Jehovap anersaava illernartoq aliasutseqinagu
“Guutip Anersaava illernartoq aliasutseqinasiuk, taassuminnga naqissusersimavusi.” — EFESOSIMIUT 4:30.
1. Jehova inuit millionillit pillugit qanoq iliorsimava, taakkualu qanoq iliornissaq pisussaaffigaat?
JEHOVA inuit millionillit silarsuarmi eqqissisimanngiffiusumi matumani inuusut pillugit immikkut ittumik iliuuseqarsimavoq. Taakku ernituani, Jiisusi Kristusi, aqqutigalugu imminut palligussinnaalersissimavai. (Johannesi 6:44) Taakkununnga ilaavutit Guutimut tunniulluinnarsimaguit tunniulluinnarnerillu naapertorlugu inuuguit. Anersaap illernartup aqqani kuisinnikuugavit anersaamut tamatumunnga naapertuuttumik pissuseqarnissat pisussaaffigaat. — Matthæusi 28:19.
2. Apeqqutit suut sammissavavut?
2 Uagut ‘anersaamut siaruarterisugut’ inuttut pissuseq nutaaq ativarput. (Galatiamiut 6:8; Efesosimiut 4:17-24) Apustililli Paulusip siunnersorpaatigut mianersoqqullutalu Guutip anersaavanik aliasutsitsisinnaanerput pillugu. (Atuakkit Efesosimiut 4:25-32). Siunnersuutigisaa maanna sammissavarput. Paulusip Guutip anersaavata aliasutsinneqarsinnaanera eqqartoramiuk suna pivaa? Jehovamut tunniulluinnarsimasut qanoq ilillutik taanna aliasutsissinnaagamikku? Qanorlu ililluta Jehovap anersaava aliasutsinnaveersaarsinnaavarput?
Paulusip suna pigaa
3. Efesosimiut 4:30-mi allassimasut qanoq nassuiassavigit?
3 Siullermik Paulusip Efesosimiut 4:30-mi oqaasii maluginiariakkit. Ima allappoq: “Guutip Anersaava illernartoq aliasutseqinasiuk, taassuminnga naqissusersimavusi ulloq utertitaaffissaq nalliutserlugu.” Paulusip kissaatiginngilaa uppeqatimi asasami Jehovamut attaveqarnertik navianartorsiortissagaat. Jehovap anersaavanit ‘naqissusersimapput ulloq utertitaaffissaq nalliutserlugu’. Kristumiunut tanitanut aalajaatsunut Guutip anersaava illernartoq tassaasimavoq tassaallunilu naqissut, imaluunniit piumaartussanut ‘sallunaveerut’. (2 Korinthimiut 1:22) Naqissut tamanna taakkua Guutimit pigineqarnerannut erseqqissaataavoq qilammilu inuunissamik neriuuteqarnerannut uppernarsaataalluni. Naqissuserneqartut katillutik 144.000-iupput. — Saqqummersitat 7:2-4.
4. Sooq Guutip anersaavanik aliasutsitsinnginnissarput pingaaruteqarpa?
4 Kristumiu anersaamik aliasutsitsiguni, naggataatigut Guutip anersaavanit najorneqarunnaarluinnarnerminik kinguneqartumik iliuuseqartalersinnaavoq. Taamaattoqarsinnaanera Daavip Batsebamik ajortulioqateqarnermi kingorna oqaasiinit erserpoq. Daavi peqqissimingaarluni Jehovamut ilungersorluni ima qinuvoq: “Ilinnit igeqinanga, anersaallu illernartoq uannit peerseqinagu!” (Tussiaat 51:13) Taamaallaat tanitat ‘toqumut allaat ilumoortut’ ‘ajugaasumut niaqorusiussassamik inuussutaasumik’ tunineqassapput, taakkununngalu tunngatillugu niaqorut taanna tassaavoq qilammi toqujuitsutut inuuneq. (Saqqummersitat 2:10; 1 Korinthimiut 15:53) Kristumiuttaaq nunarsuarmi inuunissamik neriugisallit Guutimut assuarnaattuarsinnaajumallutik taassumalu Kristusip utertitsissutitut pilliutaanik upperinninneq tunngavigalugu inuunermik tunissutaanik pisinnaajumallutik anersaaq illernartoq pisariaqartippaat. (Johannesi 3:36; Romamiut 5:8; 6:23) Taamaattumik tamatta Jehovap anersaava illernartoq aliasutsinnaveersaartariaqarparput.
Kristumiu qanoq ililluni anersaamik aliasutsitsisinnaava?
5, 6. Kristumiu Jehovap anersaavanik qanoq ililluni aliasutsitsisinnaava?
5 Kristumiuugatta tunniulluinnarsimasut anersaaq aliasutsinnaveersaarsinnaavarput. Taamaaliorsinnaavugut ‘anersaamut naapertuuttumik saqiuarlutalu inuujuarnitsigut’ (NV), taamaalioruttami uinikkut kajungerisapiluit nakkaannarfiginavianngilavut ajortunillu pissuseqarnaviarata. (Galatiamiut 5:16, 25, 26) Ajoraluartumilli allanngorsinnaavugut. Guutip anersaava ilaatigut aliasutsissinnaavarput immaqa malunnanngingajattumik Guutip oqaasiani, anersaamit isumassarsisitaasumi, assuarineqartumik pissuseqaleriartuaarnitsigut.
6 Anersaap illernartup siulersuineranut akerliusumik iliortuarutta, taanna, tassa imaappoq Jehova, anersaap tamatuma pilerfia, aliasutsissavarput. Efesosimiut 4:25-32-mi allassimasunik misissuinitsinni paasissavarput qanoq pissuseqartariaqartugut, aamma misissuinerput Guutip anersaavanik aliasutsitsinaveersaarnissamut iluaqutigissavarput.
Qanoq ililluta anersaaq aliasutsinnaveersaarsinnaagipput
7, 8. Sooq ilumoortuusariaqartugut nassuiaruk.
7 Ilumoortuusariaqarpugut. Efesosimiut 4:25-mi Paulusi ima allappoq: “Salluliortarneq iperarniarsiuk ilumoortumillu immissinnut oqaluffigisarlusi. Immitsinnummi avatioqatigiippugut!” ‘Immitsinnut avatioqatigiittutut’ ataasiussuseqaratta peqqusersiunngilluinnassaagut uppeqativulluunniit piaaraluta eqqunngitsumik paasissutississanngilluinnarlugit, taamaalioruttami assigiinnassavaa salloqittarivut. Taamaaliortuartut kikkulluunniit naggataatigut Guutimut attaveqarunnaassapput. — Atuaruk Tussiaat 5:7.
8 Oqaatsit iliuutsillu salluliuutit ilagiinni ataasiussusermik ajoqusiisinnaapput. Taamaattumik pruffiititut Danielitut tatiginartuusariaqarpugut, taannami unnerluutiginnissutaasinnaasunik nassaarfigineqanngilaq. (Danieli 6:5) Aamma avatit tamarmik ‘Kristusip timaanut’ ilaasut avatinut allanut tamanut atagamik Jiisusimut ajoqersugaasutut ilumoortuujuartariaqarlutillu ataasioqatigiittuartariaqarnerat pillugu Paulusip kristumiunut qilaliarnissamik neriugisalinnut siunnersuutaa eqqaamasariaqarparput. (Efesosimiut 4:11, 12) Nunarsuarmi paratiisiusumi naassaanngitsumik inuunissamik neriugisallit aamma ilumoortumik oqaluttariaqarput taamaalillutillu silarsuaq tamakkerlugu qatanngutigiissuit ilaaffigisatta ataasiussusiannik siuarsaaqataallutik.
9. Sooq Efesosimiut 4:26, 27-mi kajumissaarutip malinnissaa pingaaruteqarpa?
9 Diaavulu akiortariaqarparput anersaakkut ajoqusinnginniassammatigut. (Jaaku 4:7) Anersaaq illernartoq Saatanimik akiuinissamut iluaqutigisinnaavarput. Assersuutigalugu nunusinnaanngisatsinnik kamannaveersaarnitsigut akiorsinnaavarput. Paulusi ima allappoq: “Kamassimariannguaritsi, kisiannili ajortuliornasi. Seqineq tarrisinaveersiuk narrutsassimanissinni. Diaavululu inissaqarteqinasiuk.” (Efesosimiut 4:26, 27) Pissutissaqarluarluta kamakkutta nipaatsumik qinupallalaarneq Guutip anersaavanik aliasutsitsisinnaasumik iliornata ‘silatusaarnissatsinnut’ iluaqutigisinnaavarput. (Ussatit 15:4) Kamassimaartuassanngilagut, kamassimaartuaruttami Saatani uagutsinnik ajortumik iliortitsinissaanut periarfississagatsigu. (Tussiaat 37:8, 9) Ilaatigut akiorsinnaavarput Jiisusip siunnersuutaanut naapertuuttumik akerleriissutit aaqqinniapallannerisigut. — Matthæusi 5:23, 24; 18:15-17.
10, 11. Sooq tillinnatalu peqquserlussanngilagut?
10 Tillinnissamut peqquserlunnissamulluunniit napititaassanngilagut. Paulusi ima allappoq: “Tillittartoq tillissaarli, ilungersorlunili suliniarli assani atorlugit sulinermigut ajunngitsunik naammassisaqarniarluni ajorsartunut tunniussassaqarsinnaajumalluni.” (Efesosimiut 4:28) Kristumiu tunniulluinnarsimasoq tillikkuni ‘Guutip aqqanik narrunarsaassaaq’ taassumunnga kanngunarsaataasumik iliorluni. (Ussatit 30:7-9) Allaat piitsuuneq tillinnermut utoqqatsissutaasinnaanngilaq. Guutimik tullerminnillu asannittut nalunngilaat tillinnissamut pissutissaqalernaviaratik. — Markusi 12:28-31.
11 Paulusip iliuuserisassarinngisavut kisiisa eqqaanngilai; iliuuserisariaqakkavut aamma saqqummiuppai. Anersaamut illernartumut naapertuuttumik inuullutalu saqigutta, ‘ilungersorluta sulissaagut’ ilaquttavut pilersorsinnaajumallugit aamma ‘ajorsartunut tunniussassaqarsinnaajumalluta’. (1 Timotheusi 5:8) Jiisusi apustiliilu aningaasanik piitsunut immikkoortitsipput, killuussisorli Judasi Iskarioti aningaasat ilaannik tigusivoq. (Johannesi 12:4-6) Taanna anersaamit illernartumit siulersortinngilluinnarpoq. Uagut Guutip anersaavanit siulersortittugut, Paulusip iliorsimaneratut ‘tamatigut eqqortumik iliorumasarpugut’. (Hebræerit 13:18) Taamaalilluta Jehovap anersaava illernartoq aliasutsinnaveersaartarparput.
Anersaamik aliasutsitsinaveersaariaatsit allat
12, 13. (a) Efesosimiut 4:29 naapertorlugu oqaatsit qanoq ittut aninnaveersaassavavut? (b) Qanoq oqaluttariaqarpugut?
12 Qanoq oqalunnersugut eqqumaffigisariaqarparput. Paulusi ima allappoq: “Oqaatsinik mikiarsimasunik qanissinnit aniatitaqarniaqinasi, oqaatsinilli ajunngitsuinnarnik aniatitaqaritsi ineriartornissamut pisariaqartunik, tamakku tusartunut pilluaatissaaqqullugit.” (Efesosimiut 4:29) Matumani apustilip Paulusip oqaluttuutiinnanngilaatigut sunaveersaassanersugut, aammali susariaqarnersugut oqaluttuuppaatigut. Guutip anersaavata sunniineratigut killinneqarluta ‘oqaatsinik ajunngitsuinnarnik aniatitaqarusussaagut ineriartornissamut pisariaqartunik, tamakku tusartunut pilluaatissaaqqullugit’. Aamma “oqaatsinik mikiarsimasunik” aniatitaqassanngilagut. Oqaaseq grækerisooq ‘mikiarsimasumik’ nutserneqarsimasoq naatitanut, aalisakkanut neqinulluunniit asiusunut mikiarsimasunulluunniit tunngatillugu atorneqartarsimavoq. Soorlu nerisassat taamaalisimasut maajugisarivut, Jehovap ajortumik oqalunnertut isigisai maajugisarpavut.
13 Ileqqorissumik, ilorraallaataasumik ‘tarajulimmillu’ oqaluttariaqarpugut. (Kolossemiut 3:8-10; 4:6) Inunnit allanit allaanerunerput tusaaneqarsinnaasariaqarpoq. Taamaammat ineriartornartumik oqalunnitsigut allanik ikiuisa. Qanortoq tussiaasiortup ima erinarsortup misigineratut misigigisa: “Qanerma oqaasii uummatimalu eqqarsaatai ilinni iluarinarilit, [Jehova], qaarsora aniguisitsisigalu!” — Tussiaat 19:15.
14. Efesosimiut 4:30, 31 naapertorlugu suut iperartariaqarpavut?
14 Narrutsassimaneq, kamanneq, mitalliineq ajussutsillu suulluunniit iperartariaqarpavut. Paulusi Guutip anersaavanik aliasutsitsinissaq mianersoqqussutigereerlugu ima allappoq: “Narrutsatsitsinerit, puffajanerit, kamannerit, nipiliornerit mitalliinerillu, tassami ajorsutsit suulluunniit, eqqaasassanngilasiluunniit.” (Efesosimiut 4:30, 31) Tamatta naammalluinnanngitsuugatta eqqarsaatitta iliuutsittalu aqunnissaat ilungersorluta sulissutigisariaqarparput. ‘Narrutsatsitsinerit, puffajanerit kamannerillu’ nununngikkutsigit Guutip anersaava aliasutsissagaluarparput. Taamaassagaluarpoq aamma eqqunngitsuliorfigineqarnerit naatsorsoqqissaartaraluarutsigit, allanik iluarinninngitsuugutta saammartitassaanngikkuttaluunniit. Siunnersuutit Biibilimiittut sumiginnartalerutsigit naggataatigut anersaamut ajortuliornitsinnik kinguneqartumik isiginnittaaseqaleriartuaarsinnaavugut tamatumalu kingunipilui misigalugit.
15. Allanit eqqunngitsuliorfigineqarsimagutta qanoq periassaagut?
15 Inussiarnersuullutalu misiginneqataasuullutalu isumakkeerfiginnittuusariaqarpugut. Paulusi ima allappoq: “[Immissinnut] ajunngitsuliorfigigitsi nallittuillusilu, isumakkeerfigeqatigiittaritsilu soorlu Guutip Kristusimi isumakkeerfigigaasi.” (Efesosimiut 4:32) Allanit eqqunngitsuliorfigineqarsimagaluaruttaluunniit qamuunaluunniit annersinneqarsimagaluarutta, taakku isumakkeerfigisariaqarpavut, soorluttaaq Guutip uagut isumakkeerfigisaraatigut. (Lukasi 11:4) Takorlooriartigu uppeqatitta ilaat uagut pilluta ajortumik oqarsimasoq. Tamanna aaqqiiviginiarsariniarlugu taanna ornipparput oqaloqatiginiarlugu. Taanna oqarpoq oqaatigisimasani ilumut aliasuutigalugit, isumakkeerfigeqquvorlu. Isumakkeerfigaarput, taamaaliornissaannarli naammanngilaq. Mosesimik allakkat pingajui 19:18-imi ima allassimavoq: “Inuiaqatinnut akinialerituussanngilatit puttarsisaqarnalluunniit. Tullit ilittut asassavat. Uanga tassaavunga [Jehova].”
Eqqumasariaqarpugut
16. Jehovap anersaava aliasutsikkumanagu allannguisariaqartoqarsinnaanera assersuuteqarlutit oqaluttuariuk.
16 Aamma kisimiikkaangatta Guutip iluarinngisaanik iliornissamut ussernartorsiorsinnaavugut. Immaqa qatanngut nipilersuutinik kristumiunut naleqqutinngitsunik tusarnaartarsimavoq. Ilaanni ilerasulerpoq siunnersuutit Biibilimeersut atuakkani atuagassianilu ‘inussiamit aalajaallunilu silatuumeersuni’ (NV) atuarsimasani sumiginnarsimagamigit. (Matthæusi 24:45) Immaqa ajornartorsiut tamanna Jehovamut qinunikkut saqqummiuppaa Paulusillu Efesosimiut 4:30-mi oqaasii eqqaallugit. Guutip anersaavanik aliasutsitsisinnaasumik iliorniannginnini aalajangiusimalluinnarlugu aalajangerpoq nipilersuutit nalorninartut taakku tusarnaartarunnaarniarlugit. Jehovap taassuma isiginnittaasia ajunngitsoq pilluaqqussavaa. Guutip anersaava aliasutsinnaveersaartuartigu.
17. Eqqumanngikkutta Guutimullu qanittumik attaveqanngikkutta qanoq pisoqarsinnaava?
17 Eqqumanngikkutta Guutilu qanimut attaveqarfiginngikkutsigu minguttuumik eqqunngitsumilluunniit iliuuseqarsinnaavugut taamaalillutalu anersaaq aliasutsillugu. Ataatatta qilammiusup anersaaq illernartoq kinaassutsiminut naapertuuttumik atortarmagu, taanna aliasutsikkaangatsigu Jehova aliasutsittarparput — aliasutsikkusunngilluinnarparpullu. Ukiuni hundredelinni siullerni allakkanik ilisimasut juutiusut ajortuliorput Jiisusip tupinnartuliai Saatanimeersuuneraramikkit. (Atuakkit Markusi 3:22-30). Kristusimut akeraasut taakku ‘Anersaamut Illernartumut mitallerput’, taamaalillutillu isumakkeerfigineqarsinnaanngitsumik ajortuliorput. Qanortoq uagut taamaaliunngisaannarisa!
18. Qanoq ililluta paasisinnaavarput isumakkeerfigineqarsinnaanngitsumik ajortuliorsimanerluta?
18 Ajortuliamut isumakkeerfigineqarsinnaanngitsumut eqqaanangajaannartumilluunniit iliuuseqarusunnginnatta, Paulusip anersaamik aliasutsitsinnginnissamik oqaasii eqqaamasariaqarpavut. Taavami ingasattumik ajortuliorsimagutta? Allamik isumataarsimagutta utoqqaanertanillu ikiorneqareerutta isummersinnaavugut Guutip isumakkeerfigereeraatigut anersaamullu illernartumut ajortuliorsimanngitsugut. Guutip ikiuineratigut aamma siunissami anersaaq aliasutsinnaveersaarsinnaavarput.
19, 20. (a) Sunaveersaartariaqarpugut? (b) Sunissarput aalajangiusimasariaqarparput?
19 Guutip anersaani illernartoq iluaqutigalugu innuttamini asanninnermik, nuannaarnermik ataasiussusermillu siuarsaasarpoq. (Tussiaat 133:1-3) Taamaattumik anersaaq taanna aliasutsinnaveersaartigu mamarliutinik qaqqaqqalaarutiginninnata ilagiinni paarsisunik, anersaamit illernartumit toqqarneqarsimasunik, ataqqinnikkunnaarsitsisinnaasunik oqaaseqartarnata. (Apustilit Suliaat 20:28; Judasi 8, 1936) Ilagiinni ataasiussuseq ataqqeqatigiinnerlu siuarsartariaqarparput. Guutip innuttaasa akornanni immikkoortukkuutaarluta allanik avataaniittutut misigititsissanngilluinnarpugut. Paulusi ima allappoq: “[Oqaaqqissaarpassi], qatanngutit, Naalakkatta Jiisusi-Kristusip aqqagut isumaqatigeeqqullusi akornassinni avissaartuunneqaleqqunagu eqqarsaatissigulli isumassigullu ataasioqatigeeqqullusi.” — 1 Korinthimiut 1:10.
20 Jehova anersaaminik aliasutsitseqqunata uagutsinnik ikiuisinnaallunilu ikiuinissamut kajumissuseqarpoq. Anersaaq illernartoq qinnutigiuartigu tamatumalu aliasutsinnginnissaa aalajangiusimallugu. Aamma ‘anersaamut siaruarteriuarta’ ilumoorlutalu tamatuma siulersuinera naapertorlugu iliortuarta, maanna naassaanngitsumullu. (w10 05/15-E)
Qanoq akissavit?
• Guutip anersaavanik aliasutsitsineq qanoq paasisariaqarpa?
• Jehovamut tunniulluinnarsimasoq taassuma anersaavanik qanoq ililluni aliasutsitsisinnaava?
• Anersaaq illernartoq qanoq ililluta aliasutsinnaveersaarsinnaavarput?
[Qupp. 29-mi assiliartaq]
Akerleriissutit aaqqinniapallattakkit
[Qupp. 30-mi assiliartaq]
Illit oqalunnerit sumut assersuulluarneqarsinnaanerua?