Meeqqat sunik ilinniartinneqassappat?

“Allakkat Guutimit anersaarfigineqartut tamarmik iluaqutaapput ajoqersuinermut, uppernarsaanermut, ilitsersuinermut iluarnermullu perorsaanermut.” — 2 TIMOTHEUSI 3:16.

MEEQQAT Guuti pillugu ilumoortumik ilinniartinneqartariaqarput. Ilumoortoq tamanna pillugu sumi ilinniarsinnaavaat? Upperisarsiornikkut atuakkami silarsuarmi pingaartinneqarnerpaami, tassa Biibilimi.

Biibili allagarsiatut Guutimeersutut ippoq. Allakkani taakkunani kinaassusilittut qanoq ittuunini ersersillugulu qitornani angisuut mikisullu tamaasa ileqqussatigut siunnersorpai. Biibilimi ajoqersuutit taakkualu ilinniagassartaat allaat meeqqat mikisut ilinniarfigisinnaasaat malugikkit.

Guutip imminut pilluni sunik ilisimatikkusuppaatigut?

◼ Biibilimi allassimasoq: “Illit kisivit — aqqit tassaasoq Jahve — Qutsinnerussaartuusutit nunarsuarmi tamarmi.” — Tussiaat 83:19.

Ilinniagassaq: Guuti tassaanngilaq nukik kinaassuseqanngitsoq. Kinaassusiliviuvoq atilik.

◼ Biibilimi allassimasoq: “[Guutip] uummatit tamaasa misissuiffigeqqissaartarpai inuillu piumasaat pilersaarutaallu tamaasa paasisimallugit. Ujarukku naniumaarpat.” — 1 Nalunaarsuutit 28:9.

Ilinniagassaq: Jehova Guuti tamatsinnik aamma meeqqanik mikisunik isumassuisuuvoq. (Tussiaat 10:14; 146:9) Kissaatigaa ilinniassagitsinni.

◼ Biibilimi allassimasoq: “Uillarneq iliarsullu naalliutsinngisaannassavasi. Taamaalioruilli torlorfigippannga tusassavakka.” — 2 Mosesi 22:21-23.

Ilinniagassaq: Jehovap imminut qinusut tamaasa, aamma meeqqat, tusartarpai. Qanorluunniit akulikitsigisumik Guuti oqaluussinnaavarput, qanorpiaq eqqarsarnerluta misiginerlutalu taassumunnga oqaluttuarsinnaavugut.

◼ Biibilimi allassimasoq: “Guuti misilinniartuartarpaat ajuallatsillugulu Israelip Illernartua.” — Tussiaat 78:41.

Ilinniagassaq: Jehovap oqaatsivut iliuutsivullu sunnerneqaatigisarpai, taamaattumik oqaaseqartinnata iliuuseqartinnatalu eqqarsaqqaartariaqarpugut.

Inuit uagutsinnit allaanerusut qanoq pisassavavut?

◼ Biibilimi allassimasoq: ‘Guuti kinaassusersiortuunngilaq, tassaavorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.’ — Apustilit Suliaat 10:34, 35.

Ilinniagassaq: Guutip inuit qanorluunniit tunuliaqutallit ilassisarmagit ammip qalipaataatigut kiinnamikkulluunniit allatut isikkoqartunik assigiinngisitsisassanngilagut.

◼ Biibilimi allassimasoq: “[Piareersimajuaritsi] neriuutigisaq ilissinniittoq pillugu isumarsi illersorsinnaaqqullugu nassuiaaqqusisumut kimulluunniit. Taamaaliortassaasili qanilaarlusi, mianerinnittuullusi.” — 1 Petrusi 3:15, 16.

Ilinniagassaq: Upperisarsiorneq pillugu oqaloqateqaraangatta taamaaliortassaagut qulanngilluinnarluta, qiningasuujunatali. Uagutsinnit allaanerusumik isumalinnut ataqqinnittuusariaqarpugut.

Ilaquttavut qanoq pisassavavut?

◼ Biibilimi allassimasoq: “Qitornaasusi, tamatigut angajoqqaasi naalattarsigit tamanna Naalakkami iluarmat.” — Kolossemiut 3:20.

Ilinniagassaq: Meeqqat angajoqqaaminnut naalakkaangamik angajoqqaatik asallugit ersersiinnarnagu, aamma Guuti nuannaartikkusuttarpaat.

◼ Biibilimi allassimasoq: “Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi. Soorlu [Jehovap] isumakkeerfigigaasi taamatuttaaq ilissi iliussaasi.” — Kolossemiut 3:13.

Ilinniagassaq: Inuit allat, aamma ilaquttatta, ilaannikkut pakatsisittassavaatigut. Guutimilli isumakkeerfigineqarumagutta allanik isumakkeerfiginninnissarput ilikkartariaqarparput. — Matthæusi 6:14, 15.

Sooq unneqqarissuullutalu inussiarnisaartuussaagut?

◼ Biibilimi allassimasoq: “Salluliortarneq iperarniarsiuk ilumoortumillu immissinnut oqaluffigisarlusi.” — Efesosimiut 4:25.

Ilinniagassaq: Ilumoortumik oqalukkaangatta Guuti ilaartarparput nuannaartillugulu. Salluneq ileqquliukkutsigu Guutimut akeraasutut, Diaavulutut ‘sallumut ataataasutut’, issaagut. — Johannesi 8:44; Titusi 1:2.

◼ Biibilimi allassimasoq: “Inunnut qanorluunniit iliorfigeqqugussi ilississaaq taamatut iliorfigisigit.” — Matthæusi 7:12.

Ilinniagassaq: Ilaquttatta inuillu allat illoqarfigisatsinniittut misigissusii, isumaat pisariaqartitaallu innimisuffigisariaqarpavut. ‘Misiginneqataasarutta’ allat inussiarnisaarfigeqqajaanerussavaatigut. — 1 Petrusi 3:8; Lukasi 6:38.

Erseqqippoq Biibilimi siunnersuuteqartoq meeqqat inersimasutut ilakkuminartuunissaminnut, ataqqinnittuunissaminnut misiginneqataasuunissaminnullu iluaqutigisinnaasaannik. Meeqqalli tamakku pillugit kikkunnit ilinniartinneqassappat?