Ullut ajortut nalliutinnginneranni Jehovamut kiffartorneq

1, 2. (a) Salomo isumassarsisitaalluni inuusuttunut qanoq allappa? (b) Sooq kristumiut 50-it sinnerlugit ukiullit Salomop siunnersuutaa aamma soqutigisariaqarpaat?

KUNNGI SALOMO isumassarsisitaalluni inuusuttunut ima allappoq: “Pinngortitsisit eqqaamaniaruk inuusuttuunerpit ulluini, ullut ajortut nalliutinnginneranni.” “Ullut ajortut” qanoq paasisariaqaramik? Ukioqqortusinertut paasisariaqarput. Salomop utoqqasaat unamminiarnartitaat — assakkut sajunneq, pitsorlunneq, kigutinik amigalerneq, isigiarsunneq, tutsarlunneq, qeersaalerneq, peqingalerneq eqartunngornerlu — taalliorpalaartumik allaatigai. Tupinnanngilaq Salomop inuusunnitsinni Pinngortitsisorsuatsinnik eqqaamanneqqummatigut. — Oqaluussisartup oqaasii 12:1-5 atuakkit.

² Kristumiorpassuit 50-it sinnerlugit ukiullit suli inuummarissorujussuupput. Imaassinnaavoq qeersuusut, Salomolli allaatigisai tamaasa peqqiilliutiginaviarunanngilaat. Kristumiut taakkua misilittagaqarluartut Salomop inuusuttunut ‘pinngortitsisimik eqqaamanninnissamut’ siunnersuutaa aamma maleruarsinnaavaat? Siunnersuut tamanna qanoq paasisariaqarpa?

3. Pinngortitsisorsuatsinnik eqqaamanninnerput qanoq paasisariaqarpa?

³ Imaassinnaavoq ukiorpassuarni Jehovamut kiffartortuusimasutit, ilaanneeriarlutilli Pinngortitsisitta qanoq qutsinnerussaartigineranik eqqarsaatiginneqqissaartaruit pitsaassaaq. Inuuneq tunissutaavoq nalissaqanngitsoq. Pinngortitarsuup ilusilersorneqarnera tupinnangaarmat tamakkiisumik paasisinnaanngilarput. Jehovap pinngortitaasa assigiinngiiaarnerat inuunitsinnik assigiinngitsutigut nuannaarutiginnissinnaalissutigaavut. Jehovap pinngortitaanik eqqarsaatiginneqqissaartarnerput taassuma qanoq asannitsigineranik, siuneqartigineranik pissaaneqartigineranillu eqqaasitsissutigisarparput. (Tuss 143:5) Pinngortitsisorsuatsinnik eqqaamanninnerput aamma taassumannga sumik piumaffigineqarnitsinnik eqqaamanninnitsinnik isumaqarpoq. Taakkuninnga eqqarsaatiginneqqissaartarnerput taassumunnga kiffartornitsinni sapinngisatsinnik iliuuseqartuarnitsigut qujamasunnitsinnik ersersitsinissatsinnut kajumississutigisarparput. — Oqal 12:13.

UTOQQASAANNGORNERMI PERIARFISSATSIALAAT

4. Kristumiut ukiorpassuarni misilittagaqarsimasut imminut qanoq aperisinnaappat, aamma sooq?

⁴ Ukiorpassuarni misilittagaqarsimaguit imminut ima aperigit: ‘Massakkut, suli pisinnaaninni nukissaqarninnilu, suniarpunga?’ Kristumiutut misilittagaqarluaravit allanit periarfissagissaarneruvutit. Assersuutigalugu Jehovamit ilikkarsimasatit inuusuttunut ingerlateqqissinnaavatit. Guutimut kiffartorninni misigisimasatit nuannersut allanut oqaluttuarisinnaavatit. Kunngi Daavi taamaaliornissaminut periarfissaqalerumalluni ima qinuvoq: “Guuti, inuusunninnilli ajoqersorparma. ... Taava qimaqinanga, Guuti, utoqqanngoruma qeersuunngorumalu, oqaluttuarisinnaaqqullugu pissaassutsit kingulissatsinnut tamanut.” — Tuss 71:17, 18.

5. Kristumiut utoqqasaat ilikkarsimasatik qanoq allanut ingerlateqqissinnaavaat?

⁵ Ukiut ingerlaneranni ilisimalersimasatit qanoq allanut ingerlateqqissinnaavigit? Inuusuttut nuannisaqatiginiarlugit pulaaqqusinnaavigit? Jehovamut kiffartorninnik nuannaarutiginninnerit takuniassammassuk oqaluusseqatigiumasinnaavigit? Elihu ima oqarpoq: “Utoqqaat oqalullit ukioqqortuullu ilisimassuseq nalunaajaatigilissuk.” (Job 32:7) Apustilip Paulusip kristumiut arnat misilittagaqarluartut oqaatsimikkut maligassiuinermikkullu allanik kajumissaarisaqquai. Ima allappoq: ‘Arnat utoqqaat ajunngitsuliornermik ajoqersuussisuussapput.’ — Tit 2:3.

ALLANIK IKIUINIARLUTIT SUSINNAASUTIT

6. Sooq kristumiut ukiorpassuarni misilittagaqarluarsimasut pisariaqartinneqarpat?

⁶ Kristumiutut misilittagaqarluaruit allanik ikiuiniarlutit iliuuseqangaarsinnaavutit. Massakkut paasisimasatit, ukiut 30-t 40-lluunniit matuma siorna ilisimasimanngisatit, eqqarsaatigikkit. Najoqqutassiat Biibilimeersut pissutsini assigiinngitsuni qanoq maleruassanerlugit nalunngilat. Sallusuissutit Biibilimeersut atorlugit allat uummataat killissinnaavatit. Utoqqaanertaaguit qatanngutit silatusaanngitsumik aalajangiisimasut qanoq ikiorsinnaallugit nalunngilat. (Gal 6:1) Imaassinnaavoq ilagiinni sammisassanik, ataatsimeersuarnermi immikkoortortaqarfinnik naalagaaffilersaarfinnilluunniit sanaartornernik nakkutilliinissat ilikkarsimagit. Imaassinnaavoq nakorsat aalersortinnertaqanngitsumik suliarinninnissaannut qanoq kajumissaarsinnaallugit nalunngikkit. Allaat kuisernaagaluaruit naleqangaartumik inuunermi misilittagaqalereersimassaatit. Assersuutigalugu meeqqanik perorsaasimaguit atorluarsinnaasumik ilisimassuseqalersimassaatit. Kristumiut utoqqasaat qatanngutinik ilinniartitsisarnermikkut, siunnersuisarnermikkut kajumissaarisarnermikkullu Jehovap innuttaanut iluaqutaangaarsinnaapput. Biibilimi ima allassimavoq: ‘Utoqqarsuarniippoq ilisimassut, inuunertuunilu ippoq siuneqarneq.’ — Job 12:12, 1900.

7. Utoqqasaat inuusuttunik qanoq ilinniartitsilluarsinnaappat?

⁷ Pikkoriffitit allanik ikiuinermut qanoq allatigut atorsinnaavigit? Imaassinnaavoq qanoq Biibilimik atuaqqissaaqateqartoqalersinnaanera inuusuttunut takutissinnaagit. Qatanngutaaguit arnaq anaanat inuusuttut meeqqanik perorsaajutigaluni Jehovamut kiffartornermi qanoq oqimaaqatigiissaarisoqarsinnaaneranik ilinniartissinnaavigit? Qatanngutaaguit angut angutit inuusuttut uummaarissumik oqalugiartalernissaannik nutaarsiassamillu nuannersumik oqaluussillaqqinnerulernissaannik ilinniartissinnaavatit. Qatanngutinut utoqqarnut pulaarnermi qanoq kajumissaarisoqarsinnaaneranik ilinniartissinnaavigit? Inuusukkallarnertut nukittutiginngikkaluarlutit inuusunnerusunik ilinniartitsinissannut periarfissagissaarputit. Biibilimi ima allassimavoq: “Angutit inuusuttut nukitik pinnersaatigaat, utoqqaallu qiitik ataqqinaatigaat.” — Uss 20:29.

PISARIAQARTITSIFFIUNERUSUMI KIFFARTORNEQ

8. Apustili Paulusi utoqqasaanngoreerluni sua?

⁸ Apustili Paulusi utoqqasaanngoreeraluarluni Jehovamut kiffartornermi ulapputeqartuarpoq. Ukiup 61-ip missaani Romami parnaarussivimmit iperagaagami sulerulooreerlunilu ajoqersuiartortitatut misilinneqarnerpassuit naammagalugit atoreersimavai. Romami eqqissilluni oqaluusseqataaginnarniarluni aalajangersinnaagaluarpoq. (2 Kor 11:23-27) Qularnanngitsumik qatanngutit Romami ilagiinniittut Paulusimit najuinnarneqarnertik qujamasuutigisimassagaluarpaat. Paulusilli nunani allani pisariaqartitsisoqarnerunera nalunngilaa. Taamaattumik ajoqersuiartortitatut angalaqqilerpoq. Timotheusi Titusilu Efesosimut, tamatumalu kingorna Kretamut immaqalu Makedoniamut angalaqatigai. (1 Tim 1:3; Tit 1:5) Spaniamukarsimanersoq naluarput, apissinnissanili pilersaarutigaa. — Rom 15:24, 28.

9. Petrusi qanga sumiiffimmut pisariaqartitsiffiunerusumut nuuppa? (Allaaserisap aallaqqaataani assiliaq takuuk).

⁹ Apustili Petrusi sumiiffimmut pisariaqartitsiffiunerusumut nuukkami 50-it missaanni ukioqarsimagunarpoq. Tamanna qanoq nalunngilarput? Jiisusi ilutigisimaguniuk taassumanngaluunniit angajulliunerulaarsimaguni ukiumi 49-mi apustilit allat Jerusalemimi naapeqatigigamigit 50-it missaanni ukioqarsimassaaq. (ApS 15:7) Naapeqatigiinnerup kingorna Petrusip juuterpassuit Babylonimi najugallit oqaluussiffigiartorpai. (Gal 2:9) Ukiup 62-ip missaani Babylonimi najugaqarluni isumassarsisitaalluni allakkani siulleq allappaa. (1 Petr 5:13) Sumiiffimmut pisariaqartitsiffiunerusumut nuunneq unamminiarnarsinnaavoq, Petrusilli utoqqaliarsaarnini Jehovamut uummatikkut iluunngarluni kiffartornerup pilluarnartuanik misigisaqarnissaminut tunuarsimaassutiginngilaa.

10, 11. Robert nulianilu utoqqasaanngoreerlutik suppat?

¹⁰ Ullumikkut kristumiorpassuit 50-it sinnerlugit ukiullit atukkamik allanngorsimaneratigut Jehovamut allatigut kiffartorsinnaalersimanertik paasisimavaat. Qatanngutit ilaat sumiiffinnut pisariaqartitsiffiunerusunut nuussimapput. Assersuutigalugu Robert ima allappoq: “Nuliaralu 50-it sinnerlugit ukioqarluta periarfissagissaalersimanerput paasivarput. Ernituarput nammineq initaareerlunilu angajoqqaavut toqukkut qimagutereerlutillu annertunngitsumik kingornussaqarpugut. Illutta tunineratigut akiitsutta sinnerinik akiliisinnaanerput suliunnaarnersiuteqalernissamalu tungaanut immitsinnut pilersorsinnaanerput naatsorsuinikkut paasivara. Tusarparput Boliviami inuit Biibilimik atuaqqissaaqatigineqarusuttut amerlallutillu taqqavani inuuniarneq akikitsuararsuusoq. Taamaattumik nuunniarluta aalajangerpugut. Nunassiffitsinnut naleqqussarniarnerput sapernartipparput. Suut tamarmik USA-mi sungiusimasatsinnit allaanerulluinnarput. Ilungersornerpulli pillugu akissarsisinneqangaarpugut.”

¹¹ Robert ima nangippoq: “Ilagiit sammisartagaat inuunitsinni pingaarnerpaapput. Biibilimik atuaqqissaaqatigisartakkatta ilaat kuisereerput. Ilaqutariit atuaqqissaaqatigisartakkatta ilaat piitsuullutillu illoqarfeeqqami ungasiartumi najugaqarput. Ilaqutariilli sapaatit-akunneri tamaasa ataatsimiinnernut najuunniarlutik illoqarfimmut tikikkuminaaqisumukartarput. Ilaqutariit anersaakkut siumukarnerannik ernerallu angajulliup pionerinngorniarneranik malinnaaviginninnitsinnik nuannaarutiginninnerput takorloorsinnaavisiuk?”

ALLAMIUTUT OQAASILINNI PISARIAQARTITSINEQ

12, 13. Brian suliunnaarnersiuteqalerami nulianilu suppat?

¹² Ilagiit oqaluussisartoqatigiilluunniit allamiutut oqaasillit qatanngutit utoqqasaat maligassiuilluarnerat iluaqutigingaarsinnaavaat. Sumiiffinni taamaattuni aamma oqaluussineq nuannaarutaangaarsinnaavoq. Assersuutigalugu Brian ima allappoq: “Tuluit Nunaanni 65-inik ukioqarlunga suliunnaarnersiuteqalerama nuliaralu pikkunaalliulerpugut. Qitornavut namminneq ineqalereerlutillu inunnik Biibilimik atuaqqissaartalerusuttunik qaqutigorujussuaq naapitsisarpugut. Taava angut inuusuttoq Kiinamiu illoqarfitsinni ilisimatusarfimmi ilisimatusartutut sulisoq naapippara. Ataatsimiigiaqatiseriganni akuersivoq, Biibilimillu atuaqqissaaqatigisalerpara. Sapaatit-akunneri arlaqanngitsut qaangiummata suleqatini nunaqqatigisani ataatsimiigiaqatigisalerpaa. Sapaatit-akunneri marluk qaangiummata aamma allat marluk ataatsimiigiaqatigisalerpai.

¹³ Tamatuma nalaani tallimassaanik Kiinamiumik Biibilimik atuaqqissaaqateqartalerama ima eqqarsarpunga: ‘65-inik ukioqarnera pissutigiinnarlugu Jehovamut kiffartornermi iliuuseqarunnaartariaqanngilanga.’ Taamaattumik nuliara, uannit ukiunik marlunnik nukarliusoq, Kiinamiutut ilinniaqatigerusunneraanga aperaara. Immiussat atorlugit Kiinamiutut ilinniarpugut. Tamanna ukiut qulit qaangiummata pivoq. Sumiiffinni allamiutut oqaasilinni oqaluussineq inuususseqqittutut misigilissutigaarput. Ulloq manna tikillugu Kiinamiut 112-it Biibilimik atuaqqissaaqatigereerpavut! Amerlanerpaartaat ataatsimeeqataanikuupput. Ilaat ataaseq massakkut pioneritut kiffartorpoq.”

SAPINNGISANNIK ILIUUSEQARNINNIK NUANNAARUTIGINNIGIT

14. Kristumiut utoqqasaat suna eqqaamasariaqarpaat, Paulusillu maligassiuinera qanoq kajumississutigisinnaavaat?

¹⁴ Kristumiut 50-it missaanni ukiullit ilaannaat Jehovamut kiffartornermi allatigut iliuuseqarnissaminnut periarfissaqarput. Ilaat peqqiilliorput, allallu meeqqanik angajoqqaanilluunniit utoqqalisimasunik isumaginnipput. Eqqaamassavalli Jehovap imminerminut kiffartorninni qanoq iliuuseqarnerit apeqqutaatinnagu pingaartimmatit. Taamaattumik iliuuserisinnaanngisatit isumatsassutiginagit iliuuserisinnaasatit nuannaarutigisakkit. Apustili Paulusi eqqarsaatigiuk. Ukiorpassuarni parnaarussaaqqagami ajoqersuiartortitatut angalasinnaasimanngilaq. Pulaartigisartakkanili Allakkat pillugit oqaloqatigisarlugillu Guutimut aalajaallutik kiffartortuarnissaannut ikiortarpai. — ApS 28:16, 30, 31.

15. Sooq kristumiut utoqqaat pingaartinneqangaarpat?

¹⁵ Jehovap utoqqaat imminerminut kiffartornermi iliuuserisartagaat pingaartippai. Salomop “ullut ajortut” artornarsinnaaneraraluarai Biibilimi eqqaasinneqarpugut Jehovap utoqqaat imminik unnersiutiginninnermi iliuuserisartagaat maluginiartarai. (Luk 21:2-4) Qatanngutit taakkua uppernermik pinertusaarnermillu maligassiuilluarnerat ilagiinniittunit pingaartinneqangaarpoq.

16. Anna sunissaminut periarfissaqarsimagunanngila, Guutimilli pallorfiginninniarluni susinnaasimava?

¹⁶ Arnaq utoqqaq aalajaatsoq Annamik atilik Biibilimi allaatigineqarpoq. Jiisusi inunngormat uillarneq taanna 84-inik ukioqarpoq. Ukioqqortusinini pissutigalugu allatulli Jehovamut kiffartornermi periarfissagissaartiginngilaq. Taassuma Jiisusimut ajoqersuganngornissaa, anersaamik illernartumik taninneqarnissaa oqaluussisalernissaaluunniit ilimananngilaq. Jehovamulli allatigut kiffartornini nuannaarutigaa. Assersuutigalugu ullaat unnuillu tamaasa palasip Jehovamut tipigissaatilliissummik pilliinerani akunnerup affaani naalaffiup silarlianut nipaatsumik qinujartortarpoq. Biibilimi allassimavoq ‘Naalaffik qimanngisaannarlugulu unnuaq ullorlu Guuti kiffartuuttaraa’. (Luk 2:36, 37) Naalaffimmiinnermini Jiisusi meeraasoq takuaa. Taassuma Missiarsinngornissaa Jerusalemimillu aniguisitsinissaa kikkunnut tamanut oqaluttuaraa. — Luk 2:38.

17. Ilagiinniittut kristumiut utoqqaat napparsimasulluunniit ilumoortumik pallorfiginneqataanissaannut qanoq ikiorsinnaavaat?

¹⁷ Ullumikkut qatanngutit utoqqalisimasut napparsimasulluunniit assigiinngitsutigut ikiorniartariaqarpavut. Utoqqarpassuit ataatsimiinnerni ataatsimeersuarnerniluunniit najussalluta nuannarisaraluarlugu najuussinnaaneq ajorput. Ilagiinniittut qanoq ikiuisinnaappat? Sumiiffiit ilaanni oqarasuaatikkut internetikkulluunniit peqataatinneqarsinnaapput. Sumiiffinni allani tamanna ajornarsinnaavoq. Utoqqaat ataatsimiinnernut najuussinnaanngikkaluarlutik pallorfiginninnermik ilumoortumik tapersersueqataasinnaapput. Assersuutigalugu ilagiit ingerlalluarnissaat qinnutigisarsinnaavaat. — Tussiaat 92:14, 15 atuakkit.

18, 19. (a) Kristumiut utoqqaat allanik qanoq kajumissaarisinnaappat? (b) Kikkut siunnersuut una maleruarsinnaavaat: “Pinngortitsisit eqqaamaniaruk”?

¹⁸ Imaassinnaavoq kristumiut utoqqaat allanik qanoq kajumissaarisartiginertik nalugaat. Anna, ukiorpassuarni aalajaalluni naalaffimmukartuartoq, eqqarsaatigiuk. Maligassiuilluarnermi Jehovamillu asanninnermi Biibilimi allaatigineqarnissaat nalitsinnilu suli kajumissaataanissaat ilisimasimanaviarunanngilaa. Taamatuttaaq illit Jehovamik asanninnerit qatanngutinit eqqaamaneqartuassaaq. Tupinnanngilaq Guutip oqaasiani ima allassimasoqarmat: “Nutsat qeersuusut niaqorutaasarput kusanangaartut naapertuilluarnerup aqqutaaniikkaangata”! — Uss 16:31, NW.

¹⁹ Tamatta Jehovamut kiffartornermi iliuuserisinnaasavut killeqarput. Pisinnaaninni, nukissaqarninni ‘ullullu ajortut nalliutinnginneranni Pinngortitsisinnik eqqaamanninnissat’ aalajangiusimajuaruk. — Oqal 12:1.