SAMMISAQ PINGAARNEQ | GUUTIP NAALAGAAFFIA — QANOQ ILUAQUTIGISINNAAVIUK?

**Guutip naalagaaffia — Ilinnut qanoq iluaqutaassava?**

Allaaserisat matuma siulii atuareerlugit immaqa paasivat Guutip naalagaaffia Jehovap Nalunaajaasuinut pingaaruteqangaartoq. Immaqa aamma Guutip naalagaaffiata siunissami pilluaqqussutisiarititassaasa sammisatta ilaat soqutigaatit. Aammali eqqarsarsinnaavutit neriorsuutit tamakku ilumut piviusunngorsinnaanersut.

Tusakkatit uppernarsaatissarsiortarukkit silatusaassaatit. (Ussatit 14:15) Taamaalioruit itsaq Berøamiuta iliuusiattut iliussaatit. Taakkua Guutip naalagaaffia pillugu nutaarsiassaq nuannersoq tusaramikku ilassivaat. Tamatuma ilumoortuunissaa kissaatigiinnarpaat? Naamik, Allakkat misissoqqissaartarpaat paasiniarlugu tusakkatik “ilumut taamaannersut”. (Apustilit Suliaat 17:11) Allatut oqaatigalugu Berøamiut tusartakkatik Allakkani allassimasunut naleqqiuttarpaat. Taamaaliortarnermikkut nutaarsiassap nuannersup Guutip oqaasianik tunngaveqarluartuunera upperilluinnalerpaat.

Jehovap Nalunaajaasuisa aamma illit taamaalioqqullutit kajumissaarpaatsit. Guutip naalagaaffia pillugu upperisaat Biibilimi ajoqersuutigineqartunut naleqqiussinnaavatit. Akeqanngitsumik Biibilimik atuaqqissaartarnikkut taamaaliornissannut neqeroorfigaatsigit.

Biibilimik atuaqqissaarnikkut Guutip naalagaaffia pillugu ilinniarninnut ilanngullugit inuunermi apeqqutit pingaarutillit akissutissarsisinnaavatit.

Suminngaanneerpugut?
Inuunerup suna siunertaraa?
Sooq Guutip naalliunnartoqarnera akueraa?
Toqugutta susoqassava?
Nunarsuaq piuneerutissava?
Ilaqutariittut qanoq pilluartoqarsinnaava?

Pingaarnerpaamik, Biibilimik atuaqqissaarnikkut ‘Guuti qanillisinnaavat’. (Jaaku 4:8) Guuti qaninnerujartortillugu paasinerujartussavat Guutip naalagaaffia ilinnut qanoq iluaqutaassasoq — maannakkuinnaanngitsoq aammali naassaanngitsumik. Jiisusi Ataataminut qinnummini ima oqarpoq: “Inuunerlu naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.” — Johannesi 17:3.

Jehovap Nalunaajaasuisa atuagaq una atorlugu Biibilimik atuaqqissaaqatigisinnaavaatsit.

Akeqanngitsumik Biibilimik atuaqqissaaqatigineqarumallutit Jehovap Nalunaajaasuisa ilaannut oqarit, imaluunniit www.pr2711.com-imi immersugassaq immersoruk. (Nittartakkami BIIBILIMIK ATUAQQISSAARTALERIT takuuk)

a Berøa itsaq Makedoniami illoqarfiuvoq.

Sooq Guutip naalagaaffia pingaartikkaa

Qanittukkut niviarsiaraq qulinik ukiulik Folakemik atilik atuarfimmi allatassinneqarpoq ima qulequtalimmik: “Silarsuarmi matumani nuannarinerpaasara.” Folakep Guutip naalagaaffia pillugu allanut oqaluttuartarnini sooq nuannarinerini allaatigaa.

“Guutip naalagaaffia aqutsineruvoq piviusoq,” Folake nassuiaavoq. “Takussaanngitsuuvorli — isaruaqaraluaruilluunniit takusinnaanngilat!”

Folakep nangilluni Naalagaaffiup pilluaqqussutisiassartai immikkut qilanaarisani allaatigai. Ajornartorsiutit Naalagaaffiup aaqqikkumaagaasa ilaat pillugit ima allappoq: “Aliasuttarpunga angerlarsimaffeqanngitsut aqqusinermi inuusut” aamma “silarsuup ilaani assigiinngitsuni meeqqat perlertut takugaangakkit”. Imalu nangippoq: “Nuannaaleqqittarpunga Esaja 65:21 atuaraangakku.” Guutip naalagaaffiata aqutsinerani inuusussat versimi tamatumani ima neriorsorneqarput: “Illuliorumaarput namminneq inigisassaminnik viinnequtinillu ikkussuillutik inerititaat nerisassaminnik.”

Folake aamma allappoq Guutip naalagaaffini aqqutigalugu nappaataarutitsinissaa qilanaaralugu. Allatamini Saqqummersitat 21:4 issuarpaa, tassani Guuti pillugu ima allassimavoq: “Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq.” Folakep allatani naggaserlugu uteqqiilluni allappoq Jehova taassumalu naalagaaffia pillugit allanut oqaluttuarneq silarsuarmi matumani nuannarinerpaallugit. Erseqqippoq niviarsiaqqap taassuma Guutip naalagaaffia pingaartilluinnaraa!