Ullumikkut kristumiut politikkimut qanoq isiginnittaaseqassappat?

ULLUMIKKUT kristumiut ilumoortut politikkimut akuliunneq ajorput. Sooq? Jiisusip maligassiaanik malinnikkamik. Taanna imminut pilluni ima oqarpoq: ‘Silarsuarmut ilaanngilanga.’ Ajoqersukkanilu ima oqarfigai: ‘Silarsuarmut ilaanngilasi.’ (Johannesi 15:19; 17:14, NV) Kristumiut politikkimut akuliuttussaannginnerannut pissutaasut makku eqqarsaatigeriakkit.

1. Inuit pisinnaasaat killeqarput. Biibilimi erseqqissarneqarpoq uagut inuit Guutimit siulersorneqarata inuunitsinnik nammineq aqutsisinnaanatalu aqutsisussaatitaanngitsugut. Pruffiiti Jeremia ima allappoq: “Ingerlasup alloriartarnini aqussinnaanngilai.” — Jeremia 10:23, NV.

Soorluttaaq uagut inuit timmisinnaasunngorluta pinngortitaanngitsugut, taamatulli nammineerluta aqutsisinnaasunngorluta imaluunniit naalakkersuisinnaasunngorluta pinngortitaanngilagut. Inuit aqutsisinnaanerata killeqarnera pillugu oqaluttuarisaanermik ilisimatooq David Fromkin ima allappoq: “Naalakkersuisut inuinnaapput; taamaattumik kukkusinnaapput, siunissaallu nalorninartarpoq. Pissaanermik atuisinnaapput, [pissaanermilli atuisinnaanerat] killeqarpoq.” (The Question of Government) Tupinnanngilaq inunnik isumalluuteqaqqunata Biibilimi mianersoqquneqaratta! — Tussiaat 146:3.

2. Anersaapiluit ullumikkut sunniuteqartarput. Saatanip nunarsuarmut tamarmut naalagaassuseq Jiisusimut neqeroorutigimmagu, Jiisusip miserratiginngilaa Diaavulup nunarsuarmi naalagaaffinnik tamanik neqeroorutiginninnissaminut pissaaneqarnera. Kingusinnerusukkut allaat Jiisusip Saatani tassaanerarpaa “silarsuup naalagaanera”. Ukiualuit tamatuma kingorna apustilip Paulusip Saatani ‘silarsuup matuma guutiatut’ taavaa. (Johannesi 14:30; 2 Korinthimiut 4:4) Paulusi kristumioqatiminut ima allappoq: “Sorsunnerput . . . [sorsunneruvoq] . . . taartumi matumani silarsuarmi naalagaasunut ajussutsillu anersaavinut pissaasunut qilaap ataaniittunut.” (Efesosimiut 6:12) Aap, silarsuarmi naalakkersuisuiit tassaapput anersaapiluit isertorlutik naalakkersuisut. Tamanna politikkimut isiginnittaatsitsinnut qanoq sunniuteqartariaqarpa?

Assersuut una eqqarsaatigeriaruk: Soorlu angallateeqqat imaq sakkortuumik sarfartillugu sarfaanneqartartut, taamatuttaaq silarsuarmi matumani politikkikkut aaqqissuussinerit anersaapilunnit takussaanngitsunit pissaaneqangaartunit aqunneqartarput. Aamma soorlu umiartortut sakkortuumik sarfartillugu akiuuppiarsinnaaneq ajortut, taamatuttaaq politikerit anersaapiluit ajortumik sunniuteqarnerannut akiuussinnaaneq ajorput. Pissaanillit ajortut taakkua inunnik sequmisitsinissartik nunarsuarmillu erloqisitsinissartik aalajangiusimavaat. (Saqqummersitat 12:12) Taamaattumik allannguivissinnaasutuaq tassaavoq Saatanimit taassumalu anersaapiluinit pissaaneqarnerusoq. Jehova Guuti kisimi allannguisinnaavoq.a — Tussiaat 83:19; Jeremia 10:7, 10.

3. Kristumiut ilumoortut Guutip naalagaaffianik tutsuiginnipput. Jiisusip taassumalu ajoqersugaasa nalunngilaat Guuti piffissaq aalajangikkani nalliuppat naalagaaffimmik qilammit nunarsuarmut naalakkersuisussamik atuutilersitsisussaasoq. Naalagaaffik taanna Biibilimi Guutip naalagaaffianik taaneqarpoq, aamma Biibilimit erserpoq Jiisusi Kristusi naalagaaffimmi tamatumani kunngiusussatut toqqarneqarsimasoq. (Saqqummersitat 11:15) Naalagaaffik tamanna inunnut tamanut sunniuteqartussaammat “Guutip naalagaaffianik iivangkiiliu” Jiisusip oqaluussinermini pingaarnersaatippaa. (Lukasi 4:43) Aamma taassuma ajoqersukkani Guutimut ima qinusarnissaannik ilinniartippai: “Naalagaaffiit tikiulli.” Sooq? Naalagaaffik taanna naalakkersuilerpat Guutip piumasaa pinngitsoorani qilammisut nunarsuarmi pissammat. — Matthæusi 6:9, 10.

Silarsuarmimi matumani naalakkersuisut qanoq pineqassappat? Biibilimi allassimavoq “silarsuarmi tamarmi” naalakkersuisut peerneqassasut. (Saqqummersitat 16:14; 19:19-21) Silarsuarmi matumani politikkikkut aaqqissuussaanerit tamarmik Guutip naalagaaffianit qanittukkut piiarneqarnissaat upperilluinnaraanni aaqqissuussanik taakkuninnga tapersersuinnginnissaq isumatusaarnerussaaq. Naalagaaffinnik inunnit pilersitaasunik tapersersuineq Guutimut akerliusumik isummerneruvoq.

[Quppernerup ataani ilanngussaq]

[Qupp. 6-mi issuagaq]

Jehovap Nalunaajaasui politikkikkut aaqqissuusseqqinnissamik tapersersuinatik Guutip naalagaaffianik tapersersuipput