Ilaqutariit qanoq ikioqatigiissinnaasut — ataatsimiinnernut najuuttarnermi
1 Ilaqutariit kristumiuusut ilagiit ataatsimiittarnerinut katisimasarnissamut peqqussut maleruartariaqarpaat. (Epr. 10:24, 25) Ilaqutariit suleqatigiilluarunik piffissaalluartukkut ataatsimiigiartarsinnaapput, tamarmillu piareersarluartarsinnaallutillu peqataaffigisarsinnaavaat. Ilaqutariit tamarmik assigiinngitsuupput, kisianni qassinilluunniit qitornaqaraluarunik taakkulu qanoq ukioqaraluarpataluunniillu kristumiut uiusut, nuliaasut uppertut imaluunniit kisimiillutik pilersuisut ilaqutariit anersaakkut ataatsimoortarnerat siuarsarsinnaavaat. — Uss. 1:8.
2 Piareersarnissamut piffissamik immikkoortitsisarit: Ilaqutariit iluanni tamarmik ikioqatigiittariaqarput ataasiakkaat ataatsimiinnernut piareersarluarnissaannut. Ilaqutariit amerlasuut Napasuliaq Alapernaarsuiffik-mik ilanngutassiaq atuaqqissaaqatigiissutissaq piareersaqatigiissutigisarpaat. Ilaat ilagiit atuakkamik atuaqqissaaqatigiinnissaannut piareersaqatigiittarput imaluunniit sapaatip-akunneranut Biibilimik atuagassaq atuaqatigiissutigisarlugu. Siunertaa tassaavoq ataatsimiigiannginnermi pingaarnerit eqqaamanissaat. Taamaalillutik tamarmik tusakkatik iluaqutiginiassavaat, akinissaminnullu periarfissaqarsinnaallutik. — 1 Tim. 4:15.
3 Peqataanissamut pilersaarusiorit: Ilaqutariit tamarmik ataatsimiinnerni akisarnikkut neriugisamik nassuerutiginissaanut anguniagaqarsinnaapput. (Epr. 10:23) Ilaqutariit iluanni ikiorneqarnissaminik imaluunniit kajumissaarineqarnissaminik pisariaqartitsisoqarpa? Qanoq ikiuisoqarsinnaava? Teokratiimik Atuarfimmi ilanngunneqarsimasunut piareersarniarnerni sutigut ikiortariaqartoqarpa? Qatanngutit arnat amerlasuut uimik soqutiginninnerat nuannaarutigaat, assersuutigalugu assersuutilersuinissamik imaluunniit qanoq periaaseqarsinnaanermik isumassamik pissarsisissinnaammatigik. Angajoqqaat misigissanngillat meeqqamik pisassaat suliarisariaqarlugit. Taama misigigunik, meeqqat peqataaniarnerat naqisimasinnaavaat. Pitsaanerpaavoq meeqqat pisassaat piareersarnerini tusarnaarnerisigut ikioraanni. — Evf. 6:4.
4 Eqqortumik aaqqissuussineq: Meeqqat mikisuuneraniilli piffissaalluartukkut ataatsimiigiartarnissamut atisalersujaartarnissamullu ilinniartinneqarsinnaapput. Ilaqutariit illumi pisassanik tamanik ikioqatigiittariaqarput inortuinatillu kingusinaannginnerussagamik. — Atuakkami Ilaqutariittut pilluarneq isertugaateqarpoq-mi, quppernermi 112-imi aammalu Unge spørger — Svar der duer-imi quppernerni 316-17-ini siunnersuutit takukkit.
5 Angajoqqaat meeqqallu Josvap oqaasii eqqarsaatigisinnaavaat, taanna oqarami: „Uangali eqqarleriissortamalu [Jehova] kiffartuukkumavarput.“ Taamaattumik aalajangersimagitsi ataatsimiinnernut najuuttarnissassinnut peqataasarnissassinnullu ikioqatigiissallusi. — Jos. 24:15.