Atuaqqissaaqatigisartakkavit uummataa angujuk
1 Kissaatigaajuk atuaqqissaaqatigisartakkavit ilinniakkani malillugit iliuuseqarnissaa? Taamaaliornissarmi ilikkakkat iluaqutigissagaanni pisariaqarpoq. Atuaqqissaaqatigisartakkat iliuuseqarnissaanut kaammattussagukku uummataa angusariaqarpat. Ukiumi 33-mi inuit 3000-it Peterip oqalugiaataa kajumissinartoq tusarnaaramikku ’uummatimikkut killinneqarsimapput’ ullormilu tamatumani ’oqaasianik ilassinnittut kuisipput’. (ap. sul. 2:37, 41) Qanoq ilillutit atuaqqissaaqatigisartakkavit uummataa angusinnaaviuk?
2 Piareersarluartarit: Takivallaamik atuaqqissaaqatigisassanngilat eqqarsalersinniarnissaanut piffissaqarniassagavit. Aalajangereertaruk sorpiaat erseqqissaaffigissallugit, qulakkeerluartarullu allassimaffiit eqqortumik paasisimaneritit eqqortumillu atorsinnaaneritit. Isumaliutigereertaruk atuaqqissaaqativit suut apeqqutigeriataarsinnaanerai, taassuma tunuliaqutaa eqqarsaatigiitigalugu. Atuaqqissaaqatigisartakkat ilisarisimalluarukku paasissutissat taassuma inuttut ikiornissaanut naleqquttut piareersimaffigisinnaassavatit.
3 Jesusip ilinniartitseriaasia ilaaruk: Paasiuminaatsut paasiuminarsarniarlugit, tusarnaartini eqqortumik paasinninnissaannik ikiorniarlugit misigissusiisigullu killinniarlugit Jesusip assersuutit atortarsimavai. (Lúk. 10:29-37) Aamma Biibilip ajoqersuutai atuaqqissaaqatigisartakkannut puiuikkiutitiniarsinnaavatit ulluinnarni pisartut atorlugit assersuusiornikkut, pissutsinullu atuaqqissaaqativit atugarisaanut tapitartuunnerisigut.
4 Atuaqqissaaqatigisartakkap uummataa anguniassagaanni Jesusip iliorajussimaneratut apeqquteqartarnissaq iluaqutaasorujussuusarpoq. (Lúk. 10:36) Atuaqqissaaqatigisavit akissut atuakkamit atuaannaraangagu naammagissanngilat. Apeqqutinik aqqutissiuussisunik apeqquteqarfigisaruk eqqarsaatigisimanngisaraluamik inerniliinissaanik ikiorniarlugu. Tamanna aamma atuaqqissaartup eqqarsarsinnaassusianut ineriartuutaassaaq. Eqqartugarsi qanoq isumaqarfigineraa aperisaruk. Taava ikiorneqarnissaminik pisariaqartitsiffii sammisinnaavasi, tamakkununngalu naleqquttunik siunnersorsinnaavat.
5 Atuaqqissaaqatigisartakkat siumukanngippat tamatumunnga suna peqqutaanersoq paasiniartariaqarpat. Piffissakkut allakkut atuaqqissaarfigisassi saniatigut pulaarsinnaavat. Suumuna uninngatikkaa? Biibilimi ajoqersuutit ilaannik paasinngisaqarsimava? Inuunermini allannguinissaminut nangaava? Atuaqqissaaqatigisat ’illuttut tusianniarsariinnarpat’ ikiorniarsinnaavat taamaaliornerup qanoq navianaataanik paasitinniarlugu. — 1 kúng. 18:21.
6 Apustilip Paulusip paasisimavaa soqutiginnittunik Biibilip ajoqersuutaanik ilumoortunik ilinniartitsineq tassaasoq inuunermik annaassiniarluni sulineq, kristumiullu tamaasa siunnersorpai ’ajoqersuutertik misissortuaqqullugu’. (1 Timûtiuse 4:16) Inuit atuaqqissaaqatigisartakkavut Biibilimik silarsuarmilu pisunik ilisimasaqarfiginnilernissaannaat naammanngilaq. Jehova Jesusilu pillugit eqqortumik ilisimasaqalertariaqarput taakkununngalu inuttut asannittumik attaveqalernissaannik ikiorneqartariaqarput. Aatsaammi taamaaliorunik uppernermik suliamikkut takutitsinissaminnut kajumississapput. (Jâk. 2:17, 21, 22) Atuaqqissaaqatigisatta uummataa angugutsigu aqqutikkut Jehovamik ataqqinartitsisukkut inuunerminillu annatsitsisukkut ingerlarusulissaaq. — Uss. 2:20-22. (km 93/12 Nå ind til hjertet . . .)