Ilissi arnat, sooq uissinnut naalatsigitissavisi?
‘Arnap angut niaqoraa.’ — 1 KORINTHIMIUT 11:3.
1, 2. (a) Jehovap siulersuinermik aaqqissuussaanut naalatsigitinnermullu tunngatillugu Paulusi qanoq allappa? (b) Apeqqutit suut allaaserisami matumani sammineqassappat?
JEHOVAP siulersuinermik aaqqissuussaq apustilip Paulusip ‘angutip kialuunniit Kristusimik niaqoqarnera’ ‘Kristusillu niaquata Guutiunera’ pillugit allakkami eqqaasaa pilersippaa. (1 Korinthimiut 11:3) Allaaserisap matuma siuliani sammineqarput Jiisusip ‘Niaqquminut’, Jehovamut Guutimut, naalatsigitinnini nuannaarutigalugulu immikkut pisinnaatitaaffittut isigigaa aamma angutit kristumiut Kristusi ‘niaqorigaat’. Kristusi inussiarnersuuvoq saamasuullunilu, misiginneqatiginnittuulluni allanullu tunngatillugu namminissarsiortuunani. Angutit ilagiinni kristumiuniittut allat, ingammik nuliatik, taamatut pisariaqarpaat.
2 Arnalli kina ‘niaqoraat’? Apustili Paulusi ima allappoq: ‘Arnap angut niaqoraa.’ Arnat oqaatsit isumassarsiarititaasut taakku qanoq isigissavaat? Najoqqutassiaq taanna uiusoq nuliaminit allaanerusumik upperisaqartillugu aamma atuuttarpa? Nuliaasoq uiminut naalatsigitissammat imaappa oqassanani inooqataaginnassasoq, isummani oqaatigisinnaatitaanagu? Arnaq qanoq ililluni nersortarialinngorsinnaava?
“Ikiortissiussavara”
3, 4. Sooq aappariinnermi siulersuinermik aaqqissuussamik malinninnissaq iluaqutaava?
3 Guutip aalajangerpaa ilaqutariinni kina siulersuisuussanersoq. Adami pinngortinneqareermat Jehova Guuti ima oqarpoq: “Iluanngilaq inuk kisimiimmat, ikiortissiussavara taassumunnga tulluartumik.” Eva pinngortinneqareermat Adamip inooqatissaqalerlunilu ikiortissaqalernini ima pilluaatigitigaa ima oqarluni: “Tamanna tassa saaneq saanerma ilaa uinillu uinimma ilaa.” (1 Mosesi 2:18-24) Adamip Evallu inuiannut naammalluinnarlutillu pilluartunut paratiisimi nunarsuarmi tamarmiittumi naassaanngitsumik inuusinnaasunut siuaasanngornissartik qilanaarisinnaavaat.
4 Siuaasavut siulliit pikitsitsimmata Naatsiivimmi Edenimi pissutsit naammalluinnartut atuukkunnaarput. (Atuaruk Romamiut 5:12). Siulersuinermilli aaqqissuussaq suli atuuppoq. Aaqqissuussaq tamanna eqqortumik malinneqaraangat aappariinnermi iluaqutaangaartarlunilu nuannaarutaangaartarpoq. Jiisusittaaq ‘Niaqquminut’, Jehovamut, naalatsigitinnini iluaqutigaa. Jiisusi inuttut inunngunngikkallarami Jehovap ‘saani nuannaartuarpoq’. (Ussatit 8:30) Naammalluinnanngissuseq pissutigalugu angutit oqartussaassusertik tamakkiisumik atorsinnaanngilaat, aamma arnat tamakkiisumik naalatsigitissinnaanngillat. Uiusulli nuliaasullu Guutip siulersuinermik aaqqissuussaa malinniarlugu sapinngisartik tamaat iliuuseqarunik naammalluinnanngitsuutillutik sapinngisamik annerpaamik nuannaarlutillu nalerisimaassapput.
5. Sooq aappariit siunnersuut Romamiut 12:10-miittoq malittariaqarpaat?
5 Aappariittut ingerlalluarnissamut aalajangiisuusoq tassaavoq aappariit siunnersuummik Biibilimiittumik kristumiunut tamanut atuuttumik matuminnga malinninnissaat: “Qatanngutigiittut asaqatigiillusi ungageqatigiigitsi, ataqqeqatigiigitsilu immissinnut akimorniullusi.” (Romamiut 12:10) Uiusoq nuliaasorlu ‘imminnut ajunngitsuliorfiginiarlutik nallittorniarlutillu, isumakkeerfigeqatigiittarniarlutillu’ ilungersortariaqarput. — Efesosimiut 4:32.
Aapparisaq allamik upperisaqaraangat
6, 7. Nuliaasup kristumiup uiminut allamik upperisalimmut naalatsigitinnera qanoq kinguneqarsinnaava?
6 Taavami illit aappat Jehovamut kiffartortuunngippat? Amerlanertigut uiusoq taannaasarpoq Jehovamut nalunaajaasuunngitsoq. Taamaappat, taava nuliaasup taanna qanoq pisassavaa? Biibilimi tamanna ima akineqarpoq: “Ilissi nuliaasusi uissinnut naalatsigitissaasi, uiusut ilaat oqaatsimut naalasseriikkaluartut oqaluffigineqanngikkaluarlutik nuliamilli inuusaasiatigut ilanngussinnaaqqullugit Guutimik mianerinnillusi inuunersi minguitsoq takulerunikku.” — 1 Petrusi 3:1, 2.
7 Guutip oqaasia naapertorlugu nuliaasup uiminut allamik upperisalimmut naalatsigitittuarnissani siunniusimasariaqarpaa. Taassuma immaqa nuliaasup pissuserissaarnera pissuserissaarnissaminut sumik kajumississuteqarneranik eqqarsaatiginnissutigilissavaa. Tamanna nuliami upperisaanik misissuilerneranik naggataatigullu nammineq sallusuissummik upperinnilerneranik kinguneqarsinnaavoq.
8, 9. Nuliaasoq kristumiu susinnaava uini pissuserissaarnerminut ajunngitsumik perianngippat?
8 Nuliaasorli kristumiu qanoq iliorsinnaava uini ajunngitsumik perianngippat? Nuliaasoq uppertoq Biibilimi kajumissaarneqarpoq kristumiutut pissuserineqartussanik ersersitsiuaqqullugu, taamaaliornissaq qanorluunniit artornartigigaluarpat. Korinthimiunut allakkani siullerni 13:4-mi ima allassimavoq: “Asanninneq kamagittartuuvoq.” Nuliaasoq kristumiu silatusaassaaq maniguuttuarlunilu saamajuaruni, naammagittartuarluni asannillunilu pissutsini atukkamini kamaginnittuaruni. (Efesosimiut 4:2) Guutip nukingata sulisup — anersaavata illernartup — ikiuineratigut pissutsini ilungersunaraluartuniluunniit kristumiutut pissuserineqartussanik ersersitsisoqarsinnaavoq.
9 Paulusi ima allappoq: “Tamaasa pissatsitsisikkut atussallugit sapinngilakka.” (Filippimiut 4:13) Aappaasup kristumiup iliuuserisinnaanngisaraluaminik iliuuseqarnissamut Guutip anersaava iluaqutigisarpaa. Assersuutigalugu aappaq ajortumik pinnippat akiniaarusunnarsinnaavoq, Biibilimili kristumiut ima saaffigineqarput: “Ajortoq akileqinasiuk ajortoqataanik . . . allassimasoqarmat: ‘Akiniut pigaara, uanga akiliiumaarpunga,’ oqarpoq [Jehova].” (Romamiut 12:17-19) Siunnersuut tamatumunnga assingusoq Thessalonikamiunut allakkani siullerni 5:15-imiippoq: “Ajortoq ajortoqataanik akilerniaqinasiuk, noqqaassutiginiarsiulli akornassinni tamanullu ajunngitsuliornissaq.” Jehovap anersaavata illernartup ikiuineratigut nammineerluta iliuuserisinnaarpasinngisavut iliuuserisinnaalertarpavut. Taamaattumik eqqortumik iliussaagut qinnutigisarutsigu Guutip anersaavata illernartup pisariaqartitatsinnik matussusiisarnissaa.
10. Jiisusip oqaatsitigut iliuutsikkulluunniit imminik ajortumik pinnittartut qanoq pisarpai?
10 Jiisusi oqaatsitigut iliuutsikkulluunniit imminik ajortumik pinnittartunut pissusilersornerminut tunngatillugu maligassiuilluarpoq. Petrusip allagaani siullerni 2:23-mi ima allassimasoqarpoq: “Oqaasipiluunneqarami oqaasipiluummik akissuteqanngilaq, anniartitaanermini sioorasaarinngilaq; pineqarninili naapertuilluartumik eqqartuussisumut isumagisassanngortippaa.” Uagut kajumissaarneqarpugut Jiisusip maligassiaanik malinneqqulluta. Allat ajortumik pissusilersornerat puffaatigeqinagu. Soorlu kristumiut tamarmik kajumissaarneqartut, illittaaq ‘nallittuillutillu qanilaartuunissat, ajortumik ajortoqataanik akiliinnginnissat, oqaasipiluummilluunniit oqaasipiloqataanik’ akiliinnginnissat ilungersuutigisariaqarpat. — 1 Petrusi 3:8, 9.
Oqassanatik inooqataaginnartut?
11. Immikkut pisinnaatitaaffik angingaartoq suna arnat ilaasa ilangiiffigiumaarpaat?
11 Nuliaasut uiusumut naalatsigitissammata imaappa oqassanatik inooqataaginnassasut — ilaqutariinnut tunngassuteqartunut allanullu tunngatillugu oqaasissaqartitaanngitsut? Naamerluinnaq. Jehovap arnat aamma angutit amerlasuunik immikkut pisinnaatitaaffilerpai. Eqqarsaatigeriaruk inuit 144.000-it Kristusimik kunngioqateqarlutillu palasioqateqarlutik nunarsuarmut naalakkersuinissamik angingaartumik immikkut pisinnaatitaaffeqartut! Taakkua ilagaat arnat. (Galatiamiut 3:26-29) Erseqqippoq Jehovap arnat siunertamini pingaarutilimmik suliassaqartikkai.
12, 13. Sumit erserpa arnat siulittuisarsimasut?
12 Assersuutigalugu Biibilip nalaani arnaqarpoq siulittuisartunik. Joeli 3:1, 2-mi siulittuuteqarpoq imaattumik: “Anersaara kuiumaarpara inunnut tamanut. Ernisi panisilu siulittuissapput. . . . Anersaara kuiumaarpara allaat inussiaatissinnut angutinut inussiaatissinnullu arnanut ullussani taakkunani.”
13 Ukiumi 33-mi piinsip ulluani Jiisusip ajoqersugai 120-t missaanniittut inimi Jerusalemimiittumi katersuuffigisaanni arnat angutillu najuupput. Guutip anersaava inunnut taakkununnga tamanut kuineqarpoq. Taamaattumik Petrusip pruffiitip Joelip siulittuutigisimasai issuarsinnaavai, oqaatsini angutinut arnanullu tunngatillugit. Petrusi ima oqarpoq: “[Maanna] pisoq tassaavoq pruffiitikkut Joelikkut oqaaserineqartoq: ‘Ullussani kingullerni pissaaq, oqarpoq Guuti: Anersaannit kuisiumaarpunga inunnut tamanut. Ernisi panisilu siulittuissapput. . . . Anersaara kuiumaarpara allaat inussiaatinnut angutinut inussiaatinnullu arnanut ullussani taakkunani, siulittuissappullu.’” — Apustilit Suliaat 2:16-18.
14. Ukiuni hundredelinni siullerni arnat kristumiussutsimik siaruarterinermi sunik suliassaqarpat?
14 Ukiuni hundredelinni siullerni arnat kristumiussutsimik siaruartereqataanermi pingaaruteqarput. Taakkua inuit allat Guutip naalagaaffia pillugu oqaluttuuppaat oqaluussinermilu suliassanik allanik suliaqarlutik. (Lukasi 8:1-3) Assersuutigalugu apustilip Paulusip Føbe ‘Kenkreæmi ilagiinni kiffartortuusutut’ taavaa. Aamma kristumioqatimi ilaannik inuulluaqqusigami arnarpaaluit aalajaatsut eqqaavai, ilaatigut “Tryfæna Tryfosalu Naalakkami sulisuusut”. Aamma eqqaavaa ‘Persisi Naalakkami sulingaartoq’. — Romamiut 16:1, 12.
15. Ullutsinni arnat kristumiussutsimik qanoq siaruartereqataappat?
15 Ullutsinni Guutip naalagaaffia pillugu nutaarsiassamik nuannersumik oqaluussissutiginnittut 7 millioninit amerlanerusut ilarparujussui tassaapput arnat qassinilluunniit ukiullit. (Matthæusi 24:14) Taakkua ilarpassui piffissaq tamaat oqaluussisartuupput, ajoqersuiartortitaapput Betelimiluunniit suleqataasuullutik. Tussiaasiortoq Daavi ima erinarsorpoq: “[Jehovap] oqaaseq tutsiutitippaa, arnallu amerlaqaat tipaatsunnartumik nalunaariartortut.” (Tussiaat 68:12) Ilumullumi oqaatsit taakkua ilumoornerat paasinarsisimavoq! Jehovap arnat nutaarsiassamik nuannersumik oqaluussissutiginneqataanerat piumasaatullu iliornerat pingaartingaarpaa. Arnat kristumiut naalatsigitinnissaannik piumasaqaateqarmat imaanngilluinnarpoq oqassanatik inooqataassasut.
Arnat marluk isummaminnik oqaatiginnittut
16, 17. Sarap maligassiaanit qanoq erserpa arnat aappariinnermi oqassanatik inooqataaginnassanngitsut?
16 Jehovap arnat amerlasuunik immikkut pisinnaatitaaffilersimappagit, taava uiusut pingaarutilimmik aalajangiitinnatik nuliatik aalajangeeqataatittassavaat, ilaa? Taamaaliorunik silatusaassapput. Nuliaasut uiminnit siunersiorneqanngikkaluarlutik oqalullutillu iliuuseqartut pillugit Biibilimi oqaluttuarpaaloqarpoq. Taakkua ilaat marluk misissoriartigit.
17 Sarap, ataataanerpaap Aaperaap nuliata, Aaperaat peqqusaqattaarpaa panerfani erneralu aallarteqqullugit ataqqinninngimmata. “Tamanna Aaperaap ajuusaarutigeqaa” — Guutilli ajuusaarutiginngilaa. Jehovap Aaperaat ima oqarfigaa: “Inussiaatit taassumalu ernera pillugit ajuusaaruteqarnak Sarap oqaasii tamaasa naalanniakkit.” (1 Mosesi 21:8-12) Aaperaap Jehova naalappaa, Sara tusarnaarlugu piumasaalu malillugu iliorluni.
18. Abigajili siulliulluni sumik iliuuseqarpa?
18 Eqqarsaatigiuttaaq Abigajili, Nabalip nulia. Daavi kunngimit Saulimit sinngasumit qimaasimatilluni Nabalip savaataanit ungasinngitsumi tammaarsimaarpoq. Daavi angutitaalu angutip pigissaartup taassuma pigisaanik tigusinngillat, savaataali kiffaalu sernissorpaat. Nabalili “peqqarniitsuuvoq”, Daavillu angutitai “oqalorujuffigai”. ‘Inupiluuvoq’, ‘sianiitsumillu iliorpoq’. Daavip angutitaasa ataqqinnillutik Nabali nerisassanik tuneqqullutik qinnuigigamikku taassumannga tuniumaneqanngillat. Abigajilip qanoq pisoqarsimasoq tusaramiuk sua? Nabalimut oqaaseqarnani “Abigajilip aanasuarpai timiusat 200-t, qummuattat marluk viinnimik imallit, savat tallimat nerisassiarereersimasut, karrit sikatsitat seat tallimat naligisaat, seqquluttut tiggussimasut 100-t figenillu tiggussimasut 200-t” Daavimullu angutitaanullu tunniullugit. Abigajili eqqortumik iliorpa? Aap, tamanna kingusinnerusukkut pisunit erserpoq. Biibilimi ima oqaluttuarineqarpoq: “[Nabali] toquvoq [Jehovap] pillaammik eqqormani.” Kingusinnerusukkut Daavip Abigajili nuliartaaraa. — 1 Samueli 25:3, 14-19, 23-25, 38-42.
‘Arnaq nersortarialik’
19, 20. Arnap suna nersortarialinnguutigisarpaa?
19 Biibilimi nuliaasut Jehovap peqqusineratut iliortut nersualaarneqarput. “Arnaq pikkorissoq” Ussatini ima nersorneqarpoq: “Sapannganit naleqarnerungaarpoq. Uiata tatigisarpaa, pissarsiassaaleqinngilaq. Uini ajunngitsumik pisarpaa, ajortumik pinngisaannarlugu inuutilluni.” Imalu nangippoq: “Oqalulersarpoq ilisimassuseqarluni, oqaaseqartarporlu inussiarnersunik ajoqersuussutinik. Illumini pisartut alaatsinaattarpai, nerisartagaalu eqiasunnikkut pissarsiaanngillat. Ernerisa sassarlutik unnersiutigisarpaat, uiatalu nersualaartarpaa.” — Ussatit 31:10-12, 26-28.
20 Arnap suna nersortarialinnguutigisarpaa? Ussatit 31:30-mi ima allassimavoq: “Takujuminassuseq peqquserlunneruvoq [pisuusaarnerinnaasinnaavoq, NV], pinnissuserlu piunngitsuuvoq [piunngitsuusinnaavoq, NV]; arnarli [Jehovamik] mianerinnittoq tassaavoq nersortarialik.” Jehovamik mianerinninnermut ilaavoq taassuma qullersanngortitaanut kajumilluni naalatsigitinneq. ‘Arnap angut niaqoraa’, ‘angutip kialuunniit Kristusi niaqoraa’, ‘Kristusillu niaqua Guutiuvoq’. — 1 Korinthimiut 11:3.
Guutip tunissutaa qujamasuutigiuk
21, 22. (a) Kristumiut aappariit suna pissutigalugu aappariinnermik tunissut Guutimut qujamasuutigisinnaavaat? (b) Sooq Jehovap siulersuinermik oqartussaanermillu aaqqissuussaanik ataqqinnittariaqarpugut? (Takuuk ungalusaq qupp. 22-miittoq).
21 Kristumiut katissimasut Guutimut qujamasunnissamut pissutissarpassuaqaqaat. Aappariittut pilluarlutik inooqatigiinnissamut periarfissaqarput. Pingaartumik aappariinnermik tunissut angingaartoq Jehovamut qujamasuutigisinnaavaat, taassuminnga saqeqateqarnissamut periarfissaqalissutigigamikku. (Ruthi 1:9; Mika 6:8) Jehovap — aappariinnermik Pilersitsisup — nalunngilaa aappariittut pilluarumalluni sorpiaat iliuuserineqartariaqarnersut. Aappariit taassuma peqqusaatut iliortuartariaqarput, taamaaliorunimmi ‘Jehovami nuannaarneq nakuussutigissavaat’, allaat silarsuarmi ajornartorsiuteqangaarfiusumi matumani. — Nehemia 8:10.
22 Uiusup kristumiup nuliaminik immisut asannittup oqartussaassutsini asannittumik soqutigittartumillu atussavaa. Taassuma nulia Guutimik mianerinnittoq asajuminassaaq, taassumami uini tapersersussavaa taassuminngalu ataqqinningaarluni. Suli pingaaruteqarneruvoq taakkua maligassiuilluarlutik aappariinnerat Guutitsinnut, Jehovamut, nersorneqangaartariaqartumut ataqqinaataassammat.
Eqqaamavigit?
• Jehova siulersuinermut naalatsigitinnermullu tunngatillugu sumik aaqqissuussaqarpa?
• Sooq aappariit ataqqeqatigiissappat?
• Nuliaasup kristumiup uini allamik upperisalik qanoq pisassavaa?
• Sooq uiusup pingaarutilinnik aalajangiinnginnermini nuliani aalajangeeqataatittassavaa?
[Qupp. 22-mi ungalusaq]
Sooq oqartussaassusilinnik ataqqinnissaagut?
Jehovap pinngortitani sianissusillit pillugit siulersuinermik aaqqissuussaq pilersippaa. Taamaaliorpoq pinngortitat anersaajusut inuillu iluaqutissaannut. Tamanna taakkua piumasamittut iliorsinnaatitaanerminnik atuinissamut Guutillu eqqissillutik ataasiussuseqarlutillu kiffartorfigineratigut taassuminnga ataqqinninnissamut periarfissaqalissutigaat. — Tussiaat 133:1.
Ilagiit kristumiut tanitat Jiisusip Kristusip oqartussaanera siulersuineralu akueraat. (Efesosimiut 1:22, 23) Jehovap oqartussaaneranik akuerinnilluni aamma “Erneq nammineq naalatsigitikkumaarpoq tamanik imminut naalatsigititsisumut, Guuti tamani tamarsooqqullugu”. (1 Korinthimiut 15:27, 28) Taamaattumik naleqquppoq kristumiut tunniulluinnarsimasut ilagiinni ilaqutariinnilu siulersuinermik aaqqissuussamik malinnittarnerat. (1 Korinthimiut 11:3; Hebræerit 13:17) Taamaaliornitsigut Jehovamit akuerisaallutalu pilluaqqusaasarpugut — tamannalu iluaqutigingaartarparput. — Esaja 48:17.
[Qupp. 18-mi assiliartaq]
Qinuneq nuliaasup kristumiup pissuserineqartussanik Guutimik mianerinninnermut ersiutaasunik ersersitsinissamut iluaqutigisinnaavaa
[Qupp. 20-mi assiliartat]
Jehovap arnat Guutip naalagaaffiata soqutigisaanik siuarsaaqataasut pingaartingaarpai