Eqqiluisaarneq Guutip ataqqinaatissaanut
1 Mosesip inatsisai imaqarput eqqiluisaarnissamik piumasaqaatinik ersarissunik Israelikkunnik inuiattut immikkut ittuutitsisunik — inuiaagamik anersaakkut timikkut minguitsuusussat. (3 Mos. 11:35, 36; 15:1-11; Jes. 52:11) Taamaannerat Guutimut ataqqinaataavoq tamannalu iluatigalugu peqqinnissamut siuarsaataalluni.
2 Aamma ullumikkut minguissuseq Jehovap innuttaasa ilisarnaatigaat. Ataatsimooqatigiittut eqqarsaatigaluta eqqiluisaartutut torersutullu ilisimaneqarpugut, ataasiakkaarlutali taamaappugut? Takkorliuttarnitsinnut eqqiluisaarnitsinnullu qanoq annertugisumik ilungersuussinerput ersersitsivoq Jehovap piumasaa qanoq paasisimatigineripput.
3 Assersuutigalugu angerlarsimaffipput qanoq isikkoqarpa? Peqatigiiffitsinnut tusarliussatsinnullu atatillugu inunnut allanut pitsaanngitsumik takussutissiiva? Allat takugunikku angerlarsimaffipput angerlarsimaffittalu silataa tukattut taava nunarsuup paratiisinngorluni alianaalluni saligaatsunngornissaa pillugu oqaluussinerput upperisinnaassanerpaat? Angerlarsimaffipput paarinerlugaarpasippat eqqiluisaannginnerluunniit pissutigalugu tipippat taava malunnassanerpa ilaqutariit ’Guutip naalagaaffiata ataani silarsuassamut nutaamut naleqquttunik ileqqoqalersimasut’? — om, q. 125-27.
4 Biilerput oqaluussinitsinni atoraangatsigu qanoq isikkoqartarpa? Ilua silataalu ipiippat, suliatsinnut pitsaanngitsumik isigineqalersitseqqunagu? Oqaluussinitsinnimi pooqattarput? Uagullu nammineq — ipiillutalu torersunik atisaqarpugut? Takujuminarlutalu isorinninnissamut pissutissiinaveersaartariaqarpugut. Nammineq atisavullu ipiippata tulluaannarpoq. — w89 1/6, q. 16-19.
5 Qatanngut imminut ipeersaartuutikkunnaarpat, imaluunniit angerlarsimaffia mamiatsatsitsisinnaappat? Immaqa utoqqalisimavoq, imaluunniit peqqippallaarunnaarsimalluni, ikiorneqarnissaminillu pisariaqartitsiinnarluni? Taava asannittuliornerussaaq ikiussallugu. Ilaasa eqqiluisaarnikkut ajornartorsiuteqarnertik namminneq nalulluinnarpaat; ilisimatinneqaannariaapput, aaqqikkasuassavaallu. Eqqiluisaarnissaq eqqarsaatigalugu maligassiuinerluttuartut ilagiinni immikkut pisinnaatitaaffinnut atorsinnaanngillat. Soorunami utoqqaanertat namminneq inuttut iluarinerusaminnik periaatsiminnillu allanut pinngitsaaliillutik atuisitsiniaassanngillat.
6 Rigssalitsinnut, anersaakkut nerisassanik piareersarluakkanik sassaallerfiusartumut, inunnik avataaniittunik qaaqqusisarpugut. Amerlanertigut rigssali torerlunilu eqqiluittangaarmat takutinnissaa nuannarisarparput. Imminilli taamaalinavianngilaq. Rigssali qimerluualaalaariaruk. Issiaviit, iikkat naterlu ipiippat? Anartarfiit ipiitsuutinneqartuaannarpat? Natersuaq iigarluunniit simernilik takukulagaanni sungiunnartarpoq malunnarunnaartarlunilu. Pulaanulli aatsaat tamaaniittunut qissimigaarnarsinnaavoq. Taamaattumik sapinngisatsinnik rigssali ipiitsuutillugulu torersuutinniartigu, eqqiarneranullu imaluunniit allanngortiterneqassappat allanngortiterneranut ikiuuttarluta.
7 Aap, oqaaseqanngikkaluarluta Guuti unnersiutigisinnaavarput — inuttut pigisattalu (biilitta, angerlarsimaffitta pialuutittalu) ipiitsuutinnerisigut paarilluarnerisigullu. Maligassiuinitsigut mamiatsatsitsinaveersaassaagut, pallorfiginninnittalu sutigut tamatigut minguitsuuneranut takussutissaassaagut. — 1 Kor. 10:31, 32; Jak. 1:27. (kmD 4/94 Renlighed er til ære for Gud)