Neriorsuuterput ullut tamaasa qanoq eqquutitipparput
1 Tussiaasiortoq David Jehovamut oqarsimavoq: „Aqqit unnersiutigissavara naassaanngitsumut, neriorsuutikkalu eqquutitillugit ullut tamaasa.“ (Tuss. 61:9) Davidip nalunngilaa neriorsuinissaq nammineq kajumissutsimik pisartoq. Aammattaarli paasisimavaa taamaaliussaguni, neriorsuunni eqquutitittariaqarlugu. Ullut tamaasa neriorsuunni eqquutitissinnaasaramiuk Jehova unnersiutigaa.
2 Jehovamut tunniulluinnaratta nammineq kajumissutitsinnik taassuma piumasaanik iliorumavugut. Imminut naaggaarpugut Jehovallu kiffartuunnera inuunitsinni tamanik pingaartinnerulerlugu. (Lúk. 9:23) Taamaattumik neriorsuuterput ullut tamaasa eqquutitittariaqarparput. (Nal. oq. 5:4-6) Imermut kuisinnikkut nassuernerput inooriaasitsigut takutittariaqarparput, nalunnginnatsigu ’qanikkut nassuerneq annaffissaasoq’. (Rûm. 10:10) Tamatuma nassataraa nutaarsiassamik nuannersumik oqaluussissutiginninnissarput. (Epr. 13:15) Pissutsit atukkavut soorunami assigiinngeqaat, tamattali ullut tamaasa allat nutaarsiassamik nuannersumik avitseqatiginissaasa pingaaruteqassusia immikkut eqqumaffigisariaqarparput.
3 Ullut tamaasa oqaluussinissamut pilersitsigit: Allanut nutaarsiassamik nuannersumik oqalunneq nuanningaartumik nassataqartarpoq. Ullut tamaasa oqaluussisinnaajumalluta pisinnaanerit tamaasa periarfissanik pilersitsisariaqarpugut. Amerlasuut ajunngitsunik misigisaqartarput suleqatinut, atuaqatinut, sanilinut imaluunniit allanut ulluinnarni naapittakkaminnut aallarniillutik sukkulluunniit oqaluussigaagamik. Aammattaaq allakkatigut telefoniluunniit atorlugu oqaluussisoqarsinnaavoq. Periarfissat tamakkua atornerisigut, matumiillu matumut oqaluussinissamik pulaaqqiisarnissamillu piffissamik immikkoortitsinikkut, Biibilimik atuaqqissaaqateqartarneq immikkut nuannersoq anguneqarsinnaavoq. Aap, immaqa ullut tamaasa oqaluussinissamut periarfissarsisinnaavugut.
4 Qatanngut arnaq suliffimmini pausernermini Ullut tamaasa allakkat misissortakkit atuartalersimavaa. Suleqatini ullormut allassimaffimmik atuaqataanissaanut ilaserisimavaa, erniinnarlu arnaq atuaqqissaaqatigineqartalerpoq. Ullut tamaasa akunnerup affaa atuaqqissaartarput, sapaatip-akunneranut tallimariarlutik. Suleqatip allap malugai atuaqqissaaqatigiittartut. Kiisami naggataatigut angut taanna ilisaritippoq qatanngutaalluni unittoorsimasoq. Qatanngutip arnap aallussilluarnerata utoqqaanertamik attaveqarfiginnitsippaa aallarteqqinnissani siunertaralugu. Qatanngutip arnap taassuma inuit marluk inuunerinik ajunngitsumik sunniuteqarfigaa aallussilluarluni neriorsuutini ullut tamaasa eqquutitinniartuaramiuk.
5 Jehovap uatsinnut ajunngitsuliarisimasarpassuinik pingaartitsingaarneq pissutigalugu uummammit kajumissisinneqarutta, nuannaangaarnermik naammagisimaarnermillu kinguneqassaaq tunniulluinnarnitsinni neriorsuuterput ullut tamaasa sapinngisarput tamaat eqquutitikkutsigu. Tussiaasiortutut oqarsinnaassaagut: „Qutsavigaakkit [Jehova] Guutiga uummatikkut iluunngarlunga. Ataqqissavara aqqit naassaanngitsumut.“ — Tuss. 86:12. (kmD 7/96 Hvordan vi lever op til vort løfte . . .)