Guutimut palligunniarit

Neriorsuutiminik eqquutitsisartoq

JOSVA 23:14

ALLANUT tatiginninnissat ajornakusoortippiuk? Ajoraluartumik silarsuarmi tatigeqatigiinnermik aseruiffiusartumi inuuvugut. Tatigisannit ajuallatsinneqarsimaguit — immaqa sallunikkut neriorsuinerlunnikkulluunniit — tatiginninnissat sapernartilersimassavat. Pakatsisinneqanngivillutilli tatigisaqarsinnaavutit. Ussatit 3:5-imi ima kajumissaaruteqarpoq: “[Jehova] tatigiuk uummatikkut iluunngarlutit.” Sooq Jehova taama tatigineqartariaqarpa? Apeqqut tamanna akissutissarsiniarlugu Josvap — angutip Jehovamik tatiginnilluinnaqqissaartup — Josva 23:14-imi qanoq oqarsimanera misissoriartigu.

Pisimasoq takorlooriaruk. Josva, Israelikkut siulersuisuattut Mosesip kingoraartaa, 110-nik ukioqangajalerpoq. Inuunermini sivisuumi Israelikkut iluaqutissaattut Jehovap tupinnartuliarpassuinik — soorlu ukiut 60-it missiliorlugit tamatuma siorna tupinnartuliornikkut Immakkut Aappalaartukkut aniguisitaanerannik — takunnittuusimavoq. Josvap inuunini kingumut eqqarsaatigaa Israelikkullu ‘utoqqaanertai, qullersaat, eqqartuussisui allattuusullu’ katersorlugit. (Josva 23:2) Oqaatigiumasai inuunermini misigisimasaanik ersersitsiinnaratik aammali inuup upperluartup eqqarsaataanik ilorlerpaanik ersersitsipput.

“Maanna kikkulluunniit atorumaagaat atortussanngorpara.” Josva taamatut nassuiaavoq. Oqaariartaaseq “kikkulluunniit atorumaagaat” toqumut assersuutigineqartarpoq. Josva oqarporlusooq: “Inuunera naangajalerpoq.” Josvap toqungajalerluni nalunnginnamiuk eqqissilluni inuunerisimasani eqqarsaatigeqqissaartarsimassavaa. Uppeqatiminut naggammik qanoq oqaaseqarumava?

Josva ima nangippoq: “Ajunngitsut [Jehovap] Guutissi ilissinnut oqaatigisaasa ilaat ataasinnguarluunniit [qammuinnarsimanngilaq]. Tamarmik piviusunngorsimapput, oqaaseq ataasiinnarluunniit maangaannarsimanngilaq.” Oqaatsit taakku angummit Guutimik tatiginneqqissaartumit oqaaserineqarput. Qanoq ililluni taamatut tatiginnilerpa? Josvap inuunerminit misilittakkaminit tamanit misigisimavaa Jehova neriorsuutiminik eqquutsitsiuaannartoq.a Josvap anguniagaa erseqqippoq: Kissaatigaa Israelikkoqatimi Jehovap siunissaq pillugu neriorsuutaanik tamanik aamma eqquutitsiumaarneranik tatiginnilluinnarnissaat.

Josva 23:14-mut tunngatillugu qinerlerfissiami Biibilimut tunngasumi ima allassimavoq: “Biibilimi neriorsuutit tamaasa eqqarsaatigeriakkit, oqaluttuarisaanermillu ujarlerfissiat tamaasa ujarlerfigalugit, taava nunarsuarmi pinngortitat tamaasa aperikkit paasiniarlugu ilumut ataasinnguamilluunniit assersuutissaqarnersoq Guutip neriorsuutiminik eqquutititsisimannginneranik puiugaqarsimaneranilluunniit.” Taamatut misissuisinnaagutta Josvatut isummissagaluarpugut — Jehovap neriorsuutai eqquuttuaannarput. — 1 Kunngit 8:56; Esaja 55:10, 11.

Guutip neriorsuutai eqquutereersimasut Biibilimi allaatigineqarput, taakkualu ilaat maannakkorpiaq eqquupput. Biibilimi aamma Jehovap siunissaq pillugu neriorsuutai nuannersut allaatigineqarput.b Neriorsuutinik taakkuninnga nammineq misissuineq silatusaarnerussaaq, ilaa? Biibilimik atuaqqissaartarnikkut qularutigiunnaarsinnaavat Guuti neriorsuutiminik eqquutitsiuaannartoq illit tatigisariaqarlugu. (wp10 01/01-E)

[Quppernerup ataani ilanngussat]