Jiisusi politikkimut qanoq isiginnittaaseqarpa?
IIVANGKIILIUNI sisamaasuni arlaleriarluni eqqaaneqarpoq Jiisusi kiffartornermini politikkimut akuliuteqqullugu kajumissaarneqartoq. Assersuutigalugu 30-nik ukioqarluni kuiseqqammersoq Diaavulup taanna silarsuarmut naalaganngornissaanik neqeroorfigaa. Kingusinnerusukkut inuppassuarnit kunnginngoqquneqarpoq. Sulilu kingusinnerusukkut politikkikkut suliniuteqartartunngortinniarneqarpoq. Jiisusi qanoq piva? Pisimasut taakku sammeriartigit.
Silarsuarmut naalagaq. Iivangkiiliuni oqaluttuarineqarpoq Diaavulup “silarsuarmi naalagaaffiit tamaasa” Jiisusimut neqeroorutigigai. Eqqarsaatigeriaruk Jiisusi silarsuarmi naalagaaffinnut tamanut naalakkersuisutut pissaaneqarsimasuuguni inunnut naalliuutilinnut qanoq ajunngitsuliorsinnaatigisimassagaluartoq! Jiisusili Saatanimut akuersinngilaq. Inuk politikkimik soqutigisaqartoq inuiaallu atugarissaarnissaannik ilumoorluni sulissutiginnittoq Jiisusitut naaggaarsinnaanavianngilaq. — Matthæusi 4:8-11.
Kunngi. Jiisusip nalaani inuusut ilarpassui aningaasatigut inuttullu ajornartorsiutiminnik aaqqiisinnaasumik naalagaqalerusuttorujussuugaluarput. Jiisusip iliuuserisinnaasarpassui tupigusuutigaat, politikkikkullu suliniuteqaqataatikkusukkaluarpaat. Jiisusi qanoq piva? Apustili Johannesi ima allappoq: “Jiisusip nalujunnaaramiuk kunnginngortikkumalluni tigujartorniaraanni qaqqamukaqqippoq, kisimiilluni.” (Johannesi 6:10-15) Erseqqippoq Jiisusi politikkimut akuliukkusunngitsoq.
Politikkikkut suliniuteqartartoq. Jiisusip toqunissaa ullualunnik sioqqullugu pisimasoq maluginiariaruk. Farisiiarit ajoqersugaasa ilaat, Romamiut naalagaaffiannit avissaarumasut, herodianerit, partiimut Romamik tapersersuisumut ilaasortaasut, peqatigalugit Jiisusimut saaffiginnipput. Taanna pinngitsaalillugu politikkikkut isummertinniarlugu aperaat juutit Romamut akileraartussaanersut.
Jiisusi qanoq akinersoq Markusip ima allaatigaa: “‘Sooq misilinniarpisinga? Denarimik isaassivigisinga, takuniassavara!’ Denarimik ataatsimik isaassivigaat. Aperaalu: ‘Kiaana assinga atialu?’ ‘Kaasarip’, akipput. Jiisusip oqarfigai: ‘Taavami kaasari tunisiuk kaasarip piinik Guutilu Guutip piinik.’” (Markusi 12:13-17) Jiisusip akissutaanut oqaaseqaammi atuakkami Church and State — The Story of Two Kingdoms-imiittumi ima inerniliisoqarpoq: “Taanna missiarsitut politikkimik suliaqartutut isigineqarusunngilaq, kaasarillu pisassai Guutillu pisassai erseqqissumik immikkoortippai.”
Jiisusi pitsuunermut, peqquserluttoqartarneranut naapertuilluanngitsuliortoqartarneranullu tunngatillugu misigittaatsuunngilaq. Biibilimi ersersinneqarpoq inuit atugarliortut assut nalligigai. (Markusi 6:33, 34) Taamaakkaluartorli taamanikkut politikkikkut akerleriissutigineqartunut isummertinniarneqaraluarluni suliniummik silarsuarmi tamarmi naapertuilluanngissusermik soraarsitsisussamik aallarnisaanngilaq.
Allaatigineqarsimasunit erseqqippoq Jiisusi politikkimut akuliukkumanngitsoq. Ullumikkummi kristumiut politikkimut qanoq isiginnittaaseqassappat?