Qatanngutit angutit — anersaamut siaruarterigitsi akisussaaffeqalerumallusilu suliniuteqarlusi!
‘Anersaamut siaruarterisup inuuneq naassaanngitsoq katersugariumaarpaa.’ — GALATIAMIUT 6:8.
1, 2. Matthæusi 9:37, 38 ullumikkut qanoq eqquuppa, tamatumalu kingunerisaanik ilagiinni sunik pisariaqartitsisoqalerpa?
ILLIT ullumikkut pisunik naassaanngitsumut eqqaamaneqarumaartunik takunnittuuvutit! Suliaq Jiisusip eqqartugaa maanna suliarineqaleruttorpoq. Ima oqarpoq: “Katersugassat amerlaqaat sulisussalli ikittuinnaallutik. Taamaattumik katersuinermi naalagaasoq qinnuigisiuk katersuisussanik aallartitseqqullugu.” (Matthæusi 9:37, 38) Jehovap Guutip qinnutit taama ittut asseqanngilluinnartumik akivai. Ukiumi kiffartorfiusumi 2009-mi Jehovap Nalunaajaasuisa silarsuaq tamakkerlugu ilagiivi 2031-nik amerleriarput, tamarmik katillutik 105.298-inngorlutik. Agguaqatigiissillugu ullut tamaasa 757-inik kuisittoqartarpoq.
2 Taamatut amerliartortoqarmat qatanngutinik angutinik piumasaqaatinik eqqortitsisunik ilagiinni ilinniartitsisutut paarsisutullu siuttuusinnaasunik pisariaqartitsisoqarpoq. (Efesosimiut 4:11) Ukiut ingerlaneranni Jehovap angutit piumasaqaatinik eqqortitsisut savaatiminik isumassuitissinnaasimavai, qularutiginngilarpullu taamaaliortuarumaartoq. Siulittuummi Mika 5:4-miittumi neriorsoqqissaarneqarpugut Jehovap innuttai ulluni kingullerni ‘arfineq-marlunnik savanik paarsisoqarumaartut’ ‘arfineq-pingasunillu inunnut naalagaaneqarumaartut’, tassa imaappoq anguteqarumaartoq pisinnaasunik amerlasuunik taakkuninnga siulersuisussanik.
3. ‘Anersaamut siaruarterineq’ qanoq paasisariaqarnersoq nassuiaruk.
3 Angutaaguit kuisimasoq, taava illit ilagiinni akisussaaffeqarnissamik suliniuteqarusulernissannut suna kajumississutigisinnaaviuk? Pingaaruteqangaarpoq ‘anersaamut siaruarterinissat’. (Galatiamiut 6:8) Anersaamut siaruarterinermut ilaavoq illit Guutip anersaavanik illernartumik inuuninnut sunniuteqarsinnaanngortitsisumik inooriaaseqarnerit. ‘Uinimmut siaruarterinnginnissat’ aalajangiusimajuk. Ilorrisimaarnartumik inooriaaseqarneq, sunngiffimmi soqutigisat aliikkutassat tamakkualu assigisaat allat Guutimut kiffartornermi imminut pilliutiginissamik kissaateqarpiarunnaarsitsisinnaveersaakkit. Kristumiut tamarmik ‘anersaamut siaruarterisariaqarput’, qatanngutillu angutit taamaaliortut piffissap ingerlanerani ilagiinni akisussaaffeqarnissamut piukkunnarsisinnaapput. Ullumikkut ilagiinni kiffartortunik utoqqaanertanillu assut pisariaqartitsisoqarmat, allaaserisaq manna angutinut kristumiunut naatsorsuussaavoq. Taamaattumik ilissi qatanngutit angutit kajumissaarpassi allaaserisaq manna qinunikkut eqqarsaatigeqqissaaqqullugu.
Pingaarutilimmik suliaqarnissat sulissutigiuk
4, 5. (a) Angutit kuisimasut ilagiinni suna immikkut pisinnaatitaaffigilerumallugu sulissuteqartariaqarpat? (b) Qanoq sulissuteqarniartoqarsinnaava?
4 Qatanngut angut kristumiu suliniuteqarsimatinnani nakkutilliisunngornavianngilaq; ‘pingaartumik tamatuminnga suliaqarnissani’ sulissutigisariaqarpaa. (1 Timotheusi 3:1) Tamatumunnga ilaavoq uppeqatit pisariaqartitaannik isumaginninneq. (Atuakkit Esaja 32:1, 2). Angut tamatuminnga suliaqalerumalluni eqqortunik pissutiginiagaqarluni sulissuteqartoq ataqqineqarumatunanilu namminissarsiornani allanut iluaqutaarusussuseqarpoq.
5 Ilagiinni kiffartortunngornissamut utoqqaanertanngornissamulluunniit piukkunnarsiumagaanni piumasaqaatinik Biibilimi allassimasunik eqqortitsiumalluni ilungersortariaqarpoq. (1 Timotheusi 3:1-10, 12, 13; Titusi 1:5-9) Angutaaguit Guutimut tunniulluinnarsimasoq, taava imminut ima aperigit: ‘Oqaluussinermi eqiasuippunga, aamma allat taamaannissaannut ikiorpakka? Uppeqatikka inuttut soqutigalugit taakkununnga ineriartuutaavunga? Biibilimik atuaqqissaarninni misissuilluartartutut ilisimaneqarpunga? Ataatsimiinnerni akissutikka pitsaanerulersinniarsaraakka? Utoqqaanertat uannut suliassiissutaat akisussaassuseqarpalaartumik suliarisarpakka?’ (2 Timotheusi 4:5) Apeqqutit tamakku eqqarsaatigeqqissaartariaqarput.
6. Ilagiinni akisussaaffeqalernissamut piukkunnarsiumalluni sunissaq pisariaqarpa?
6 Ilagiinni akisussaaffeqalernissamut piukkunarsisinnaajumalluni pingaarutilik alla tassaavoq ‘inuutsikkut ilorlikkut [Guutip] Anersaavanit nakussatsitaaneq’. (Efesosimiut 3:16) Ilagiinni kristumiuni kiffartortunngorneq utoqqaanertanngornerluunniit atorfinitsitaanissamut qinigaanermut tunngassuteqanngilaq. Immikkut pisinnaatitaaffiuvoq taamaallaat anersaakkut siumukarnikkut anguneqarsinnaasoq. Qanoq ilillutit anersaakkut ineriartorsinnaavit? Taamaaliorsinnaavutit ilaatigut ‘anersaamut naapertuuttumik saqiuarnikkut’ (NV) anersaallu inerititaanik ineriartortitsinikkut. (Galatiamiut 5:16, 22, 23) Amerlanerusunik kiffartornermi immikkut pisinnaatitaaffeqarsinnaajumalluni anersaakkut pissuserineqartariaqartunik pissuseqarninnik ersersitsinerujartortillutit siumukarsinnaanissannullu ilinnut siunnersuutigineqartunik malinninnerujartortillutit ‘siumukarnerit tamanit takuneqarsinnaanerujartuinnassaaq’. — 1 Timotheusi 4:15.
Imminut pilliutigeriaannaanissaq pisariaqarpoq
7. Allanik kiffartuussinermut suut ilaappat?
7 Allanik kiffartuussissagaanni eqiasuilluni iliuuseqartariaqarlunilu imminut pilliutigeriaannaasariaqarpoq. Nakkutilliisut kristumiut anersaakkut ittumik paarsisuupput, taamaattumillu ‘savanik’ isumassuingaartuupput taakkualu ajornartorsiutaannik ikiorusullugit. Maluginiaruk apustilip Paulusip uppeqatiminik paarsisuunermut tunngatillugu akisussaaffini qanoq killinneqaatigigaa. Qatanngutinut Korinthimiittunut ima allappoq: “[Allaffigaassi] qullilingaarlunga annikilliungaarlungalu uummatikkullu qussalangaarlunga, aliasulernissarsi siunertarinagu ilisimaqqulluguli qanoq atsigisumik pingaartumik ilissi asagissi.” (2 Korinthimiut 2:4) Erseqqilluinnarpoq Paulusip suliassani tamanna uummatikkut iluunngarluni suliarigaa.
8, 9. Angutinik imminut pilliutigeriaannaasimasunik Biibilimi oqaluttuarineqartunik eqqaasaqarit.
8 Imminut pilliutigeriaannaaneq angutit Jehovap kiffaasa iluaqutissaannut ilungersorsimasut ilisarnaatigiuaannarsimavaat. Assersuutigalugu takorloorsinnaagunanngilarput Noap inoqutini ima oqarfigigai: ‘Umiarsuaq naammassereerussiuk oqarisi, taava takkukkumaarpunga.’ Mosesip Israelikkut Egyptenimiittut ima oqarfiginngilai: ‘Immap Aappalaartup eqqaani naapikkisa. Aqqutaa nammineq nanissajunnarsivarsi.’ Josva aamma ima oqanngilaq: ‘Jerikop qarmarsui uppippata kalerrilaarisinga.’ Aamma Esaja allamik tikkuartuinngilaq imalu oqarluni: ‘Piareersimavoq! Aallartissiuk.’ — Esaja 6:8.
9 Imminut pilliutigeriaannaanissamut Guutip anersaavanit kajumissisinneqartut maligassaalluarnerpaartaat tassaavoq Jiisusi Kristusi. Taassuma inunnik utertitsisutut suliassaq kajumilluni suliaraa. (Johannesi 3:16) Jiisusip imminut pilliutigeriaannaalluni asanninnera uagut imminut pilliutigeriaannaanissatsinnut kajumississutigisariaqarparput, ilaa? Qatanngut angut sivisuumik utoqqaanertaasimasoq savaatinut misigissutsini pillugit ima oqarpoq: “Jiisusip Petrusimut oqaasii, ‘Savaatinnik paarsisuugit’, assut killinneqaatigaakka. Ukiut ingerlaneranni paasisimavara nuannersumik oqaaseqalaarneq inussiarnisaalaarnerluunniit allanut qiimmassaataasinnaasut. Paarsisutut suleqataanera nuannaarutigeqaara.” — Johannesi 21:16.
10. Angutit kristumiut Jiisusip allanik kiffartuussinermik maligassiaanik malinninnissamut suna kajumississutigisinnaavaat?
10 Guutip savaataanik isumaginninnermut tunngatillugu angutit tunniulluinnarsimasut ilagiinniittut Jiisusip ima oqartup isiginnittaasianik ersersitserusupput: “Nukissaqalerseqqissavassi.” (Matthæusi 11:28, NV) Taakkua Guutimut uppernertik ilagiinnillu asanninnertik pingaarutilimmik tamatuminnga suliaqarnissamik sulissutiginninnissamut kajumississutigaat, aamma misiginngillat suliaq tamanna pilliuteqarnarpallaartoq ilungersunarpallaartorluunniit. Taavami qatanngut angut akisussaaffeqalernissaminik sulissuteqarusuppianngikkuni? Ilagiinni kiffartorusussusermik ineriartortitsisinnaava?
Kiffartorusussusermik qanoq ineriartortitsisoqartartoq
11. Qatanngut angut kiffartorusussusermik qanoq ineriartortitsisinnaava?
11 Imminut sapiunnerit pissutigalugu akisussaaffeqarnissat sulissutiginaveersaarukku, naleqqutissaaq anersaaq illernartoq qinnutigigukku. (Lukasi 11:13) Jehovap anersaava isumakuluutigisavit suulluunniit ajugaaffiginissaannut iluaqutigissavat. Guuti taannaavoq qatanngutinik angutinik kiffartorusussuseqalersitsisartoq, taassumami anersaava akisussaaffeqarnissamik sulissutiginninnissamut taakkuninnga kajumissisitsisarpoq tamatumalu kingorna illernartumik kiffartornissaannut nakussatsittarlugit. (Filippimiut 2:13; 4:13) Taamaattumik pissusissamisuussaaq Jehova qinnuigigukku akisussaaffeqalernissamut akuerserusussuseqalerseqqullutit. — Atuakkit Tussiaat 25:4, 5.
12. Qatanngut angut qanoq ililluni akisussaaffeqarnissamut naammattumik ilisimassuseqalersinnaava?
12 Kristumiup immaqa akisussaaffeqalernissani sulissutigerusunngilaa savaatit pisariaqartitarpassui artornarpasippallaarmata. Aamma imaassinnaavoq misigisoq tamakkuninnga suliaqarnissamut naammattumik ilisimassuseqarnani. Taamaappat ilisimassuseqarnerulersinnaavoq Guutip oqaasianik atuagassianillu atuakkanillu Biibililersaarutinik atuaqqissaarnerminik peqqissaarussinerunermigut. Imminut ima aperisinnaavoq: ‘Guutip oqaasianik atuaqqissaarnermut piffissaqarnerusinnaavunga, aamma ilisimassuseq qinnutigisarpara?’ Ajoqersugaq Jaaku ima allappoq: “[Ilisimassutsimigut] inorsartumik ilaqarussi taassuma qinnutigissavaa ilisimassuseq Guutimit avoqqaarlernani naammalluinnartunik tamanut tunisisartumit, taava piumaarpaa.” (Jaaku 1:5) Illit isumassarsisinneqarluni allanneqarsimasut taakku upperaagit? Salomop qinnutaa akillugu Guutip taanna ‘ilisimassusilimmik silaqassusilimmillu uummateqalersippaa’ eqqartuussissagaangami ajunngitsumik ajortumillu immikkoortitsisinnaannguutigisaanik. (1 Kunngit 3:7-14) Ilumoorpoq Salomomut tunngatillugu immikkorluinnaq ittumik pisoqartoq. Qularutiginngilluinnarsinnaavarpulli Guutip qatanngutit angutit ilagiinni akisussaaffeqalersinneqarsimasut ilisimassuseqalersikkumaarai savaatit eqqortumik isumassorsinnaaniassammatigit. — Ussatit 2:6.
13, 14. (a) ‘Kristusip asanninnera’ Paulusimut qanoq sunniuteqarpa? (b) ‘Kristusip asanninnera’ uagutsinnut qanoq sunniuteqartariaqarpa?
13 Aamma allanik kiffartuusserusussusermik ineriartortitsisoqarsinnaavoq Jehovap taassumalu ernerata uagut pilluta iliuuserisimasaannik tamanik eqqarsaatiginneqqissaarnikkut. Assersuutigalugu eqqarsaatigeriakkit Korinthimiunut allakkat aappaanni 5:14, 15-imi allassimasut. (Atuakkit). ‘Kristusip asanninnerata pinngitsaaligaatigut’ qanoq paasisariaqarami? Kristusip Guutip piumasaa naapertorlugu inuunerminik uagut pilluta akiginninnermigut asannittuliornera asseqanngilluinnarpoq. Aamma taassuma iliuuserisimasaanik qujamasuutiginninnerujartortilluta taamatut asannittuliornera qamuuna attorneqaatigingaartarparput. Paulusi Kristusip asanninneranit siulersortippoq. Namminissarsiorluni iliuuseqarnaveersaassutigisarpaa inuunerminilu anguniakkami taamaallaat Guutimut kiffartornermut aamma inoqatiminik ilagiinniittunik ilagiillu avataanniittunik ikiuinermut tunngatinnissaannut iluaqutigisarlugu.
14 Kristusip inunnik asanninneranik eqqarsaatiginneqqissaarneq qujamasungaalissutigisarparput. Nammineq angorusutanik anguniaanikkut imminullu iluatatsinnissamik pingaarnerpaatitsiffiusumik inooriaaseqarnikkut ‘uinimmut siaruarteriuarnerup’ eqqunngitsuliorneruneranik paasinninnissamut iluaqutigaarput. Aamma inuunerput ima aaqqissuupparput, Guutip uagutsinnut suliassiissutigisaa inuunitsinni pingaarnerpaajulluni. Qatanngutitsinnik asanninnerput taakkua ‘kiffartorfiginissaannut’ kajumississutigaarput. (Atuaruk Galatiamiut 5:13). Kiffatut Jehovap kiffaasa tunniulluinnarsimasut iluaqutissaannut maniguulluni sulisutut imminut isigigutta, taakku ataqqinnittumik pisassavavut. Isornartorsiueqqajaaneq eqqartuusseqqajaanerlu Saatanip siuarsagai pigiliukkusunngilluinnarpavut. — Saqqummersitat 12:10.
Ilaquttat suleqataasariaqarput
15, 16. Qatanngutip angutip nulia meeraalu ilagiinni kiffartortutut utoqqaanertatulluunniit toqqarneqarsinnaaneranut tunngatillugu qanoq pingaaruteqarpat?
15 Qatanngut angut aappaqarlunilu meeraqarpat, taanna ilagiinni kiffartortunngornissamut utoqqaanertanngornissamulluunniit piukkunnarnersoq aalajangissatillugu, pissutsit taassuma ilaqutaani atuuttut eqqarsaatigineqartarput. Aap, ilaqutariit anersaakkut atugaat qanorlu tusaamaneqarnerat taassuma toqqagaasinnaaneranut toqqaannartumik sunniuteqartarput. Tamanna ilaqutaasut taassuma ilagiit soqutigisaannik isumaginneqataasinnaajumalluni ilagiinni kiffartortunngorniarluni utoqqaanertanngorniarluniluunniit suliniuteqarnerani taassuminnga tapersersuinissaata pingaaruteqassusianut erseqqissaataavoq. — Atuakkit 1 Timotheusi 3:4, 5, 12.
16 Ilaqutariinni kristumiuniittut tamarmik suleqataagaangata, tamanna Jehovamut nuannaarutaasarpoq. (Hebræerit 6:10) Ilaqutariinni ittuusoq ilagiinni akisussaaffeqarumalluni inoqutiminillu pitsaasumik aqutsisinnaajumalluni oqimaaqatigiissaarisinnaasariaqarpoq. Pingaaruteqangaarpoq utoqqaanertat ilagiinnilu kiffartortut sapaatit-akunneri tamaasa unnummi ilaqutariittut anersaakkut ittunik sammisaqarfimmi nuliatillu meeqqatillu Biibilimik atuaqqissaaqatigiittarnissaat. Ataataasup aamma taakku oqaluusseqatigiuartariaqarpai. Taamatuttaaq ilaqutaasut taassuma ilaqutariinni ittuusutut akisussaaffianut tunngatillugu suleqataasariaqarput.
Kiffartuleqqerusuppit?
17, 18. (a) Qatanngut angut akisussaaffeqarnissamut piumasaqaatinik eqqortitsiunnaarsimasoq susinnaava? (b) Qatanngut angut utoqqaanertaasimasoq ilagiinniluunniit kiffartortuusimasoq qanoq isiginnittaaseqartariaqarpa?
17 Immaqa illit utoqqaanertaanikuullutilluunniit ilagiinni kiffartortuunikuuvutit, maannali taamatut kiffartornak. Jehovap illit asammatit qularutiginngilluinnarsinnaavat taassuma suli isumassoraatit. (1 Petrusi 5:6, 7) Paasitinneqarnikuuit allannguisariaqartutit? Kukkunivit nassuerutiginissaannut kajumissuseqarit, Guutillu ikiuineratigut sulissutigikkit. Narrutsannaveersaarit. Isumatusaarit isumalluarlutillu. Qatanngut angut ukiorpassuarni utoqqaanertaasimasoq kiffartornermilli immikkut pisinnaatitaaffimminik annaasaqartoq ima oqarpoq: “Aalajangiusimavara utoqqaanertaagama pisarnittulli ataatsimiigiartuarniarlunga, oqaluussiuarniarlunga Biibilimillu atuartuarniarlunga — taamaaliorsinnaasimavungalu. Isumaqaraluarpunga kiffartornermi immikkut pisinnaatitaaffigisimasakka ukiup ataatsip ukiulluunniit marluk ingerlaneranni pisinnaatitaaffigileqqissallugit, ukiulli arfineq-marlungajaat aatsaat qaangiummata utoqqaanertanngoqqippunga, taamaammat utaqqisinnaassuseqarnissaq ilikkarpara. Piffissami tamatumani uniinnannginnissamut akisussaaffeqarumallunilu suliniuteqartuarnissamut kajumissaarneqarnera iluaqutigeqaara.”
18 Pissutsit atukkatit tamatumunnga assinguppata nikalloqinak. Eqqarsaatigiuk Jehovap oqaluussinerit ilaquttatillu qanoq pilluaqqunerai. Ilaquttannut anersaakkut ineriartuutaagit, napparsimasut pulaartakkit, sanngiitsullu nakussatsittakkit. Pingaarnerpaamillu, Guutimik unnersiutiginnissinnaanermik Jehovallu Nalunaajaasuisa ilaattut Guutip naalagaaffia pillugu nutaarsiassamik nuannersumik oqaluussissutiginnissinnaanermik immikkut pisinnaatitaaffik pingaartingaaruk.a — Tussiaat 145:1, 2; Esaja 43:10-12.
Pissutsit atukkatit allatut isigilikkit
19, 20. (a) Angutit kuisimasut tamarmik sunissamut kajumissaarneqarpat? (b) Allaaserisami tulliuttumi suna sammineqarpa?
19 Ullumikkut nakkutilliisunik ilagiinnilu kiffartortunik aatsaat taama pisariaqartitsisoqartigaaq. Taamaattumik angutit kuisimasut ilagiinni kiffartortuunngitsut utoqqaanertaanngitsulluunniit kajumissaarpavut pissutsit atukkatik allatut isigileqqullugit imminullu ima aperalutik: ‘Taakkua ilaannik akisussaaffeqannginninnut suna pissutaava?’ Kiffartornermut eqqortumik isiginnittaaseqalernissannut Guutip anersaava iluaqutigiuk.
20 Ilagiinniittut tamarmik uppeqatimik imminut pilliutigeriaannaanerat iluaqutigaat. Isumassuisarutta namminissarsiornatalu iliuuseqartarutta allanik kiffartuussinerup anersaamullu siaruarterinerup nuannaarnartua misigissavarput. Allaaserisami tulliuttumi Guutip anersaavanik illernartumik aliasutsitsinnginnissarput qanorlu aliasutsitsinaveersaarsinnaanersugut sammineqarpoq.
[Quppernerup ataani ilanngussaq]
a Takuuk Vagttårnet, 15. aggusti 2009-moortoq, qupp. 30-32.
Qanoq akissavit?
• Mika 5:4-mi siulittuummi qanoq neriorsoqqissaarneqarpugut?
• Nassuiaruk imminut pilliutigeriaannaaneq qanoq paasisariaqarnersoq.
• Kiffartorusussutsimik qanoq ineriartortitsisoqarsinnaava?
• Qatanngut angut ilagiinni kiffartortunngornissamut utoqqaanertanngornissamulluunniit piukkunnarsissappat ilaqutaasut tapersersuillutillu suleqataanissaat qanoq pingaaruteqartigaa?
[Qupp. 25-mi assiliartat]
Akisussaaffeqalerumallutit suut sulissutigisinnaavigit?