Jehovap aqqa nersornartoq naalannartiguk
1 Satanip angajoqqaavut siulliit ajortuliortikkamigit Guutip aqqa mitallerpaa. Diaavulup oqaatiginiarpaa Jehova Adamimut salluliortoq. (1 Mos. 3:1-5) Guutip aqqa siunertaminik eqqortitsisinnaanermut piginnaaneranut atassuteqarmat, Diaavulup pasilliinera ingasattumik mamarliineruvoq. Siunertani naammassiartuaartillugu Jehovap aqqi kanngunaataajarpaa ’aqqilu tassaaleqqullugu Naalannartoq’. — Jes. 63:12-14.
2 Uagut tassaavugut Jehovap ’aterminut ilannguttunik’ innuttassarsivigisai. (ap. sul. 15:14, 17) Tamatuma periarfissippaatigut aqqata illernarsisinneqarnissaanut qanoq kissaateqartiginitta ersersinnissaanut. Uagutsinnut Jehovap aqqa nersornangaartuuvoq, sunut ajunngitsunut tamanut, ilakkuminartunut, asanartunut, nallittuinernut naapertuilluartunullu tunngaveqarpoq. Guutip aqqata angingaassusianut tulluuttumik ataqqinningaarpugut. (Tus. 8:2; 99:3; 148:13) Qanoq iliornissatsinnut killinneqartariaqarpugut?
3 Guutip aqqata illernarsisinneqarnera: Guutip aqqa illernareersoq illernarnerulersinneqarsinnaanngilaq. Kisianni minguitsumik iluartumillu saqinitsigut oqaluussinitsigullu takutissinnaavarput Guutip aqqa unnersiutigissallugu pingaartikkipput. Pruffiitip kajumissaarutaa malissinnaavarput: „Qutsavigisiuk [Jehova], aqqa torlorfigisiuk, naammassisai inuiaqatigiinni ilisimaneqalersissigit, tusarliussiuk aqqa naalannangaartoq!“ (Jes. 12:4) Qanoq iliorluta?
4 Periarfissat tamaasa atorlugit inuit allat Jehovap aqqanik aqqatalu pingaaruteqassusianik oqaluttuuttarnerisugut. Torruutiinnarlugu torruutiinnarnaguluunnit, imaluunniit illumit-illumut, pisiniarfimmi, aqqusinerni telefonikkulluunniit oqaluusigaluaraangatta Jehova naalannartinneqartarpoq. Tusarumasunik naammattuuigaangatta piffissamik aalajangersumik taasaqarluta aggeqqikkumalluta isumaqatigissavavut Jehovalu pillugu annerusumik ajoqersorlugit. Tamatuma nassataraa isumaqatigiinnitta sapinngisamik eqqortinniarnissaat Bibilimillu atuaqqissaaqatigilernissaata angunissaa ilungersornitsigut nikallujuinnitsigullu. Nuannaarutigisinnaavarput ukiut tamaasa hundredetusintilikkuutaat Jehovap aqqa nersornartoq ilisaralugu ilinniartarmassuk, ataqqillugulu illernartilertarmassuk.
5 Uummaterput tamakkerlugu Guutip aqqa naalannartillugu iliuuseqarnitta ersarissumik takutippaa Satanip Edenip naatsiiviani akerleriissumik pilersitaani kina tapersersorneripput. Tassaavoq suliarisinnaasatta qutsinnersaralugulu ataqqinarnersaat. Suliamik tamatuminnga pingaartitsinerput takutitsigu Jehovap aqqa naalannartoq uummammik tamakkiisumik unnersiutigalugu. — 1 Isr. 29:13.