Guutip oqaasia ilinniarfigiuk

Guutip naalagaaffia suua?

Apeqqutit immaqa eqqarsaatiginikuusatit allaaserisami matumani sammineqassapput, aamma apeqqutinut taakkununnga akissutit illit nammineq Biibilinni sumi atuarsinnaaneritit paasissutissiissutigineqartassaaq. Jehovap Nalunaajaasuisa illit peqatigalutit apeqqutinut taakkununnga akissutit taakku sammerusukkaluarpaat.

1. Guutip naalagaaffia suua?

Guutip naalagaaffia qilammi naalakkersuineruvoq. Naalagaaffiit allat tamaasa suujunnaarsissallugillu Guutip piumasaata qilammi nunamilu pinissaa isumagiumaarpaa. Guutip naalagaaffia naalakkersuinissamik pitsaasumik pisariaqartitsinitsinnut aaqqiissutissaavoq. — Atuakkit Danieli 2:44; Matthæusi 6:9, 10.

Naalagaaffik naalagaqartariaqarpoq. Taamaattumik Jehovap Guutip ernini, Jiisusi, naalagaaffimmini kunngitut toqqarsimavaa. — Atuakkit Lukasi 1:30-33.

2. Sooq Jiisusi naalakkersuisussatut piukkunnarnerpaava?

Guutip ernera kunngitut piukkunnarnerpaavoq inussiarnersuulluni, eqqortunik aalajangiusimannittuullunilu inunnik ikiuinissamut pissaaneqartuugami. (Matthæusi 11:28-30) Jiisusi toqusunit makititaareernermi kingorna qilaliarpoq, Jehovallu talerpiata tungaani issialluni utaqqiinnalerpoq. (Hebræerit 10:12, 13) Kingusinnerusukkullu Guutip Jiisusi qilammiit naalakkersuilernissaanut pissaanermik tunivaa. — Atuakkit Danieli 7:13, 14.

3. Kikkut Jiisusip naalakkersueqatigissavai?

Jiisusip eqimattat Guutimit toqqarneqarsimasut ‘illernartunik’ taaneqartut qilammiit naalakkersueqatigissavai. (Danieli 7:27) Illernartunut ilaanissaminnut periarfissinneqartut siulliit tassaapput Jiisusip apustilii aalajaatsut. Taamanimiilli Jehovap angutit arnallu aalajaatsut ‘illernartutut’ toqqartarsimavai. Taakku Jiisusitut anersaakkut ittumik timeqarlutik makititaasarput. — Atuakkit Johannesi 14:1-3; 1 Korinthimiut 15:42-45.

Inuit qassit qilaliassappat? Jiisusip ‘savarpannguatut’ eqqaavai. (Lukasi 12:32) Naggataatigut 144.000-inngussapput, taakkulu Jiisusi peqatigalugu nunarsuarmut naalakkersuissapput. — Atuakkit Saqqummersitat 14:1; 20:4.

4. Guutip naalagaaffia qanga aqutsilerpa?

1914-imi Jiisusi kunnginngorpoq.a Kingunitsianngua taassuma Saatani anersaapiluilu nunarsuarmut igippai. (Saqqummersitat 12:7-10, 12) Taamanimiilli inuit ajornartorsiutaat amerlatsissimapput. Sorsunnerit, nunap sajunneri, kaannersuit, nappaalanerit inatsisaannerlu pissutsit aaqqissuussaanerata matuma ulluinut kingullernut ilisarnaataanut ilaapput. (2 Timotheusi 3:1-5) Guutip naalagaaffiani inoorusuttut tamarmik ilinniartariaqarpaat kunngimut, Jiisusimut, qanoq ajoqersuganngorsinnaanerlutik. — Atuakkit Lukasi 21:7, 10, 11, 31, 34, 35.

5. Guutip naalagaaffia sumik naammassisaqassava?

Allaat ullumikkut Guutip naalagaaffia inuppassuarnik ikiuisarpoq. Inuit millionillit inuiaqatigiinnit tamaneersut silarsuaq tamakkerlugu oqaluussineq iluaqutigalugu Guutip siunertaanik ilinniartinneqartarput. (Matthæusi 24:14) Guutip naalagaaffiata pissutsit aaqqissuussaanerat ajortoq manna atuuttoq suujunnaarsikkuniuk Jiisusip innuttai ilumoorfiginnittut ‘amerlangaartut’ aamma illersorumaarpai. — Atuakkit Saqqummersitat 7:9, 10, 13-17.

Ukiut 1000-it ingerlaneranni Guutip naalagaaffiata nunarsuaq paratiisinngortikkiartuaarumaarpaa. Naggataatigullu Jiisusip Naalagaaffik Ataataminut tunniukkumaarpaa. (1 Korinthimiut 15:24-26) Illit Guutip naalagaaffia pillugu kikkut oqaluttuukkusuppigit? — Atuakkit Tussiaat 37:10, 11, 29.

[Quppernerup ataani ilanngussaq]