‘Uppernerpit eqqortinnaveeqqutaa’ isumagisarpiuk?

1-2. (a) Efesosimiut 6:16 naaper­torlugu sooq “up­per­nerup eq­qor­tin­naveeq­qutaa” pisariaqar­tip­par­put? (b) Apeq­qutit suut sam­mis­savavut?

IL­LIT angisuumik ‘up­per­nik­kut eq­qor­tin­naveeq­quteqar­pit’? (Efesosimiut 6:16 atuaruk). Ilimanar­poq. Eq­qor­naveeq­qut angisooq timimut tamangajam­mut as­siaqutaasar­poq. Taamatut­taaq silarsuup ajor­tup matuma kinguaas­siuutitigut inuunerluf­fiusup, nakuuserfiusup guutiitsuuf­fiusul­lu sun­niiniar­neranut up­per­nerit il­lersuutigisar­pat.

² ‘Ul­lul­li kingul­liit’ inuuf­figigatsigit up­per­ner­put misilin­neqaqat­taas­saaq. (2 Tim 3:1) Up­per­ner­pit eq­qor­tin­naveeq­qutaa qanoq misis­sorsin­naaviuk qulak­keer­niarlugu up­perluar­tuul­lutit? Qanorlu up­perluar­tuujuarsin­naavit? Apeq­qutit taak­kua akis­sutaat sam­mis­savavut.

EQQORTINNAVEEQQUTIT MISISSORLUARUK

3. Sak­kutuut eq­qor­naveeq­quter­tik susar­paat, aam­ma sooq?

³ Biibilip nalaani sak­kutuut amermik qal­lik­kamik eq­qor­naveeq­quteqar­tar­put. Amitaa asioq­qunagu saviminer­taalu man­nger­tor­nileq­qunagit sak­kutuup eq­qor­naveeq­qutini uuliater­tar­paa. Paasiguniuk arlaatigut ajoqusersimasoq iluarsaat­tuun­nis­saa qulak­keer­niar­tar­paa sorsugiaq­qin­nis­saminut piareersimanias­sagami. Taman­na up­per­nin­nut qanoq as­sersuutaava?

4. Up­per­ner­pit eq­qor­tin­naveeq­qutaa qanoq misis­sorsin­naaviuk, aam­ma sooq taamaalior­tariaqar­pit?

⁴ Kristumiuugat­ta anersaak­kut sorsup­pugut, akeq­qat­talu ilagaat anersaapiluit. (Ef 6:10-12) ‘Sorsun­nermut’ piareersimanias­sagavit itsaq sak­kutuut as­sigalugit ‘eq­qor­naveeq­qutit’ misis­sorlugulu paaril­luar­tariaqar­pat. Al­la il­lit sin­nerlutit taamaaliorsin­naan­ngilaq. Misilin­neqar­ner­ni up­perluar­tuunis­sat qanoq qulak­keersin­naaviuk? Siul­ler­tut, Jehovamut qinunik­kut ikioq­qusariaqar­putit. Taava up­per­nerit Guutip piumasaanut naaper­tuun­nersoq paasiumal­lugu Biibili misis­sor­tariaqar­pat. (Hebr 4:12) Biibilimi ima al­las­simasoqar­poq: “Naalagaq tatigiuk uum­matik­kut iluun­ngarlutit, nam­minerlu paasisimasaqas­sutsit tatigeqinagu!” (Uss 3:5, 6) Taman­na eq­qarsaatigalugu inuunin­ni qanit­tuk­kut nalaas­simasan­ni qanoq iliorsimanerit eq­qarsaatigiuk. As­sersuutigalugu aningaasaqar­niar­nik­kut ajor­nar­torsiuteqangaarsimavit? Jehovap neriorsuutaa Hebræerit 13:5-imi al­las­simasoq eq­qaaviuk? Imami al­las­simavoq: “Iperas­san­ngilak­kit im­miniigin­nas­sanal­lu.” Neriorsuut taan­na Jehovap ikiuiumaar­neranik tatiginerulis­sutigaajuk? Taamaap­pat up­per­ner­pit eq­qor­tin­naveeq­qutaata ajoquteqan­ngin­nis­saa isumagisimavat.

5. Up­perluar­tuunersutit misis­sor­til­lugu im­maqa suna paasis­saviuk?

⁵ Up­perluar­tuunersutit misis­soq­qis­saar­nerani paasisin­naavat aaq­qitas­saqar­toq. Im­maqa paasis­savat ilisiman­ngisan­nik san­ngiis­suteqarlutit. Imaas­sin­naavoq isumakulup­pal­laar­neq, sal­luliuutit nikal­lunganerlu pis­sutigalugit up­per­nik­kut san­ngiil­lisimasutit. Taamaap­pat up­per­nik­kut suli an­ner­tunerusumik ajoquseq­qunak qanoq im­minut il­lersorsin­naavit?

UPPERNIKKUT SANNGIILLIS­SUTAASARTUNUT ILLERSORIT

6. Er­numas­sutit ajun­ngitsuusin­naap­pat? Nas­suiaruk.

⁶ Er­numas­sutit ilaat ajun­ngil­lat. As­sersuutigalugu Jehovamit Jiisusimil­lu iluarisaanis­sat­ta pingaar­tin­nera iluaqutigisar­par­put. (1 Kor 7:32) Ingasat­tumil­lu ajor­tuliorsimagut­ta Guutimut ikin­ngutaal­luaq­qiler­nis­sar­put ilungersuutigis­savar­put. (Tuss 38:19) Aam­ma aap­pat­ta qanoq nuan­naar­tin­nis­saa eq­qarsaatigisar­par­put, soorlu ilaqut­tat­ta up­peqatit­talu qanoq isumas­sor­nis­saat soqutigisarip­put. – 1 Kor 7:33; 2 Kor 11:28.

7. Us­satit 29:25 naaper­torlugu sooq inun­nik qunugisaqar­tariaqan­ngilagut?

⁷ Paarlat­tuanik isumakulup­pal­laar­neq up­per­nitsin­nut ajoqutaasin­naavoq. As­sersuutigalugu naam­mat­tunik atisas­saqarlutalu nerisas­saqar­nersugut isumakuluutigiin­nalersoorsin­naavar­put. (Matt 6:31, 32) Taamaasil­luta pigisaqaler­niar­neq sal­liut­tuulersin­naavar­put al­laal­lu aningaaserituun­ngorluta. Taava up­per­nik­kut san­ngiil­lis­saagut Jehovamul­lu ikin­ngutaaner­put in­narlerlugu. (Mark 4:19; 1 Tim 6:10) Isumakuluutigival­laalersoorsin­naasar­put al­la tas­saavoq al­lat uagut pil­luta isumaat. Jehovap iluarin­ngisaanik ilior­naveersaarusun­nitsin­niit il­laruaatigineqar­neq malersor­neqar­nerlu isumakuluutiginerulersin­naavar­put. Inun­nik qunugisaqaq­qunata Jehova kimigiiserfigisariaqar­par­put up­per­nermik sapiis­susermil­lu pisariaqar­titatsin­nik tuneq­qul­luta. – Ussatit 29:25 atuaruk; Luk 17:5.

8. Sal­luliuutinut qanoq qisuariar­tariaqar­pugut?

⁸ Saatani, ‘sal­lumut ataataasoq’, pis­saaneqarfigisani aq­qutigalugit Jehova qatan­ngutivul­lu pil­lugit sal­lunik siam­mar­terisar­poq. (Joh 8:44) As­sersuutigalugu tunus­sisut nit­tar­tak­katigut, fjer­nsynik­kut al­latigul­lu Jehovap peqatigiis­sor­tai pil­lugit sal­lunik saq­qum­mersitsil­lutil­lu paasis­sutis­sanik al­lan­nguisar­put. Sal­luliuutit taak­ku Saatanip ‘qarsuisa ikumasut’ ilagaat. (Ef 6:16) Sal­luliuutinik taak­kunan­nga oqalut­tuun­niar­neqalerut­ta sus­saagut? Tamak­kunin­nga tusar­naarusun­navian­ngilagut! Sooq? Jehova up­perigatsigu qatan­ngutivul­lu tatigalugit. Aap, tunus­sisut qanorluun­niit at­taveqaqatigerusun­ngilavut. Sunaluun­niit, soorlu alaper­naan­neq, pis­sutigalugu oqal­liseqatigerusun­ngilavut.

9. Nikal­lunganeq qanoq sun­ner­neqaatigisin­naavar­put?

⁹ Nikal­lunganeq up­per­nik­kut san­ngiil­lis­sutaasin­naavoq. Ajor­nar­torsior­nitsin­ni ilaan­nik­kut nikal­lungasin­naasar­pugut. Soorunami ajor­nar­torsiutivut soqutigin­ngitsuusaagin­narsin­naan­ngilavut. Eq­qarsaatigiuaan­nas­san­ngilavul­li, taamaalior­nik­kum­mi Jehovap neriorsuuter­pas­sui nuan­nersut puigor­toorsin­naagatsigit. (Saqq 21:3, 4) Ima nikal­lor­tigisin­naavugut al­laat san­ngiil­lil­luta Jehovamul­lu kif­far­torusuk­kun­naarluta. (Uss 24:10) Taman­nali pin­ngitsoor­tis­sin­naavar­put.

10. Qatan­ngutip ar­nap al­lataanit suna paasivar­put?

¹⁰ USA-mi qatan­ngut ar­naq uiminik nap­parsimasumik isumas­suisoq qanoq up­perluar­tuujuarsin­naasoq eq­qarsaatigiuk. Qul­lersaqarfim­mut al­lak­kamini ima al­lap­poq: “Pis­sutsit atuk­kavut naner­tisimanarlutil­lu nikal­lor­nar­tar­put, neriut­tuar­pugul­li. Up­per­nik­kut nakus­satsik­kumal­luta tup­pal­lersarumal­lutalu Jehovap tun­nius­sai tamaasa qujamasuutigeqaak­ka. Taamatut siun­nersor­neqar­nis­sar­put qiim­mas­sar­neqar­nis­sar­pul­lu pisariaqar­til­luin­nar­par­put. Jehovamut kif­far­tor­tuar­nis­samut Saatanil­lu saas­sus­sinerini piner­tusaar­nis­samut iluaqutigaavut.” Qatan­ngutit­ta al­lataanit paasivar­put nikal­lunganeq qaanger­neqarsin­naasoq. Qanoq? Ajor­nar­torsiutitit Saatanimit misilin­neqaatitut isigik­kit. Jehova Tup­pal­lersaasoralugu tatigiuk anersaak­kul­lu inuus­sutis­sat tun­nius­sai qujamasuutigalugit.

11. Up­perluar­tuunerluta paasiumal­lugu im­minut qanoq aperisariaqar­pugut?

¹¹ Up­per­nerit nakus­satsit­tariaqar­nersoq qanoq paasisin­naaviuk? Im­minut ima aperigit: ‘Qaam­matialuit kingul­liit isumakulup­pal­laar­naveersaar­punga? Tunus­sisut sal­luliuutaan­nik tusar­naar­nangalu taak­ku oqal­liseqatiginaveersaar­pak­ka? Aam­ma nikal­lunganeq iliuuseqarfigisin­naasimavara?’ Taamaap­pat up­per­nik­kut ingerlal­luar­putit. Saatanil­li sak­kut al­lat ator­tarmagit eq­qumajuar­tariaqar­pugut. Taak­kua ilaat misis­soriar­tigu.

PIGISALERITUNERMUT ILLERSORIT

12. Pigisalerituneq pis­sutigalugu susin­naavugut?

¹² Pigisalerituneq pis­sutigalugu al­lamut saasar­neqarlutalu up­per­nit­ta eq­qor­tin­naveeq­qutaa sumigin­narsin­naavar­put. Apustili Paulusi ima al­lap­poq: “Kinaluun­niit sorsuk­kiar­tor­toq sak­kutuus­sarsiarin­nitsiminit iluarineqarumasoq ul­luin­nar­ni suliarisar­tak­kaminit akor­nusersor­tin­neq ajor­poq.” (2 Tim 2:4) Romamiut sak­kutuui al­lanik suliaqarsin­naatitaaneq ajor­put. Sak­kutuup taman­na maleruan­ngip­pagu susoqarsin­naava?

13. Sooq sak­kutooq al­lamik suliaqarusun­neq ajor­pa?

¹³ Una takorlooruk: Sak­kutuut panalisarlutik ul­laak­kut sungiusar­put, ataaserli peqan­ngilaq. Taan­na nerisas­siaminik tuniniaajar­torluni il­loqarfiliarsimavoq. Un­nulersoq sak­kutooqatimi ator­tumin­nik misis­suineran­ni panamin­nil­lu ipis­saaneran­ni nam­mineq aqaguani tuniniagas­saminik nerisas­sior­poq. Ul­laaralaak­kul­li akeq­qamin­nit saas­sun­neqariasaar­put. Sak­kutuut ilaat sorleq sorsun­nis­samut piareersimas­sava taamatul­lu naalak­kaminit iluarineqarluni? Il­lit arlaat sorleq sanilererusus­sagaluar­piuk? Sak­kutooq piareersimasoq imaluun­niit al­lanik ulap­puteqar­toq?

14. Kristusip sak­kutuuisut suna pingaar­tip­par­put?

¹⁴ Sak­kutuujul­luar­tutut Naalak­katsin­nit, Jehovamit aam­ma Kristusimit, iluarisaanis­sar­put pingaar­ner­paatip­par­put. Saatanip silarsuaata neqeroorutigisin­naasaanit sunil­luun­niit naleqar­neruvoq. Jehovamut kif­far­tor­ner­put pingaar­tik­katsigu up­per­nit­ta eq­qor­tin­naveeq­qutaata anersaak­kul­lu sak­kutuus­sutit­ta sin­nerisa isumagil­luar­nis­saan­nut pisariaqar­tumik pif­fis­saqarlutalu nukis­saqar­nis­sar­put qulak­keer­tar­par­put.

15. Paulusi qanoq mianersoq­qusiva, aam­ma sooq?

¹⁵ Eq­qumajuar­tariaqar­pugut! Sooq? Apustili Paulusi al­lap­poq ‘inuit pisuun­ngorumasut up­per­nermin­nit tunus­sisitaasar­tut’. (1 Tim 6:9, 10) Pigisat pisariaqan­ngitsut pis­sarsiariniar­nis­saat al­lamut saasaatigalugit ‘tunus­sisitaasin­naavugut’. Taava ‘sianiitsulior­nerusunik ajoqutaasunil­lu’ pileris­suseqalersin­naavugut. Eq­qaamasariaqar­par­put pileris­sutsit taamaat­tut sak­kugalugit Saatanip up­per­nikil­lisin­niar­taraatigut.

16. Markusi 10:17-22 al­las­simasut apeq­qutinik sunik eq­qarsalersitsip­pat?

¹⁶ Im­maqa pigisar­pas­suar­nik pisior­tor­nis­samut akis­saqar­pugut. Kis­saatigisamik pisariaqar­tin­ngisamil­li pisineq eq­qun­ngitsulior­nerua? Taamaat­tariaqan­ngilaq. Apeq­qutil­li uku eq­qarsaatigik­kit: Pisinis­samut akis­saqaraluarluta pisiarerusutat­ta paaril­luar­nis­saanut pif­fis­saqarfigalugulu nukis­saqarfigaar­put? Aam­ma pigisavut erligival­laalersoorsin­naavavut? Pigisanik pingaar­titsival­laaler­nik­kut angut inuusut­toq Guutimut kif­far­tor­nerunis­samut Jiisusip qaaq­qusis­sutaanut itigar­titsisoq ilaalersoorsin­naavar­put? (Markusi 10:17-22 atuakkit). Pilimanian­ngitsumik inooriaaseqarluta pif­fis­sar­put nukivul­lu atorlugit Guutip piumasaatut iliorut­ta pitsaanerungaas­saaq!

UPPERNERPIT EQQORTIN­NAVEEQQUTAA TIGULLUAR­TITAARTUARUK

17. Suna eq­qaamajuar­tariaqar­par­put?

¹⁷ Eq­qaamajuar­tariaqar­par­put ul­lut tamaasa sorsun­nis­samut piareersimasar­nis­sar­put. (Saqq 12:17) Up­per­nit­ta eq­qor­tin­naveeq­qutaa qatan­ngutit­ta tigum­misin­naan­ngilaat. Uagut nam­mineq up­perluar­tuunis­sar­put isumagisariaqar­par­put.

18. Sooq itsaq sak­kutuut eq­qor­naveeq­quter­tik tigum­mil­luar­tar­paat?

¹⁸ Itsaq sak­kutuup sorsun­nermi sapiitsuunini ataq­qinaatigisar­paa. Eq­qor­naveeq­quteqarani uteruni nikanarsaataas­saaq. Oqalut­tuarisaanermik ilisimatooq Romamiu Tacitus ima al­lap­poq: “Sak­kutuup eq­qor­naveeq­qutiminik qimatsinera nikanarsaataaner­paavoq.” Taman­na sak­kutuut eq­qor­naveeq­qutimin­nik tigum­min­nil­luar­tar­neran­nut pis­sutaasut ilagaat.

19. Up­per­nit­ta eq­qor­tin­naveeq­qutaa qanoq tigum­mil­luarsin­naavar­put?

¹⁹ Up­per­nit­ta eq­qor­tin­naveeq­qutaa tigul­luar­titaarsin­naavar­put ataatsimiin­ner­ni najuut­tar­nik­kut aam­ma Jehovap aq­qa naalagaaf­fialu pil­lugit oqalut­tuar­tar­nik­kut. (Hebr 10:23-25) Tamatuma saniatigut Biibili ul­lut tamaasa atuar­tar­par­put atuak­kat­talu maleruar­nis­saanut Jehovamut qinunik­kut ikioq­qul­luta. (2 Tim 3:16, 17) Taamaaliorut­ta Saatanip sak­kunik ator­tak­kaminik ataavar­tumik ajoqusersin­naas­san­ngilaatigut. (Es 54:17) ‘Up­per­nit­ta eq­qor­tin­naveeq­qutaa’ angisooq il­lersuutigis­savar­put. Sapiil­luta qatan­ngutivut sorsoqatigis­savavut. Ul­lut tamaasa akiuun­nitsin­ni ajugaasin­naas­saagut. Pingaar­ner­tul­lu, Jiisusip Saatanimut taas­sumalu iliinut sorsuk­kuni ajugaasus­sap naalagarinera ataq­qinaatigis­savar­put. – Saqq 17:14; 20:10.