Guutip oqaasia ilinniarfigiuk
Upperisarsiorneq eqqortoq sorliunersoq qanoq paasineqarsinnaava?
Apeqqutit ataaniittut eqqarsaatigisarpigit? Akissutaat illit nammineq Biibilinni qanoq nassaarisinnaaneritit allaaserisami matumani sammineqarpoq. Akissutissarsiorneranni Jehovap Nalunaajaasuisa ikiorusuppaatsit.
1. Upperisarsiorneq eqqortoq ataasiinnaava?
Jiisusip ajoqersukkani upperisarsiornermik ataasiinnarmik, eqqortumik, ilinniartippai. Taanna tassaavorlusooq aqqut inuussummut sammisoq. Aqqut taanna pillugu Jiisusi ima oqarpoq: ‘Ikittuinnaapput taassuminnga nanisisut!’ (Matthæusi 7:14) Guutip pallorfiginninneq oqaatsiminik sallusuissutaasumik tunngavilik kisiat akueraa. Ilumoortumik pallorfiginnittut tamarmik upperisami ataatsimi ataasiussuseqarput. — Atuakkit Johannesi 4:23, 24; 14:6; Efesosimiut 4:4, 5.
2. Sooq upperisarsiortut assigiinngitsorpassuit kristumiuunerarpat?
Pruffiitioqqusersut kristumiussuseq mumisissimavaat namminnerlu soqutigisaminnik siuarsaanerminnut atorsimallugu. Jiisusip siulittuisimaneratut taakkua taassumunnga ‘savaataanerarput’, amaqqutulli kiisortutut pissusilersortarput. (Matthæusi 7:13-15, 21, 23) Kristumiussuseq ilumuunngitsoq ingammik Jiisusip apustiliisa toqunerisa kingorna tunngavileriartuaarneqarpoq. — Atuakkit Apustilit Suliaat 20:29, 30.
3. Upperisap ilumoortup suut immikkoorutigai?
Ilumoortumik pallorfiginnittut Biibili Guutip oqaasiatut ataqqivaat. Najoqqutassianik tassaniittunik maleruaaniartuupput. Tassa upperisaq ilumoortoq upperisamit inuit isumaannit aallaaveqartumit allaaneruvoq. (Matthæusi 15:7-9) Ilumoortumik pallorfiginnittut oqaluussissutigisaminnit allaanerusumik iliuuseqarneq ajorput. — Atuakkit Johannesi 17:17; 2 Timotheusi 3:16, 17.
Upperisarsiornermi ilumoortumi Guutip aqqa, Jehova imaluunniit Jahve, ataqqineqarpoq. Guutip aqqa Jiisusip ilisimaneqalersippaa. Inuit allat ikiorlugit Guutimik ilisarsisippai Guutillu aqqa illernarsiseqqullugu qinusassasut ilinniartillugit. (Matthæusi 6:9) Najugarisanni upperisarsiortut sorliit Guutip aqqata atorneqarnissaanik siuarsaappat? — Atuakkit Esaja 42:8; Johannesi 17:26; Romamiut 10:13, 14.
4. Ilumoortumik pallorfiginnittut kikkuunersut qanoq paasineqarsinnaava?
Kristumiut ilumoortut Guutip naalagaaffia oqaluussissutigisarpaat. Guutip Jiisusi nunarsuarmukartippaa naalagaaffimminik oqaluussissutiginneqqullugu. Tamanna inuiaat neriuutissatuaraat. Jiisusi toqussi tikillugu Guutip naalagaaffia pillugu oqaluussiuarpoq. (Lukasi 4:43; 8:1; 23:42, 43) Aamma oqarpoq ajoqersukkami naalagaaffik taanna oqaluussissutigissagaat. Inuup arlaata Guutip naalagaaffia pillugu oqaloqatiginiarlutit saaffigippatit, upperisarsiortunut sorlernut saaffiginnittup ilaanissaa ilimanarnerpaava? — Atuakkit Matthæusi 10:7; 24:14.
Jiisusip malinnittai silarsuarmut ajortumut matumunnga ilaanngillat. Silarsuarmi politikkimut tunngasunut akerleriinnernullu peqataaneq ajorput. (Johannesi 17:16) Iliuutsit isummallu ajoqutaasut silarsuarmi maani nalinginnaasut ilaarneq ajorpaat. — Atuakkit Jaaku 1:27; 4:4.
5. Kristumiussutsip ilumoortup pingaarnertut suna ilisarnaatigaa?
Kristumiut ilumoortut immikkorluinnaq ittumik asaqatigiipput. Biibili atorlugu naggueqatigiit qanorluunniit tunuliaqutallit tamaasa ataqqinissaat ilinniartarpaat. Upperisarsiortut ilumuunngitsut inuiaat sorsunnerinut tamakkiisumik tapersersuigajupput, kristumiulli ilumoortut taamaaliorumaneq ajorput. (Mika 4:1-4) Ilumoortumik upperisallit namminissarsioratik piffissartik nukitillu allanik ikiuinermut kajumissaarinermullu atortarpaat. — Atuakkit Johannesi 13:34, 35; 1 Johannesi 4:20, 21.
Upperisarsiortut sorliit ilinniartitsissutigisartik tamaat Guutip oqaasianit tunngaveqartippaat, Guutip aqqanik ataqqinnippat taassumalu naalagaaffia inuiaat neriuutissatuaattut oqaluussissutigaat? Kikkut tullermik asannittuuppat sorsuttunillu tapersersuineq ajorlutik? Ilisarnaatinit siuliini eqqartorneqartunit erserpoq tassaasut Jehovap Nalunaajaasui. — 1 Johannesi 3:10-12.
Paasisaqarnerorusukkuit atuaruk kapitali 15 atuakkami uani, Jehovap Nalunaajaasuinit saqqummersinneqartoq.
[Qupp. 10-mi assiliartaq]
“Nassuerutigisarpaat Guuti ilisimallugu, uffali suliamikkut miserratigalugu.” — Titusi 1:16