Jehovap inuunermut aqqutigeqqusaanik malinninnissarput aalajangiusimavarput
1 Ataatsimeersuarnermi „Guutip inuunermut aqqutigeqqusaa“-ni pingaarnersat ilagaat aalajangersagaq oqalugiaammi naggataarutaasumi saqqummiunneqartoq. Oqaatsit aallarniutaasut ima nipeqarput: ’Qularata nalunaarutigerusupparput Guutip inuunermut aqqutigeqqusaa allanit tamanit pitsaanerpaasoq.’ Taamani angikkatta ilaat maanna uteqqilaariartigik.
2 Aalajangiusimalluinnarparput Jehovamut attaveqarnitsinni imminut minguitsuutinnissarput, silarsuarmit mingutsissimanata. Guutip piumasaa inuunitsinni salliutikkusupparput oqaasianillu, Biibilimit, siulersortikkusulluta, talerpimmut saamimmulluunniit sangussanata. Taamaalilluta takutittarparput upperigipput Guutip aqqutigeqqusaa aqqummit silarsuarmi ingerlavigineqartumit pingaarnerujussuusoq.
3 Pissutsit nalinginnaasut eqqarsaatigissagaanni oqartariaqarpoq silamiut Guutip aqqutigeqqusaanut akerliusut, taamaattumillu tamatuma kingunissai atoraat. (Jer. 10:23) Uagulli Ajoqersuisorsuarmit, Jehovamit, ima oqartumit ajoqersortittuarnissarput kissaatigaarput: „Aqqut aana ingerlavigisassarsi.“ (Jes. 30:21) Jehovap aqqutigeqqusaa Biibilimi saqqummiunneqarpoq sutigullu tamatigut tamanit pitsaanerpaavoq. Aqqulli tamanna ingerlavigisinnaajumallugu Jehovap ilinniartitsissutigisaanik tamanik tamakkiisumik iluaqutiginninnissarput pisariaqarpoq.
4 Jehovap ilinniartitsinermik aaqqissuussaa: Jehovap inuunitta sumik siunertaqarneranik qanorlu pitsaanermik tamatuminnga atuinissatsinnik ilinniartippaatigut. Ilinniartippaatigut qanoq ililluta sianissutsikkut, ileqqussatigut anersaakkullu pitsaanerusumik inuulersinnaasugut. Tamannalu ilutigalugu qatanngutitsinnik, ilaquttatsinnik tullitsinnillu eqqisseqateqarnissatsinnik ilinniartippaatigut. Taamaaliorpoq Biibili, atuagaq ilinniuterput, aqqutigalugu, aammali peqatigiissortani aqqutigalugit.
5 Tamatumunnga atatillugu ilagiit ataatsimiittarneri pingaarutilerujussuupput. Ataatsimiinnerit tallimaasut tamaasa aalajaalluta najuuffigiuartarneranni nutaarsiassamik nuannersumik oqaluussissutiginninnermik tamatigoortumik ilinniartinneqartarpugut kiisalu kristumiutut inooriaatsimik oqimaaqatigiissumik sungiusarneqartarluta. (2 Tim. 3:16, 17) Ajoqersuisorsuatta aamma ataatsimeersuaararnerit ataatsimeersuarnerillu aqqutigalugit teokratiimik ilinniartittarpaatigut. Peqqiilliunngikkutta allamilluunniit akornutissaqanngikkutta ataatsimiinnernut ataatsimeersuarnernullu tamatigut orniguttarnissarput anguniagarisariaqarparput.
6 Taamaattumik piffissami aggersumi Guutip aqqutigeqqusaatigut kajumilluta ingerlajuarniarta — Jehovap nersornaatissaanut uagullu naassaanngitsumik iluaqutissatsinnut. — Jes. 48:17.