Apeqquteqartarfik

◼ ’Ilisarsineq’ ikiortigalugu aalajangersimasumik atuaqqissaaqateqarneq qanoq sivisutigisariaqarpa?

Jehovap peqatigiissortani pilluaqquai. Tamatumunnga uppernarsaatissaapput ukiut tamaasa inuit tuusintilikkuutaat sallusuissummik aalajangerfiginnittut. Paasinarsisimavoq ’Ilisarsineq’ iluaqutaalluartorujussuusoq. Napasuliaq Alapernaarsuiffik-imi 1. februaari 1996-imoortumi eqqaaneqarpoq atuakkap tamatuma siunertarigaa atuaqqissaaqatigineqartup anersaakkut siumukapallannissaanik immaqalu qaammatialuinnaat ingerlaneranni kuisinnissaminut piareernissaanik ikiornissaa.

Tamanna pissutigalugu Napasuliaq Alapernaarsuiffik-mi tassani, quppernermi 11-imi, ima unnersuussuteqarpoq: „Biibilimik atuaqqissaaqatigineqartoq ’Ilisarsinermik’ atuaqqissaaqatigineqareeruni kuisereerlunilu, immaqa pisariaqassanngilaq atuakkamik allamik . . . aalajangersimasumik atuaqqissaaqatigiuaannarnissaa.“

Taavami ’Ilisarsineq’ naareeraluarlugu kuisissimanngitsut? Naalagaaffimmut Kiffartorneq-mi, juuni 1996-imoortumi, immikkoortumi 23-mi, Napasuliaq Alapernaarsuiffik-imi eqqaaneqarsimasumik eqqaasinneqarpugut, tassa atuaqqissaaqatigineqartoq ’Ilisarsineq’-mik atuaqqissaaqatigereerutsigu atuakkamik allamik atuaqqissaaqatigeqqissanngikkipput. Tamanna isumaqarpa atuaqqissaaqaterput siumukarneroqqinnissaanik ikiussanngikkipput? Naamik. Inuit sallusuissut pillugu tunngaviusunik ilisimasaqalernissaat kissaatigaarput. Naatsorsuutigineqarsinnaavorli oqaluussisartup pikkorissup atuaqqissaaqatini Jehovamut kiffartulerniarluni isumaliutigeqqissaakkamik aalajangersinnaanissaanut naammattumik piffissap sivisuallaanngitsup ingerlanerani ilisimasaqalersissinnaassagaa. Immaqa atuaqqissaaqatigineqartut ilaasa inuttut atukkatik pissutigalugit allaat sapaatip-akunneranut ataasiaannaratik atuaqqissaaqatigineqartarnissartik kissaatigissavaat.

Soorunami atuaqqissaaqatigineqartut ilaat allanit arriinnerusumik siumukartarput. Atuaqqissaaqatigineqartartulli immaqa pisarnermit arriinnerusumik ’Ilisarsineq’ naallugu atuaqqissaareerlugu ilagiinnut atalernissani aalajangiussimanngippagu, oqaluussisartoq silatusaassaaq utoqqaanertat kiffartornermut ataatsimiititamut ilaasut ilaannik siunersiuissaguni. Pissutsit immikkorluinnaq ittut pineqarpata immaqa ikiuuteqartoqarsinnaassaaq. Tamanna Napasuliaq Alapernaarsuiffik-mi, 1. februaari 1996-imoortumi, quppernermi 12-imi, immikkoortuni 11-mi 12-milu, eqqartorneqartuni eqqarsaammut naapertuuppoq.

Atuaqqissaaqatigineqartartoq sallusuissut pillugu ilisimalikkaminik tunngaviusunik pingaartitsiguni ilagiit ataatsimiittarnerinut ornigukkumassaaq. Immaqa tamatumannga killinneqarluni Jehovamut kiffartorusulersimanerminut takussutissanik ersarissunik saqqummeerusulissaaq. Piffissap sivisungaatsiartup ingerlanerani ’Ilisarsinermik’ atuaqqissaaqatigineqareeraluarluni taamatut anersaakkut pingaartitsinermik ersersitsinngippat immaqa atuaqqissaaqatigisarunnaarnissaa inassutiginassaaq.