‘Suliamik ajunngitsumik suliaqalernissat sulissutigaajuk’?

FERNANDOa utoqqaanertanit marlunnit oqaloqatigineqartussaagami annilaangavoq. Ilagiinnik nakkutilliisoq arlaleriarluni tikeraareersoq ilagiinni annerusumik immikkut pisinnaatitaaffeqarnerulerumalluni susinnaanerminik utoqqaanertanit nassuiaanneqarsimavoq. Piffissap ingerlanerani utoqqaanertatut toqqarneqarsinnaanngitsutut misigisalerpoq. Maanna ilagiinnik nakkutilliisoq tikeraaqqammermat utoqqaanertat qanoq oqassappat?

Utoqqaanertat ilaat Fernandomik oqaloqatiginneqataasoq Timotheusimut allakkat siulliit 3:1-imut innersuussilluni oqarpoq utoqqaanertatut toqqarneqarsimaneranut tunngasumik utoqqaanertaqatigiit allagarsisimasut. Fernando tupaallalluni imminut ima aperivoq: “Qanoq?” Qatanngutip oqaatsini uteqqimmagit Fernando tanngalerpoq. Toqqagaaneratalu nalunaarutigineqarnera ilagiinniittut iluarisimaarpaat.

Ilagiinni immikkut pisinnaatitaaffeqalerusunneq ajortuua? Naamerluinnaq. Biibilimimi ima allassimavoq: “Angummik nakkutilliisunngornissamik sulissutiginnittoqarpat, taassuma suliaq ajunngitsoq kissaatigaa.” (1 Tim 3:1, NW) Angutit kristumiorpassuit kajumissaarut tamanna maleruarlugulu ilagiinni immikkut pisinnaatitaaffeqalerumallutik anersaakkut siumukarput. Tamanna pissutigalugu Guutip innuttai angutinik piukkunnartunik 100.000-likkuutaanik utoqqaanertaqarlutillu ilagiinni kiffartortoqarput. Ilagiilli amerliartuinnarmata qatanngutit angutit amerlanerusut akisussaaffeqalernissaat pisariaqartinneqarpoq. Akisussaaffeqalerusuttut susariaqarpat? Nakkutilliisunngorusuttut qaqugu utoqqaanertanngornissartik eqqarsaatigiuartariaqarpaat?

SULISSUTIGINNINNEQ QANOQ ISUMAQARPA?

Grækerisut oqaluut Biibilimi ‘sulissutiginnittumik’ nutserneqarsimasoq tamaviaarluni tigusiniarsarinermik isumaqarpoq. Tamanna angummik puisimik kiviartortumik nissiiniarsarisumik eqqarsaatiginnilissutigissagunarpat. Suliamilli ajunngitsumik suliaqalernissaq namminissarsiorluni ‘nakkutilliisunngorniarnermik’ isumaqanngilaq. Sooq? Utoqqaanertatut ilumoorlutik kiffartorusuttut nuimasumik inissisimaffeqalerusunnatik “suliaq ajunngitsoq” suliarisinnaasariaqarmassuk.

Suliamut ajunngitsumut piumasaqaatit amerlanerit Timotheusimut allakkat siulliit 3:2-7-imi aamma Titusimut allakkat 1:5-9-mi allassimapput. Najoqqutassiat qutsissut taakku innersuussutigalugit utoqqaanertaq misilittagaqarluartoq Raymond ima nassuiaavoq: “Inuttut qanoq ittuunerput uannut pingaarnerpaavoq. Oqallorinneq oqalugiallaqqinnerlu pingaaruteqarput, piginnaanerilli taakku assuarnaatsuunermit, ingasaassinaveersaarnermit, silatusaarnermit, pissuserinnermit, inoroorsaarnermit sallaannermillu pingaarnerunngillat.”

Qatanngutip angutip suliamik ajunngitsumik suliaqalerusuttup unneqqaserlunnerit minguttuullu suulluunniit ingalassimanerisigut assuarnaatsuunini ersersittarpaa. Ingasaassinaveersaartuuguni, silatusaartuuguni, pissuserissuuguni sallaatsuugunilu uppeqatiminit ilagiinni siulersuisutut ajornartorsiutinullu tunngatillugu ikiuisussatut tatigineqassaaq. Inoroorsaarnermigut inuusuttut kuiserlaallu nakussatsissavai. Ajunngitsunik pingaartitsisuugami napparsimasunik utoqqarnillu tuppallersaasarlunilu ikiuisarpoq. Toqqarneqaqqusaarnini pissutiginagu allanulli iluaqutaarusunnini pissutigalugu pissuserineqartussat taakku ineriartortissavai.b

Utoqqaanertaqatigiit siunnersuisinnaanertik qiimmassaasinnaanertillu nuannaarutigaat, suliamilli ajunngitsumik suliaqalernissamik sulissutiginnittut Biibilimi piumasaqaatinik eqqortitsinissartik akisussaaffigaat. Henry, nakkutilliisoq misilittagaqarluartoq, ima oqarpoq: “Suliaq ajunngitsoq suliarilerusukkukku tamaviaarlutit piukkunnarnerit ersersinniartaruk.” Oqaluussisartup oqaasii 9:10 innersuussutigereerlugu ima nassuiaavoq: “‘Assavit suliassarsiaat suliarissavatit piginnaanerit tamaat atorlugu.’ Utoqqaanertat suliassiissutaat suulluunniit pitsaanerpaamik naammassiniartakkit. Ilagiinni suliassinneqartarnitit tamaasa, aamma nivattarnerit, nuannaarutigisakkit. Piffissap ingerlanerani tamaviaarlutit sulinerit pillugu akissarsisinneqassaatit.” Ullut ilaanni utoqqaanertanngornissat kissaatigigukku illernartumik kiffartorninni sutigut tamatigut tamaviaartarlutillu tatiginartuusarit. Maniguunnerit, makitallutit nuimalerusunneriunngitsoq, inuuninni ilisarnaatigisariaqarpat. — Matt 23:8-12.

EQQARSAATIT ILIUUTSILLU EQQUNNGITSUT ITIGARTIKKIT

Ilagiinni immikkut pisinnaatitaaffeqarnerulerusuttut ilaat immaqa utoqqaanertanngorusunnertik pillugu toqqaannanngitsumik oqaaseqarnissaminnut imaluunniit utoqqaanertaqatigiinnik sunniiniarnissaminnut ussernartorsiussapput. Allat utoqqaanertanit siunnersorneqarnertik iluarineq ajorpaat. Inuit taamaattut imminut ima aperisariaqarput: ‘Uanga soqutigisakka siuarsarusuppakka, imaluunniit maniguullunga Jehovap savaatai isumassorusuppakka?’

Suliamik ajunngitsumik suliaqalerusuttut utoqqaanertanut piumasaqaat alla una eqqaamasariaqarpaat: ‘Savaatinut maligassaagitsi.’ (1 Petr 5:1-3) Ilagiinni maligassaalluartoq eqqunngitsumik eqqarsarnaveersaartarlunilu iliuuseqarnaveersaartarpoq. Toqqagaasimagaluaruni toqqagaasimanngikkaluaruniluunniit erinitsajuinnermik pinertusaarsinnaanermillu ineriartortitsisarpoq. Utoqqaanertanngortut tupinnartuliornikkut naammalluinnartunngortinneqarneq ajorput. (4 Mos 12:3; Tuss 106:32, 33) Imaassinnaavortaaq qatanngut angut ‘qanoq iliorsimanerminik sianigisaqanngikkaluartoq’ allat ajortumik isiginnittaaseqarfiginissaanut pissutissaqartut. (1 Kor 4:4) Taamaattumik utoqqaanertat ilumoorlutik Biibili tunngavigalugu siunnersorpatsit narrujuumminak tusarnaaqqissaarit. Tusakkatillu naapertorlugit iliuuseqarit.

UTAQQINERIMMI SIVITSORSIMAPPAT?

Qatanngutit angutit arlallit toqqarneqarnissartik sivisuumik utaqqisariaqarsinnaasarpaat. Ukiuni arlalinni ‘suliamik ajunngitsumik suliaqalernissannik sulissutiginnissimaguit’ ilaanneeriarlutit ernumalertarpit? Taamaappat oqaatsit isumassarsiarititaasut uku maluginiakkit: “Sivisunaartumik pissamaarnerup uummat nappaateqalersittarpaa, kissaatigisaq pissarsiarisimasaq orpiuvoq inuunartoq.” — Uss 13:12.

Inuup anguniakkani pingaartitani angujuminaatsikkunigit uummammigut nappaateqalersinnaavorlusooq. Aaperaat taamatut misigivoq. Jehovap neriorsorpaa ernermik tuniumallugu, ukiorpassuarnili Sarap ernertaatinngilaa. (1 Mos 12:1-3, 7) Aaperaat ukioqqortusigami ima torlulavoq: “Naalagaq Guuti, sumik tunisinnaagamma qitornaqarnanga toqusussaasunga, ... kinguaassaqartinnginnammami.” Ernertaarumaarneranik neriorsuutimi eqquunnissaanik Jehovap uppernarsaavigaa. Aatsaalli minnerpaamik ukiut 14-it ingerlareermata Guutip neriorsuutini eqquutitippaa. — 1 Mos 15:2-4; 16:16; 21:5.

Aaperaap utaqqinini Jehovamut kiffartornerminik nuannarinnikkunnaassutigaa? Naamik. Guutip neriorsuutaa upperiuarpaa. Ajunngitsumik isiginnittaaseqartuarpoq. Apustili Paulusi ima allappoq: “Aaperaat erinitsajuilluni utaqqigami Guutip neriorsuutigisaanik tunineqarpoq.” (Hebr 6:15) Guutip Ajugaqanngitsup naggataatigut angutip taassuma aalajaatsup ilimagisaanit annerusumik pilluaqquaa. Aaperaat qanoq ilinniarfigisinnaaviuk?

Utoqqaanertatut kiffartulernissat ukiorpassuarni utaqqisimagukku Jehovamik tatiginnittuarit. Jehovamut kiffartornerit nuannaarutigiuaruk. Warrenip, qatannguterpassuit anersaakkut siumukarnissaannik ikiuisimasup, tamanna ima nassuiarpaa: “Qatanngut toqqarneqarnissaminut piareersimanersoq qulakkeerneqassappat piffissaq ingerlaqqaartariaqarpoq. Piffissap ingerlanerani qatanngutip pikkoriffii isiginnittaasialu iliuusiinit akisussaaffimminillu isumaginnittariaasianit erseriartuaalertarput. Ilaat isumaqartarput aatsaat immikkut pisinnaatitaaffeqalerunik toqqarneqarunilluunniit iluatsilluarsinnaallutik. Taamatut eqqarsartarneq kukkuneruvoq eqqarsaatigiualerneqarsinnaasoq. Sumiinnerit sulerinerilluunniit apeqqutaatinnagit Jehovamut aalajaallutit kiffartoruit iluatsilluassaatit.”

Qatanngutip angutip utoqqaanertatut toqqarneqarnissani ukiut qulit sinnerlugit utaqqisimavaa. Ezekielip allagaani kapitali 1-imi eqqaaneqartoq ilisimaneqarluartoq innersuussutigalugu ilinniutigisimasani pillugu ima oqaluttuarpoq: “Jehovap qamutimi sorsuutimi, peqatigiissortami, sukkassusaa aquppaa. Uagut toqqarneqarnissarput pingaaruteqarnani Jehovap toqqaanissaa pingaaruteqarpoq. Imaassinnaavoq Jehovap nalunngikkaa piumasarput pisariaqartinngikkipput.”

Ullut ilaanni kristumiutut nakkutilliisutut suliamik ajunngitsumik suliaqalerusukkuit ilagiit nuannaarnerulernissaannut suleqataagit. Utaqqikataleruit ernumalernaveersaarlutillu erinitsajuigit. Raymond, siusinnerusukkut eqqaaneqartoq, ima oqarpoq: “Ataqqineqarumaleruit nalerisimaalersinnaanngilatit. Ernumajuartut Jehovamut kiffartornermik nuannaarutiginnissinnaanngillat.” Guutip anersaavata inerititaa, ingammik utaqqisinnaassuseq, annerusumik ineriartortiguk. Biibilimik atuaqqissaartarnikkut anersaakkut ineriartornerulerniarit. Piffissaq annerusoq nutaarsiassamik nuannersumik oqaluussinermut soqutiginnittunillu Biibilimik atuaqqissaaqateqarnermut atortaruk. Ilaquttatit anersaakkut ittunik sammisaqarnermi ilaqutariittullu atuaqqissaaqatigiinnermi siulersortakkit. Qatanngutitit nuannisaqatigisakkit. Anguniakkatit piviusunngortikkiartorukkit Jehovamut kiffartornerit nuannaarutigissavat.

Ilagiinni immikkut pisinnaatitaaffeqalernissamut piukkunnarsarsinnaaneq Jehovamit pilluaqqussutaavoq, Jehovammi taassumalu peqatigiissortaasa kissaatiginngilaat suliamik ajunngitsumik suliaqalernissaminnik sulissutiginnittut kiffartornerminni isumatsannissaat nuannaarunnaarnissaalluunniit. Guutip ilumoortunik pissutiginiagaqarlutik kiffartortut tapersersortarlugillu pilluaqqusarpai. ‘Pilluaqqussutini erloqinartumik ilasarinngilaa’. — Uss 10:22, 1900.

Sivisujaamik suliamik ajunngitsumik suliaqalernissamik sulissutiginnissimagaluarlutit anersaakkut siumukartuarsinnaavutit. Pissuserineqartussanik ineriartortitsiguit, ilagiinni tamaviaarlutit suliaqartaruit ilaquttatillu anersaakkut ikiortarukkit Jehovap kiffartorninni iliuuserisimasatit tamaasa eqqaamajuassavai. Qanortoq sunilluunniit akisussaaffilerneqaraluaruit Jehovamut kiffartornerit nuannersuujuarili.