Nakimaassuseqarlutit oqalugit
1 Ukiuni kingulliunerusuni oqaluussisartut sumiiffiit ilaanni suli inuit angerlarsimaffiini naapinnissaat ajornakusoortittarpaat. Amerlasuut oqartarput angalaartarfitik naammassigaangamikkik 50 procentii amerlanerusulluunniit angerlarsimaneq ajortut. Taamaattumillu piffissarujussuarmik atuineq kinguneqanngitsoortarluni.
2 Ukiualunnguit qaangiupput inuit weekendimi angerlarsimarrattarnerat, kisiannili maanna taamaakkunnaarsimavoq. Amerlanerit suliaqartarput, saniatigullu niuerniartarlutik aammalu immaqa aliikkusersornissaminnut piffissaqarniartarlutik. Taamaattumik amerlanertigut angerlarsimasanngillat — weekendiniluunniit.
3 Inuit angerlarsimanngikkaangamik, soorunami allamiissimassapput. Inuit oqaloqatiginissaat anguniagarigatsigu, sooq naapissinnaasavut sumiluunniit oqaloqatigissanngilavut? Paulusip inunnut ’naapitaminut’ saaffiginnittarneq ileqqorisimavaa. (ap.sul. 17:17) Takutinneqarpoq taamani atorluarsinnaasimasoq ullumikkut aamma taamaappoq.
4 Angalaartarfitsinni nalunaajaagaangatta ilaanni saneqqunneqartarpugut imaluunniit utaqqisunik naapitaqartarluta. Sila ajunngikkaangat silami issiarujoortut biiliminnilluunniit iluarsaassisut naapissinnaasarpavut. Inussiarnersumik qungujunneq ilassinnilluniluunniit tassatuaasinnaavoq oqaloqatigiinnissamut aallarniutissaasinnaasoq. Qanittumi najugaqarpat aamma oqaatigisinnaavat ilimanarluinnartoq kasuttortarsimagaluartutit inoqanngitsoortillugilli, nuannaarutigaluguli maannakkut naapissinnaagakku. Amerlasuut misilittagaqarluarput pisarnermit nakimaannerulaartarnermikkut.
5 Nakimaanneq akilersinnaavoq: Qatanngut angut oqaluttuarpoq bussimik utaqqillutik uninngasunut pisuttuarusaartunulluunniit biilimiluunniit utaqqillutik uninngasunut saaffiginnittarsimalluni. Eqqaamiuusutut sivikitsumik pulaartutut inussiarnersumik ilassisarpoq. Taamaalilluni atuagassiarpassuarnik agguaassisimavoq, allaat arlalinnik biibilimik atuaqqissaaqateqartalerluni.
6 Qatanngut alla nuliani ilagalugu illumiit illumut angalaartillutik aqqutaani arnaq puussianik pisiaminik arliartoq naapippaat. Aallarniillutik oqaloqatigilerpaat, nersorlugu eqiasuilluni ilaquttaminik isumaginnilluarnerarlugu. Taava aperaat: „Kisianni kina inuiaat tamarmik pisariaqartitaannik isumaginnittuua?“ Tamatuma arnaq soqutiginnilersippaa. Sivikitsumik oqaloqatigereeraallu angerlarsimaffimminut qaaqquai, atuaqqissaaqatigineqartalerporlu.
7 Tulliani illumiit illumut oqaluussiartoruit, weekendiugaluarpat ulluinnarniluunniit, inuillu angerlarsimanngippata, misilinniaruk inunnut aqqusinermi arlaanniluunniit naapitannut saaffiginninnissannut nakimaannerulaarlutit? (1 Tás. 2:2) Qularnanngitsumik kinguneqarluassaaq nalunaajaanerillu nuannaarutiginerussavat. (kmD 96/01 Tal med frimodighed)