisa pisarnerattut Jehovamut ‘inunnullu tunissutaasunut’ (NV), ilagiinnut uternissaminnut ajornannginnerulersitsisunut, qujamasungaassaaq. — Efesosimiut 4:8, 11, 12.

Naggatissap nalaani kristumiutut asannittuliorfigeqatigiinneq

9. Jiisusip ajoqersukkaminut qanoq asannittuliorsimaneranik assersuuteqarit.

⁹ Lukasi Jiisusip asannittuliorneranik allaaserisaqarpoq. Jiisusip nalunngilaa kingusinnerusukkut Romamiut sakkutuuisa Jerusalemi, aserugaasussaq, tiguarumaaraat taamaalillutillu illoqarfimmit qimaasoqarnaveersillugu. Taassuma ajoqersukkani asannittumik isumassorlugit ima mianersoqquai: “Takugussiuk Jerusalemi sakkutuunit unguneqarsimasoq, taava nalussanngilarsi piuneerussaaffissaa qanillisoq.” Qanoq iliussappat? Jiisusi paasiuminartumik tamanna pillugu ilitsersueqqissaarpoq: “Taava Judæamiittut qaqqanut qimaassapput; illoqarfimmiittut illoqarfik qimassavaat, nunaannarmiittullu illoqarfimmut isissanngillat. Tassaajumaarput ullut pillarneqarfissat allassimasut tamarmik eqquutissammata.” (Lukasi 21:20-22) Ukiumi 66-imi Romamiut Jerusalemimik ungusinerata kingorna mianersoqqussummik eqqumaffiginnittut naalallutik taassuma ilitsersuussutaa malillugu iliorput.

10, 11. Kristumiut siulliit Jerusalemimit qimaanerat ‘naalliunnartoqangaarnissamut’ piareersimanissamut qanoq iluaqutigisinnaavarput?

¹⁰ Kristumiut Jerusalemimit qimaanerminni imminnut asannittuliorfigeqatigiittariaqarput, Kristusip imminnut asannittuliorsimaneratut. Qularnanngitsumik pigisaminnik aveqatigiittariaqarsimassapput. Jiisusilli siulittuutaa Jerusalemip piuneerunneqarneranut taamaallaat tunnganngilaq. Aamma ima siulittuivoq: “[Taamaannerani] naalliunnartoqangaassaaq silarsuup pileqqaarneraniit maannamut asseqanngitsumik nalliuteqqinngisaannassasumillu.” (Matthæusi 24:17, 18, 21) ‘Naalliunnartoqangaarnissaq’ tamanna sioqqullugu aamma ‘naalliunnartoqangaarnerani’ qularnanngitsumik aamma ajornartorsiuteqartassallutalu pissakilliortassaagut. Kristusitut isiginnittaaseqarnerput tamakkua tamaasa naammagalugit atornissaannut iluaqutigissavarput.

¹¹ Taamanikkussamut Jiisusip maligassiaa malittariaqarparput namminissarsiornatalu asannittuliortariaqarluta. Tamatumunnga tunngatillugu Paulusip oqaaqqissaarutaa una eqqarsaatigisinnaavarput: “Tamatta immikkut eqqarsaatigissavavut tullitta iluaqutissaat ineriartornissaallu. Kristusiluunniimmi imminut eqqarsaatiginngilaq . . . Guutip nikallujuitsuutitsisup tuppallersaasullu tunilisi isummamik taannaasumik ataasiusumik Kristusi-Jiisusip piumasaa malillugu.” — Romamiut 15:2, 3, 5.

12. Kikkunnik asanninnissaq pingaartittariaqarparput, aamma sooq?

¹² Petrusip, Jiisusimit asannittuliorfigineqartup, taamatuttaaq kristumiut kajumissaarpai ‘qatanngutigiittut ilumoortumik asaqatigeeqqullugit’ ‘sallusuissummullu naalaqqullugit’. ‘Uummammik minguitsumik asaqatigiittussaapput’. (1 Petrusi 1:22) Ullumikkut kristumiunit pissuserineqartussat taakku ineriartortinneqarnissaat aatsaat taama pisariaqartigaaq. Guutip innuttai tatineqarneruleraluttuinnalereerput. Kristumiut silarsuatoqqamiittunik sunilluunniit tutsuiginninngikkunik silatusaassapput, soorlu silarsuarmi aningaasatigut ajornartorsiornermit tamanna ersertoq. (Atuakkit 1 Johannesi 2:15-17). Pissutsilli aaqqissuussaanerata maanna atuuttup naggatissaa qanilliartortillugu Jehovamut immitsinnullu attaveqarnerput nakussatsittariaqarparput, ilagiinni ilumoortunik ikinngutitaartorluta. Paulusi ima oqaaqqissaarivoq: “Qatanngutigiittut asaqatigiillusi ungageqatigiigitsi, ataqqeqatigiigitsilu immissinnut akimorniullusi.” (Romamiut 12:10) Aamma Petrusip tamanna erseqqissarpaa ima allakkami: “Tamanit annermik asaqatigiinnersi attattuinnarsiuk, asanninnerup ajorterpassuit matoortarmagit.” — 1 Petrusi 4:8.

13-15. Pinngortitami ajunaarnersuaqarnerata kingorna qatanngutit qanoq kristumiutut asannittuliorsimappat?

¹³ Silarsuarmi tamarmi Jehovap Nalunaajaasui kristumiutut asannittuliortartutut ilisimaneqarput. Assersuutigalugu Jehovamut nalunaajaasorpassuaqarpoq namminneq piumassutsiminnit ikiuiartortunik anorersuarujussuit USA-p kujasissuani 2005-imi sumiiffinnik isorartoorujussuarnik aseruimmata. Jiisusip maligassiaa kajumississutigalugu 20.000-init amerlanerusut namminneq piumassutsiminnit ikiuiartorput, qatanngutitik ajornartorsiortut ikiorniarlugit angerlarsimaffitik ilorrisimaarnartut suliffitillu toqqissisimanartut qimallugit.

¹⁴ Sumiiffiit ilaanni immap nuna 80 kilometerisut isorartutigisoq qarsussimavaa, malissuarlu siulleq qaartoq 10 meterisut portutigisimavoq. Tamaani imaq apparmat illut inigineqartut illullu allat pingajorterutaat aserorluinnarsimapput. Jehovap Nakunaajaasuisa nunanit assigiinngitsuneersut suliassanut assigiinngitsunut pikkoriffillit atortulisarlutik sanaartugassanillu nassarlutik suliarineqartariaqartut suliariartorpaat. Arnat qatanngutigiit marluk uillarnerusut pigisatik biilimut assartuummut ikiorarpaat ikiuutaajumallutillu 3000 kilometerisut ungasitsigisumut biilerlutik. Qatanngutigiit aappaat taamanimiilli tamaaniissimavoq pioneriutigaluni ikiuiniaqatigiinnik tamaaniittunik ikiuiniarluni.

¹⁵ Nalunaajaasut allallu 5600-nit amerlanerusut najugaat tamaaniittut sanaqqinneqarsimallutilluunniit iluarsaanneqarsimapput. Jehovap Nalunaajaasuisa tamaaniittut uppeqatimik taamatut asannittuliungaarnerat qanoq isumaqarfigaat? Qatanngut arnaq aserorsimasumik illulik qamutinut unnuiffiusinnaasunut ussiitsumik qalialimmut ajoqutilimmillu iffiorfilimmut nuussimavoq. Qatanngutit taanna mikisumik atortorissaarluartumilli illuliuuppaat. Kingusinnerusukkut illutaami kusanartup saaniilerluni Jehovamut anersaakkullu qatanngutiminut qujamasunnermik qissaserpoq. Pisimasuni allarpassuarni Jehovap Nalunaajaasui tamaaniittut namminneq illumik sanaqqinneqarnerata kingorna ukioq ataaseq sivisunerusumilluunniit najugarigallakkaminniiginnarput. Sooq? Illutaatik ikiuiartortunut atukkiukkumallugit. Tamanna Kristusip isiginnittaasianik ersersitsineruvoq nuanningaartoq.

Napparsimasunut Kristusitut isiginnittaaseqarneq

16, 17. Qanoq ililluta napparsimasunut Kristusitut isiginnittaaseqarsinnaavugut?

¹⁶ Ilavut ikittuinnaat pinngortitami ajunaarnersuarmit eqqugaasimapput. Tamarluinnangajattali nammineq nappaammit eqqugaasimavugut ilaquttattaluunniit arlaat nappaammit eqqugaasimavoq. Jiisusip napparsimasunut isiginnittaasia uagutsinnut maligassaqqippoq. Taassuma asanninnini kajumississutigalugu taakkua misiginneqatigisarpai. Inuit napparsimasortatik Jiisusimukaammatigit taassuma ‘napparsimasut tamaasa ajorunnaarsippai’. — Matthæusi 8:16; 14:14.

¹⁷ Ullumikkut kristumiut Jiisusitut tupinnartuliornikkut ajorunnaarsitsisinnaanngillat, Jiisusilli pisimaneratut napparsimasunik misigeqatiginnittarput. Tamanna qanoq ersersittarpaat? Assersuutigalugu utoqqaanertat napparsimasut ilagiinniittut pulaarneqarlutillu ikiorneqartarnissaat isumagisarpaat, periaaseq Matthæusi 25:39, 40-mi eqqaaneqartoq malillugu iliorlutik.a (Atuagassaq).

18. Qatanngutit arnat marluk qatanngummut arnamut allamut qanoq ilumoortumik asannittuliorpat, qanorlu sunniuteqarpa?

¹⁸ Soorunami allanut ajunngitsuliorumalluni utoqqaanertaanissaq pisariaqanngilaq. Charlene 44-nik ukiulik kræftimik nappaateqalersimavoq paasitinneqarlunilu ulluni quliinnarni inuusinnaalluni. Anersaakkut qatanngutit arnat marluk, Sharonip Nicolettellu, taassuma pisariaqartitaanik uiutalu taassuminnga isumaginninnerminik artorsaatiginninneranik eqqumaffiginnittut taanna ulluni inuuffiini kingullerni ulloq unnuarlu ikiorpaat. Ullut taakku sivitsorput sapaatit-akunneri arfinilinngorlutik, qatanngutilli arnat taakku marluk taassuma toqussaa tikillugu asannittuliortuarput. Sharon ima oqaluttuarpoq: “Aaqqikkiartornavianngitsoq nalunagu artornarpoq, Jehovalli nakussatsippaatigut. Misigisarput tamanna Jehovamut immitsinnullu qaninnerulissutigaarput.” Charlenep uia ima oqarpoq: “Qatanngutinnguit taakkua marluk inussiarnerlutik ikiuinerat eqqaamajuassavara. Minguitsumik pissuteqarnerat isumalluarnerallu Charlenep aalajaatsup asasama naggammik misilinneqarneranik artornannginnerulersitsivoq uannullu timikkut misigissutsikkullu pisariaqartitannut oqilisaataalluni. Tamanna pillugu qujamasuffigiuassavakka. Imminut pilliutigeriaannaanerat Jehovamut upperninnut nakussatsissutigaara qatanngutigiissuarnillu asanninnerulissutigalugu.”

19, 20. (a) Jiisusip isiginnittaasianut tunngasut suut sammereerpavut? (b) Illit suna aalajangiusimaviuk?

¹⁹ Allaaserisani tulleriinni pingasuni ukunani Jiisusip isiginnittaasianik ersersitseriaatsit tallimat misissorpavut, aamma taassumatut eqqarsartaaseqarnissamut iliortaaseqarnissamullu kajumissaarneqarpugut. ‘Saamallutalu uummatikkut makitajuitta’ taamaalillutalu taanna ilaarlugu. (Matthæusi 11:29, NV) Allanut inussiarnisaartarnissarput ilungersuutigisigu, taakkua naammalluinnanngissutaat sanngiiffiilu erseqqikkaluartut. Aammattaaq sapiitsuusa Jehovalu sutigut tamatigut naalallugu, aamma misilinneqaraluaraangatta.

²⁰ Aamma qatanngutitsinnut tamanut ‘naggatissamut allaat’ asannittuliortarta, soorluttaaq Kristusi taamaaliortarsimasoq. Taamatut asannittuliornitsigut takuneqarsinnaassaaq taassuma ajoqersugarigaatigut ilumoortut. (Johannesi 13:1, 34, 35) Aap, “qatanngutigiittut asaqatigiinnersi atattuinnartissiuk”. (Hebræerit 13:1) Tunuarsimaaqinak! Inuunerit Jehovamik unnersiutiginninnermut allanillu ikiuinermut atoruk! Jehovap ilumoorlutit iliuuseqarniarnitit pilluaqqujumaarpai.

[Quppernerup ataani ilanngussaq]

Uku nassuiarsinnaavigit?

• Utoqqaanertat ajortuliortunut qanoq Kristusitut isiginnittaaseqarsinnaappat?

• Sooq naggatissap nalaani Kristusip asanninneranik ilaarsinissaq immikkut pingaaruteqarpa?

• Napparsimasunut qanoq Kristusitut isiginnittaaseqarsinnaavugut?

[Qupp. 20-mi assiliartaq]

Utoqqaanertat kissaatigaat ajortuliortut Jehovamut uternissaat

[Qupp. 21-mi assiliartaq]

Kristumiut Jerusalemimit qimaasut Kristusip isiginnittaasianik qanoq ersersitsippat?

[Qupp. 22-mi assiliartaq]

Jehovap Nalunaajaasui kristumiutut asannittuliortartutut ilisimaneqarput