Atuaqqissaaqatitit oqaluussinissamut piareersaakkit
1 Biibilimik atuaqqissaarnitsinni siunertaq pingaarnerpaasoq tassa nutaanik ajoqersuganngortitsinissaq, allanik ilinniartitsinitsinni ikiuisussanik. (Mat. 28:19, 20) Atuaqqissaarnerup ilinniartut paasisaqalernissaat siunertariinnanngilaa; uppernerli aalajaatsoq pilersissavaa, neriuutertillu allanut ingerlateqqinniassammassuk piareersartittariaqarpavut. (2 Kor. 4:13) Qanorli ililluta allat ajoqersuisalernissaannut pisinnaanngortissavavut? — 2 Tim. 2:2.
2 Kiffartuussineq anguniagassatut saqqummiugiuk: Aallaqqaataaniilli atuaqqissaaqatit paasitinniaruk pallorfiginninneq ilumoortoq ’qanikkut nassuernissamik annakkumaarnartumik’ nassataqartariaqartoq. (Rûm. 10:10) Taaguuterput Jehovap Nalunaajaasui takutitsivoq allat saaffigissagivut. Atuaqqissaaqatitit ikiorniakkit paaseqqullugu ilinniartinneqarnertik namminiinnaq annannissamik siunertaqanngitsoq. Namminneq ajoqersuisunngorunik tusarnaartussat aamma annaanneqarumaarput. — 1 Tim. 4:16.
3 Sammisimasat uteqqittakkit: Akuttunngitsumik sammisimasat uteqqittarutsigik iluaqutaasorujussuussaaq. Ilinniartoq anersaakkut ineriartussaaq ilinniarsimasai isumaanut uummataanullu sorlannippata. Uagut nammineq tamanna misilissimavarput Napasuliaq Alapernaarsuiffik-mik atuaqqissaarnermi uteqqiinissamut apeqqutissat akigaangatsigik. Apeqqutissat ersarissut ilaat ilinniartup nammineq oqaatsini atorlugit akisassai piareersartakkit.
4 Uteqqiinerup oqaluussinermi pissuseq assigisinnaavaa. Apeqqutissaq eqqartoruk imaluunniit oqaluussinermi misilittakkat oqaluttuaralugu. Illit pulaagaasuusaarsinnaavutit atuaqqissaaqaterpillu misilissinnaavaa qanoq oqaaseqarsinnaanerluni. Oqaaserisai pitsaasut pillugit nersorniaruk, siumukarsinnaanissaanillu siunnersorlugu. Tamatuma takutissavaa qanoq ililluni ilinniarsimasani atorsinnaagai, Biibilimillu atuisinnaanera ineriartortissavaa.
5 ’Ræsonnerebogi’: Atuaqqisaaqatit ’Ræsonnerebogi’-mik tuniuk atuinissaanillu takutillugu. Takutinniaruk qanoq aallarneeriaatsinik siunnersuuteqartoq, Biibilimut tunngatillugu apeqqutissanut akissutissaqartoq akerlileeriaatsillu assigiinngitsut akineqarsinnaasut. Atuaqqissaaraangassi atuagaq atortaruk takutillugulu qanoq ililluni qularpasinnginnerulluni allat oqaluussiffigisinnaagai. Tatiginninnera atuakkap tamatuma nakussatsissinnaavaa Naalagaaffimmik tusarliussamik allanut nalunaajaarusulersissinnaallugu.
6 Ataatsimiinnerit pingaaruteqassusiat erseqqissartaruk: Ilagiit ataatsimiinnerisa, ingammik oqaluussinermut tunngasumik ataatsimiinnerup teokratiimillu ilinniarfiup, oqaluussinermi pikkorissiartornissarput siunertaraat. Qatanngutit angutit arnallu misilittagallit pikkorissullu takutittarpaat kinguneqarluartumik oqaluussissagaanni qanoq iliortariaqartoq. Ataatsimiinnerit pingaaruteqassusiat erseqqissartaruk, atuaqqissaaqatillu najuuttarnissaanut ikiortarlugu. Najuuttaleruni tamatuma Jesusimut ilumoorluni ajoqersuisunngornissaanut ikiorsinnaavaa.
7 Namminerlu maligassaalluartariaqarputit. Oqaluussinermi ilungersussuserpit takutissavaa sallusuissut qanoq pingaartitsiginerit, ilinniartullu uppernini takutinniarlugu iliuuseqarnissaanut kajumissaassavaa. (Lúk. 6:40) Tamakkua tamarmik soqutiginnittut ikiorsinnaavaat kiffartuussineq immikkut pisinnaatitaaffittut isigeqqullugu peqataasinnaanissaallu qujamasuutigeqqullugu. — 1 Tim. 1:12. (kmD 9405 Oplær dem du studerer med . . .)