‘Suut pingaaruteqarnerunersut qulakkeertakkit’

1, 2. Ullut kingulliit pillugit siulittuut sorleq qanoq eqquutissanersoq ajoqersukkat eqqarsaatigisimassavaat, aamma sooq?

JIISUSIP ajoqersukkani oqarfigisimavai naalaffik piuneerussaajumaartoq. Petrusip, Jaakup, Johannesip Andreasillu taassuma oqaasii isumakuluutigaat. (Mark 13:1-4) Taamaattumik Jiisusi kisimeeqatigileramikku ima oqarfigaat: “Oqarfigitigut qaqugu tamanna pissasoq sunalu nalunaaqutaassasoq illit tikiunnissannut silarsuullu naggatissaanut.” (Matt 24:1-3) Jiisusi akissummini Jerusalemip piuneerussaannginnerani pisussanik nassuiaaginnarnani aammali Saatanip silarsuaata naggataatungaani pisussanik nassuiaavoq. Jiisusip pisussat alianartorujussuit, assersuutigalugu sorsunnerit, kaannersuit inatsisaatsuliornerillu, siulittuutigai. Jiisusilli aamma pisussaq nuannersoq siulittuutigaa. Ima oqarpoq: ‘Naalagaaffimmik iivangkiiliu [nutaarsiassaq nuannersoq, NW] taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.’ — Matt 24:7-14.

² Ajoqersukkat Guutip naalagaaffia pillugu nutaarsiassaq nuannersoq Jiisusi ilagalugu oqaluussissutigisareersimavaat. (Luk 8:1; 9:1, 2) Jiisusillu ima oqarsimanera eqqaamasimassavaat: “Katersugassat amerlaqaat sulisussalli ikittuinnaallutik. Taamaattumik katersuinermi naalagaasoq qinnuigisiuk katersuinermi sulisussanik aallartitseqqullugu.” (Luk 10:2) Immaqa ima eqqarsimassapput: ‘Qanormitaava “silarsuarmi tamarmi” oqaluussissallutalu “inuiannut tamanut” nalunaajaassagatta? Kikkorpassuit sulissagamik?’ Ajoqersukkat Matthæusi 24:14-imi allassimasut tupinnaannartumik qanoq eqquutissanersut takorloorsinnaanngivippaat!

3. Sooq Jiisusip oqaasii Lukasi 21:34-miittut uagutsinnut ingammik ullumikkut pingaaruteqarpat, immitsinnullu qanoq aperisinnaavugut?

³ Jiisusip siulittuutaata eqquunnerata nalaani inuuvugut. Nunarsuaq tamakkerlugu inuit millionillit arlallit Guutip naalagaaffia pillugu nutaarsiassaq nuannersoq oqaluussissutigisarpaat. (Es 60:22) Jiisusilli aamma paasitippaa oqaluussisartut ilaasa oqaluussinertik inuunerminni salliutikkuminaatsissagaat. Allamut saasaateqarumaaramik uummataat ‘malussarlersitaajumaarpoq’. (Atuaruk Lukasi 21:34). Guutip innuttaasa ilaasa pingaaruteqarnerpaat salliutinngimmatigit Jiisusip oqaasii uagutsinnut ingammik ullumikkut pingaaruteqarput. Tamanna ersertarpoq taakkua suliffimmut, qaffasinnerusumik ilinniagaqarnermut pigisanullu tunngatillugu aalajangiigaangata. Allat timersornermut imaluunniit aliikkutassanut piffissaq atorpallaartarpaat. Ilaat tatineqarneq ulluinnarnilu isumakuluutit pissutigalugit Guutimut kiffartornerminni iliuuseqarpiarunnaarsimapput. Imminut ima aperigit: ‘Uangami? Inuuninni Guutip piumasaatut iliornissara pingaarnerpaatippara?’

4. (a) Paulusip kristumiut Filippimiut pillugit suna qinnutigaa, aamma sooq? (b) Allaaserisami matumani tulliuttumilu suut sammissavavut, taakkulu sunissamut iluaqutigisinnaavavut?

⁴ Ukiuni hundredelinni siullerni kristumiut Guutip piumasaa inuunerminni salliutikkumallugu ilungersortariaqarput. Taamaattuminguna apustilip Paulusip qinnutigigaa Filippimiut ‘suut pingaaruteqarnerunersut qulakkiissagaat’. (NW) (Atuakkit Filippimiut 1:9-11). Paulusip pisimaneratut kristumiut amerlanersaat ‘annerusumik sapiillipput ersiornatik Guutip oqaasia oqaluussissutigalugu’. (Fil 1:12-14) Tamatumunnga assingusumik ullumikkut amerlanersavut Guutip oqaasianik sapiillutik oqaluussissutiginnittuupput. Jehovap peqatigiissortaani ullumikkut suliarineqartunik eqqarsaatiginninnerput oqaluussinermi iliuuseqarnerulissutigisinnaavarput? Ilaana! Allaaserisami matumani Jehovap Matthæusi 24:14-imi allassimasut qanoq eqquutitikkai sammeriartigu. Jehovap peqatigiissortaani suna pingaarnerpaatinneqarpa, tamannalu uagutsinnut ilaquttatsinnullu qanoq kajuminnerulissutaasinnaava? Allaaserisami tulliuttumi Guutimut kiffartornermi pinertusaarnissatsinnut Jehovallu peqatigiissortaanit siulersorneqarnissatsinnut suna iluaqutigisinnaanerlutigu sammissavarput.

JEHOVAP PEQATIGIISSORTAASA ILAAT TAKUSSAANNGITSUT

5, 6. (a) Sooq Jehovap kiffani qilammi pisunik takorruuisippai? (b) Ezekieli qanoq takorruuisinneqarpa?

⁵ Jehova assigiinngitsorpassuit pillugit, assersuutigalugu avataarsuaq inuullu qarasaa pillugit, Biibilimi sukumiisumik allatsitsinngilaq. Jehovalli piumasaminik paasinnissinnaaqqulluta naalassinnaaqqullutalu paasissutissanik pisariaqartitatsinnik tunisimavaatigut. (2 Tim 3:16, 17) Soqutiginarporli Jehova peqatigiissortani takussaanngitsut pillugit paasissutissanik allatsitsisimammat. Biibilip atuagartaani Esajami, Ezekielimi, Danielimi Saqqummersitanilu paasissutissat taakku atuarlugit pissanganarpoq! (Es 6:1-4; Ez 1:4-14, 22-24; Dan 7:9-14; Saqq 4:1-11) Sooq Jehova qilammiittut ilaat pillugit uagutsinnut paasisitsiva?

⁶ Jehovap kissaatigaa qilammi nunarsuarmilu peqatigiissortaanut ilaanerput eqqaamajuassagipput. Jehovap peqatigiissortai takussaanngitsut taassuma piumasaa naammassiniarlugu ilungersorput. Assersuutigalugu Ezekielip takorruuilluni takuai qamutit angisuut Jehovap peqatigiissortaanut takussaanngitsunut assersuunneqartut. Qamutit sukkasoorujussuupput, ingerlaannarlu sammivimmut allamut sangusarput. (Ez 1:15-21) Aamma qamutit ingerlatitsisuat, Jehova, takuaa. Ezekieli ima allappoq: “[Takusaqarpunga] kuultitut qaqortutut uisorilasutut ittumik, innertut nigalimmik kaajaluisimasutut ittumik.” Imalu nangippoq: “Taamaappoq Naalakkap naalannassusiata assigisaa.” (Ez 1:25-28) Takorruugaq tamanna Ezekielip tupigutsaatigisimassaqaa! Takuaa Jehovap peqatigiissortani aqulluaqqissaarlugillu anersaani illernartoq atorlugu siulersorai. Takorruukkami qamutit ingerlanerat Jehovap peqatigiissortaasa takussaanngitsut sulinerannut assersuutaalluarpoq!

7. Danielip takorruugaa qanoq uppernikkut nakussatsissutigaarput?

⁷ Aamma Danielip takorruugaa uppernikkut nakussatsissutigisinnaavarput. Jehova “ittuinnartoq” issiavissaarsuarmi assakaasulimmiittoq takuaa. (Dan 7:9) Jehovap kissaatigaa Danielip taassuma peqatigiissortaasa ingerlanerat, tassa Jehovap piumasaa naammassiumallugu suliuarnerat, paasissagaa. Taava Danielip “inuup erneratut isikkoqartoq”, Jiisusi, Jehovap peqatigiissortaanut takussaasunut oqartussaassusermik tunineqartoq takuaa. Jiisusip inunnik naalakkersuinera ukiualuinnarnik sivisussuseqassanngilaq. “Naalagaassusia naalagaassusiuvoq soraajuitsuusussaq, kunngeqarfialu suujunnaassanngilaq.” (Dan 7:13, 14) Takorruugaq tamanna Jehovamik tatiginninnissatsinnut iliuusiinillu pingaartitsinissatsinnut kajumississutigaarput. Jiisusilu Jehovamit oqartussaassusermik tunineqarmat Jiisusi siulersortitsitut upperilluinnarsinnaavarput.

8. Jehovap peqatigiissortaanik takorruukkat Ezekielimut Esajamullu qanoq sunniuteqarpat, takorruukkallu taakku uagutsinnut qanoq sunniuteqarpat?

⁸ Jehovap peqatigiissortaanik takorruukkat uagutsinnut qanoq sunniuteqassappat? Ezekielip misigineratut, Jehovap iliuuserisai ajasoorutigaavut. (Ez 1:28) Aamma pruffiitip Esajap takorruuilluni qilammiittut takuai. Taakku pillugit allanut oqaluussinissaminik periarfissaqalerami nangaanani kajumilluni taamaaliorpoq. (Atuakkit Esaja 6:5, 8). Esajap nalunngilaa Jehovamit ikiorneqarami pruffiititut kiffartornermini kimilluunniit sumilluunniillu unitsinneqarnaviarani. Esajap misigineratut, takorruugaq tamanna Jehovap peqatigiissortaanik tapersersuinissatsinnut kajumississutigaarput Guutimut kiffartornermi iliuuseqarnerunikkut. Peqatigiissortanut Jehovap piumasaa naammassiumallugu suliuartunut ilaanerput nalunagu qiimmaallannaqaaq!

JEHOVAP PEQATIGIISSORTAASA ILAAT TAKUSSAASUT

9, 10. Sooq Jehovap peqatigiissortaasa ilaat takussaasut pisariaqarpat?

⁹ Jehovap ernini aqqutigalugu peqatigiissortami ilaat nunarsuarmiittut peqatigiissortami ilaannik takussaanngitsunik suleqateqartussat pilersippai. Sooq suliaq Matthæusi 24:14-imi siulittuutigineqartoq naammassineqassappat nunarsuarmi peqatigiissortaqartariaqarpa? Pissutaasut pingasut misissussavavut.

¹⁰ Siullermik, Jiisusi siulittuivoq ajoqersukkani ‘nunarsuup isua tikillugu allaat’ oqaluussiumaartut. (ApS 1:8) Aappassaanik, oqaluussisartut isumassorneqaqqullugit anersaakkut inuussutissanik pilersuisoqartariaqarpoq. (Joh 21:15-17) Pingajussaanik, ataatsimiittarnissat aaqqissorneqartariaqarput taakku Jehova pallorfiginiarlugu katersuussinnaaqqullugit allanullu oqaluussinissamik ilinniartinneqarsinnaaqqullugit. (Hebr 10:24, 25) Tamakku tamarmik suliarineqassappata Jiisusip ajoqersugai peqatigiissortanik aaqqissuulluagaasunik pisariaqartitsipput.

11. Jehovap peqatigiissortai qanoq tapersersorsinnaavavut?

¹¹ Jehovap peqatigiissortai qanoq tapersersorsinnaavavut? Tapersersueriaaseq pingaarutilik tassaavoq qatanngutinik angutinik oqaluussinermi siuttuusunik tatiginninneq. Jehovap Jiisusillu qatanngutit angutit taakku tatigimmatigit aamma uagut taakku tatigisariaqarpavut. Qatanngutit taakku silarsuarmi ajornartorsiutigineqartunik aaqqiiniarlutik piffissartik nukitillu atorsinnaagaluarpaat, taamaaliorusunngillalli. Jehovap peqatigiissortaani takussaasumi suna pingaarnerpaatinneqarnersoq sammeriartigu.

‘PINGAARUTEQARNERUSUT’ SALLIUPPAAT

12, 13. Utoqqaanertat akisussaaffitik qanoq isumagisarpaat, aamma sooq tamanna ilinnut qiimmaallannarpa?

¹² Nunarsuaq tamakkerlugu utoqqaanertat misilittagallit nunani kiffartorfigisaminni oqaluussinermik siuarsaanissamik nakkutilliinissamillu akisussaaffilerneqarsimapput. Aalajangiiniaraangamik Guutip oqaasia ‘isikkaminnut naneruaralugu aqqutiminnilu qaammaqqutigalugu’ Jehovalu qinnuigalugu siulersoqqullutik aalajangiisarput. Taamaalillutik Jehovap peqatigiissortaanit takussaanngitsunit siulersorneqarput. — Tuss 119:105; Matt 7:7, 8.

¹³ Utoqqaanertat ukiuni hundredelinni siullerni pisimanerattut, ullumikkut utoqqaanertat oqaluussinermik nakkutilliisuusut ‘oqaatsip kiffartuutiginissaa’ pingaartippaat. (ApS 6:4) Sumiiffimminni nunarsuarmilu tamarmi oqaluussinerup siumukarnera nuannaarutigingaarpaat. (ApS 21:19, 20) Amerlasuunik malittarisassiorneq ajorput. Oqaluussinerli siuarsarumallugu Biibili malillugu Guutillu anersaavanit illernartumit siulersortillutik pisariaqartunik aaqqissuussisarput. (Atuaruk Apustilit Suliaat 15:28). Taamaaliornermikkut qatanngutit taakku ilagiinniittunut tamanut maligassiuilluarput. — Ef 4:11, 12.

14, 15. (a) Nunarsuaq tamakkerlugu oqaluussisinnaaniassagatta suut suliarineqartarpat? (b) Oqaluussinermik tapersersueqataanerit qanoq isigaajuk?

¹⁴ Qatannguterpassuit atuagassianik, atuakkanik, ataatsimiinnernik ataatsimeersuarnernillu piareersaaniarlutik ullut tamaasa sulisarput. Assersuutigalugu tusindit arlallit kajumissutsiminnik suliuarput Biibililersaarutit oqaatsinut 600-nit amerlanerusunut nutserlugit. Tamatuma kingunerisaanik inuppassuit “Guutip tupinnangaartuliai” pillugit namminneq oqaatsitik atorlugit ilinniarsinnaapput. (ApS 2:7-11) Qatanngutit inuusuttut naqiterisarlutillu atuakkanik ungalulersuisarlutik ulapputeqartarput. Atuakkat atuagassiallu taakku ilagiinnut, allaat ungasissumiittunut, nassiunneqartarput.

¹⁵ Ilagiitsinniittut peqatigalugit nutaarsiassamik nuannersumik oqaluussineq salliussinnaaniassagatsigu assigiinngitsorpassuit allat suliarineqartarput. Assersuutigalugu naalagaaffilersaarfinnik ataatsimeersuartarfinnillu sanaartornermi tusindilinnik kajumissutsiminnik sulisartorpassuaqarpoq. Allat pinngortitami ajunaarnersuarni imaluunniit nakorsamit ikiorneqapallattariaqartunik ikiuisarput. Allat ataatsimeersuaararnernik ataatsimeersuarnernillu aaqqissuussisarput, aamma allat Biibilimik ilinniarfinni ilinniartitsisarput. Suliarpassuit taakku suna siunertaraat? Suliarineqarput nutaarsiassamik nuannersumik oqaluussissutiginnissinnaaniassagatta, anersaakkut siumukarsinnaaniassagatta inuillu amerlanerusut Jehovamik pallorfiginnittunngorsinnaaniassammata. Jehovap peqatigiissortai takussaasut pingaarnerusunik ilumut salliutsitsipput!

JEHOVAP PEQATIGIISSORTAASA MALIGASSIAAT MALIGUK

16. Ilaqutariittut atuaqqissaaqatigiinnermi namminerluunniit atuaqqissaarnermi suna misissorneqarsinnaava?

¹⁶ Jehovap peqatigiissortaani suliarineqartut ilaannikkut eqqarsaatigisarpigit? Ilaat ilaqutariittut atuaqqissaaqatigiikkaangamik namminerluunniit atuaqqissaaraangamik peqatigiissortat pillugit misissueqqissaartarsimallutillu ilikkakkaminnik eqqarsaatiginneqqissaartarput. Assersuutigalugu Esajap, Ezekielip, Danielip Johannesillu takorruugaannik misissueqqissaarnissaq pissanganarsinnaavoq. Atuagaq Jehovas Vidner — forkyndere af Guds rige atuakkallu allat imaluunniit dvd-t iluaqutigalugit Guutip peqatigiissortai pillugit soqutiginartorpassuarnik ilinniarsinnaavugut.

17, 18. (a) Allaaserisaq sammeriigarput qanoq iluaqutigaajuk? (b) Imminut qanoq aperisinnaavit?

¹⁷ Jehovap peqatigiissortani atorlugu oqaluussinermik tapersersuinera eqqarsaatigeqqissaarutsigu iluaqutaassaaq. Peqatigiissortat nuanningaartut assigalugit pingaarnerusut salliuttuartigit. Taamaaliorutta Paulusip misigineratut misigisinnaavugut, taannami ima allappoq: “Kiffartuutigisatsinni nallittorneqarnikkut pisimasatsinni nikallunngilagut.” (2 Kor 4:1) Aamma qatanngutini ima kajumissaarpai: “Ajunngitsuliorneq qatsuteqinatigu, piffissarmi nalliuppat katersuiumaarpugut qasunngikkutta.” — Gal 6:9.

¹⁸ Illit ilaquttatillu pingaarnerusunik ulluinnarni salliussiniarlusi allannguisariaqarpisi? Oqaluussinerusinnaaniassagavit inooriaatsinnik pisariillisaasinnaavit? Allaaserisami tulliuttumi Jehovap peqatigiissortaasa maligassiaannik malinninnissatsinnut Guutimullu kiffartornermi aallussilluartuarnissatsinnut iluaqutaasut tallimat sammissavavut.