Guutip oqaasia ilinniarfigiuk

Upperisarsiornerit qanoq pineqassappat?

Allaaserisami matumani immaqa apeqqutigisarnikuusatit taakkualu akissutaat illit nammineq Biibilinni sumi takusinnaaneritit sammineqassapput. Akissutissarsiorninni Jehovap Nalunaajaasuisa ikiorusuppaatsit.

1. Upperisarsioqatigiit tamarmik ajunngitsuuppat?

Upperisarsioqatigiinni amerlasuuni Guutimik iluarisaarusuttunik inoqarpoq. Guutip inuit taakku maluginiartarpai soqutigalugillu. Ajoraluartumilli inuit ilaasa upperisarsiorneq ajortumik siunertaqarlutik atortarpaat. Qanga upperisarsiornikkut siuttuusut akeqqatik allaat naalliutsittarsimavaat. (2 Korinthimiut 4:3, 4; 11:13-15) Ullutsinni nutaarsiassaqartitsiviit naapertorlugit upperisarsiornikkut siuttut ilaat peqqarniisaarniarnissamut kaammattuisarsimapput, sorsunnernik tapersersuisarsimapput imaluunniit ilaasa meeqqat kinguaassiuutitigut atornerluttarsimavaat. — Atuakkit Matthæusi 24:3-5, 11, 12.

Biibilimi upperisarsiornerit assigiinngitsut marluk eqqaaneqarput — ilumoortumik upperisarsiorneq aamma eqqunngitsumik upperisarsiorneq. Upperisarsiornermi eqqunngitsumi Guuti pillugu ilumoortoq ajoqersuutigineqanngilaq. Guutilli kissaatigaa inuit imminut tunngatillugu sallusuissut paasissagaat. — Atuaruk 1 Timotheusi 2:3-5.

2. Upperisarsiornerit qanoq pineqassappat?

Guutip kissaatiginngilaa inuit upperisarsioqatigiinnit Guutimik asanninneraasunit eqqunngitsumilli ilisarititsisunit salloqittagaanissaat. Upperisarsioqatigiit taakkua ilaasortaat silarsuarmut Saatanimit aqunneqartumut ikinngutaarusupput. (Jaaku 4:4; 1 Johannesi 5:19) Upperisarsioqatigiit taakku Guutimik tapersersuisuunatik nunami naalakkersuisunik tapersersuisuusut Guutip oqaasiani atortittartutut taaneqarput. Atortittartoq taanna Biibilimi ‘Babylonersuarmik’ taaneqarpoq, itsaq illoqarfik Noap nalaani ulersuup kingorna upperisarsiornerup eqqunngitsup pilerfia atsiullugu. Ungasinngitsukkut upperisarsioqatigiit inunnik nakutitsisut naqisimannittullu tassanngaannaq Guutip suujunnaarsissavai. — Atuakkit Saqqummersitat 17:1, 2, 5, 17; 18:8, 23, 24.

3. Guuti qanoq ililluni nunarsuaq tamakkerlugu inunnik nuannaarutissiiumaarpa?

Upperisarsiornermut eqqunngitsumut eqqartuussinissaq nutaarsiassaavoq nuannersoq. Nunarsuaq tamakkerlugu inuit naqisimaneqarunnaassapput. Qaqugumulluunniit inuit upperisarsiornermit eqqunngitsumit tammartinneqaqqinnatillu avissaartuutitseqqinneqassanngillat. Taamanikkussamut kikkut tamarmik ataasiussuseqarlutik Guutimut ilumoortutuamut pallorfiginnissapput. — Atuakkit Esaja 11:9; Saqqummersitat 18:20, 21; 21:3, 4.

4. Inuit eqqortuliorusuttut qanoq iliortariaqarpat?

Silarsuaq tamakkerlugu inuit upperisarsiornermi eqqunngitsumiittut eqqortuliorusuttulli Jehovap puiorsimanngilai. Maanna Jehovap inuit taakku katersorpai ataasiussuseqalersillugit sallusuissummik ilinniartinnerisigut. — Atuakkit Mika 4:2, 5. 

Jehovap imminut kiffartorusuttut ilaqutariissortaminut tikilluaqqusarpai. Imaassinnaavoq ikinngutitta ilaqutattaluunniit Jehovamut kiffartulernerput kamaatigigaat. Ajunngitsortarpassuaqarporli, Guutimummi ikinngutaalissaagut, asannittunik ‘ilaqutartaassaagut’ inuunermillu naassaanngitsumik neriugisaqalerluta. — Atuakkit Markusi 10:29, 30; 2 Korinthimiut 6:17, 18.

Paasisaqarnerorusukkuit atuaruk kapitali 15 aamma 16 atuakkami uani, Biibilimi sorpiaat ajoqersuutigineqarpat?, Jehovap Nalunaajaasuinit saqqummersinneqartoq.

[Qupp. 26-mi suminngaanneernera]

The Complete Encyclopedia of Illustration/​J. G. Heck