APEQQUTIT BIIBILIMI AKINEQARTUT

Guuti qanoq ittuua?

Guuti anersaajuvoq takussaanngitsoq. Qilammik, nunarsuarmik uumasunillu tamanik pinngortitsisuuvoq. Guuti kimilluunniit pinngortinneqanngilaq — aallartiffeqanngilaq. (Tussiaat 90:2) Guutip kissaatigaa inuit immini pilluni eqqortumik ilisimannilissasut ujassagaannilu. — Apustilit Suliaat 17:24-27 atuakkit.

Guuti kinaassusiliuvoq aqqatigut ilisimalersinnaasarput. Pinngortitarsuata qimerloorneratigut pissusiisa ilaat paasisinnaavavut. (Romamiut 1:20) Guutip piumasai ilisimalerumallugit taassuma oqaasia, Biibili, atuaqqissaartariaqarparput. Taanna aqqutigalugu Guutip asannittuuneranik ilisimasaqalersinnaavugut. — Tussiaat 103:7-10 atuakkit.

Guutip naapertuilluanngissuseq qanoq isigaa?

Pinngortitsisitta, Jehovap, naapertuilluanngissuseq uumigaa. (5 Mosesi 25:16) Aamma imminut assililluni inuk pinngortippaa, taamaattumik amerlanerusugut naapertuilluanngissuseq uumigaarput. Naapertuilluanngissuseq avatangiisitsinniittoq Guutimit pinngilaq. Guutip inuk nammineq aalajangiisinnaassuseqartippaa. Ajoraluartumilli inuit namminneq aalajangiisinnaatitaanertik atornerluppaat naapertuilluanngitsuliorlutillu, tamannalu Jehovap aliasuutigaa. — 1 Mosesi 6:5, 6; 5 Mosesi 32:4, 5 atuakkit.

Jehovap naapertuilluarneq nuannaraa naapertuilluanngissuserlu naassaanngitsumik akuersaanngisaannassallugu. (Tussiaat 37:28, 29) Biibilimi neriorsuutigineqarpoq Guutip naapertuilluanngissuseq ungasinngitsukkut atuukkunnaarsikkumaaraa. — 2 Petrusi 3:7-9, 13 atuakkit.