Naammattorsuarmik siaruarterivit?
1 Nalinginnaasumik naluneqanngilaq sulinermi pissarsiaq suliniuteqarnerup annertussusiatut atsigisartoq. Aamma pallorfiginninnitsinnut atatillugu taamaappoq. Piffissaq nukiillu ataatsimiinnernut piareersarnermut, Naalagaaffimmik oqaluussissutiginninnermut qatanngutitsinnillu asanninnermik ersersitsisarnermut atortakkavut annertunerujartuinnartillugit anersaakkut ineriartornerujartuinnartarpugut. Aammali akerlianik pisoqartarpoq. Ilungersuusserujussuanngikkutta imaluunniit affaannarmik uummateqarluta suliniuteqarutta kiffartornitsinni kinguneqarluartitsinissarput ilimagisinnaanngilarput.
2 Tunngaviusoq tamanna apustilip Paulusip oqaatigilluarpaa Korintumiunut agdlagkat áipait 9:6-imi: ’Ikinaarlugit siaruarterisoq ikinaarlugittaaq katersuiumaarpoq; pilluaqqusaasumillu siaruarterisoq pilluaqqusaasumittaaq katersuiumaarpoq.’ Pilluaqqusaasumik, imaluunniit naammattorsuarmik, siaruarterivit?
3 Nammineq Biibilimik atuaqqissaarneq: Kiffartornerput kinguneqarluassappat nammineq atuaqqissaarnitsinni naammattorsuarmik siaruarterisariaqarpugut. Anersaakkut peqqinnartumik nererusussuseqarluartariaqarpugut. (Tussiaat 119:97, 105; Mat. 5:3) Ullut tamaasa suliassaqartartilluni anersaakkut pisariaqartitanik eqqumaffiginnilluinnarniassagaanni suliniuteqarnissaq pisariaqarpoq. Amerlanersavut ’piffissamik iluatinnartumik pisisariaqartarput’. (Evf. 5:16, NV) Ilaat sapaatip-akunnerata ulluisa ilaanni aalajangersimasuni makiaarlutik atuaqqissaartarput. Allat taamaaliornissaminnut unnunnik marlussunnik immikkoortitsisimapput. Taamaaliortarutta naammattorsuarmik sumik katersuissaagut? Uppissuseqarnerulissaagut, neriuuterput ersarinnerulissaaq aammalu nuannaarnerulissaagut isumalluarnerulissallutalu. — Rûm. 10:17; 15:4; 1 Pîtr. 1:13.
4 Ilagiit ataatsimiittarneri: Tussiaat 122:1-imi David oqarpoq: „Nuannaatsaqaanga ima oqarfigineqarama: ’Piartorta [Jehovap] illuanut.’“ Aamma illit taama misigisarpit? Naammattorsuarmik siaruarterineq isumaqarpoq sapaatip-akunnerata ingerlanerani ataatsimiittarnerit tallimaasut tamaasa aalajangersimasumik najuuffigisarnissaat. Aalajangerit ataatsimiigiarnissannut silarluk, iluaakujunnerit, qasoqqanerit allaluunniit akornutigisassanagu. Ajornartorsiutit ajugaaffigisariaqakkavut amerliartortillugit pilluaqqusaanivut annertusiartortarput.
5 Ataatsimiinnermut aggiaartarit ataatsimeereernermilu uninngagallartarit qatanngutit kajumissinartumik oqaloqatiginiassagakkit. Sapinngisamik amerlasuut ilassisakkit. Napasuliaq Alapernaarsuiffimmik atuaqqissaarnissamut ataatsimiinnernullu allanut piareersarluartarit, periarfissaqaraangavit akisarnikkut naammattorsuarmik siaruarteriniassagavit. Ataatsimiinnerni allat ’imerusuersartakkit’, taamaalillutit ’nammineq imerusuersarneqassagavit’. — Uss. 11:25.
6 Oqaluussineq: Naammattorsuarmik siaruarterinermut tunngaviusoq immaqa oqaluussinermi atornerpaavoq. Piffissaq oqaluussinermut atugarput annerujartuinnartillugu naapitaqarluarnissarput, pulaaqqiinissarput siuariartortumillu Biibilimik atuaqqissaaqateqalernissarput ilimanaateqarnerujartortarput.
7 Oqaluussinermi naammattorsuarmik siaruarterineq pitsaassutsimut annertussutsimullu attuumassuteqarpoq. ’Ræsonnerebogi’ ikiortigalugu kiffartornerput pitsanngorsarsinnaavarput. Quppernerni 9-15-imi oqaluuserisassanut assigiinngitsunut 18-inut 40-nit amerlanerusunik aallarneeriaaseqarpoq naapitatsinnik soqutiginnilersitsiniaanitsinni iluaqutigisinnaasatsinnik. Soqutiginnittunik naapitaqaraangavit allattoqqissaarnissaat eqqaamasariaqarpat uterfigeqqinniassagakkit siaruartersimasavillu inerititai katersorlugit. Neriuppugut ilungersornitit Biibilimik atuaqqissaaqateqalerninnik kinguneqassasut, taamaalillutit allat naammattorsuarmik siaruarterinissaannik ilinniartissinnaaniassagakkit.
8 Naammattorsuarmik siaruarterigutta Jehovamit pilluaqqusaanerunissarput ilimagisinnaavarput. — Mal. 3:10. (kmD 94/6 Sår du rigeligt?)