Tamakkiisumik uummateqarlutit oqaluussisarit
Immikkoortoq 2: Angorniornerulerniarit
1 Suliarisaq nuannarigaanni angorniuutigiuminarnerusarpoq. Piareersarsimasarlu suliarissallugu amerlanertigut nuannaarutiginarnerusarpoq.
PIAREERSARNEQ PINGAARPOQ
2 Qanoq piareersarluartigisimanerput aamma qanoq akulikitsigisumik peqataasarnerpugut oqaluussinermi angorniortuunissatsinnut aalajangiisuupput. Assersuutigalugu, illumiit illumut angalaarnitsinni musliimiunerartoq naammattoorutsigu, qanoq oqarsinnaavugut? Oqaluussisartoq piareersarluarsimasoq immaqa oqarumassaaq: „Soqutiginarpoq. Musliimit ikittuinnaat oqaloqatigisimavakka. Upperisavilli ajoqersuutaasa ilaat pillugit atuakkami matumani atuarsimavunga. [’Ræsonnerebogi’ qupperneq 23-mi qupperuk.] Allassimavoq Jesus pruffiitisut isigigissi kisianni Muhamed tassaasoq pruffiiti kingulleq pingaarnerpaasorlu. Taama upperisaqarpusi, ila? [Pulaarfigisaq oqaaseqartiguk.] Upperaajuk Mosesissaaq pruffiitiusoq ilumoortoq? [Pulaarfigisaq oqaaseqartiguk. Qularnanngitsumik angissaaq.] Bibelimit takutissinnaavakkit Guutip Moses nammineq aqqi pillugu qanoq ilinniartissimagaa?“ Taava Mosesimik allakkat aappaat 6:3 atuarneqarsinnaavoq. Taamaalilluni oqaloqatigiinneq soqutiginartoq aallartinneqarsinnaavoq.
3 Ilarpassuatta quppernerit kisitsisaat eqqaamajuminaatsittarpaat. Piareersaruttali sungiusarlutalu ’Ræsonnerebog’-ip aallaqqaataani immikkoortoq „Indvendinger“-mik (akerliliissutit) qulequtalik atorsinnaavarput. Tassani arlalinnik qupperneqarpoq paasissutissanik inuit assigiinngitsunik upperisallit oqaloqatiginerini iluaqutigisinnaasatsinnik imalinnik.
4 ’Ræsonnerebog’-imi pitsaasumik immikkoortoqarportaaq aallarniissutissanik imalimmik. Aallarniissutissat tamakku najoqqutariniakkit. Saqqummiussinerput pissutsinut naleqquttunngorsartariaqarsinnaavarput. ’Ræsonnerebog’-imi immikkoortut amerlasuut naalerneranni imaattumik qulequtaqartarpoq: „Hvis nogen siger“ (Ima oqartoqarpat). Tassani apeqqutinut akerliliissutinullu akissutissat toqqaannartut nassaarineqarsinnaapput. Paasissutissalli pitsaasut tamakku tamarmik iluaqutaassapput aatsaat piareersaanitsinni atortarutsigik.
QANOQ ILILLUTA PIAREERSARSINNAASUGUT
5 Oqaluussinermut tunngasumik ataatsimiinnermi naqitikkat suut atorneqassasut sianiginiakkit, nassartakkillu oqaloqatigiissuteqarnerni takutitsinernilu malissinnaaqqullutit. Taamaalillutit allat piareersarsimanerat iluaqutiginerussavat.
6 Piffissangaatsiaq atorlugu oqaluussinissamut piareersarneq iluaqutaavoq. Atuakkat atuagassiallu atortussatit pisiareerpigit? Minuttialuit atorlugit oqaloqatigiissutissaq samminiaruk, atuagassianilu neqeroorutigisassamiluunniit erseqqissarsinnaasatit naniniarlugit. Ilaqutariittut peqatigiilluni taamaaliorneq iluaqutaaqaaq.
7 Sungiusaqatigiinniaritsi. Piffissani assigiinngitsuni sungiusartoqarsinnaavoq — atuakkamik atuaqqissaaqatigiinnerup kingorna, katerisimaaqatigiinnerni, biilerluni oqaluussiartornermi imaluunniit pulaarnerit akornanni. Sungiusaqatigiilluni akerliliissutit qanoq akineqarsinnaasut oqaloqatigiissutigalugillu misiligarlugit nuannersorujussuusinnaavoq; taamaaliortarutta oqaluussinermi pikkorissiartorsinnaavugut.
8 Piareersarluartarutta oqaluussinissarput kajumiginerussavarput, aammattaaq oqaluussineq nuannaarutiginerussallugulu nalerisimaarutiginerussavarput. — Juá. 2:17. (kmD 8/91 Vær helhjertet i forkyndelsen — 2. del)