Sooq Guuti peqatigiissortaqarpa?

Allaaserisami matumani immaqa apeqqutigisarnikuusatit taakkualu akissutaat illit nammineq Biibilinni sumi takusinnaaneritit sammineqassapput. Akissutissarsiorninni Jehovap Nalunaajaasuisa ikiorusuppaatsit.

1. Sooq Guutip Israelikkut peqatigiissortamisut aaqqissuussaasunngortippai?

Guutip Aaperaap kinguaaviisa ilaat inuiattut aaqqissuussaasunngortippai inatsisinik tunigamigit. Inuiaat taakku Israelikkunnik taavai pallorfiginninnerullu ilumoortup Oqaatsimilu, Allakkat Illernartut, illersornissaannik akisussaaffeqartillugit. (Tussiaat 147:19, 20) Tamanna inuit inuiannit tamaneersut iluaqutigisimavaat. — Atuaruk 1 Mosesi 22:18.

Guutip Israelikkut ilisimannittumisut, imaluunniit nalunaajaasumisut, qinerpai. Naalakkaangamik Guutip inatsisai iluaqutigisarpaat. (5 Mosesi 4:6) Israelikkut oqaluttuarisaanerat misissorutsigu Guutimik ilumoortumik ilisarisimanninnerulersinnaavugut. — Atuakkit Esaja 43:10, 12.

2. Sooq kristumiut ilumoortut peqatigiissortatut aaqqissugaappat?

Jehovap Israelikkut iluarisariunnaaramigit ilagiit kristumiut iluarisarilerpai. (Matthæusi 21:43; 23:37, 38) Itsaq Israelikkut Guuti pillugu nalunaajaapput, kristumiulli ilumoortut ullumikkut Jehova pillugu nalunaajaasuupput. — Atuakkit Apustilit Suliaat 15:14, 17.

Jiisusip ajoqersukkani Jehova pillugu nalunaajaaqatigiinnissaannik inuiaqatigiinnilu tamani ajoqersuganngortitsinissaannik ilinniartippai. (Matthæusi 10:7, 11; 24:14; 28:19, 20) Aatsaat taama oqaluussisoqartigaaq. Ullumikkut Jehovap inuit millionillit inuiaqatigiinnit tamaneersut pallorfiginninnermut ilumoortumut katersortippai. (Saqqummersitat 7:9, 10) Aamma Jiisusip kristumiut eqimattatut suleqatigiinnissaannik ilinniartippai qiimmassaqatigiillutillu ikioqatigiissinnaaniassammata. Silarsuaq tamakkerlugu taakkua ataatsimiinneranni Biibilimik ilinniartinneqarnerat pilersaarusiat assigiit atorlugit ingerlanneqartarpoq. — Atuakkit Hebræerit 10:24, 25.

3. Jehovap Nalunaajaasui nalitsinni peqatigiiffittut qanoq pilerpat?

1870-ikkunni Jehovap Nalunaajaasuisa peqatigiiffiat pilerpoq. Biibilimik atuaqqissaartartut ikittunnguit sallusuissutit Biibilimeersut ukiorpassuarni paasineqarsimanngitsut paasilerpaat. Nalunnginnamikku ilagiit kristumiut Jiisusimit oqaluusseqquneqarsimasut silarsuaq tamakkerlugu oqaluussinermik immikkut suliniuteqartalerput. 1931-mi taakkua taaguutigilerpaat Jehovap Nalunaajaasui. — Atuakkit Apustilit Suliaat 1:8; 2:1, 4; 5:42.

4. Ullumikkut Jehovap Nalunaajaasui peqatigiissortatut qanoq aaqqissugaappat?

Ukiuni hundredelinni siullerni ilagiit kristumiut nunani amerlasuuniittut siulersuisoqatigiinnit siulersorneqarput. Siulersuisoqatigiit taakkua Jiisusi ilagiit niaquattut akueraat. (Apustilit Suliaat 16:4, 5) Ullumikkuttaaq Jehovap Nalunaajaasuisa Jiisusi ‘ilitsersuisoraat’. (Matthæusi 23:9, 10) Aamma Jehovap Nalunaajaasuisa iluaqutigisarpaat Siulersuisoqatigiit utoqqaanertanik misilittagaqarluartunik ilaasortallit ilagiinni 100.000-init amerlanerusuni Biibili tunngavigalugu kajumissaarisarnerat siulersuinerallu. Ilagiinni tamani angutit piumasaqaatinik eqqortitsisut utoqqaanertatut, tassa nakkutilliisutut, kiffartorput. Angutit taakku “Guutip savaataanik” isumassuilluarput. — Atuakkit 1 Petrusi 5:2, 3.

Jehovap Nalunaajaasui peqatigiissortatut aaqqissugaapput nutaarsiassamik nuannersumik oqaluussissutiginninniassagamik ajoqersuganngortitsiortorniassagamillu. Inuit sumi tamani ikiorumallugit Biibililersaarutit oqaatsinut 500-nit amerlanerusunut nutsertarpaat, naqitertarlugit agguaattarlugillu. Apustilit iliornerattut illumiit illumut oqaluussisarput. (Apustilit Suliaat 20:20) Sallusuissummik ilumoorlutik nuannarinnittut Biibilimik atuaqqissaaqatiginissaannik neqeroorfigisarpaat. Jehovap innuttaasa taassuma iluarisaatut iliornissartik allanillu ikiuisarnissartik pingaartippaat, taamaattumik peqatigiiffiuvoq pilluartunik innuttalik. — Atuakkit Tussiaat 33:12; Apustilit Suliaat 20:35.

Paasisaqarnerorusukkuit atuaruk kapitali 19 atuakkami uani, Biibilimi sorpiaat ajoqersuutigineqarpat?, Jehovap Nalunaajaasuinit saqqummersinneqartoq.