Anersaaq illernartoq — Nukik inuuninni pisariaqartitat
“ILINNIT igeqinanga, anersaallu illernartoq uannit peerseqinagu.” (Tussiaat 51:13) Kunngi Daavi kukkorujussuarnermi kingorna qamannga pisumik taama qinuvoq.
Daavip anersaap illernartup nakussatsitsinera misigigajussimavaa. Suli inuusuttuaraalluni anersaaq taanna pissutigalugu Goliati — sorsuttartoq qununartoq — ajugaaffigisinnaanngorsimavaa. (1 Samueli 17:45-50) Aamma tussiaatit erinniarineqarsimasut tusarnernerpaartaasa ilaannik allannissamut nukissaqalersimavoq. Daavip tamanna nammineq ima nassuiarpaa: “Uakkut oqaluppoq [Jehovap] anersaava, oqaasii oqqanniipput.” — 2 Samueli 23:2.
Jiisusip Kristusip uppernarsarpaa anersaaq illernartoq Daavip inuunerani pingaaruteqangaartoq. Ilaanni Jiisusip tusarnaartuni ima oqarfigai: “[Daavi] nammineq Anersaakkut Illernartukkut ima oqarpoq: ‘[Jehova] oqarpoq naalakkannut: “Talerpimma tungaanut inginniarit akeqqatit uannit pisinneqarserlugit isikkavit ataannut.”’” (Markusi 12:36; Tussiaat 110:1) Jiisusip nalunngilaa Daavip anersaamit illernartumit isumassarsisitaalluni tussiaasiani allakkai. Anersaaq illernartoq taanna uagut iluaqutigisinnaavarput?
‘Qinujuaritsi, tunineqassaasi taava’
Immaqa illit tussiaasiunngisaannassaatit. Imaalluarsinnaavorli ajornartorsiuteqalersutit Goliatersuartut sapiissuseerunnartigisunik. Arnaq Isabelimik atilik taamatut ajornartorsiuteqalersimavoq.a Taassuma uiata arnaq inuusunnerusoq pillugu taanna qimappaa. Akiitsugarpassuarnik artukkerlugu qimappaa panimminnillu marlunnik pilersuinissamut iluaqutigisinnaasaanik aningaasatigut tapersersornagu. Taanna ima oqarpoq: “Sumiginnarneqartutut narrugineqartutullu misigaanga. Taamaakkaluartorli qimammangali misigisimavunga Guutip anersaavata illernartup napatikkaanga.”
Isabelip nammineq iliuuseqarnani Guutip anersaavanit illernartumit ikiorneqarnissani naatsorsuutigaa? Naamik. Ullut tamarluinnaasa Guuti kimigiiserluni qinnuigisarpaa anersaaminik illernartumik tuneqqulluni. Nalunngilaa siunissamut isumalluarsinnaajumalluni, meeqqani isumassorluarsinnaajumallugit imminullu nalilittut isigileqqissinnaajumalluni Guutimit nakussatsinneqartariaqarluni. Jiisusip kajumissaarutaa una malillugu iliorpoq: “Qinugitsi [Qinujuaritsi, NV], tunineqassaasi taava; ujarleritsi, nanisissaasi taava; kasuttoritsi, mappiunneqassaasi taava.” — Matthæusi 7:7.
Roberto aamma misigivoq Guutip anersaava pisariaqartillugu. Taassumali tupamik hashimillu pujortartuakkaminik pinngitsuuisinnaannginnini pissutigalugu pisariaqartippaa. Atornerluinini ukiuni marlorsuarni akiorpaa arlaleriarlunilu nakkaqqittoortarluni. Roberto ima nassuiaavoq: “Tamakkuninnga taamaatitsineq eqqissiveqannginnarlunilu uniffeerunnartarpoq. Timi ullut tamaviisa ikiaroornartunut qiisajuartarpoq.”
Roberto ima nangippoq: “Inuunermali allanngortinnissaa aalajangiusimavara Guuti taassuma akuerisinnaasaanik kiffartorfigisinnaaniassagakku. Isumaga eqqarsaatinik nuannersunik Biibilimeersunik ulikkaarniartarpara. Ullut tamarluinnaasa Guutimut qamannga pisumik qinusarpunga qinnuigisarlugulu inuuninni iluarsaassinissannut nakussatseqqullunga. Nalunngilara kisimiillunga iluatsissinnaananga. Aamma takuara Jehovap qinnutikka qanoq akisarai, ingammik nakkaqqittoornerma kingorna ajoraangama. Misigaanga Guutip anersaava illernartoq nukissaqalissutigisarlugu; taassuma anersaavanit ikiorneqarnanga atornerluinera ajugaaffigisimanngisaannassagaluarpara.” — Filippimiut 4:6-8.
“Nattoralittut” sulunigit
Jehovap Nalunaajaasuisa millionillit, Isabelip Robertollu pisimanerattut, anersaap illernartup nukinga inuunerminni malugisimavaat. Jehovap nukinga sulisoq — nukik nunarsuup avataarsuatalu pinngortinneqarnerannut pissutaasoq — nukiuvoq piumaguit ilangiiffigisinnaasat. Ilumoorlutit Guuti tamatuminnga qinnuigigukku, taanna anersaaminik ilinnut tunniussinissaminut kajumissuseqarlunilu piumassuseqassaaq. Anersaarli taanna ilangiiffigisinnaajumallugu Guuti pillugu sallusuissut paasiniartariaqarpat ilumoorlutillu taassuma piumasaatut iliorniarlutit. — Esaja 55:6; Hebræerit 11:6.
Anersaap illernartup nakussatsitsineratigut Guutip iluarisaatut kiffartorfiginissaanut inuuninnilu sumilluunniit ajornartorsiuteqarnissamut nukissaqalersinnaavutit. Biibilimi ima neriorsoqqissaarneqarpugut: “[Jehovap] qasusoq nakussatsittarpaa, nukillaangasoq pissatsittarpaa. . . . [Jehovamik] neriuffiginnittut nutaanik nukinissapput, sulunissapput nattoralittut. Arpassapput qasunatik, ingerlassapput nukillaarnatik.” — Esaja 40:28-31. (wp09 10/01-E)
[Quppernerup ataani ilanngussaq]
a Atit ilaat allanngortitaapput.
[Qupp. 8-mi issuagaq]
‘Ullut tamaviisa Guutimut qamannga pisumik qinusarpunga nakussatseqqullunga. Nalunngilara kisimiillunga iluatsissinnaananga. Aamma takuara Jehovap qinnutikka qanoq akisarai’
[Qupp. 7-mi ungalusaq/assiliartat]
ANERSAAQ ILLERNARTOQ ATORLUGU NAAMMASSINEQARTUT
Guutip anersaaq illernartoq atorpaa nunarsuaq avataarsualu pinngortikkamigit. Tussiaasiortoq ima erinarsorpoq: “Amerlangaarput pinngortitatit, [Jehova]! Pinngortippatit tamaasa ilisimasuullutit. Nunarsuaq pinngortitannik ulikkaarpoq. Anersaat aallartikkaangakku pinngortarpoq inuuneq.” — Tussiaat 104:24, 30; 1 Mosesi 1:2; Jobi 33:4.
Anersaaq illernartoq atorlugu angutit Guutimik mianerinnittut Biibilimik allannissamut isumassarsisitaapput. Apustili Paulusi ima allappoq: “Allakkat Guutimit anersaarfigineqartut tamarmik iluaqutaapput.” (2 Timotheusi 3:16) Jehovap anersaarnerata, imaluunniit anersaavata, Biibilimik allattut eqqarsaataat siulersorpai ‘Guutip oqaasianik’ ingerlatitseqqitsillugit. — 1 Thessalonikamiut 2:13.
Anersaaq illernartoq atorlugu Guutip kiffai eqqoqqissaartumik siunissamik siulittuutiginnissinnaanngortinneqarput. Apustili Petrusi ima nassuiaavoq: “Pruffiitip siulittuutaa sunaluunniit Allakkaniittoq kialuunniit piumasarsuutigiinnarlugu [nassuiarsinnaanngilaa]; pruffiitimmi siulittuutaa inuup piumasaagut tutsiutinngisaannarpoq, Anersaamilli Illernartumit sunnertillutik inuit Guutimit pisumik oqaaseqartarput.” — 2 Petrusi 1:20, 21; Joeli 3:1.
Anersaaq illernartoq iluaqutigalugu Jiisusi angutillu upperluartut allat Guutip naalagaaffia pillugu nutaarsiassamik nuannersumik oqaluussissutiginnillutillu tupinnartuliorput. Jiisusi ima oqarpoq: “[Jehovap] anersaavata tikippaanga [Jehovap] tanitarimmanga. Aallartippaanga nalunaarut nuannersoq piitsunut tusarliuteqqullugu, torlulaatigeqqullugu parnaarussat iperagaanissaat tappiitsullu tappissinissaat.” — Lukasi 4:18; Matthæusi 12:28.
[Qupp. 9-mi ungalusaq/assiliartat]
ANERSAAQ ILLERNARTOQ IMA ILUAQUTIGISINNAAVARPUT
Anersaaq illernartoq ussernartunik akiuinissamut ileqqunillu ajoqutaasunik ajugaaffiginninnissamut nakussatsissutigisinnaavat. Apustili Paulusi ima allappoq: “[Guuti] unneqqarippoq; akuersaarumanngilaa artukkassinnik usserneqarnissarsi, kisianni usserneqarnermut ilagitillugu aniguiffissaq pilersissavaa artorsartitaaqqunasi.” — 1 Korinthimiut 10:13.
Anersaaq illernartoq pissuserineqartussanik Guutip iluarisaanik ineriartortitsinissamut iluaqutigisinnaavat. “[Anersaap] inerititai tassaapput asanninneq, nuannaarneq, eqqissineq, kamajasuunnginneq, inussiarnisaarneq, ajunngitsuuneq, unneqqarissuseq [upperneq, NV], qanilaarneq imminullu naalakkersinnaaneq.” — Galatiamiut 5:22, 23.
Anersaaq illernartoq misilinneqaatit naammagalugit atornissaannut nakussatsissutigisinnaavat. “Tamaasa pissatsitsisikkut atussallugit sapinngilakka.” — Filippimiut 4:13.