Ajornartorsiungaarfiusuni nuannaartuarit
“[Jehovami] qimarnguffissarsiortut tamarmik nuannaassapput, qiimmattassapput naassaanngitsumik.” — TUSSIAAT 5:12.
1, 2. (a) Annikilliuutit ullumikkut isumatsassutaangaartut ilaannik eqqaasaqarit. (b) Kristumiut inuit annikilliuutigisartagaasa saniatigut suna naammagalugu atortariaqarpaat?
JEHOVAP NALUNAAJAASUI ajunaarnernit inunnik eqquisartunit sunnertinngitsoorsinnaanngillat. Guutip innuttaasa ilarpassui pinerluttuliornernit, sorsunnernit naapertuilluanngitsuliornernillu allanit eqqugaasimapput. Pinngortitarsuarmi ajunaarnersuit, piitsuussuseq, nappaatit toqulu isumatsassutaangaartarput. Apustili Paulusi eqqorluartumik ima allappoq: “[Nalunngilarput] pinngortitat tamarmik suli peqatigiillutik anersaarulullutillu nimaartut.” (Romamiut 8:22) Aammattaaq nammineq naammalluinnanngissutsitta kinguneri misigisarpavut. Kunngip Daavip pisimaneratut immaqa ima oqarpugut: “Ajortuliama artorsippaannga, nanertuutaalerpoq uannut oqimaappallaartoq.” — Tussiaat 38:5.
2 Inuit tamarmik annikilliuutigisartagaasa saniatigut kristumiut ilumoortut aamma nappagaq anniartitaaffik assersuutaasoq ersuttariaqarpaat. (Lukasi 14:27) Aap, Jiisusip ajoqersugai uumissorneqarlutillu malersugaapput, soorlu taanna nammineq taama pineqarsimasoq. (Matthæusi 10:22, 23; Johannesi 15:20; 16:2) Taamaattumik Kristusimik malinnissagutta silarsuassami nutaami pilluaqqussutissat utaqqitillugit ilungersortariaqarlutalu pinertusaartariaqarpugut. — Matthæusi 7:13, 14; Lukasi 13:24.
3. Biibilimi allassimava kristumiut Guutimit iluarisaajumallutik naalliuttariaqartut?
3 Imaappa kristumiut ilumoortut nuannaanngivillutik pilluanngivillutillu inuusariaqartut? Naggatissap tikiunnissaata tungaanut inuunitta aliasunneq eqqarsaatillu alianartut kisiisa ilisarnaatigissavai? Naamik, erseqqilluinnarpoq Jehovap kissaatigigaa nuannaassasugut piffissap neriorsuutiminik eqqortitsiffissami nalliunnissaa utaqqitillugu. Biibilimi Guutimik pallorfiginnittut ilumoortut inuttut nuannaartutut allaatigineqaqattaarput. (Atuakkit Esaja 65:13, 14). Tussiaat 5:12-imi ima allassimavoq: “[Jehovami] qimarnguffissarsiortut tamarmik nuannaassapput, qiimmattassapput naassaanngitsumik.” Aap, ajornartorsiuteqaraluarluni nuannaangaartoqarsinnaallunilu nalerisimaangaartoqarsinnaallunilu qamuuna eqqissisoqarsinnaavoq. Biibili misilinneqaatit nuannaarluta naammagalugit atornissaannut qanoq iluaqutigisinnaaneripput misissoriartigu.
Jehova — ‘Guuti pilluartoq’
4. Guuti piumasani sumiginnarneqaraangat qanoq misigisarpa?
4 Assersuutigalugu eqqarsaatigeriaruk Jehovamut namminermut tunngatillugu qanoq innersoq. Guutiugami ajugaqanngitsoq nunarsuaq avataarsualu pissaaneqarfigalugillu oqartussaassuseqarfigai. Sumilluunniit amigaateqarnanilu kimilluunniit pisariaqartitsinngilaq. Killeqanngitsumilli pissaaneqaraluarluni Jehova pakatsisimassaaq ernermi anersaajusut ilaat pikitsitsillunilu imminut Saataninngortimmat. Aamma inngilit allat pikitsitsisumut ilaliummata Guutip aalaterneqaatigisimassavaa. Aammattaaq eqqarsaatigiuk Adamip Evallu, pinngortitami nunamiusut pingaarnersaasa, imminik tunussinerat Guutip qanoq anniaatigitigisimassaneraa. Taamanimiilli taakkua kinguaavi milliardillit aamma Jehovap oqartussaassusianik ajattuisimapput. — Romamiut 3:23.
5. Ingammik suut Jehovap aliasuutigisarpai?
5 Saatani suli pikitsitsivoq. Ukiut 6000-it missaanni Jehovap inuit guutipilussiornerat, peqqarniisaarnerat, toqutsisarnerat kinguaassiuutitigullu ileqqorlunnerat isigisimavaa. (1 Mosesi 6:5, 6, 11, 12) Aammattaaq salluliuutaat imminillu mitaatiginninnerat tusartarpai. Allaat Guutimik pallorfiginnittut ilumoortut ilaannikkut taanna aliasutsittarsimavaat. Tamanna Biibilimi ima allaatigineqarpoq: “Qassinimmitaava naalaalliorfigaat inoqajuitsumi, aliasuutissiorlugu nunami ivigarsuartuumi!” (Tussiaat 78:40, 1990) Tassa Jehovap inunnit ajattorneqarnini anneringaartarpaa. (Jeremia 3:1-10) Aamma pisut ajortut tamaasa Jehovap aliasuutigingaartarpai. — Atuaruk Eqqartuussisut 10:16.
6. Guuti annikilliornernut qanoq periartarpa?
6 Jehovalli aliasunnini pakatsininilu iliuuseqarsinnaajunnaassutigineq ajorpai. Ajornartorsiuteqalerniariartoq tamatuma sunniutai ajortut annikillisinniarlugit iliuuseqartarpoq. Aamma siunertani naggataatigut eqquuteqqullugu piareersaasimavoq. Taamaalilluni Jehovap kisimi oqartussaassutsimi qutsissisinnissaa tamatumalu kingunerisaanik pallorfiginnitsiminut ilumoorfiginnittunut pilluaqqussutaajumaartut qilanaarisinnaavai. (Tussiaat 104:31) Aap, Jehova taamarsuaq nikanarsarneqarsimagaluarluni ‘Guutiuvoq pilluartuartoq’. — 1 Timotheusi 1:11; Tussiaat 16:11.
7, 8. Ingerlanerliorutta Jehova qanoq ilaarsinnaavarput?
7 Ilumoorpoq uagut ajornartorsiutinik aaqqiisinnaaneq eqqarsaatigalugu Jehovamut naleqqiussinnaanngitsugut. Taamaakkaluartorli atugarlioraangatta Jehova ilaarsinnaavarput. Ingerlanerlioraanni nikallungasarneq nalinginnaavoq, nikallungajuarnissarli pisariaqanngilaq. Jehova assilillugu pinngortitaagatta eqqarsarsinnaallutalu atoriaannaasumik ilisimassuseqarpugut. Taamaattumik ajornartorsiutivut eqqarsaatigeqqissaarsinnaavavut periarfissaqaliinnartorlu aaqqinniarlugit iliuuseqarsinnaalluta.
8 Inuunermi ajornartorsiutit naammagalugit atornissaannut iluaqutigisinnaasarput pingaarutilik tassaavoq ilaannikkut iliuuseqarfigisinnaanngisatsinnik ajornartorsiuteqartarneranik miserratiginninnginneq. Iliuuseqarfigisinnaanngisatsinnik isumakuluutiginnippallaarutta suli eqqissiunnaarnerusinnaavugut pallorfiginninnermullu ilumoortumut tunngassuteqartut ilarpassui nuannaarutigiunnaarsinnaallutigit. Ajornartorsiut aaqqinniarlugu silatusaartumik iliuuseqareerutta pitsaanerpaassaaq ingerlaqqikkutta nalerisimaarnarnerusumillu ulapputeqarluta. Oqaluttuani Biibilimeersuni tulliuttuni tamanna erseqqissarneqarluarpoq.
Isumatusaartuunissaq pingaaruteqarpoq
9. Hanna qanoq isumatusaarpa?
9 Pissutsit Hannap, pruffiitimut Samuelimut anaananngortup, atugai misissoriartigit. Meerartaarsinnaannginnini aliasuutigeqaa allaallu meerartaarsinnaannginnini pillugu mitaatigineqartarluni. Ilaannikkut Hanna ima nikallungatigisarpoq qiasarluni neriumanerlu ajorluni. (1 Samueli 1:2-7) Ilaanni Jehovap illernartuutaaniitilluni Hanna ‘isumatsassimaqaluni Jehovamut qinuvoq nipituumik qiaatigaluni’. (1 Samueli 1:10) Hannap Jehovamut qinunikkut uummammiuni aniatereermagit palasiunerup Elip taanna saaffigaa imalu oqarluni: “Eqqissillutit aallarit! Israelip Guutiata qinnutigisannik tunissavaatit.” (1 Samueli 1:17) Taamaalinerani Hannap erseqqissumik nassuerutigaa iliuuserisinnaasani tamaasa iliuuserisimallugit. Ernisuitsuunini nammineq iliuuseqarfigisinnaanngilaa. Hanna taamatut isummerami isumatusaarpoq. “Taava qimaguppoq. Kingumut nerisalerpoq isikkualu aliasuppalukkunnaarluni.” — 1 Samueli 1:18.
10. Paulusi ajornartorsiummut aaqqissinnaanngisaminut piviusorsiortumik qanoq isiginnittaaseqarpa?
10 Apustili Paulusi tamatumunnga assingusumik isiginnittaaseqarpoq. Ajuuteqarpoq assut ippingiatuutigisaminik. ‘Kapinartumik timiminut kapputtumik’ taavaa. (2 Korinthimiut 12:7) Tamanna suusimagaluarpalluunniit Paulusip taanna qaangerniarlugu iliuuserisinnaasani iliuuseraa taanna peersitaaqqullugu Jehovap qinnuigineratigut. Paulusip Jehova qasseriarluni tamatuminnga qinnuigaa? Pingasoriarluni. Tamatuma kingorna Guutip Paulusi paasitippaa ‘kapinartoq timaanut kapputtoq’ tupinnartuliornikkut peerneqarnavianngitsoq. Paulusip tamanna akueraa Jehovallu tamakkiisumik kiffartorfiginissaa ulapputigalugu. — Atuakkit 2 Korinthimiut 12:8-10.
11. Qinuneq torlorfiginninnerlu ajornartorsiutitta naammagalugit atornissaannut qanoq pingaaruteqartigippat?
11 Taakku assersuutigineqarmata imaanngilaq Jehova naalliuutigisatsinnut tunngatillugu ikioqqulluta qinnuigisarunnaassagipput. (Tussiaat 86:7) Guutip oqaasiani ima kajumissaarneqarpugut: “Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu.” Jehova torlorfigigaangatsinni qinnuigigaangatsinnilu qanoq periartassava? Tamanna Biibilimi ima akineqarpoq: “Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.” (Filippimiut 4:6, 7) Aap, imaassinnaavoq Jehovap ajornartorsiut piinngikkaa, qinnutivulli akisinnaavai isumatta, imaluunniit eqqarsarsinnaassutsitta, sernissorneratigut. Ajornartorsiut qinnutitsinni eqqaareerutsigu isumakuluutiginnippallaarnerup navianartuunera immaqa paasilluarsinnaanerussavarput.
Guutip piumasaatut iliornerit nuannaarutigiuk
12. Sooq sivisuumik nikallunganeq ajoqutaasinnaava?
12 Ussatit 24:10-mi ima allassimavoq: “Ullormi annikilliorfiusumi sapiissuseerukkuit taava nukitit annikillissapput.” Allamik aamma ima ussateqarpoq: “[Uummatikkut] aliasunnerup nikallunganeq ilagisarpaa.” (Ussatit 15:13) Kristumiut ilaat ima nikallorsimatigipput Biibilimik atuartarunnaarsimallutik Guutillu oqaasianik eqqarsaatiginneqqissaartarunnaarsimallutik. Qinnutaat qalliinnarsiortuulersimapput, immaqa aamma uppeqatiminnit immikkoorniarput. Sivisuumik taamatut nikallunganeq ajoqutaasinnaavoq. — Ussatit 18:1, 14.
13. Sunik sammisaqarneq nikallungajunnaarnissamut ilaatigullu nuannaalernissamut iluaqutigisinnaavarput?
13 Isumalluartuuguttali tamanna inuunermi nuannaarutigisinnaasat isiginiarnerunissaannut iluaqutigisinnaavarput. Daavi ima allappoq: “Guuti, piumasat malillugu iliornissaq tassa kajungerisara.” (Tussiaat 40:9) Inuunitsinni arlaannik ajortoqarpat teokratiimut tunngatillugu ileqquvut iluaqutaasut unitsinngilluinnartariaqarpavut. Eqqarsaatinut nuanniitsunut nikallunganermullu akiuussutissaq tassaavoq nuannaarnartunik sammisaqarneq. Jehovap oqaluttuuppaatigut oqaatsiminik atuarnitsigut aalajangersimasumillu tamatuminnga ‘isumaliutiginneqqissaartarnitsigut’ nuannaalerlutalu pillualersinnaasugut. (Tussiaat 1:1, 2; Jaaku 1:25) Biibili kristumiullu ataatsimiinneri aqqutigalugit ‘oqaatsinik tusaruminartunik’ ineriartuutigisinnaasatsinnik uummatitsinnillu nuannaalersitsisinnaasunik tunineqartarpugut. — Ussatit 12:25; 16:24.
14. Jehovap neriorsuutaa suna ullumikkut nuannaarutigaarput?
14 Guutip nuannaarnissamut pissutissarpassuaqartippaatigut. Ingammik annaanneqarnissatsinnik neriorsuutaa nuannaarutaangaarpoq. (Tussiaat 13:6) Nalunngilarput maannakkut uagutsinnut qanorluunniit pisoqaraluarpat Guutip ilumoorlutik imminik ujarlersut naggataatigut akissarsisikkumaarai. (Atuaruk Oqaluussisartup oqaasii 8:12). Pruffiitip Habakkukip tamatuminnga qularutiginninnginnini nuannersumik ersersippaa ima allakkami: “Orpik figeneqartartoq inerititaqanngikkaluarpalluunniit viinnequllu viinnissanik naatitsinani, orpik oliveneqartartoq inerititaqanngikkaluarpalluunniit narsaatillu nerisassarsiffigineqaratik, savaatit ungaluliamit piiagaagaluarpataluunniit nersutaatillu inaanni ussinnik amiakkuerulluni — taamaakkaluartoq [Jehova] qiimmattaatigissavara, Guuti annaassisiga tipaatsuutigalugu.” — Habakkuki 3:17, 18, 1990.
‘Pilluarput inuiaat Jehovamik Guuteqartut!’
15, 16. Siunissami pilluaqqussutissat utaqqitillugit Guutip tunissutaasa nuannaarutigisinnaasatta ilaannik eqqaasaqarit.
15 Siunissaq nuanningaartoq utaqqitillutigu Jehovap kissaatigaa uagutsinnut tunissutini ajunngitsut nuannaarutigissagivut. Biibilimi ima allassimavoq: “Paasivara inunnut pitsaanerpaassasoq inuunertik atorunikku nuannaarlutik inuunermilu pilluarneq nanillugu. Inuit nerillutillu imersinnaammata suleruloornermillu inerititaat inuulluutigisinnaallugit tamannaavortaaq Guutip tunissutaa.” (Oqaluussisartup oqaasii 3:12, 13) ‘Inuunermi pilluarnermik nanisinermut’ ilaavoq allat iluaqutissaannik ajunngitsuliortarneq. Jiisusi oqarpoq tunisineq tigusinermit pilluarnarnerusoq. (Apustilit Suliaat 20:35) Aappatsinnik, qitornatsinnik, angajoqqaatsinnik ilaquttatsinnillu allanik isumassuineq nalerisimaarutigingaartarparput. (Ussatit 3:27) Aamma anersaakkut qatanngutitsinnut asannittuullutalu inoroorsaartuullutalu isumakkeerfiginnittuunerput nuannaarutigingaartarparput. (Galatiamiut 6:10; Kolossemiut 3:12-14; 1 Petrusi 4:8, 9) Aamma imminut pilliutigeriaannaalluta kiffartornerput pilluaqqusaanangaarpoq. Tamakkuninnga tamanik iliuuseqarnerput Jehovap iluarisarpaa.
16 Oqaatsini Oqaluussisartup oqaasiinit qulaani issuarneqartuni inuunermi ulluinnarsiutit nuannaarutigineqarsinnaasut eqqaaneqarput, soorlu ‘imerneq nerinerlu’. Aap, ajornartorsiuteqaraluaraangatta Jehovap pigisatigut uagutsinnut tunissutai nuannaarutigisinnaavavut. Aammattaaq seqernup tarrikkiartornera kusanangaartoq, nunap isikkua alianaaqisoq, piaqqat pinnguarnerat pinngortitamilu tupinnartut allat nuannaarutaapput akeqanngitsut mianerinningaalersitsisarlutillu nuannaalersitsisartut. Tamakkuninnga eqqarsaatiginninnerput Jehovamik, ajunngitsunik tamanik Tunisisumik, asanninnitsinnut nakussatsissutaassaaq.
17. Ajornartorsiutitsinnit qanoq ililluta aniguisitaalluinnassaagut, tamannalu nalliutserlugu suna tuppallersaatigaarput?
17 Guutimik asanninnerput, peqqussutaanut naalannerput utertitsissutitullu pilliummik upperinninnerput naammalluinnanngitsuulluni inuunerup ajornartorsiutaanit aniguisitaalluinnarnitsinnik naassaanngitsumillu nuannaarnitsinnik naggataatigut kinguneqarumaarpoq. (1 Johannesi 5:3) Tamanna nalliutserlugu tuppallersaataavoq nalunagu Jehovap artorsaatitsinnik tamanik ilisimanninnera. Daavi ima allappoq: “Unneqqarissutsit qiimmattaatigalugulu tipaatsuutigissavara. Annikilliornera takoreerpat, annikilliuutinni ikiorparma.” (Tussiaat 31:8) Jehovap asanninnini kajumississutigalugu ajunaarnernit aniguisikkumaarpaatigut. — Tussiaat 34:20.
18. Sooq nuannaarneq Guutip innuttaani malunnartariaqarpa?
18 Jehovap neriorsuutiminik eqquutitsinissaa utaqqitillugu taanna, Guuti pilluartoq, ilaartigu. Pingaaruteqarpoq misigissutsit nikallornartut uagutsinnik anersaakkut susinnaajunnaarsitsisinnginnissaat. Qanortoq ajornartorsiuteqaleraangatta eqqarsarsinnaassutsitsinnit ilisimassusermillu atoriaannaasumit siulersortittarisa. Jehovap misigissutsitsinnik aqutsinissamut pisimasullu nuanniitsut kingunerisaannik misigissutsikkut artorsannginneruniarluta sapinngisatsinnik iliuuseqarnissamut ikiorumaarpaatigut. Ajunngitsut taassuma tunniussai, tigussaasut anersaakkullu ittut, nuannaarutigisigit. Jehovamut qanittumik attaveqarnitsigut nuannaarsinnaassaagut, ‘pilluarpummi inuiaat Jehovamik Guuteqartut!’ — Tussiaat 144:15.
Suna ilikkarpiuk?
• Ajornartorsioraangatta Jehova qanoq ilaarsinnaavarput?
• Isumatusaartuuneq ajornartorsiutit naammagalugit atornissaannut qanoq iluaqutigisinnaavarput?
• Ajornartorsiungaarfiusuni Guutip piumasaatut iliorneq qanoq ililluta nuannaarutigisinnaavarput?
[Qupp. 16-mi assiliartat]
Pisartut ajortut tamaasa Jehovap aliasuutigingaartarpai
[Suminngaanneernera]
© G.M.B. Akash/Panos Pictures
[Qupp. 18-mi assiliartat]
Jehovap nuannaartuarnissamut pisariaqartitatsinnik tamanik tunivaatigut