Sooq inuit ajortuliortarpat?

INUIT ikittuinnaat una miserratigissavaat: Naammalluinnanngitsuugatta tamatta kukkusarpugut taamaattumillu kingusinnerusukkut peqqissimissutigisatsinnik iliuuseqartarluta. Tamannali pissutaava ullut tamarluinnangajaasa ajortorpassuarnik, ajornerusunik soqutaannginnerusunilluunniit, qanigisatsinnit tusagassiuutitigulluunniit tusagaqartarnitsinnut takusaqartarnitsinnullu?

Inuit naammalluinnanngitsuugaluartut amerlanerit miserratiginngilaat ileqqussatigut killeqartoq qaangerneqanngisaannartussamik aamma inuit ajortuliornaveersaarsinnaasut. Amerlanerit isumaqatigiissutigaat eqqunngitsumik oqartoornerup mamarliinerullu, ajoqusertoqarneranullu pisuunerup piaaralunilu toqutsinerup, assiginngissuteqarnerat. Taamaattoq tupannartunik iliuuseqartartut tassaagajupput eqqaamiut inuit nalinginnaasut. Soormiuna inuit ajortuliortartut?

Tamatuma akissutaa Biibilimi paasinarsisinneqarpoq. Sooq inuit iliuutsimik ajortuunerat nalunngikkaluarlugu iliuuserinnittarnerannut pissutaasut pingaarnerusut ilaat Biibilimi erseqqissarluarneqarput. Tassani qanoq allassimasoqarnersoq sammeriartigu.

▪ “Naqisimanninnerup ilisimasoq silaqanngitsutut iliulersissinnaavaa.” — OQALUUSSISARTUP OQAASII 7:7, NV.

Biibilimi miserratigineqanngilaq inuit ilaannikkut pissutsinit atukkanit pinngitsaalineqartutullusooq misigalutik iliuusererusunngisaannakkaminnik iliuuseqartartut. Immaqa allaat inoqarpoq annikilliuutinut naapertuilluanngitsuliornernullu aaqqiissutissaasorisaminnik ujartuinerminni pinerluttunngortunik. Atuakkami Urban Terrorism-imi ima allassimavoq: “Peqqarniisaarniap pingaarnertut kajumississutigigajuppaa politikkikkut, innuttaaqatigiinni aningaasatigullu sunneerujussuarsinnaasunik allanngortinneqarsinnaarpasinngitsunik pakatsissutiginninnini.”

▪ “[Aningaaserituujuneq] ajortunut tamanut sorlaavoq.” — 1 TIMOTHEUSI 6:10.

Oqartoqartarpoq allaat inuk ajunngitsoq aningaasanik naammattunik neqeroorfigineqaruni ileqqorissuunermut inooriaaserinnermullu najoqqutassianik unioqqutitsiumassasoq. Inuit ilakkuminartuullutillu inussiarnersuugaluit aningaasanik iluanaarsinnaaleraangamik annaasaqarsinnaaleraangamilluunniit ilakkuminaallillutik akeqqersimaalerlutillu allanngorluinnarpasittarput. Eqqarsaatigikkit pinerluttuliornerpassuit piumatussutsimit sorlaqartut, soorlu sioorasaarilluni akiliisitsiniaanerit, peqquserluttuliornerit, inunnik aallarussinerit allaallu toqutsinerit.

▪ “Iluaatsuliorneq pillugu piaartumik eqqartuussineqanngikkaangat inuit uummataat ajortuliornissamut pilerissusermik ulikkaartarput.” — OQALUUSSISARTUP OQAASII 8:11.

Allassimaffimmi tamatumani ersersinneqarpoq isumaqaqqajaasartugut oqartussaasunik paasineqanngikkutta qanorluunniit ilioraluarutta kingunerlutsitsinaviarnata. Taama isumaqarput sukkavallaarlutik biilertartut, soraarummeernermi peqquserluttartut, naalagaaffiup piinik imminut paarititanik peqquserluuteqartartut ajornerusumillu iliuuseqartartut. Inatsisinik unioqqutitsisoqartillugu ingerlaannaq pineqaatissiisoqartanngippat, imaluunniit paasineqarnissaq siooraginngikkaanni taava immaqa innuttaasut inatsisinik maleruaasartuugaluit iliuusererusunngisaraluamittut iliuuseqarniarlutik sapiillisarput. Atuagassiami russisoortumi ima allassimavoq: “Pinerluttartut ilaat pillanngitsoorneqartarput, taamaattumillu inuit nalinginnaasut peqqarniinnerpaamik pinerluttuliorusulertarunarput.”

▪ “Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu; pilerissutsillu ilumileraangami ajorti erniarisarpaa.” — JAAKU 1:14, 15.

Inuit tamarmik eqqarsaatipiloqalersinnaapput. Ullut tamarluinnaasa eqqunngitsuliornissamut ussernartuusinnaasunik misiligarneqartuarpugut. Biibilip nalaani kristumiut ima allaffigineqarput: “Usserneqaatigisimasasi inuit atortagaattut iinnarput.” (1 Korinthimiut 10:13) Taamaattoq qanoq aalajangerneq, tassa eqqarsaatipiluup tamatuma eqqarsaatigiunnaapallannera imaluunniit eqqarsaatigiuaannarneratigut sakkortusitinnera, kinguneranut aalajangiisuuvoq. Allassimaffimmi Jaakup allagaanit isumassarsiarititaasunit issuakkatsinni mianersoqquneqarpugut kissaatipiluup ‘ilumilernissaa’ periarfissikkaangatsigu ajortuliornermik kinguneqanngitsoornavianngitsoq.

▪ “Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.” — USSATIT 13:20.

Ilagisartakkatta — ajunngitsumik ajortumilluunniit — sunniuteqarsinnaanerat suusupagissanngilarput. Qasseriarlutami tusartarpavut inuit kingunerlutsitserujussuarlutik iliuusererusutarinngisamittut iliortut — ilagisartakkanit tatineqarneq, imaluunniit inuppassuit oqartarnerattut ikinngutipalaaqalerneq, pissutigalugu. Biibilimi ‘sianiitsut’ eqqaaneqaraangata pineqarneq ajorput inuit silassorissuunngitsut, pineqartarpulli Guutip oqaasiani siunnersuutinik pitsaasunik sumiginnaasut. Ikinngutissarsiornitsinni silatusaanngikkutta, tassa najoqqutassiat pitsaasut Biibilimiittut tunngavigalugit ikinngutissarsiunngikkutta, inuusuttuugutta utoqqaaguttaluunniit, ‘ajortumeertussaasugut’ ilimagisariaqarparput.

Versit taakku allarpassuillu Biibilimeersut eqqortumik naatsukullammillu nassuiaataapput sooq inuit — immaqa inuit nalinginnaasuugaluit — ajortuliortarnerannut, allaalluunniit tupannartumik iliuuseqartarnerannut. Soorunami iluaqutaasinnaavoq paasillugu inuit suna amiilaarnartuliulissutigisaraat, pissutsilli pitsaanerulernissaannut neriuutissaqarpa? Aap, Biibilimi nassuiarneqaannanngilaq sooq inuit ajortuliortartut, aammali neriorsuutigineqarpoq ajortuliortoqartarunnaarumaartoq. Qanoq neriorsuuteqarami? Ilumut silarsuarmi ajortuerutivissava? Allaaserisami tulliuttumi tamakku akineqassapput.