Siuariartortumik Biibilimik atuaqqissaaqateqarit
1 Tanzaniami napparsimasunik paarsisoq, Argentinami niviarsiaraq Letlandimilu anaanaasoq sukkut peqatigiissuteqarpat? ’Atuakkami ukiumoortumi’ 1997-imoortumi (qupp. 8, 46-56-lu) eqqartorneqarpoq tamarmik siuariartupallassimasut atuagaq ’Ilisarsineq’ sapaatip-akunneranut ataasiaannaratik atuaqqissaartarsimammassuk. Siunnersuutigineqarsimavoq pisinnaappat atuaqqissaaqateqarnerit tamaasa kapitali ataaseq atuaqqissaaqatigiissutigineqarsinnaasoq. Ilaat isumaqarput tamanna anguniassallugu ajornakusoortuusoq. Naak pissutsit atukkat ilinniartullu ataasiakkaat ilinniartikkuminarnerat apeqqutaasaraluartut, ilinniartitsisut misilittagaqartut siunnersuutit atornerisigut pitsaasumik angusaqarluartarsimapput.
2 Soorlu Naalagaaffimmut Kiffartorneq-mi ilanngussami juuni 1996-imoortumi eqqaaneqareersimasoq ilinniartut atuaqqissaarnissamut piareersartarnissaannik ilinniartissallugit pisariaqartoq. Atuaqqissaarnermi siullermi qanoq iliortarnermik takutillugulu nassuiaatissallugu isumassarsiaassaaq pitsaasoq. Atuakkamik ’Ilisarsineq’-mik illit nammineq pigisannik takutikkit. Pisassami siullermi piareersaqatigiigitsi. Ilinniartut ikiukkit oqaatsit pingaarnerit imaluunniit oqaaseqatigiit toqqaannartumik apeqqutaasa allanneqarsimasut akissutaannik, titartarlugillu. Tamatumunnga atugassamik oqaluussisartut ilaasa ilinniartuutitik kuglepenimik imaluunniit tuschimik tunisarsimavaat. Allassimaffiit innersuussutigineqarsimasut tamaasa piareersarnerminni quppertarnissaannik kajumissaakkit. Taamatuttaaq ilagiit atuakkamik atuaqqissaarnerannut Napasuliaq Alapernaarsuiffik-millu atuaqqissaaraangamik piareersarnissaq ilinniassavaat. — Lúk. 6:40.
3 Ilinniartitsillaqqissup ilinniartoq peqataatinniartarpaa namminerlu oqaluppallaarnani. Sammisamut apeqqutit attuumassuteqanngitsut ilanngunneq ajorpai taamaalilluni allamut saatitsiniarnani. Qaqutigorsuaq atuagassianik allanik ilanngussilluni tigusisarpoq. Kisiannili pisassarisap pingaarnersai erseqqissarniassavai. Ilaasa ilinniartut atuagassianik allanik tunisarsimavaat namminneerlutik apeqqutigisamik akissutissaat nassaariniassammatigik. Taamattaaq soqutiginnittut ilagiit ataatsimiinnerinut najuuttarnermikkut paasissutissanik annikitsualunnik amerlanerusunik pissarsinerussapput.
4 Atuaqqissaarnerup nalaani allassimaffiit tamaasa quppernissaat pisariaqanngilaq. Immaqa allassimaffiit immikkoortuni innersuussutigineqarsimasut ilaat pingaarnersaat nassuiarsinnaavatit. Uteqqiinermi allassimaffiit pingaarnerit erseqqissarsinnaavatit ilinniartorlu kajumissaarlugu eqqaamaniaqqullugit.
5 Atuaqqissaarneq qanoq sivisutigissava?: Atuaqqissaarneq nalunaaquttap akunneranik ataatsimik sivisussuseqarnissaa aalajangersimasariaqanngilaq. Ilaat immaqa piffissaqarnerulaartarput sivisunerusumillu atuaqqissaarumasarlutik. Imaluunniit ilinniartup kissaatiginerusinnaavaa sapaatip-akunneranut arlaleriarluni atuaqqissaartarnissani. Taamatut periarfissaqartut iluaqutigingaassavaat.
6 Jesaja 60:8-imi Jehovamik unnersiutiginnilerlaat hundredetusintilikkuutaat ullumikkut innuttami ilagiivinut ussagartut assigaat ’nuissat ingerlaartut, tuit timmillutik iniminnut iseriartortut’. Tamatta peqataalluta Jehova qanimut suleqatigisigu assersuutaasumik savanik pilertortumik katersuinerani. — Jes. 60:22.