Eqqumaniarpugut imaluunniit allamut saasarneqarpugut?
1 Jesusip mianersoqqussutaasa ilaat imaappoq: ’Eqqumaniartuinnaritsi, . . . piumaartussanik tamanik qimarratiginnissinnaaqqullusi.’ Ajornartorsiorfiit pinngitsooratik pisussaapput. (Lúkarse 21:36) Piffissaq inuuffigisarput aatsaat taama nalorninartoqarfiutigaaq. Ajunaarutaangaassaaq anersaakkut aramalernissamut tunniutiinnarutta. Arlaannarpulluunniit navianartoqanngivissumi inuunngilaq. Tamatumunnga atatillugu Jesusip eqqaavai nerisassat, imigassat ulluinnarnilu isumakuluutigisat. Sooq? Allaat tamakkua allamut saasarsinnaammatigut anersaakkut aramalersilluta.
2 Suut tamatigut allamut saasaarutaasinnaasut: Ilaat ingasaassillutik sukisaarsaatinik sammisaqartarput, allaalluunniit Tv-mik isiginnaarajuttunngortarlutik. Naalagaaffimmik salliutitsineq soorunami imaanngilaq sukisaarsaatit suulluunniit asoorulluinnarneqassasut. Ingasaassinianngitsumik ingasattajaanngitsumillu sunngiffimmi sammisassat nuannaarutigisinnaavavut. (Naleqqiuguk 1 Timûtiuse 4:8.) Allamulli saasassavaatigut taakkuinnaviit samminiartuarutsigit, piffissarujussuarmik uagutsinnik tigusippata, nukissatsinnik oqaluussiartortarnissaraluatsinnillu.
3 Allamut saasaarisinnaasut ilagaattaaq anersaakkullu aramalissutigisinnaasarput, pisariaqanngitsunik pigisaqarusunneq. Tamakku piviusunngortissagaanni piffissarujussuaq sulinermut atortariaqarpoq, tamatigullu anersaakkut suliniutissaraluit akigineqartarlutik. Ilaasa anersaakkut anguniakkatik annaasimavaat pigisaqarusunnermik tiguartissimallutik inuunertik suli pitsanngortinnerujumagaluarlugu. Pisariaqartippavut ’nerisassaqarlutalu atisassaqarnissarput’, aningaasanulli asanninneq napititaaffigissanngilarput, uppernermik tammartitsisarmat. (1 Tim. 6:8-10) Naalagaaffiup soqutigisaanut tunaarinnittuanngikkutta, ilaquttatta anersaakkut pisariaqartitaat pinngitsoortissinnaavavut kiffartuutigisarpullu naammassinngitsoorlugu. — 1 Tim. 5:8; 2 Tim. 4:5.
4 Allattaaq annertuumik ’uummaterput inuunerup matuma piinik isumakulunnermut’ anersaakkut sinilersissinnaavaatigut. (Lúk. 21:34) Ilaatigut isumakuluutit takkussinnaapput peqqiilliulernikkut ilaquttaniluunniit ajornartorsiuteqarneq pissutigalugu. Kisianni tamakku inuttut isumaliuutitta silarsuup matuma aaqqissuussaanera qanilliartorasuarneranik ilisimanninnerput sakkukillisissanngilaa. — Mak. 13:33.
5 Diaavulu nuannaartorujussuusarpoq sinnassarsinnaagaangamitigut silamiorpaluttunik kissaaterpassuaqalersilluta. Anersaakkut eqqumaniarluta akiuuttuartariaqarpugut. Nalunngilarput Jehovap ullussaa tillinniatut ililluni takkukkumaartoq, taamaattumik pingaaruteqartorujussuuvoq ’eqqumaniarluta putumatsaalinissarput’. (1 Tás. 5:2, 6) Malugigutsigu aramaneq uagutsinni sunniutilersoq, erniinnaq ’suliat taartup pii iperartigik’. — Rûm. 13:11-13.
6 Qanoq anersaakkut eqqumaniarsinnaasugut: Qinuneq pingaarnerpaat ilagaat. Kipisuitsumik qinujuartariaqarpugut. (1 Tás. 5:17) Qanittumik kristumiut ilagiivinut attaveqarnikkut taamaalilluta ’misissoqatigiissinnaaqqulluta asanninnermut ajunngitsuliornermullu kajumissaaqatigiilluta.’ (Epr. 10:24) Nangittaqattaartuarluta ilumoortumillu imminut misissortarluta ersarinnerusumik sanngiiffitsinnut eqqumaniarnerusinnaavugut ajugaaffigisinnaallugit. (2 Kor. 13:5) Immikkut ileqquliullugu atuaqqissaartarneq ’oqaatsitigut uppernerup piisigut’. (1 Tim. 4:6) Nukivut tamakkerlugit taamaaliorutta, tatigisinnaavarput uagutsinnik allamut saasaarisut pinngitsoortissinnaallugit. Akerlianik ’eqqumassaagut aalajaatsumillu upperluta’. — 1 Kor. 16:13. (kmD 95/10 Holder vi os vågne eller lader vi os distrahere?)