Qatanngutit angutit pioneerisut kiffartortut amerlanerusut atorfissaqartinneqarput
1 Paulusip kajumissaarpaatigut ’Naalakkap suliaanik naammassisaqangaartuinnaqqulluta’. (1 Kor. 15:58) Amerlasuunut tamanna pioneerisut kiffartuussinissamik aallartinnermik kinguneqartarpoq.
2 Maannakkut qatanngutit arnat pioneerit amerlanerupput. (Tuss. 68:12) Ilagiinnut ataasiakkaanut nuannaarutaagaassaaq qatanngutit angutit amerlanerit piffissaq tamakkerlugu kiffartuussinermut peqataasinnaappata. (Tuss. 110:3) Paasisinnaavarput qatanngutit angutit amerlasuut pingaaruteqatunik silap matuma piinut ilaquttaminnullu tunngasunik pisussaaffeqarmata. Allat ilungersorlutik ilagiit anersaakkut pisariaqartitaat naammassiniarpaat. Angutit taamaattut qujamasuutigeqaagut Naalagaaffiup pii pillugit ilungersuuteqartut. — 1 Tim. 4:10.
3 Taamaakkaluartoq amerlanerit qatanngutit angutit pioneerisut kiffartulersinnaappat? Nuliat pioneeriuppat, ilannguffigisinnaassaviuk? Suliunnaarsimaguillu, allamik naammagisimaarnarnerusoqarpa piffissaq tamakkerlugu kiffartuussinissamut piffissamik atuinermik? Atuarunnaangajaleruit, ilumoortumik qinunikkullu eqqarsaatigisimaviuk pioneerisut kiffartulersinnaanerlutit, immaqalu annerusumik kiffartuussinermi periarfissanut alloriarfigalugu? — Evf. 5:15-17.
4 Qatanngut angut suliffiutini ingerlalluartoq tunivaa ullullu affaannaani suliffeqalerluni pioneerinngorniassagami. Maligassiuilluarnerata kinguneraa meeraanit sisamaasunit pingasut atuarunnaarsimatsiaannarlutik pioneerinngornerat; meeraatalu sisamaat aamma taama kissaateqarpoq. Qatanngut angut taanna ilaqutaalu pilluaqqusaangaarput.
5 Matu angisooq ammavoq: Pioneerisut kiffartornerup ’isertarfik matuigaasoq angisooq ulapinnartoq’ ammarsinnaavaa. (1 Kor. 16:9) Qatanngutit angutit pioneeriusut ilagiinni annertuumik atorneqarsinnaapput. Oqaluussinermi aallussilluartuugunik anersaakkut inerilluarnerulissapput teokratiimilu siuariarnermut ilasaaqataavoq. Pioneerisut kiffartuussineq kiffartuussinermik immikkut pisinnaatitaaffinnut aqqutissiuussisinnaavoq. Ukioq siulleq pioneerisut kiffartoreerluni pioneerit atuarfiannut peqataaneq immikkut pisinnaatitaaffiussaaq. Ilagiinni kiffartortut utoqqaanertallu aappaqanngitsut immaqa anguniarsinnaavaat Ilagiinnut Kiffartortunngortitanut Ilinniarfimmut (Skolen for Udnævnte Tjenere) peqataanissartik. Aappariit piukkunnartut Gilead-imut qinnuteqarsinnaapput. Piffissap ingerlanerani qatanngutit angutit angalalluni ilagiinnut nakkutilliisutut kiffartornissaminnut piukkunnarsisinnaapput. Aap, pioneerisut kiffartorneq Jehovap peqatigiissortaani kiffartuussinermik immikkut pisinnaatitaaffinnut matumik ammaassisarpoq.
6 Qatanngutit angutit nalinginnaasumik pioneeriunissamut periarfissaqarsinnaasut tunisineq pilluarnarnerusoq misigissavaat. — ap. sul. 20:35. (kmD 7/96 Flere brødre pioner)