Silarsuup naggatissaa siooragineqartoq, soqutigineqartoq aamma soqutigineqanngitsoq

Illit decembarip 21-at 2012 qanoq isumaqarfigaajuk? Ulloq taanna mayat qaammatisiutaat malillugu silarsuaq tamakkerlugu allanngortoqarumaarnera inuppassuit ilimagigaluarpaat. Apeqqutaalluni qanoq ilimagisaqarsimanersutit eqqissiallakkunarlutilluunniit pakatsillutilluunniit soqutiginngilat. Silarsuup naggatissaa pillugu siulittuutit eqquutinngitsut taanna ilaannaraat?

Taavami ‘silarsuup naggatissaa’ Biibilimi allaatigineqartoq? (Matthæusi 24:3) Inuit ilaasa nunarsuaq nungulluni ikuallannissaa siooragaat. Allat silarsuup naggatissaani qanoq pisoqarumaarnera soqutigisupilussuuaat. Inuppassuilli silarsuup naggatissaa utaqqikatallugu soqutigiunnaarsimavaat. Imaassinnaavali taamatut pinerit piviusut tunngaviginagit takorluugaannarnik tunngaveqartut?

Immaqa Biibilimi silarsuup naggatissaa pillugu qanoq ajoqersuutigineqarnersoq paasigukku tupaallaatigissavat. Biibili malillugu naggatissaq qilanaarisinnaavarput, aammattaarli allaatigineqarpoq inuit ilaasa naggatissaq mulusoralugu utaqqikatassagaat. Silarsuup naggatissaa pillugu apeqqutigineqarajuttut ilaasa akissutaat Biibilimeersut misissoqqullugit kajumissaarpatsigit.

Nunarsuaq nungulluni ikuallassava?

BIIBILIP AKISSUTAA: ‘Guutip nuna aalajaatsumik tunngavilerpaa naassaanngitsumik patajaallisillugu.’ — TUSSIAAT 104:5.

Nunarsuaq innermik allamilluunniit piuneerunneqassanngilaq. Aap, Biibilimi ajoqersuutigineqarpoq inuiaat nunarsuaq naassaanngitsussamut angerlarsimaffigissagaat. Tussiaat 37:29-mi ima allassimavoq: “Iluartut nuna kingornutissavaat najugaqassallutillu tassani naassaanngitsumik.” — Tussiaat 115:16; Esaja 45:18.

Nunarsuaq pinngortereeramiuk Guuti oqarpoq ‘ajunngingaartoq’. (1 Mosesi 1:31) Guutip nunarsuaq aserornissaa siunertarinngilluinnarpaa, neriorsuutigaali ‘nunarsuarmik aseruisut aserussallugit’ nunarsuarlu illersorumallugu ataavartumik ajoquserneqannginniassammat. — Saqqummersitat 11:18.

Immaqami Petrusip allagaasa aappaat 3:7-imi allassimasoq eqqumiigivat. Tassani ima allassimavoq: “Qilaalli nunalu maannakkut ittut . . . [utaqqisitaapput] . . . ikuallagaanissaminnut.” Tassani ersersinneqannginnerpa nunarsuaq nungulluni ikuallassasoq? Biibilimi oqaatsit ‘qilaat’, ‘nuna’ aamma ‘ikuallanneq’ imaluunniit ‘inneq’ ilaannikkut assersuutitut atorneqartarput. Assersuutigalugu Tussiaat 66:4-mi ima allassimavoq: “Nunarsuummi tamarmi pallorfigissavaatit.” Uani oqaaseq ‘nunarsuaq’ atorneqarmat nunarsuup inui pineqarput.

Petrusip allagaasa aappaanni kapitali 3-mi allassimasunit erserpoq oqaatsit qilaat, nuna ikuallannerlu versi 7-imiittut assersuutitut atorneqartut. Versi 5-imi aamma 6-imi Noap nalaani ulersuaqarnera silarsuullu naggatissaa assigiissuteqartutut allaatigineqarput. Taamanikkut itsaq ‘silarsuaq’ piuneerunneqarpoq, nunarsuarli piuneerunneqarnani. Tassa ulersuarmi inuiaqatigiit ajortut, Biibilimi ‘silarsuartut’ eqqaaneqartut, piuneerunneqarput. Aamma ‘qilaat’, tassa taamanikkut nunami naalakkersuisut, piuneerunneqarput. (1 Mosesi 6:11) Petrusip allagaasa aappaat 3:7-imi assingusumik siulittuutigineqarpoq inuiaqatigiit ajortut naalakkersuisullu peqquserluttut piuneerunneqarluinnassasut soorlulusooq innermik piuneerunneqartut.

Silarsuup naggatissaani qanoq pisoqassava?

BIIBILIP AKISSUTAA: “[Silarsuaq] piumatussusialu nungussapput, Guutilli piumasaanik iliortoq naassaanngitsumik atassaaq.” — 1 JOHANNESI 2:17.

‘Silarsuaq’ nunguttussaq tassaanngilaq nunarsuaq kisianni inuiaat nunarsuarmiittut Guutip piumasaanut naapertuutinngitsumik inooriaaseqartut. Soorlu nakorsap pilattaasartup inuup inuunera annaanniarlugu kræfti tinumasoq peertaraa, taamatuttaaq Guutip inuit ajortut ‘piiassavai’ inuit ajunngitsut nunami inuunerminnik nuannaarutiginnilluinnarniassammata. (Tussiaat 37:9) Tamanna eqqarsaatigalugu ‘silarsuup naggatissaa’ siooragineqartariaqanngilaq.

Inuiaat aamma nunarsuaq asattuunneqartussaammata tunngavissaqarluarpugut isummissalluta aaqqissuussineq nutaaq atulersinneqarumaartoq, ilaa? Aap, Biibilimimi silarsuassaq nutaaq eqqartorneqarpoq. — Lukasi 18:30.

Jiisusip piffissaq nalliukkumaartoq taanna ‘sunik tamanik nutarterinissamik’ taavaa. Taamanikkussamut Guutip aallaqqaammulli siunertarisaatut inuiannut tunngasut aaqqikkumaarpai. (Matthæusi 19:28, New International Version) Taamanikkussamut uku nuannaarutigisinnaavavut:

• Nunarsuaq paratiisiusoq kikkunnut tamanut toqqissisimaffiullunilu atugarissaarfiusoq. — Esaja 35:1; Mika 4:4.

• Siunertaqarluartumik nalerisimaarnartumillu suliaqarnissaq. — Esaja 65:21-23.

• Nappaatit tamarmik atorunnaarnissaat. — Esaja 33:24.

• Utoqqaliartorunnaarlunilu inuususseqqinneq. — Jobi 33:25.

• Toqusut makinnissaat. — Johannesi 5:28, 29.

‘Guutip piumasaa’ naapertorlugu iliuuseqarutta silarsuup naggatissaa sioorassutiginagu qilanaarisinnaavarput.

Ilumoorpa silarsuup naggatissaa qanillisoq?

BIIBILIP AKISSUTAA: “Tamakku tamaasa takulerussigit ilisimassavarsi Guutip naalagaaffia qanillisoq.” — LUKASI 21:31.

Atuakkiamini The Last Days Are Here Again (Ullut kingulliit nalliuteqqipput) professori Richard Kyle allappoq pissutsinik “tassanngaannaq innuttaaqatigiinnilu uiverneq pissutaallutik silarsuup naggatissaa pillugu siulittuutinik pilersitsisartut”. Ingammik taamaattarpoq pissutsinik allannguineq uivernerlu nassuiaruminaatsinneqaraangata.

Biibilimili pruffiitit naggatissaq pillugu siulittuisut naliminni pisut ajortut nassuiarniarlugit siulittuineq ajorput. Guutimilli isumassarsisitaallutik pisussat silarsuup naggatissaa qanillineranik ersersitsisut allaatigaat. Siulittuutit taakkua ilaat eqqarsaatigikkit, nalitsinnilu eqquunnersut nammineq nalileruk.

• Sorsunnerit, kaannersuaq, nunap sajunneri nappaalanerillu toqussutaasinnaasut. — Matthæusi 24:7; Lukasi 21:11.

• Pinerluttuliornerit amerliartuinnarnerat. — Matthæusi 24:12.

• Inuit nunarsuarmik aseruinerat. — Saqqummersitat 11:18.

• Inuit tassaalerumaartut namminissarsiortut, aningaaserituut, aliikkusersuutinik pingaartitsisut Guutimillu asanninngitsut. — 2 Timotheusi 3:2, 4.

• Ilaqutariittut avissaartuunneq. — 2 Timotheusi 3:2, 3.

• Naggatissap nalliutingajalerneranut uppernarsaatinik soqutigisaqannginneq. — Matthæusi 24:37-39.

• Nunarsuaq tamakkerlugu Guutip naalagaaffia pillugu nutaarsiassamik nuannersumik oqaluussissutiginninneq. — Matthæusi 24:14.

Jiisusip oqarneratut “tamakku tamaasa” takulerutsigit ilimagissagipput silarsuup naggatissaa nalliutingajalersoq. (Matthæusi 24:33) Jehovap Nalunaajaasui isumaqarput uppernarsaatit erseqqilluinnartuusut, nunanilu 236-ni upperisartik pillugu inunnut allanut oqaluussisarput.

Naggatissaq kukkulluni nalliutissasorineqartarmat taava imaappa nalliunnavianngitsoq?

BIIBILIP AKISSUTAA: “Inuit oqarpata: ‘Sumilluunniit aarlerinartoqanngilaq!’ taava perlussap tassanngaannaq tikikkumaarpai ernilersup nallisitsisarneratut, aniguissanngillallu.” — 1 THESSALONIKAMIUT 5:3.

Biibilimi silarsuup aserornissaa nallisitsinermut assersuunneqarpoq — anaanaasup anniarneri pinngitsoorneqarsinnaanngillat, tassanngaannarlu nallisitsisarpoq. Aamma naggatissap naggataatungaanut piffissaq naartunermut assersuunneqarsinnaavoq, naartusup erningajalernerminut ilisarnaatit sakkortusiartornerat eqqumaffigisarpaa. Immaqa nakorsap erninissaa ullulersimavaa; arnalli qaangiisooraluaruniluunniit qularinngilaa qanittukkut ernisussaalluni. Taamatuttaaq ‘ullussanut kingullernut’ ilisarnaatit erseqqissut allanngortinneqanngillat naggatissaq ilimagineqartutut nalliutinngikkaluartoq. — 2 Timotheusi 3:1.

Taava immaqa ima eqqarsarputit: ‘Silarsuup naggatissaata nalliutingajalerneranut nalunaaqqut ersarikkaluartoq sooq taava inuppassuit tamanna eqqumaffiginngilaat?’ Biibilimi ersersinneqarpoq naggatissaq qanillippat inuppassuit uppernarsaatit soqutiginavianngikkaat. Ulluni kingullerni allanngortoqangaatsiarsimanera nassuerutiginagu mitaatiginnillutik ima oqassapput: “Siuaasat toqummatali suut tamarmik pinngortinneqaqqaarnermissut ittuaannarsimapput.” (2 Petrusi 3:3, 4) Tassa ullussanut kingullernut nalunaaqqut ersarippoq, inuppassuilli soqutiginavianngilaat. — Matthæusi 24:38, 39.

Allaaserisami matumani naggatissap nalliutingajalerneranut Biibilimi takussutissat ilaannaat sammineqarput.a Paasisaqarnerorusuppit? Taava Jehovap Nalunaajaasui attaveqarfigisinnaavatit akeqanngitsumik Biibilimik atuaqqissaaqatigineqarumallutit. Illit angerlarsimaffinni sumiiffimmiluunniit allami illit iluarisanni, imaluunniit oqarasuaatikkut, atuaqqissaaqatigiissinnaavusi. Piffissaqartikkukku siunissami pilluaqqussutissat nalissaqassanngillat.