Ullormut anersaakkut inuussutissat — ilaqutariit kristumiuusut inuunissaannut pisariaqavissut
1 ’Timiusaannaq inuup inuussutiginngilaa, oqaaserli sunaluunniit Guutip qarnanit anisoq inuussutigisaraa.’ (Mat. 4:4) Ilumoorpoq! Soorlu ullut tamaasa timikkut nerisassat pisariaqartikkivut ullormuttaaq anersaakkut inuussutissat pisariaqartippavut. Akuttoqatigiissumik inuussutissat anersaakkut ittut Guutip oqaasianeersut pisinnaaqqullutigik Peqatigiiffiup atuagassiaaraq Undersøg daglig Skrifterne (kalaallisuunngortitaanngitsoq) naqitersimavaa. Ilissi ilaqutariittut ullut tamaasa ullormut allassimaffiup oqaloqatigiissutiginissaanut piffissaqartarpisi?
2 Angajoqqaat maligassiuisariaqarput: Ulluinnarni ulapiffiusuni ullormut allassimaffiup atuarnissaata kinguartinnissaa ussernartorsiornarsinnaasarpoq isumaqarluni kingusinnerusukkut taamaaliuinnarumaarluni. Angajoqqaalli ilaquttamik anersaakkut pisariaqartitai eqqumaffigigunikkik, ullut tamaasa ilaqutariit ataatsimoorneranni ullormut allassimaffiup oqaloqatigiissutigineqarnissaa piffissaqarfigiumasassavaat. (Mat. 5:3) Meeqqaminnut atuaannarnagu aammali nassuiaammit Napasuliaq Alapernaarsuiffik-miittumit eqqarsaatit erseqqissassavaat paasissutissallu unnersuussutillu qanoq atorneqarsinnaasut oqaloqatigiissutigissallugu. Ilumoorpoq tamanna ileqquliutissagaanni suliniuteqartariaqartoq, ilungersornerli imminut akilerluarsinnaavoq. (Naleqqiuguk apustilit suliáinik agdlagkat 17:11, 12.) Ilissi angajoqqaat, maligassiuinissarsi tamaviaarunniarsiuk!
3 Piffissaq naleqqulluartoq qinersiuk: Piffissaq ilaqutariinnut tamanut pitsaanerpaasoq qinersiuk, ullormut allassimaffimmut ataatsimoornissarsi nalaatsornerinnaaqqunagu. Ulloq aallarnerlugu allassimaffimmik Biibilimeersumik oqaloqatigiissuteqarneq iluaqutaasorujussuuvoq. Silarsuarmi tamarmi Betelimi ajoqersuiartortitallu angerlarsimaffiini ullaat tamaasa ullormut allassimaffik sivikitsumik oqaloqatigiissutigineqartarpoq. Tamanna ikiortigalugu qatanngutit ulloq pitsaasumik aallarnertarpaat ullullu tamaasa Jehovap eqqaasitsineri eqqarsaatigisinnaasarlugit. — Tus. 1:1, 2; Fil. 4:8.
4 Ilaqutariit kristumiuusut aamma ullaakkut eqqarsaatinik Biibilimeersunik oqaloqatigiissuteqarneq iluaqutigissavaat. Meeqqat atuarfimmi anersaakkut aserornartumik sunniiniarneq akiorsinnaassavaat. Piffissami aalajangersimasumi ilaqutariit ullormut allassimaffiup atuarnissaanut katersuunnissamut periarfissaqanngikkunik, angajoqqaat aaqqiissutissamik allamik ujarlertariaqarput ilaqutariit anersaakkut inuussutissanik tamakkuninnga pinngitsooqqunagit. Ataataasoq ullaakkut meeqqat makitsinnagit suliartortarpat, immaqa anaanaasup meeqqat ullormut allassimaffimmik oqaloqatigisarsinnaavai. Allat unnukkut ilaqutariit ataatsimoorneranni ullormut allassimaffik sammisarpaat. Ilaqutariit ataasiakkaat tamanut tulluuttumik pilersaarusiortariaqarput.
5 Ullormut anersaakkut inuussutissat ilaqutariit inuunissaannut pisariaqavippoq. Ullormut allassimaffiup samminissaa pingaartitsigu. (Fil. 1:10) Ullut tamaasa allassimaffimmik oqaloqatigiissutiginninneq ikiortigalugu Jehovap inatsisai najoqqutassiaalu naapertuilluartut aalajangiussinnaavavut. Ilaqutariinniittut tamarmik suleqatigiilluarunik tamarmik aaqqissuussaq sapinngisamik annertuumik tamanna iluaqutigissavaat. (km 92/5 Daglig åndelig føde . . .)