Ataatsimiinnerit ajunngitsuliornissamut kajumissaarutaapput
1 Guutisiornitsinni marluk makku pingaaruteqaqaat: ilagiit ataatsimiinnerinut najuuttarneq oqaluussinermullu peqataasarneq. Tamarmik imminnut attuumassuteqartorujussuupput. Tamarmik imminnut sunniuteqarput. Kristumiut ataatsimiinneri ajunngitsuliornissamut kajumissaarutaapput, ajunngitsuliornerillu pingaarnerpaartaat tassaavoq Naalagaaffimmik oqaluussissutiginninneq ajoqersuganngortitsinerlu. (Epr. 10:24) Ataatsimiigiartarunnaaraluarutta erniinnaq aamma oqaluussisarunnaassaagut.
2 Sapaatit-akunneri tamaasa ataatsimiinnerni oqaluussinermut kajumissaarutinik anersaakkut ajoqersorneqartarpugut. Piffissap qanillineranik eqqaasinneqartarpugut tusarliussamik inuunartumik allanut oqaluusseqqulluta. Oqaluussisarnermi nakimaattuarnissatsinnut kajumissaarneqartarlutalu nakussatsinneqartarpugut. (Mat. 24:13, 14) Periarfissaqaraangatta ataatsimiinnerni akisarnitsigut uppernerput allanut oqaatigissallugu sungiutissavarput. (Epr. 10:23) Teokratiimik Atuarfimmi peqataasarutta oqaluussisartutut ilinniartitsisutullu pikkorinnerulissaagut. — 2 Tim. 4:2.
3 Oqaluussinermut tunngasumik ataatsimiinnerit qanoq oqaluussinissamut kajumissaaraatigut: Tamatta kajumissaarneqartarpugut Naalagaaffimmut Kiffartorneq-mi sammisassat piareersartaqqullugit. Oqaluussinermut tunngasumik ataatsimiinnermi najuukkutta saqqummiusseriaatsillu isiginnaarutsigit paasissutissat isumatsinni pigiliunnerussavavut. Oqaluussiartoraangatta Naalagaaffimmut Kiffartorneq-mi eqqaaneqartut saqqummiusseriaatsillu takusimasavut eqqaasinnaassavavut taamaalillutalu nalunaajaalluarnerussalluta. Oqaluussisartut amerlasuut tamanna misigisimavaat.
4 Oqaluussinermut tunngasumik ataatsimiinnerup kingorna ilaat oqaluusseqatigiinnissamut isumaqatigiissuteqartarput. Oqaluussisartut siunnersuutit eqqaamalluarpaat misilikkusullugillu, ataatsimiinnerni sapaatit-akunneri tamaasa oqaluusseqataanissaminnut kajumissaarneqaramik.
5 Kristumiutut ataatsimiinnivut allanit taarserneqarsinnaanngillat, tassani uppeqativut ilagisaratsigik ajunngitsuliornissamullu kajumissaarneqartarluta. Kiffartornerput inerititaqarluassappat ilagiit ataatsimiinneri tamaasa aalajangersimasumik najuuffigisariaqarpavut. Periarfissaq nuannersoq Jehovameersoq tamanna pingaartitsigu ’katisimasarfitta qimannaveerneratigut’. — Epr. 10:25.