Ajunngitsumik isiginnittaaseqartuaannarit
1 Nunarpassuarni siumukarneq annertooq tusaraangatsigu nuannaartaqaagut. Aammali soqutigisaqanngiffiusunik imaluunniit allaat oqaluussinermut akerliuffiusunik oqaluussisartut naapitassaqartarput. Naak oqaluussiffigisartakkatsinni pissutsit taama ikkaluartut qanoq ililluta ajunngitsumik isiginnittaaseqartuaannarsinnaavugut? Pitsaanngitsumik isiginninneq oqaluussinitsinni nuannaarunnaarsitsisinnaasoq imaluunniit ilungersuussiunnaamisitsisinnaasoq qanoq ililuta pinngitsoorniarsinnaavarput?
2 Ajunngitsumik isiginninnerup isumakkut oqimaaqatigiittuaannarnissatsinnik ikiussavaatigut. Nuanniitsunik eqqarsaateqartuaannarnaveersaartariaqarpugut, misilineqaraluaraangattaluunniit. Tassuunakkut Jesusip naammalluinnartumik maligassiuussimavaatigut. Taassuma ajoqersuutaa inuit amerlavallaanngitsut ilassisimavaat. Ajoqersuineranik inuit ilarpassui ajuallaatiginnissimapput. Qasusuissutsimigut sakkortuumik misilinneqartarsimavoq. Iliuusii upperisarsiornikkut pisortat isornartorsiortarsimavaat toqunnissaalu pilersaarutigalugu. Qitserarneqartarsimavoq, unatarneqartarluni, asissorneqartarluni, iperartorneqartarluni naggataatigullu toqutaalluni. Taamaakkaluartoq kiffartornini nuannaarutigisimavaa. Sooq? Guutip piumasaanik iliornissap pingaaruteqassusia paasisimagamiuk, nakkaannanngisaannarsimallunilu. — Juá. 4:34; 13:17; Epr. 12:2.
3 Kiffartornerput eqqortumik isigiuaannaruk: Taamaaliorsinnaassagutta arlalinnik eqqaamasassaqarpugut. Eqqaamassavat inuit amerlanersaasa tusarliussarput akerlilersussammassuk imaluunniit soqutiginagu. (Mat. 13:14, 15) Apustilit oqartussaasunit peqquneqarsimapput Jesusip aqqani oqaluussiunnaaqqullugit, oqaluusseqqusissummulli aalajaattuaannarsimapput, tamannalu kinguneqarluarsimavoq. (ap. sul. 5:28, 29; 6:7) Siumut mianersoqquneqareersimavugut oqaluussiffitta ilaani ikittuinnaat tusaajumassasut. (Mat. 7:14) Taamaattumik oqaluussiffitsinni ataasiinnannguarluunniit tusaajumagaangat nuannertaqaaq. Eqqaamassavalli allaat akerlilersortivut aamma tusarlerneqartussaammata. (Hes. 33:8) Akerlilersuisut ilaat isumaminnik allannguisimapput Jehovamullu kiffanngorsimallutik. Eqqortumik isiginnilluta oqaluussinitta naammassisaqarnitsinnik misigitittarpaatigut, ikittuinnaalluunniit tusaajumagaluartut. Allaat Naalagaaffimmik tusarliussaq nassarlugu matunut pisarnerinnarput immini nalunaajaataasarpoq. — Hes. 2:4, 5.
4 Ajunngitsumik isiginninnissatsinnut pissutissaqarluarpugut. Nunarsuaq tamakkerlugu oqaluussinerup siumukarnerata, annikilliornartullu angisuup qanilliartuinnarneranut takussutissat ersarissiartuinnarnerata, Guutimut tunniusimalluta sapinngisarput tamaat iliuuseqarnissatsinnut killittariaqarpaatigut. (2 Pit. 3:11, 14) Aggustimi ilungersuussilluta kiffartornitsigut ilinniarsimasatsinnik pingaartitsinerput ersersissinnaavarput. Kissaatigaarput aamma nutaat ilikkakkaminnik atuinissaminnut atatillugu ajunngitsumik isiginnissasut. Atuaqqissaaqatigisartakkavut ima siumukarluartigisimagunik oqaluussisartunngorsinnaallutik kuisimanngitsut, taava immaqa aggusti taakkununnga aallartiffissaalluassaaq.
5 Ilagiinni oqaluussisartuugaluarutta imaluunniit pioneriugaluarutta iluaqutigissavarput Jehovap uagutsinut iliuusereqqusaasa artornannginnerat eqqarsaatigissallugu. (1 Juá. 5:3) Neriorsorpaatigut ikiorniarluta. (Epr. 13:5b, 6) Soqutiginninnginneqaraluartoq akerlilersuisoqaraluartorlu ajunngitsumik isiginnittuartariaqarpugut oqaluussiuarlutalu, tamannami Guutip piumasarimmagu. — 1 Tim. 2:3, 4. (kmD 94/8 Bevar en positiv indstilling)