Nammineq atuagassianik saqqummiusseriaasiliorit
1 Napasuliaq Alapernaarsuiffik aamma Iteritsi! pingaarteqaavut saqqummiuttagaat soqutiginartut paasissutissiilluartullu pillugit, silarsuarmit pisunit pingaaruteqartunit ’Guutip itissusii’ tikillugit. (1 Kor. 2:10) Atuagassiani taakkunani, sallusuissummik paasisaqartikkiartuaartinniarluta Jehovap atortagaani, nutaanik qiimmaallannartunillu tamatta eqqaasaqarsinnaavugut. (Uss. 4:18) Atuagassiat ilungersorluta inunnut sapinngisamik amerlasuunut agguaannissaat kissaatigaarput.
2 Angalaarfigisartakkat misissoruk: Inuit qanoq ittut tamaani najugaqarpat? Ulapippata naatsumik toqqaannartumillu saqqummiinissannik piareersartariaqarputit. Inuit ulapippallaanngippata immaqa oqaaseqarnerulaarsinnaavutit. Angalaarfigisartakkanni najugallit amerlanerit ullukkut sulisarpata pitsaanerussaaq ualikkut kingusissukkut imaluunniit unnulernerani pulaartarukkit. Imaluunniit aqqusernerni niuertarfeqarfinniluunniit oqaluussisinnaavutit. Oqaluussisartut ilaasa inunnut biilit uninngasarfiiniittunut illoqannginnersaniittunullu oqaluussisarnerat kinguneqarluarsimavoq.
3 Atuagassiat ilisimalluakkit: Atuagassiat normui tamaasa tiguniariarlugit naallugit atuartakkit. Ilanngutassianik illit angalaarfigisartakkanni inunnut soqutiginarunartitannik toqqaasarit. Suut soqutigaat? Ilanngutassiami aalajangersimasumik issuagassannik ujarlerit. Soqutiginnilersitsisinnaasumik apeqqutissarsiorit. Periarfissaqariarpallu pulaakkannut atuarsinnaasannik allassimaffimmik ujarlerit. Eqqaamajuttaaq pulaaqqiinissannut tunngavissiorluassagavit.
4 Aallarniummik piareersagaqarit: Imminut ilisaritikkuit aallarniiguillu oqaasissatit peqqissaartumik piareersakkit. Ilaasa imatut oqarnertik kinguneqarluartissimavaat: „Atuagassiami uani ilanngutassiaq pissanganartorujussuaq atuarakku, isumaqarpungalu aamma allat atuarnissaanut periarfissaqartariaqartut.“ Amerlasuut oqaluusererusutaminnut aqqutissiuussisinnaasumik apeqquteqartarput. Soorlu imatut:
5 Nakuuserneq annertusiartuinnartoq pillugu ilanngutassiaq saqqummiukkusukkukku ima aperisinnaavutit:
◼ „Tillinniarfigineqarnissamik saassunneqarnissamilluunniit ersissuteqarata unnukkut innarsinnaalissagutta suna pisariaqarsoraajuk?“ Ajornartorsiummut tamatumunnga tamakkiisumik aaqqiissutissaq pillugu paasissutissaateqarninnik nassuiaaguk. Aaqqiisussap inuit akornanni eqqissiviilliornerittaaq qanittukkut piissavai. Atuagassiami neriuummut tamatumunnga tikkuussisumik innersuuguk. Tulliani pulaarukku ’Ilisarsinermi’ kapitali 1 pulaakkannut takutissinnaavat.
6 Ilanngutassiaq ilaqutariinnut tunngasoq ima saqqummiussinnaavat:
◼ „Ullumikkut angajoqqaat amerlanerit isumaqarput ilaqutariinnik ajunngitsumik ingerlatitsiniarneq unamminiarnartorujussuusoq. Ilaqutariinnut tunngasunik atuakkiarpassuaqarpoq, kisianni allaat immikkut ilisimasallit isumaqatigiinngillat. Unneqqarissumik siunnersuisinnaasoqarpa?“ Atuagassiami oqaatsinik Biibilip siunnersuutaanik silatuunik saqqummiussisunik eqqaasaqarit. Aggeqqikkuit ’Ilisarsinermi’ quppernerni 145-48-mi eqqarsaatit Biibilimik tunngaveqartut meeqqanik perorsaanermut tunngasut oqaloqatigiissutigisinnaavasi.
7 Ilanngutassiaq inuit ajornartorsiutaannut tunngasoq saqqummiukkukku ima oqarsinnaavutit:
◼ „Ullut uisakajaarnartut atukkavut pissutigalugit inuit ilarpassui tatineqartutut misigipput. Isumaqarpit taamatut inuunissarput Guutip siunertarisimagaa?“ Ilanngutassiamik qanoq ililluta nalitsinni ajornartorsiutinik nammassinnaanitsinnut tunngasumik siunissamilu ullut isumakuluuteqarfiunngitsut atuutilernissaannik upperinninnissamut pissutissiisumik innersuussuteqarit. Tulliani pulaaruit ’Ilisarsinermi’ quppernerni 4-mi 5-imilu assiliaq oqaasertaalu oqaluuserisinnaavatit, Biibilimillu atuaqqissaarneq aallartillugu.
8 Pulaakkannut naleqqussarit: Inuit assigiinngitsunik tunuliaqutallit assigiinngitsorujussuarnillu soqutigisallit naapittarpavut. Saqqummiusseriaatsimik tamatigut atugassannik pulaakkamut naleqqussapallanneqarsinnaasumik piareersagaqarit. Eqqarsaatigiuk angummik, arnamik, utoqqarmik inuusuttumilluunniit naapitaqaraangavit qanoq allanngortittarsinnaanerlugu. Oqaasissat aalajangersimaqqissaartuusariaqanngillat. Illit iluarinerusatit ajunngitsumillu kinguneqarsinnaasut atortakkit. Angorniortumilli oqalugit, uummammit pisumik, tusarnaaqqissaartarillu. Unneqqarissutsit eqqortumik uummatillit malugissavaat ajunngitsumillu qisuariarlutik. — ap. sul. 13:48.
9 Ikioqatigiigitsi: Saqqummeeriaatsinik taartigeeqatigiikkaangatta oqariaatsinik nutaanik ilikkagaqartarpugut. Sungiusaqatigiinnitsigut misilittagaqalerlutalu imminut tatigineq pigilissavarput. (Uss. 27:17) Oqaasissat sungiusaqqissaarnissaat pitsaasuuvoq, taamaaliorsimagaanni pulaarnermi eqqissisimanarnerusarmat. Pingaartuuvoq angajoqqaat meeqqamik sungiusarneranni ikiuinissaat, sungiusarneranni tusarnaarlutik pitsanngorsaatissanillu siunnersuuteqartarlutik. Nutaallu oqaluussisartunik misilittagaqarnerusunik oqaluussiartoqateqartarnertik iluaqutigisinnaavaat.
10 Nammineq atuagassianik saqqumiusseriaasiornissat ajornakusoortorsuusariaqanngilaq. Naleqquttunik oqaasissiornissaq soqutiginnilersitsisumillu oqaatiginissaat apeqqutaaginnarpoq. Iliuuseqarusussuseqarnikkut isumatusaarnikkullu saqqummeeriaasiorsinnaavutit pulaakkannik ajunngitsumik qisuariartitsisumik.
11 Atuagassianik agguaassineq Guutip naalagaaffianik tusarliussamik nunarsuaq tamakkerlugu siaruartereriaatsitta pingaarnerit ilagaat. Inuit peqqusersuitsut Napasuliaq Alapernaarsuiffik-mik Iteritsi!-millu tigusaqartissinnaagukkit atuagassiat namminneerlutik ’oqaluussisinnaassapput’. Eqqaamajuaannaruk atuagassiat nalilerujussuummata, tusarliussarlu taakkua imarisaat inuit inuunerannik annaassisinnaammat. Taamaalilluta allanut ’avaaginnillutalu tukkoraangatta’ Jehova nuannaartarpoq. — Epr. 13:16.