Aappaq allasiorsimappat

“Uima oqarfigimmanga arnaq uannit inuusunnerusoq pillugu qimalerlunga toqorusuinnarpunga. Suut tamarmik naapertuilluanngitsuliornertut ippasipput, ingammik uiga pillugu pilliutigisimasakka eqqaagaangakkit.” – Maria, Spania.

“Nuliama qimariataarmanga ilunni toqusoqartutut ippoq. Takorluukkavut, neriuutivut pilersaarutivullu maangaannarput. Ulloqartarpunga isumakuluuteqanngitsutut misigalunga, pilertaraarali isumatsarujussuaqqaqqilerlunga.” – Bill, Spania.

AAPPAQ allasiorsimagaangat alianangaartarpoq. Ilaasa aappartik peqqissimisoq isumakkeerfigisarpaat aappariinnertillu nukittorsaqqillugu.a Aappariit avikkaluarunik avinngikkaluarunilluunniit allasiorsimasumik aappallit tamanna tamatigut aliasuutigingaartarpaat. Inuit taama atugaqartut misigissutsitik qajannartut qanoq iliuuseqarfigisinnaavaat?

ALLASSIMAFFIIT BIIBILIMEERSUT ILUAQUTAASUT

Aappaasorpassuit pisuussuteqanngitsut aliasungaaraluarlutik Biibilimi tuppallersaatissarsisimapput. Paasisimavaat Guutip qullitik malugisarai misiginneqataasartorlu. – Malaki 2:13-16.

“Eqqarsaatima eqqissiviilliortileraangannga tuppallersaanerpit nuannaalersittarpaanga.” – Tussiaat 94:19.

“Allassimaffik taanna atuarakku takorloorpara Jehovapb anniartunga asannittumik toqqissisaraanga, ataatatut misiginneqataasutut illuni,” Bill oqaluttuarpoq.

“Unneqqarissumik iliortarputit [imaluunniit: Ilumoorfiginnittarputit] unneqqarissumut.” – Tussiaat 18:26.

Carmen, uia qaammatini arlalinni allasiorsimasoq, ima nassuiaavoq: “Uima ilumoorfiginngilaanga. Jehovali ilumoorfiginnittuassasoq tatigisinnaavara. Pakatsisinngisaannassavaanga.”

‘Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu. Taava eqqissinerup Guutimit pisup siuneqassusernit tamanit annerungaartup uummatisi sernigissavai.’ – Filippimiut 4:6, 7.

Sasha ima oqaluttuarpoq: “Allassimaffik taanna atuaqattaarpara. Qinujuartillunga Guutip eqqissitittarpaanga.”

Issuarneqartut tamarmik ilaannikkut sapilivittutut ittaraluarlutik Jehova Guuti tatigaat oqaasialu nukissaminnik aallerfigisarlugu. Bill ima oqarpoq: “Suut tamarmik artornarsilluinnarmata uppernerma inuunera siunertaqartippaa. Ilaannikkut ‘qooqqukkut taartukkooraluartunga’ Guutip najortuarpaanga.” – Tussiaat 23:4.

a Isumakkeerfiginninneq uani allaaserineqarpoq: “Aappaasoq allasiorsimappat”, Iteritsi! juuli-septembari 1999-imoortumi.

b Biibili naapertorlugu Guuti Jehovamik, imaluunniit Jahvemik, ateqarpoq.

Allat qanoq iliorsimasut

Allassimaffiit tuppallernartut atuarlugillu eqqarsaatigikkit.

Bill ima oqaluttuarpoq: “Jobimik allakkat aamma Tussiaatit atuarpakka uangalu atukkannut naleqquttut tamaasa ataatigut titarlugit. Paasivara Biibilimik allattut taakku uattulli anniaateqarlutillu isumakuluuteqarsimasut.”

Nipilersorneq tuppallersaatigiuk.

Carmen ima eqqaamasalikkersaarpoq: “Unnuami sinissaarukkaangama nipilersuutinik tusarnaartarpunga. Tamanna tuppallersaatigingaarpara.” Daniel ima oqarpoq: “Guitarerneq ilinniarpara nipilersornerlu iluaqutigalugu qamuuna eqqissillunga.”

Misigissutsitit eqqartortakkit.

Daniel ima oqarpoq: “Misigissutsinnik eqqartuinissara sapernartikkaluarpara. Ikinngutinnaaqarpungali ullut tamaasa oqaloqatigisartakkannik. Misigissutsinnik, allakkatigut oqaloqatigiinnikkullu, aniatitsiffigisarakkit iluaqutaaqaaq.” Sasha ima oqarpoq: “Ilaquttama ikiuinerat pingaaruteqangaarpoq. Oqalukkusukkaangama anaanaga tusarnaarnissannut piffissaqartuaannarpoq. Ataatama toqqissisimatittarpaanga pisariaqartitaralu naapertorlugu ikiortarlunga.”

Qinujuarit.

Carmen ima oqarpoq: “Qinujuarpunga. Misigisarpunga Guutip qanikkaanga, tusarnaaraanga ikioraangalu. Piffissami artornangaartumi tamatumani Guutimut qaninnerulerpunga.”